Alasang Soukohp akan—Sona
1. Soangen irair mwahu dah kan me Sona ahneki?
1 Dahme ke tamanda ni omw kin medewe duwen soukohp Sona? Ekei kin wiahki me e masepwehk de sohte nsenohki aramas. Ahpw, e kin kasalehda mwahu aktikitik, eimah oh madamadau en tounmetei. Ia duwen atail kak “alasang” ahn Sona irair mwahu kan?—Seims 5:10.
2. Ia duwen atail kak alasang ahn Sona aktikitik?
2 Aktikitik: Nin tapio, Sona tangala wasa me weksang wasa me Siohwa ketin koasoanehdi en kohla ie. Met sohte kapwuriamwei pwehki mehn Asiria kan kin lemei oh Ninipe kin kahdaneki “kahnimw en kamaramas.” (Nah. 3:1-3) Ahpw, Siohwa ketin panawih Sona, oh e kasalehda aktikitik sang ni eh ale pwukoa ni keriapak en ahnsou me kowohng ih. (Lep. Pad. 24:32; Sona 3:1-3) Mendahki e tang nin tapio, ahpw e kapwaiada kupwuren Siohwa. (Mad. 21:28-31) Kitail pil kin koasoanehdi teng en kalohki rongamwahu, mehnda ma kitail kin ale peneu de ahneki wasahn kalohk ehu me apwal?
3. Iahd me ke anahne eimah oh tounmetei me pid kalohk?
3 Eimah oh Tounmetei: Ni Sona eh wehwehki me eh pilipil sapwung kahpwalehla mouren sehla ko, e inengkihda en tounmeteikihla eh mour. (Sona 1:3, 4, 12) Mwuri, ni eh kapwaiada eh pwukoa nan Ninipe, e kohlongala nan werengen kahnimwo, ele rapahki wasa me mwahu ong kalohki sapwellimen Siohwa kadeik. Wiewia pwukat kaidehn wiewiahn aramas masepwehk men, ahpw iei wiewiahn sapwellimen Koht soukohp men me eimah. (Sona 3:3, 4) Ia duwen kitail rahnwet? Kitail anahne eimah me Koht ketikihda pwehn eimah kalohk ni atail kin lelohng uhwong kan. (Wiewia 4:29, 31) Kitail anahne tounmetei ni atail kin doadoahngki atail ahnsou oh kepwe kan ong kalohk.—Wiewia 20:24.
4. Dahme kahrehda kitail anahne doadoahngki ahnsou pwehn medemedewe wiewia mwahu en sapwellimen Siohwa soukohp kan?
4 Ahnsou koaros me ke kin wadek duwen emen sapwellimen Siohwa soukohp, ke pahn paiekihda ni omw kin medewe ma kowe me mi nan soangen irairo. Pein idek rehmw: ‘Ia duwen ei kin mwekidki met? Ia duwen ei kak alasang eh irair mwahu kan nan ei mour?’ (Ipru 6:11, 12) Ire kan nan Atail Doadoahk ong Wehio ni ahnsou kohkohdo pil pahn koasoia mehn kasukuhl mwahu kan me kitail kak sukuhlki sang sapwellimen Siohwa soukohp lelepek teikan.