Mehnda Ma Ke Ahneki Kahpwal en Paliwar—Ke Kakete Pweida Mwahu Nan Kalohk
1 Ma ke wia emen Sounkadehdehn Siohwa kan me ahneki kahpwal en paliwar de soh unsek en paliwar, met sohte pahn anahne ireiukedi sang ahmw kak iang doadoahk en kalohk oh pweida mwahu. Ni mehlel, ahmw irair kan kak kihong uhk ahnsou mwahu kan en kalohk ong aramas akan oh kangoange meteikan.
2 Kalohk Ong Aramas Koaros Me Ke Ese: Sounkadehde tohto me ahneki kahpwal en paliwar kin iang doadoahk en kalohk oh kin pweida mwahu. Karasepe ieu, emen sister me pwal ni imwen wini oh kahrehong ah solahr kak nok mwekimwekidseli oh ah lokaia pil solahr nok mwahu—e diar me e kin kak iang kihseli makisihn oh padahk ma ah pwoud kin peikihdi warara sidohsa limwahn wasahn alialu kan ni keilen ahl me diren aramas kin kot ie. Ehu ahnsou, e kihla makisihn 80 erein awa riaute! Oh pil, ahmw irair tohrohr kan kin kahrehong uhk en tuhwong aramas akan me sounkalohk teikan kin apwalki tuhwong—duwehte toahkte kan, nurs kan, soumwahu teikan oh arail peneinei kan. Nantihong kilangwohng irail nin duwen ahmw wasahn kalohk tohrohr.
3 Ahmw kalohk kakete pweida mwahu! Ni en meteikan pahn kilang ahmw nannanti oh ia mwomwen ahmw sukuhliki padahk mehlel sang nan Paipel kahrehong ahmw mour en pweida mwahu, irail pahn pil men rong duwen Rongamwahu en Wehio. Oh pil, ni ahnsou me ke pahn tuhwong aramas akan me kin lelohng kahpwal, dahme ke lelohng nan pein ahmw mour kak sewese iuk en kamweitih irail sang nan Mahsen en Koht.—2 Korint 1:4.
4 Ke Kak Kakehlailih Meteikan: Ke soh ale kangoang laud ni ahnsou me ke wadek duwen mour en Laurel Nisbet, me kin anahne memour nan misihn me kin adaneki “iron lung” erein sounpahr 37 ahpw mendahki met—e sewese aramas 17 sukuhliki padahk mehlel sang nan Paipel? Pil duwehte ih, ahmw mehn kahlemeng mwahu kin kamwekid iengomw kan en nannanti nan doadoahk en papah Siohwa.—g93 1/22 pp. 18-21.
5 Mendahki ke sohte kak iang kalohk uwen laud me ke uhdahn mwahuki pwehki ahmw irair kan, ke kak kakehlailih meteikan. Emen brother koasoia: “I diarada me aramas mwoatoralahr kan kakete pil wia sawas laud ong meteikan. Ngehi oh ahi pwoud pil kin kak wia sawas ong meteikan. Pwehki aht irair en paliwar me se miehr loale, se kin mihmihte wasa tehkis oh aramas kak mengeiong tuhwong kiht oh ale sawas.” Ahpw, pwehki ahmw kahpwal en paliwar, e sansal me ke sohte kak wia laud nan kalohk me pahn pahrekiong ahmw ngoang me ke ahneki. Ahpw, ke kakete ale sawas sang meteikan oh met pahn sewese iuk en wiahda me laud nan doadoahk en kalohk. Kahrehda, ma ke anahne sawas, menlau dehr pweiek en peki sawas rehn elder kan oh meteikan nan ahmw mwomwohdiso me kak sewese iuk.
6 Siohwa kin ketin mwahngih soahng koaros me kitail kin wia ni atail papah Ih, oh E kin ketin kupwurperenki atail papah Ih ni mohngiong unsek. (Melkahka 139:1-4) Ni ahmw kin likih Ih, E pahn kihong uhk kehl en kalohk oh pweida mwahu nan doadoahk en kalohk.—2 Korint 12:7-10.