Koakon En Peidek
◼ Dahme kitail anahne tamataman duwen doadoahngki “cell phones” oh electronic “pagers”?
Soangen misihn pwukat kin mwahu ma ke men tuhwong aramas sohte lipilipil iawasa kitail kin mih ie. Mendahki misihn pwukat kin katapan, kitail en dehr mweidohng misihn pwukat en kauwehla atail kalohk oh mihding en Kristian kan. Iaduwen met kak wiawi?
Medemedewe dahme pahn wiawi ma neitail cell phone de neitail pager pahn ring ahnsou me kitail koasoiong emen nan kalohk. Dahme tohnihmw pahn medemedewe? Dahme tohnihmw pahn medemedewe ma ke ndaiong tohnihmw en awih, pwe ke anahne sapeng noumw telephone? Kitail sohte men wia mehkot me pahn kadipwekelekelki tohnihmwo oh re uhd sohte men rong Rongamwahu en Wehin Koht. (2 Kor. 6:3) Kahrehda, ma kitail kin weuwa cell phone de pager, koasoanehdi misihn pwukat pwe re sohte pahn kauwehla ahnsoun kalohk oh mihding.
Dahme kitail pahn wia ahnsou me kitail awiawih meteikan ni arail kalohk ong aramas? Ma kitail koasoanehdi ahnsowo ong kalohk, e soh pahn konehng me atail madamadau pahn ihte pid doadoahk en kalohk? Pwehn kasalehda wahu ong atail doadoahk sarawi, menlau koasoanehdi pein atail kedirepw kan de wiewia kan ong ahnsou me kitail sohte kalohk. (Rom 12:7) Met sohte pahn wehwehki me kitail sohte kak doadoahngki atail cell phone pwehn koasoanehdi ahnsou dah me kitail men tuhwong aramas akan pwehn kalohk ong irail de pwurehng pwurala rehrail de onop Paipel rehrail.
Kitail anahne pil kanahieng duwen doadoahngki cell phone ahnsoun diraip, pwehki ekei aramas me kin wia roporop (research) duwen met oh diarada me doadoahngki cell phone oh diraip kak kahrehda aksident. Kitail anahne kanahieng pwe kitail en dehr kauwehla kosonned akan me pid duwen doadoahngki cell phone oh diraip.
Kitail kin iang towehda mihding oh kapokon en Kristian kan pwehki kitail men kaudok ong Siohwa oh kitail men rong sapwellimen Siohwa padahk kan. Atail kin kalahnganki mehpwukat soh pahn kamwekid kitail en koasoanehdi neitail cell phone kan de pager kan en dehr kauwehla atail kin rongorong padahk kan oh pil dehr kauwehla ahn meteikan arail rongorong kanahieng mihding pwukat? Ma mie mehkot kesempwal oh karuwaru me pwarada, kitail kak pedoila likio oh koasoanehdi soahng pwukat. Ahpw, ma sohte soahng kesempwal de karuwaru kin pwarada, kitail en koasoanehdi soahng kan me sohte pid atail kaudok en wiawi mwohn de mwurin mihding, kaidehn ahnsou me kileledi ong mihding.—1 Kor. 10:24.
Kitail en kanahieng doadoahngki neitail cell phone kan oh sohte lipilipil misihn teikan ni ahl me pahn kasalehda limpoak ong meteikan oh pil kasalehda me kitail kalahnganki soahng ngehnin kan.