Sewese Meteikan en Iang Towehda Mihding kan
1 “Luhk kohwong aramas sohte lipilipil . . . me men iang towehda mihding kan.” Sangete ahnsou me pakair wet pwarada nan Zion’s Watch Tower en November 1880, Sounkadehdehn Siohwa kan kin ngoangki luhke aramas pwe irail en iang tuhpene ong mihding kan, wasao me kaweid en Paipel kin wiawi ie. (Kaudiahl 22:17) Iang towehda mihding pwukat kin wia kisehn atail kaudok mehlel.
2 E Kesempwal Kitail en Iang Towehda: Kitail kin alehdi kapai kan ahnsou me kitail kin miniminiong irail kan me kin iang towehda mihding kan en mwomwohdiso. Kitail kin sukuhliki oh karanih atail Koht, Siohwa. Nan mwomwohdiso, kitail kin tuhpene pwehn “ale kasukuhl sang rehn Siohwa.” (Aiseia 54:13) Sapwellime pwihn kin doadoahngki prokram en kaweid sang nan Paipel me kak sewese kitail en karanih Ih oh kihong kitail sawas pwe kitail en kak doadoahngki “kaweid koaros sang rehn Koht.” (Wiewia 20:27, New World Translation; Luk 12:42) Mihding kan kin kaiahne kitail pwehn kak kakoahiekkitailla ni atail pahn padahkiong aramas akan duwen Mahsen en Koht. Mehn kataman kan sang nan Paipel kin sewese kitail en wiahda nanpwung mwahu rehn aramas akan oh pil rehn Siohwa. Ma kitail pahn miniminiong irail me poakohng Koht, met pahn kakehlailih atail pwoson.—Rom 1:11, 12.
3 Luhke Aramas akan: Sang ahnsou me ke pahn tepida onop Paipel rehn aramas akan, e pahn mwahu en luhke irail ong mihding kan. Kihong irail doaropwe en luhk. Sewese irail en men iang towehda mihding kan ni ahmw pahn koasoia ire ieu me ke sukuhliki sang mihding me ahpwtehn nek oh koasoia mehkot me pahn kasalehda nan mihding me pahn wiawi. Kawehwehda dahme kin mihmi nan Kingdom Hall oh tehk ma e wehwehki iawasa Kingdom Hall mihmi ie oh iaduwen e pahn lel Kingdom Hall.
4 Ma aramaso sohte kin mwadang iang towehda, nantihong luhke ih en iang. Ehu ehu wihk, koasoia ekis dahme kin wiawi nan sapwellimen Siohwa pwihn. Doadoahngki brochure Doing God’s Will oh pil kasalehong ih video cassette me oaralap koasoia Jehovah’s Witnesses—The Organization Behind the Name pwehn kak sewse ih en wehwehki duwen sapwellimen Siohwa pwihn oh pil atail mihding kan. Kahre sounkalohk teikan pwehn iang uhk pwe aramaso pahn kak tuhwong irail oh wehwehki irail. Ahnsou me ke kin kapakap, kasalehda ahmw kalahngankihong Siohwa duwen sapwellime pwihn oh kasalehda me aramaso anahne miniminiong sapwellimen Siohwa pwihn.
5 Ken dehr pweiek ahnsou me ke kak sewese me kapw kan en iang towehda mihding kan. Ni arail kalahnganki Siohwa pahn kekeirada, re pahn mwekidki dahme re sukuhliki oh re pahn men wia kisehn sapwellimen Siohwa pwihn minimin.—1 Kor. 14:25.