Iaduwen Atail Kin Medemedewehki Duwen Aramas Akan Nin Doken Rahnen Siohwa Ah Kerendohr?
“Siohwa sohte kin ketin pwapwand ni wiepen sapwellime inou, . . . ahpw e kin ketin kanengamahiong kumwail, pwehki eh sohte ketin kupwurki emen en lekdekla pwe e ketin kupwurki koaros en wiliakapwala oh sohpeisang nan diparail kan.”—2 PITER 3:9.
1, 2. (a) Iaduwen Siohwa kin kilang ong aramas akan nan rahnwet? (b) Mehnia peidek kan kitail kak pein idek rehtail?
SAPWELLIMEN Siohwa ladu kan kin ahneki pwukoa ehu en “katohnpadahkki aramas akan me kin kohsang wehi kan koaros.” (Madiu 28:19, NW) Ni atail kin kapwaiada pwukoa wet oh awiawih “rahn lapalap en Siohwa,” kitail anahne kahlemengih Siohwa ni ah kin kilangwong aramas. (Sepanaia 1:14) Eri, iaduwen Siohwa kin medemedeweki duwen aramas akan? Wahnpoaron Piter mahsanih: “Siohwa sohte kin ketin pwapwand ni wiepen sapwellime inou, duwen ekei ar kin lemeleme. Ahpw e kin ketin kanengamahiong kumwail, pwehki eh sohte ketin kupwurki emen en lekdekla, pwe e ketin kupwurki koaros en wiliakapwala oh sohpeisang nan diparail kan.” (2 Piter 3:9) Koht kin kilangwong aramas akan nin duwen emenemen me kak koluhla oh wiliakapwala. Koht “kin ketin kupwurki aramas koaros en ale komourparail oh marainkihla me mehlel.” (1 Timoty 2:4) Siohwa kin pil kupwurperenki ni ahnsou me “aramas suwed men en wiliakapwasang eh suwed pwe en mour”!—Esekiel 33:11.
2 Kitail kin ahneki soangen madamadau ohte ong aramas akan me duwehte sapwellimen Koht kupwur? Me rasehng Ih, kitail en kilangwong emenemen nan keinek kan oh wehi me e kakete wiahla “sihpw en nan sapwellime mohs”? (Melkahka 100:3; Wiewia 10:34, 35) Kitail pahn sukuhliki duwen mehn karasepe riau me pahn kasalehda kesempwalpen kolokol madamadau me duwehte sapwellimen Koht. Ong nan irair riau pwukat, kamakamalahn aramas akan pahn wiawi ni ahnsou keren, oh sapwellimen Siohwa aramas akan me wehwehkier me kamakam wet kerendohr. Karasaras pwukat kin wia mehkot kesempwal ni atail kin kasikasik sapwellimen Siohwa rahn lapalap.
Eipraam kin Ahneki Madamadau me Rasehng Sapwellimen Siohwa Kupwur
3. Iaduwen Siohwa kin kilang ong towe kan en Sodom oh Komora?
3 Keieun karasaras kin pid Eipraam, sahm lelepeko, oh kahnimw suwed kan en Sodom oh Komora. Ni ahnsou me Siohwa rong “ngilen kedip ong Sodom oh Komora,” e sohte mwadangete kasorehla kahnimw pwukat iangahki ara towe kan. E tepida kadehdehda ma met kin mehlel de soh. (Senesis 18:20, 21) E kadaralahng Sodom, tohnleng riemen, oh ira pweidi nan imwen ohl pwung emen, Lohd. Ni pwong me tohnleng ko pwarada, “ohlen Sodom kan ahpw . . . kapilpene ihmwo. Ohl koaros en kahnimwo, me pwulopwul me mah kan,” oh irail koaros nsenkihda wiahda dihp rehn tohnleng pwukat. E sansal me tohn kahnimw akan kin kasalehda sang ni arail wiewia kan me iei irail konehng en kamakamala. Ahpw, tohnleng ko padahkiong Lohd: “Mie kisehmw wasaht—noumw pwutak kan, serepein kan, oh en noumw kan ar pwoud kan, de kisehmw me iang koukousoan nan kahnimwet—wairailsang wasaht!” Siohwa ritingihda ahl ong kamourala ekei tohn kahnimwo, ahpw ni imwio, ihte Lohd oh nah serepein riemen me pitsang.—Senesis 19:4, 5, 12, 16, 23-26.
