Nantihong Rapahki Mahs Wehio
1 Rapahki mahs Wehin Koht oh nantihong en wia met ahnsou koaros sohte kin mengei ahnsou me kitail kin lelohng kahpwal en mwohni oh pil kahpwal teikan. Iaduwen kitail kak nantihong rapahki mahs Wehin Koht ahnsou me kahpwal kan kin pwarada? Dahme pahn wiawi ma emen ndaiong kitail en iang doadoahk ehu ahpw doadoahko pahn kauwehla atail iang towehda mihding de doadoahko pahn kauwehla atail kalohk? Kitail pahn kihong Wehin Koht en keriau nan atail mour?
2 Pwoson Kehlail Anahn: Ni ahnsou me soangen irair akan kin pwarada oh mie mehkot me kin kak kauwehla atail pwoson, kitail anahne tamataman duwen utuht oh sawas me Siohwa oh Sises inoukihong kitail ma kitail pahn rapahki mahs Wehio. (Mel. 37:25; Madiu 6:31-34) Kasongosong kan sang sampah oh kahpwal teikan kak kauwehla atail rapahki mahs Wehin Koht nan atail mour. Ekei kin mweidohng koapworopwor me irail pahn ale daidel laud nan arail wasahn doadoahk de naineki mwohni laud en keieu nan arail mour. Ahpw, duwehte Pohl, kitail anahne kasawihada mahs dahme kitail pahn kihong en keieu kesempwal nan atail mour.—Pilipai 3:7, 8.
3 Anahne Kamwahuwihala Wasakis Nan Atail Mour? Emen sounkalohk koasoia: “I kin keieu nsenohki ahi doadoahk—I kin uhdahn perenki dahme I kin wia. I pehm me I kakete wia emen Sounkadehde ahpw pil ni ahnsowohte kihong pali laud en ahi ahnsou oh mour ong ahi doadoahk.” Ahpw, ni mehlel, e wehwehki me e kak kalaudehla ah ahnsoun papah Siohwa. Mwuhr, e kesehla ah doadoahk pwehki e wehwehki me ah doadoahk kin kauwehla ah kekeirada ni pali ngehn. Ni ahnsou me e pehm me e kin kihong uwen me e kak ong doadoahk en Wehio, e koasoia: “Ni ahnsou wet, I pehm me ahi mour me mwahu mwohn silangin Siohwa, oh ih me keieu kesempwal.”
4 Kitail kak pil kapinga brother oh sister tohto pwe re kin tounmeteiki arail mour oh kesehla arail doadoahk pweimwahu kan de soahng kan me re kakete ale mwohni laud sang dahme mie, oh kihsang nan arail mour soahng soh-katapan kan oh iangala doadoahk en Regular Pioneer, misineri, Bethel de soahng pwukat pwe kaukaule papah Siohwa. Ministerial Servant kan oh elder kan me pwulopwul oh kiripw me iang “Ministerial Training School” wia met oh met re kin ahneki pwais kaselel en papah Siohwa. Re kin kahlemengih mehn kahlemeng mwahu en Pohl ni arail kin itarki dahme re uhdahn anahne ong arail anahn en paliwar.—1 Kor. 11:1; 1 Tim. 6:6-8; Ipru 13:5.
5 Mendahki irail nan sampah kin kouruhrki atail mour, Siohwa kin kupwurki atail mour en tounmetei. (1 Kor. 1:26-31) E soh kin kangoange kitail me Siohwa pahn doadoahngki kitail ni uwen me E kupwurki oh sewese kitail en wia sapwellime doadoahk? Atail ahnsou mwahu me kitail ahneki met pwehn pakairki duwen Wehin Koht sohla pahn pwurehng wiawi. Eri, kitail en doadoahngki atail ahnsou met en nantihong rapahki mahs Wehio nan atail mour.