Limpoak Kin Kamwekid Kitail en Kalohk
1 Nin duwen Sounkadehdehn Siohwa kan, pali laud en aramas akan kin wehwehki me kitail kin wia sounkalohk ngoang kei me kin kalohki Wehin Koht. (Madiu 24:14) Rahnwet, mie sounkalohk daulih rar pak weneu me kin kaukaule iang kalohk wasa koaros nan sampah; oh sounkalohk kapw kan kin ahnsou koaros iang kitail kalohk. Soangen nempe tohto kin kapatpene poahsoankihda sounkalohk depe me kin iang doadoahk en kalohk.
2 Dahme kin kamwekid kitail en men iang wia doadoahk apwal wet? Sohte me kin iding kitail en wia doadoahk wet oh sohte mwohni laud de daidel laud kin kohwong kitail ma kitail pahn wia doadoahk wet. Nin tepio, pali laud en kitail kin saloh nan doadoahk wet pwehki kitail pehm me kitail soakoahiek, oh likamwete pali laud en aramas sohte men rong. (Madiu 24:9) Aramas tohto sohte kin wehwehki dahme kin kamwekid kitail. Ahpw, mie kahrepe mwahu me kitail men nannanti.
3 Kehlen Limpoak: Sises kasalehda duwen kosonned me keieu kesempwal ahnsou me e mahsanih me kitail en ‘poakohng Kauno [“Siohwa,” New World Translation] nan kapehdomw unsek, ngenomw unsek, omw lamalam koaros unsek oh omw kehl unsek.’ (Mark 12:30) Atail limpoak ong Siohwa kin poahsoankihda atail pepehm loal en kalahnganki ihs Ih oh dahme E kin wia—Kaunen Lahng oh Sampah, Sounkapikpatail, me ‘uhdahn warohng sapwellimanki lingan, wahu, oh roson.’ (Kaudiahl 4:11) Sapwellime irair kan kin inenen kapwuriamwei.—Eksodus 34:6, 7.
4 Esehla oh poakohng Siohwa kin kamwekid kitail en mweidohng atail marain en sansalda mwohn aramas akan. (Madiu 5:16) Atail marain kin sansalda ahnsou me kitail kin kapinga ih mwohn aramas akan, kapinga ih oh sapwellime wiewia kan, oh kasansalehda duwen Wehin Koht. Duwehte tohnleng me pipihr nan wehwe, kitail kin weuwa “rongamwahu . . . me e pahn lohkihong tohn sampah kan, wehi koaros, kadaudok koaros, oh sahpw koaros.” (Kaudiahl 14:6) Atail limpoak me kin kamwekid kitail en kalohk ong aramas akan wasa koaros nan sampah.
5 Sampah kin kilangwong atail kalohk nin duwen “mehkot mwahl” me re sohte anahne rong. (1 Kor. 1:18) Aramas kin nantihong en kauhdi atail kalohk. Ahpw, atail limpoak lelepek kin kakehlailih kitail pwehn kalohk, duwehte me kin wiawiong wahnpoaron kan, kahrehda re kin koasoia: “Se sohte kak tokedihsang koasoakoasoia dahme pein kiht kilangehr oh rongehr. . . . Se uhdahn pahn peikiong Koht, a kaidehn aramas.” (Wiewia 4:20; 5:29) Doadoahk en kalohk kin laudla oh lella wasa koaros nan sampah mendahki uhwong.
6 Atail limpoak ong Siohwa kin rasehng kisiniei me lullul nan kapehdatail oh met kin kamwekid kitail en kalohkseli duwen sapwellimen Siohwa irair kan. (Ser. 20:9; 1 Pit. 2:9) Kitail pahn nantihong “lohkiong wehi koaros wiepen nin lime kan . . . pwehki wiepen nin lime lapalap akan”!—Aiseia 12:4, 5.