Sonah oh Mwahmw Kalaimwun

KILANG ohlo nan pihlo. E lelehr apwal, kaidehn? Mwahmwo pahn kangala ih! Ke ese ihs ohlo? Ede Sonah. Kitail pahn kilang dahme kahrehda e lelohng nan soahngen apwal duwehte met.

Sonah emen soukohp en Siohwa. Sohte werei mwehrin soukohp Elaisa mehla Siohwa padahkiong Sonah: ‘Kohlahng kahnihmw laud en Ninepah. Suwed en aramas kan inenen laud, oh I men ken kohla oh padahkiong irail duen met.’

Ahpw Sonah sohte men kohla. Ih eri douda pohn apwoat sohp me kohkohlahng ekis wasa tohrohr sang Ninepah. Siohwa sohte perenki me Sonah wia pwe e tang. Ih eri kahreong ehu melimel en kohda. Melimelo uhdahn kehlail, sohpo kereniong kihrla. Seilor kan me mi pohn sohpo masakada kowahlap, irail ahpw likweriong arail koht akan peki sawas.

Kadekadeo Sonah padahkiong irail: ‘I kin kaudokiong Siohwa, Koht me ketin wiahda lahng oh sampah. Oh I tangwei sang me Siohwa mahsanih ong ie en wia.’ Seilor ko eri idek: ‘Dahme se pahn wiaiong uhk pwe melimel wet en uhdi?’

‘Kaseiehla nan madau, oh sehd pil pahn pwurehng meleileidi,’ Sonah indaiong irail. Seilor ko sohte men wia met, ahpw melimelo kin wia susuwedla ansou koaros, irail eri koskihla Sonah nan madau. Ansouohte melimelo uhdi, oh madau pwurehng meleileidi.

Ni en Sonah kikihrdi nan pihlo, emen lapalahn mwahmw kadalehla ih. Ahpw e sohte mehla. Rahn siluh oh pwong siluh e mihmi nan kapehd en mwahmwo. Sonah uhdahn kolukihla ah sohte peikiong Siohwa oh kohla Ninepah. Ke ese dahme e wia met?

Sonah kapakap ong Siohwa peki sawas. Siohwa eri kahreong mwahmwo en mmwuskihla Sonah pohn sahpw madakeng. Mwehrin mwo Sonah eri kohla Ninepah. Kaidehn met kin padahkiong kitail me e inenen kesempwal kitail en wia me Siohwa mahsanih?