4, 5. Dahme kahrehda Eipraam peki rehn Siohwa pwen doarehla tohn Sodom kan, oh ah madamadau ong aramas akan kin pahrekiong sapwellimen Siohwa kupwur kan?
4 Eri, kitail pahn sukuhliki ni ahnsoun Siohwa ketin kasansalehda sapwellime kupwur kan ni ahnsou e tehk kahnimw en Sodom oh Komora. Ih ahnsou me Eipraam wia pekipek wet: “Ma mie aramas sohte dipe limehk nan kahnimwo, komw pahn ketin kamwomwala kahnimwo pwon? Komw sohte pahn kupwur mahk oh sohte ketin kamwomwala kahnimwo pwehki me lelepek limehko? Eri, uhdahn soh! Komw sohte kak kemehla me dipan akan iangahki me sohte dipe kan. Met sohte kak wiawi rehmwi. Pwe ma met pahn pweida, me sohte dipe kan pahn ale lokolok duwehte me dipan akan. Met sohte kak wiawi. Sounkopwung en sampah pwon uhdahn pahn kin pwung ni sapwellime wiewia kan.” Pak riau, Eipraam doadoahngki lokaia wet “met sohte kak wiawi rehmwi.” Pwehki sang dahme Eipraam kilangehr mahs, e kamehlele me Siohwa sohte kak kemehla aramas suwed kan iangahki aramas pwung kan. Ni ahnsou me Siohwa mahsanih me e sohte pahn kamwomwala Sodom ma e pahn diar nan kahnimwo “aramas limehk me sohte dipe,” Eipraam tepida ekis ekis katikitikihala nempe en aramas pwung kan nan kahnimwo lel aramas ehk.—Senesis 18:22-33.
5 Siohwa pahn karonge Eipraam ma ah pekipek kan sohte kin pahrekiong sapwellime kupwur kan? E sansal me e sohte pahn. Pwehki Eipraam me wia “Kompoakepahn Siohwa,” e kin wehwehki sapwellimen Siohwa kupwur kan. (Seims 2:23) Ni ahnsou me Siohwa sohpeiong Sodom oh Komora, e kupwurki en tehk ahn Eipraam pekipek kan. Dahme kahrehda? Pwehki Samatail nanleng “sohte ketin kupwurki emen en lekidekla, pwe E ketin kupwurki koaros en wiliakapwala oh sohpeisang nan diparail kan.”
Ahn Sona Madamadau Duwen Aramas akan Weksang Eipraam
6. Iaduwen tohn kahnimw Ninipe kan mwekidkihda mahsen kan me Sona pakairki?
6 Kitail pahn koasoiada duwen karasaras keriau—e kin pid Sona. Kahnimwo me pahn kamwomwala iei Ninipe. Soukohp Sona aleier pwukoa ehu en pakairki me suwed en kahnimwo ‘Siohwa kin ketin rong duwen suwed pwukat.’ (Sona 1:2, NW) Ninipe iei kahnimw laud ehu, “me aramas pahn sapasapalki erein rahn silu ahpw lel apali kahnimwo.” Ni ahnsou me Sona peikiong Koht oh kohla Ninipe, e tepida pakairki: “Mwurin rahn pahisek kahnimw Ninipe pahn mwomwla!” Oh irail “tohn kahnimw en Ninipe eri pwosonla mahsen en Koht. Re ahpw pwungkihda aramas koaros en kaisihsol. Eri, sang me lapalap akan lel me tikitik kan, irail koaros ahpw likawihada likoun nsensuwed, pwe en kasalehda arail koluhla.” Nanmwarki en Ninipe pil koluhla.
7. Iaduwen kupwuren Siohwa ong mehn Ninipe kan me koluhkihla diparail kan?
7 Arail kin mwekidki pakair wet kin weksang tohn kanihmw en Sodom akan! Iaduwen kupwuren Siohwa ong mehn Ninipe kan me koluhkihla diparail kan? Sona 3:10 mahsanih: “E [Koht] ketin mwahngihada ar weksang arail sapwung kan. Koht eri ketin [koluhkilahr mahsanih ong irail duwen kahpwal me e pahn ketin ketikihong irail, NW] oh e sohte ketikihong irail apwal laud me e ketin kaunopadahng irail.” Siohwa “koluhkilahr” kin wehwehki me e kin ketin wekidala sapwellime koasondi kan ong mehn Ninipe kan ni ahr kesehla ahr wiewia suwed akan. Sapwellimen Koht koasoandi kan sohte wekila, ahpw Siohwa me kawekila sapwellime pilipil kan duwen mehn Ninipe kan ni ahnsou me irail koluhla.—Malakai 3:6.
