‘Iaduwen Irail Pahn Rong?’
1 Sises mahsanih ni sansal: “Pwe Rongamwahu undahn pahn lohkseli mahs nan wehi koaros.” (Mark 13:10) Mendahki kitail kin doadoahk laud nan atail doadoahk en kalohk, miehte aramas rar rar kei me saikinte pein rong duwen Rongamwahu. Ekei wehi kan kin keinapwih atail doadoahk en kalohk. Nan ekei wehi kan, tohn wehi kan kin mwadang tohtohla. Ihme kahrehda, kitail anahne wia peidek wet: ‘iaduwen irail pahn rong?’—Rom 10:14.
2 Likih Siohwa: Kitail anahne tamataman me Siohwa kin mwahngih mohngiong en aramas koaros. Sohte lipilipil irair dah me aramas emen mihmi loale, ma e kin rapahki dahme mehlel duwen Koht, e pahn kak diarada.—1 Kron. 28:9.
3 Eipraam kin pwunodki duwen mour en tohn Sodom oh Komora. Ahpw, Koht kamehleleiong ih me E sohte pahn kasohrala Sodom ma mie aramas pwung ehk mihmi loale. (Sen. 18:20, 23, 25, 32) Siohwa sohte kin kemehla aramas pwung kan ahnsou me E kin kemehla aramas suwed kan, oh met sansal sang nan ahnsou me E kapitala Lohd oh nah serepein kan.—2 Pet. 2:6-9.
4 Mie ahnsou me Elaisa lemeleme me ih kelepw kin papah Koht mehlel. Ahpw, Siohwa kamehleleiong ih me e sohte kelepw oh doadoahk me e tepida wia pahn nek. (1 Nan. 19:14-18) Iaduwen atail irair kan en rahnwet?
5 Soupisengki Doadoahk en Koht: Ia uwen laud doadoahk me luhwe nan doadoahk en kalohk, kitail sehse. Siohwa kin apwalih doadoahk wet oh E kin ketin doadoahngki sapwellime tohnleng kan en pil iang apwalihada doadoahk wet. (Kaudiahl 14:6, 7) Ih me pahn koasoanehdi iahd doadoahk en kalohk ong wehi koaros pahn nek. Ma Siohwa kin ketin koasoanehdi, Ih me pahn kak kahrehong Rongamwahu en Wehio en wiawi ni ahl kan me kitail sohte kak medewehla pwe aramas tohto en kak “rong Rongamwahuwo oh kamehlele.” (Wiewia 15:7, New World Translation) Dahme Siohwa pahn ketin wia pahn kasalehda duwen soangen Koht dah Ih—Koht me kin sapwellimaniki limpoak, erpit oh kopwungpwung.
6 E kin wia pwais kaselel ong kitail en wia mwekid kan me pwung ong kupwuren Siohwa oh wia uwen me kitail kak en sewese aramas koaros en rong Rongamwahu.—1 Kor. 9:16.