Ken Lel Mohngiong en Aramas me kin Onop Paipel Rehmw
1 Mwohn Sises ketidala nanleng, e padahkiong sapwellime tohnpadahk kan en “peikiong” mehkoaros me e kehkehlingkihong kitail en wia. (Madiu 28:19, 20) Ma emen pahn “peikiong” sapwellimen Krais kehkehlik kan, dahme e sukuhliki anahne lel mohngiongih. (Mel. 119:112) Iaduwen ke kak kamwekid mohngiong en emen me ke kin onop Paipel reh?
2 Kapakapki Sapwellimen Siohwa Kaweid: Ni mehlel, doadoahk en katohnpadahkih aramas akan kin wia sapwellimen Koht doadoahk. Eri, ma kitail men pweida nan doadoahk wet, kitail anahne mweidohng Ih en kapaiada atail doadoahk, kitail sohte pahn likih pein atail koahiek. (Wiewia 16:14; 1 Kor. 3:7) Ihme kahrehda, kitail anahne kapakapki sapwellimen Siohwa sawas pwehn kak sewese meteikan en sukuhliki padahk mehlel.—Aiseia 50:4.
3 Tehk Mwahu Dahme Aramas me Ke kin Onop Paipel Reh Kin Kamehlele: Ma kitail wehwehki dahme aramas kin kamehlele oh dahme kahrehda re kin kamehlele soahng pwukat, mehpwukat pahn kak sewese kitail en lel mohngiongarail. Dahme kahrehda aramaso kin perenki padahk kan me e kin kamehlele? Dahme kahrehda e uhdahn kamehlele me padahko mehlel? Atail wehwehki soahng pwukat pahn sewese kitail en doadoahngki atail loalokong ni atail pahn koasoi ong aramas akan.—Wiewia 17:22, 23.
4 Kawehwe Ni Ahl me Aramas Kak Wehwehki oh Kohsang Nan Pwuhk Sarawi: Aramaso anahne wehwehki padahk mehlel ma e pahn kamehlele oh mwekidki padahk mehlel. (Wiewia 17:24-31) Kitail anahne kasalehda mwahu duwen atail koapworopwor oh dahme kahrehda kitail kamehlele me e uhdahn pahn pweida. (1 Pit. 3:15) Ahpw, kitail en ahnsou koaros koasoia soahng pwukat koaros ni ahl me kadek oh kanengamah.
5 Doadoahngki Karasaras kan Ahnsou me Kitail Padahk: Ni ahnsou me kitail kin doadoahngki karasaras kan, e kin sewese aramaso en wehwehki duwen dahme kitail koasoia oh pil karasaras kan kin kamwekid pepehm akan en aramas akan. Karasaras kan kin kamwekid atail madamadau kan oh mohngiong akan. Sises kin kalapw doadoahngki karasaras kan. (Mark 4:33, 34) Ahpw, pwe karasaras en kamwekid aramas akan, e anahne konehng oaralapo me kitail koasoia, oh pil re anahne dokedoke mour en aramas akan me kitail kin onop Paipel rehrail.
6 Kasalehda Kamwahu kan me kin Kohsang Ale Padahk Mehlel: Aramas kin men ese duwen kamwahu kan me re pahn alehdi ma re pahn doadoahngki dahme re sukuhliki. Sewese aramaso en wehwehki duwen erpit me sansalda nan sapwellimen Pohl mahsen kan en 2 Timothy 3:14-17.
7 Ken dehr nsensuwedla ma ekei sohte kin mwekidki dahme ke kin koasoia ni ahnsou me ke kin kalohk ong irail. Kaidehn aramas koaros pahn mwekidki padahk mehlel. (Madiu 13:15) Ahpw, ekei aramas pahn mwekidki oh kamehlele padahk mehlel. (Wiewia 17:32-34) Eri, ken nantihong lel mohngiong en aramas akan ni ahmw pahn kasalehong irail Rongamwahu en Wehin Koht oh met pahn sewese irail en rong oh “peikiong” sapwellimen Sises kosonned akan.