Pakapakairki Wehin Koht
1 “I uhdahn pahn pil kapahrengki Rongamwahu en Wehin Koht ong kahnimw teikan, pwe Wehin Koht ong kahnimw teikan, pwe ih me Koht ketin poaronekiniehdo.” (Luk 4:43) Ki mahsen pwukat, Sises kasalehdahr me oaralap en sapwellime doadoahk iei Wehin Koht. Rohngo me kitail kin pakapakairki rahnwet kin pil pid duwen Wehin Koht, nin duwen Madiu 24:14 kohpadahr: “Rongamwahu en Wehin Koht pahn lohkseli wasa koaros nin sampah, pwe kadehde en mie ong aramas koaros—a mwuri, imwin sampah ahpw pahn kohdo.” Soangen padahk mehlel dah kan me pid Wehin Koht me aramas anahne rong?
2 Wehin Koht wie kakaun sang nanleng ahnsou wet oh, ni ahnsou keren, e pahn wiliandi kaundahn aramas. Tepilo piskendihsangehr nanleng, oh koasoandi suwed wet mihmiher ni imwin rahn akan. (Kaudiahl 12:10, 12) Ahn Sehdan koasoandi mering suwedo pahn kasohrala douluhl, ahpw Wehin Koht sohte pahn sohrala. E pahn mihmi kohkohlahte.—Dan. 2:44; Ipru 12:28.
3 Wehin Koht pahn kaitarala ineng mwahu kan en irail aramas peik kan. E pahn kihsang lokolok kan me kohsang mahwen, kauwehla kosonned, kahpwal oh semwehmwe. (Melkahka 46:8, 9; 72:12-14) Rek en mwenge pahn mie ong aramas koaros. (Melkahka 72:16; Aiseia 25:6) Soumwahu oh kahpwal en paliwar akan pahn wia mehkan en mahs. (Aiseia 33:24; 35:5, 6) Aramas akan pahn unsekla, oh sampah pahn paradaisla, oh aramas pahn kousoanpene ni minimin oh nsenamwahu.—Aiseia 11:6-9.
4 Elen atail mour ahnsou wet kin kasalehda me kitail men wiahla tohn Wehin Koht. Rohng en Wehin Koht pahn kamwekid atail mour pwon, iangahki atail mehn akadei kan oh dahme keieu kesempwal nan atail mour. Karasepe ieu, mendahki kitail ahneki pwukoa en apwalih atail peneinei, kitail sohte kak mweidohng pwunod kan me pid kaitarala anahn en paliwar en kauwehla atail mwohnki mehkan me pid atail pali ngehn oh rapahki Wehin Koht. (Madiu 13:22; 1 Tim. 5:8) Ahpw, kitail en peikiong sapwellimen Sises kaweid: “Kumwail rapahki mahs Wehin Koht oh dahme e kin ketin kupwurki, a soahng teikan koaros [anahn en paliwar akan] e ahpw pahn kin ketikihong kumwail.”—Madiu 6:33.
5 E kin kesempwal oh karuwaru aramas akan en rong oh mwekidki rohng en Wehin Koht pwehki ahnsou a mihmihete. Kitail en sewese aramas oh “songosong kangoangehkin irail en kamehlele duwen Wehin Koht.”—Wiewia 19:8.