Iaduwen Komwi—Mie “Kisin Tek Kamedek kis Kohieng nan Paliwaromwen”?
1 Kitail uhdahn men wia uwen me kitail kak pwehn kapwaiada atail pwukoah en kalohki rongamwahu. Ahpw, brother oh sister tohto kin apwalki wia met pwe re ahneki soumwahu laud kan oh ihme re sohte kak wia uwen me re mwahuki. Ong irail, e inenen apwal en powehdi arail nsensuwed, keieu ahnsou me re kin kilang mehteikan iang kalohk ahnsou koaros.—1 Kor. 9:16.
2 Mehn Kalimeng Mwahu en Idawehn: Wahnpoaron Pohl kin peiong “kisin tek kamedek kis me kohieng nan paliware.” Pak silipak e ngidingidkihong Siohwa pwehn kihsang kahpwal kansensuwed wet, me e kawehwe me likamwete “ngehn suwed en Sehdan” kin keme ih ahnsou koaros. Ahpw, mendahki met, Pohl kin dadaurete oh nannantiong eh doadoahk en kalohk. E sohte nsensuwed de kaulimki eh luwet ahnsou koaros. E wia uwen me e kak. Kahrepe e kak powehdi eh nsensuwedki eh luwet iei ah tamataman mahsen en Koht me koasoia: “Ei kalahngan itarohng uhk; pwe ei manaman kin sansalda mehlel rehn me luwet kan.” Eri, ahn Pohl luwet uhd wiahla mehkot me e kin kehlailki ni e wehwehki eh soumwahu oh mweidong Siohwa oh sapwellime ngehn sarawi en sewese ih en dadaur.—2 Kor. 12:7-10.
3 Iaduwen Komw Kak Dadaur: Ahmw luwet kan kin kahrehong uhk en sohte kak papah Koht duwehte me kehlail kan? Ma iei, ke anahne ahneki madamadau en Pohl. Mendahki ahmw luwet de soumwahu sohte kak mwahula nan koasoandi wet, ke kak likih Siohwa ni unsek, pwe e kak wehwehki ahmw anahn akan oh pahn kihong uhk “manaman lapalap.” (2 Kor. 4:7) Ke anahne ale sawas sang mwomwohdiso, oh kanaieng en dehr kelekelepw. (Lepin Padahk 18:1) Ma ke apwalki kalohk ihmw-lel-ihmw, ke kak kalohk ni ahnsou sohte lipilip oh kalohk ni ahmw doadoahngki telephone.
4 Mendahki ahmw luwet pahn kahrehda ke sohte kak kalohk ahnsou koaros, ken dehr nsensuwed. Duwehte Pohl, ke pil kak “kalohki rongamwahu duwen kalahngan en Koht ong aramas koaros,” oh wia uwen me ke kak. (Wiewia 20:24, New World Translation) Ni ahmw wia uwen me ke kak nan doadoahk en kalohk, ken tamataman me ahmw nannanti kin kaperenih Siohwa.—Ipru 6:10.