8. Dahme kahrehda Sona kin pahtoula?
8 Ni ahnsou me Sona wehwehkihda me Ninipe sohlahr pahn kamakamala, e kin anehkihda madamadau me duwehte sapwellimen Siohwa? Soh, pwe e mahsanih: “Sona inenen nsensuwedkihla irair wet, e ahpw lingeringerda.” Dahme Sona pil wia? Pwuhk Sarawi mahsanih: “Maing Kauno, kaidehn iei met me I patohwanohng komwi mwohn ei mweselsang nan ei wasa, me wiawiheret? Ihme kahrehda ei nantihong I en tangalahng [Tarshish, NW] I ese me komwi iei Koht kalahngan oh limpoak; ahnsou koaros komwi kin ketin kanengamah oh kalahngan, oh ahnsou koaros komwi kin ketin kak wekidala kupwuromwi oh sohla kaloke aramas.’ ” (Sona 4:1, 2) Sona kin ese duwen sapwellimen Siohwa irair akan. Ahpw ni ahnsowo, soukohpo kin pahtoula oh sohte kin kilang ong tohn Ninipe koluhla kan duwehte Koht kin kilang ong irail.
9, 10. (a) Mehn kasukuhl dah me Siohwa ketikihong Sona? (b) Dahme kitail pahn kak lemelemeki me Sona ahnekihda sapwellime Siohwa kupwur ong mehn Ninipe kan?
9 Sona mweselsang Ninipe, e ahpw wiahda eh wasahn rukusang ketipin oh mwohndiong pahn mweteh “oh awiawih dahme pahn wiahwihong Ninipe.” Siohwa ahpw ketin kawosehda tuhke pwoat pwe Sona en mih pahn mwete. Ahpw mandahn rahno, tuhkeo ahpw mehla. Ni ahnsou me Sona lingeringerki tuhkeo, Siohwa ahpw ketin mahsanih: “Ke sohte wiahiong tuhke pwoatet mehkot, ke sohte pil kakairada; ahpw ke poakehla! . . . Eri, ia uwen ei sohte pahn poakehla tohn kahnimw wet Ninipe, kahnimw kalaimwun wet me [ohl akan me sohte ese wekpeseng en pali maun sang pali meing] irail akan me tohtohsang meh 120,000, oh pil iangahki mahn tohtohie?” (Sona 4:5-11) Mehn kasukuhl mwahu ehu ong Sona en sewese ih en wehwehkihla iaduwen Siohwa kin medemedewehki duwen aramas akan!
10 E sohte ntingdi nan Pwuhk Sarawi, duwen dahme Sona sapengki sapwellimen Koht mahsen duwen Koht ah ketin poakehla tohn kahnimw en Ninipe. Ahpw, e sansal me soukohp menet kin kawekila ah madamadau duwen mehn Ninipe kan me kin koluhla. Kitail kak nda met, pwe Siohwa kin ketin doadoahngki Sona en ntingihidi dahme wiawier nan Pwuhk Sarawi.
Mehnia Madamadau Ke Kin Ahneki?
11. Ma Eipraam kin wie momour rahnwet, ia ah madamadau ong aramas akan nin sampah wet?
11 Rahnwet, kitail pahn kilang pil ehu kamakam—me pahn pid koasondi suwed wet me pahn wiawi nan sapwellimen Siohwa rahn lapalap. (Luk 17:26-30; Kalesia 1:4; 2 Piter 3:10) Ma Eipraam kin wie momour ni ahnsouwet, soahngen madamadau dahieu me e pahn ahneki ong aramas akan nin sampah wet me pahn kereniong kamakamala? E pahn nsenohki irail aramas akan me saikinte rong duwen “Rongamwahu en Wehio.” (Madiu 24:14) Eipraam kin pwurpwurehng peki rehn Koht duwen aramas pwung kan me kin mih nan Sodom. Kitail kin nsenohki aramas akan me pahn kak soikala wiewiahn sampah wet me Sehdan kin kaunda ma irail pahn sukuhliki en koluhla oh papah Koht?—1 Sohn 5:19; Kaudiahl 18:2-4.
12. Dahme kahrehda e kin mengei en alehda madamadau en Sona ong aramas akan me kitail kin tuhwong nan kalohk, oh dahme kitail kak wia?
12 E konehng kitail en kasikasik imwilahn suwed akan. (Apakuk 1:2, 3) Ahpw, inenen mengei ong kitail en ahneki madamadau ieu me Sona kin ahneki, e sohte kin nsenohki aramas akan edetehn irail pahn kak koluhla. Keieu ma kitail kin kalapw tuhwong aramas akan me sohte kin perenki rong, de irail kin uhwong kitail, de men akamai ong kitail ni ahnsou me kitail kin kohla ni imwarail kan pwen kalohki Rongamwahu en Wehio. Met pahn kak kahrehong kitail en sohlahr nohn nsenohki aramas akan me Siohwa pahn ketin doarehla sang koasoandi suwed wet. (Rom 2:4) Ma kitail kin ni mehlel tehk pein atail madamadau kan, oh kitail diarada me kitail kin ahneki madamadau me Sona kin ahneki nin tepio ong mehn Ninipe kan, kitail kak kapakapki pwen sewese kitail en kawukihla atail madamadau pwen kak pahrekiong madamadau en Siohwa.
13. Dahme kahrehda kitail kak nda me Siohwa kin nsenohki aramas akan rahnwet?
13 Siohwa kin nsenohki aramas akan me saikinte papah Ih, oh e kin ketin karonge pekipek kan en sapwellime aramas inouda kan. (Madiu 10:11) Karasepe ieu, e pahn ketin sapeng arail kapakap kan oh “e pahn ketin kahrehong kopwungpwung en pweida.” (Luk 18:7, 8) Oh pil, Siohwa pahn kapwaiada sapwellime inou oh kupwur kan koaros ni pein sapwellime ahnsou. (Apakuk 2:3) E pil pahn kihsang sampah wet suwed kan koaros, duwehte ni ahnsou me e kasorehla Ninipe mwurin towe kan pwurehng wiahda suwed akan.—Nahum 3:5-7.
14. Dahme kitail anahne wia ni atail kin awihawih sapwellimen Siohwa rahn lapalap?
14 Lao lel koasondi suwed wet pahn sohrala ni sapwellimen Siohwa rahn lapalap, kitail pahn kanengamah awiawih oh soupisengki kapwaiada sapwellime kupwur kan? Kitail sehse ni oaretik erei dah kitail pahn wia doadoahk en kalohk mwohn rahn en Siohwa ah pahn leledo, ahpw kitail kin ese me rongamwahu en Wehio pahn lohkiseli wasa koaros nin sampah nin duwen Koht ah kin ketin kupwurki, a mwuri imwin sampah ahpw pahn kohdo. Oh kitail anahne en nsenohki “dipwisou kesempwal kan” me saikinte kapedelongohdo nin doken Siohwa ah pahn ketin kadirekihla sapwellime tehnpaso lingan.—Akkai 2:7.
Atail Madamadau kan kin Sansalkihda Atail Wiewia kan
15. Dahme pahn kak kalaudehla atail kalahngan ong doadoahk en kalohk?
15 Mwein kitail kin kousoan nan kousapw ehu me aramas tohto sohte kin perenki rong, oh kitail sohte kin mihla nan irair ehu me kin mweidong kitail en uhd keseula nan pil ehu sahpw me anahne sounkalohk kan. Ahpw ma mie ihte aramas ehk nan atail wasahn kalohk me pahn pedelong nan padahk mehlel mwohn imwin sampah, kitail kin ahneki madamadau ehu me mie katepe en rapahki aramas pwukat? Sises “poakpoake” pokon kan “ar pwunod akan oh sohte epwelparail, pwe re rasehng sihpw kei me sohte silepahr.” (Madiu 9:36) Ni atail kin onop Pwuhk Sarawi oh wadek mwahu artikel kan me mih nan Watchtower oh Awake!, kitail kak kalaudehla atail kin wehwehki duwen kahpwal kan en sampah wet. Met pahn kak kalaudehla atail kalahngan en kesempwaliki kalohki Rongamwahu. Oh pil, atail kin kalahnganki doadoahngki sawaspen Pwuhk Sarawi me pwihn en “ladu oh lelepek” kin ketkihong kitail pil pahn kak sewese kitail en koahiekla wia atail doadoahk en kalohk nan wasahn kalohk kan me kitail kin kalapw pwurala rehn aramas akan.—Madiu 24:45-47; 2 Timoty 3:14-17.
16. Dahme kitail kak wia pwen atail doadoahk en kalohk en pweida?
16 Atail kin nsenohki aramas akan me ele mwein pahn mwekidki Rongamwahu ehu rahn, kin kamwekid kitail en kawekila pein atail ahnsou ong kalohk oh pil song soangsoahngen tepin koasoia kan me pahn kahrehong tohnihmw akan en perenki rong. Aramas tohto sohte kin mihmi nan imwarail kan ni ahnsou me kitail kin kalohk? Ma ih duwen, kitail pahn kak pwurehng koasonehdi atail ahnsou oh wasa kan me kitail pahn kalohk pwen pweida mwahu. Sounlaid akan kin kohla laid ni ahnsou me re kak koledi mwahmw akan. Kitail kak alasang irail ni atail kin wia atail doadoahk en laid ni pali ngehn? (Mark 1:16-18) Dahme kitail soh pahn song kalohk ni soutik kan oh doadoahngki telephone kan, wasa me kosonned en sahpw kin mweidong? Ekei sounkalohk kan kin diarada ni karasaras ‘wasahn laid’ mwahu kan ni ahr kin kalohk nan wasahn peidi sidohsa kan, oh wasa kan me soun diraip truck kan kin kommoal, wasahn netkihla kas, oh ni sidohwa kan. Atail kin kasalehda madamadau me Eipraam kin kasalehda ong aramas akan pil kin sansalda ni ahnsou me kitail kin nantihong en kalohk ong aramas teikan sohte lipilipil ahnsou.
17. Iaduwen kitail kak kangoange misineri kan oh pil meteikan me kin papah Siohwa nan sahpw liki kan?
17 Aramas rar kei saikinte rong duwen Rongamwahu en Wehio. Likin atail doadoahk en kalohk, kitail kak kasalehda me kitail kin nsenohki aramas pwukat mendahki pein kitail sohte kak kohkohsang atail wasahn kousoan akan oh kohla nan sahpw teikan pwen kalohk? Iaduwen—kitail kin ese ekei misineri kan de sounkalohk kaukaule kan me mih nan sahpw doh kan? Ma kitail kin ese irail, e pahn mwahu ma kitail pahn nting ong irail kisinlikou kan me kin kasalehda atail kin kalahnganki doadoahk me irail kin wia. Iaduwen atail kin wia met pahn kak kasalehda atail kin nsenohki aramas akan? Atail kisin likou kangoang kan oh kaping kan pahn kak kangoange misineri kan en mihmihte nan wasa me irail kin kalohk ie, oh irail pahn kak sewese aramas tohto en esehla padahk mehlel. (Sounkopwung 11:40) Kitail pil kak kapakapki misineri kan oh irail aramas akan me kin perenki sukuhliki duwen padahk mehlel nan sahpw teikan. (Episos 6:18-20) Pil ehu ahl en kasalehda atail kin nsenohki aramas teikan, iei sang ni atail kin kihda atail sawas en mwohni ong doadoahk me Sounkadehdehn Siohwa kan kin wia nin sampah pwon.—2 Korint 8:13, 14; 9:6, 7.
Ke Pahn Kak Keseula Nan Sahpw Liki kan?
18. Dahme ekei Kristian akan wia pwen utungada doadoahk en Weho nan wehi me irail kin kousoanla loale?
18 Irail akan me keseula nan sahpw akan me anahnparail kin laud re kin ale kapai laud pwehki re kin tohnmeteikihla arail ahnsou oh nsenamwahu en mihmihte nan pein sapwarail. Sounkadehdehn Siohwa teikan me kin mihmihte nan pein sapwarail kan, irail kin sukuhliki lokaia tohrohr ehu pwen kin sewese pali ngehn en aramas akan me kin seiloakdohsang sahpw teikan. Aramas pwukat me kin nannanti wia met kin ale kapai laud. Karasepe ieu, Sounkadehde isimen me kin sewese mehn China kan nan kahnimw en Texas, U.S.A., kasamwo mehn China 114 me iang irail Saken Soutik en Kauno nan pahr 2001. Aramas akan me kin sewese pwihn en aramas pwukat kin diarada me met ahnsoun dolungada wahn sahpw akan.—Madiu 9:37, 38.
19. Dahme konehng ken wia ma ke kin medemedewe en wia doadoahk en kalohki Wehio nan sahpw ehu me sohte kin doadoahngki omw lokaia Wehio?
19 Ele kowe oh ahmw peneinei pehm me kumwail kak keseula nan wasa ehu me anahn en kalohk en Wehio kin mehlel. Ahpw, elen loalokong ken “mwohndi mahs oh medemedewe uwen pweine.” (Luk 14:28) Keieu ma emen kin medemedewe en keseula nan sahpw ehu me aramas kin doadoahngki lokaia me weksang ah. Eri, emen me kin medemedewe en wia met pahn kak pein idek reh peidek pwukat: ‘I pahn kak apwalihada pein ai peneinei? I kak alehdi ehu visa me konehng oh pwung? I esehier lokaia en sahpwo, de I kin perenki sukuhliki arail lokaia? I medemedeweher duwen irair en sahpwo (climate) oh pil duwen arail tiahk kan? I kak “wia sawas laud” ahpw kaidehn katoutouwiahla iengetail pwoson akan nan sahpwo?’ (Kolose 4:10, 11) Pwen esehla ma sahpw ke pilahn en kohla ia anahne sawas de soh, e pahn konehng en ntinglahng Branch Ohpis en Sounkadehdehn Siohwa kan me kin apwahpwalih doadoahk en kalohk nan wasao.a
20. Iaduwen Kristian pwulopwul men ah kihda ah sawas ong ienge tohnkaudok akan oh pil meteikan nan sahpw ehu me tohrohrasang ah?
20 Emen Kristian me kin iang sewese wiahda Kingdom Hall kan nan Sapahn kin rong me mie anahn ehu ong tohndoadoahk koahiek kan en kawada wasahn kaudok nan sahpw en Paraguay. Pwehki e pwulopwul kehlail oh kiripw, e keseula nan sahpwo oh ih kelepw me doadoahk full-time erein sounpwong waluh ong wiahda Kingdom Hall. Erein ah kin mihmih wasao, e sukuhliki lokaian Spain oh onop Pwuhk Sarawi rehn aramas akan. E kin kilang duwen nan sahpwo me sounkalohk kan en Wehio me malaulau. Edetehn e pwurala Sapan, sohte pwand, e pwurodo Paraguay oh sewese aramas akan en iang towehda mihding kan nan Kingdom Hall me e iang kauwada.
21. Dahme kitail anahne keieu nsenoki oh soahngen madamadau dahieu kitail anahne ahneki ni atail kin awiawih sapwellimen Siohwa rahn lapalapo?
21 Koht pahn apwalih doadoahk en kalohk pwen pahrekiong sapwellime kupwur kan. Rahnwet, e kin kamwadangala kaimwiseklahn rahk ni pali ngehn. (Aiseia 60:22) Ni atail kin awiawih Rahnen Siohwa, kitail en ngoangki iang doadoahk en rahket oh kilangong aramas akan nin duwen atail Koht limpoak kin kilangwong irail.
[Nting tikitik me mi pahs]
a E sohte pahn mwahu ong uhk ma ke pahn keseula nan wehi ehu me koperment kan kin keinapwihsang irail en wia doadoahk en kalohk. Ma ke pahn kohla nan soangen sahpw pwukat, ele mwein ke pahn kakete kerempwa doadoahk en sounkalohk kan en Wehio me kin ni kanahieng wia arail doadoahk en kalohk mendahki soahngen irair apwal akan.
Ke Tamanda?
• Ni atail kin awiawih sapwellimen Siohwa rahn, iaduwen kitail anahne kilang ong aramas akan?
• Ia madamadau en Eipraam ong irail aramas pwung kan me kin momour nan kahnimwen Sodom?
• Iaduwen Sona kilangong tohn Ninipe koluhla kan?
• Iaduwen kitail kak kasalehda me kitail kin kahlemengih Siohwa ni ah kin kilang ong aramas akan me saikinte rong duwen Rongamwahu?
[Kilel nan Pali 12]
Ahn Eipraam madamadau ong aramas kin duwehte sapwellimen Siohwa
[Kilel nan Pali 13]
Ni ahnsou mwuhr, Sona kin kahlemengih Siohwa ni ah kin medemedewehki irail mehn Ninipe kan me koluhla
[Kilel nan Pali 14]
Nsenohki aramas akan kin kamwekid kitail en medemedewe soangsoangen ahnsou oh ahl dah me pahn mwahu en kalohki Rongamwahu ong aramas akan