Powehdi “Tek Kamedek Kis Me Kohieng Ni Paliwar”

“Ei kalahngan itarohng uhk.”​—2 KORINT 12:9.

1, 2. (a) Dahme kahrehda kitail en dehr pwuriamweki ni ahnsou me kitail kin lelong kasongosong kan oh kahpwal akan? (b) Dahme kahrehda kitail kak liki en kolokolte atail pwoson mendahki kasongosong kan?

“ARAMAS koaros me men ahneki mour mwahu ni arail pahn miniminiong Krais Sises, re pahn ale kalokolok.” (2 Timoty 3:12) Dahme kahrehda? Pwehki Sehdan dene me aramas akan kin papah Koht pwehki roporop ong pein irail, oh e kin nantihong kasalehda me met pwung. Ehu ahnsou, Sises ketikihong sapwellime wahnpoaron lelepek kan kaweid wet: “Kilang pwe Sehdan aleier mweimwei pwe en song kumwail koaros duwehte soumwet men eh kin koahkoahsang kilin wahn pilawa.” (Luk 22:31) Sises eseier me Koht kin mweidong Sehdan en kasonge kitail oh doadoahngki kahpwal kamedek kan. Ahpw, met sohte kin wehwehki me kahpwal akan koaros me kitail kin lelong kin kohsang rehn Sehdan de nah ngehn saut akan. (Eklesiasdes 9:11) Ahpw, Sehdan kin ngoangki doadoahngki ahl sohte lipilipil pwehn kauwehla atail pwoson.

² Paipel kin padahkiong kitail en dehr pwuriamweiki kasongosong kan me kin lelohng kitail. Sohte lipilipil kasongosong dah kan me kin lelohng kitail, e sohte wiahda mehkot kapwuriamwei. (1 Piter 4:12) Ni mehlel, “me riatail Kristian akan wasa koaros nin sampah kin iang kitail mihla nan soangen lokolok me kitail kin mihla loale.” (1 Piter 5:9) Rahnwet, Sehdan kin nantihong kaloke sapwellimen Koht ladu kan koaros. Tepilo kin perenki kilang kitail lelohng kahpwal tohto me kin rasehng tek kamedek kis. Pwehn kapwaiada dahme e men akadeiong, e kin doadoahngki eh koasoandi suwed kan en kalaudehla medek me kin duwehte ‘tek kamedek kan kohieng ni paliwaratail kan.’ (2 Korint 12:7) Ahpw, dahme Sehdan kin wiaiong kitail, sohte anahne kauwehla atail lelepek ong Koht. Siohwa pahn ketin “sewese” kitail en dadaurete kasongosong kan me kitail kin lelohng, oh e pahn pil wia met ni ahnsou me kitail kin lelohng kahpwal akan me kin rasehng tek kamedek kis kohieng ni paliwaratail kan.​—1 Korint 10:13.

Iaduwen Kitail Kak Powehdi “Tek Kamedek Kis”

3. Dahme Siohwa mahsanih me sapeng ahn Pohl pekipek en kihsang reh tek kamedek kis kohieng ni paliware?

³ Wahnpoaron Pohl ngidingidki peki rehn Koht en ketikihsang reh kisin tek kamedek kis. “Pak silipak I ahpw ngidingidkihong Kauno oh peki en ketikihsang ie kisin tek kiset.” Dahme Siohwa mahsanih ong Pohl pwehn sapeng ahn Pohl kin ngidingidki peki sawas ong ire wet? “Ei kalahngan itarohng uhk; pwe ei manaman kin sansalda mehlel rehn me luwet akan.” (2 Korint 12:8, 9) Kitail pahn medemedewe duwen pasepeng wet oh kilang iaduwen met pil pahn kak sewese kitail en powehdi atail kahpwal akan me kin rasehng tek kamedek kis me kin lelohng kitail.

4. Ni ahl dah kei Pohl kin paiekihda sang sapwellimen Siohwa mahk kalahngan?

⁴ Menlau tehk wasaht me Koht ketin kangoange Pohl en kalahnganki mahk kalahngan me Koht kasalehong ih ki Krais. Ni mehlel, Pohl kin ale kapai laud kan ni ahl tohto. Siohwa ni limpoak kin ketikihong ih pwais kaselel ieu en wiahla emen tohnpadahk en Sises mendahki mahs e kin inenen uhwong sapwellimen Sises tohnpadahk kan. (Wiewia 7:58; 8:3; 9:1-4) Siohwa ni kadek ketikihong Pohl pwukoa oh pwais en doadoahk en kalohk kaselel kan. Mehn kasukuhl wet ong kitail kin inenen sansal. Edetehn kitail kin lelong kahpwal akan, kitail kin pil ahneki kapai tohto me kitail kak kalahnganki. Kitail en dehr mweidong atail kasongosong kan en kahrehong kitail en manokehla sapwellimen Siohwa kupwur mwahu me e kin ketin ketikihong kitail ni mwuledek.​—Melkahka 31:19.

5, 6. (a) Iaduwen Siohwa kin Padahkiong Pohl me sapwellimen Koht manaman “kin sansalda mehlel rehn me luwet akan”? (b) Iaduwen mehn kahlemeng en Pohl kin kasansalehda me Sehdan ih sounlikamw emen?

⁵ Sapwellimen Siohwa mahk kalahngan kin pil sewese kitail ni ahl wet. Sapwellimen Koht kehl de manaman kin itar ong sewese kitail en powehdi kasongosong kan me kin lelohng kitail. (Episos 3:20) Siohwa padahkiong Pohl me sapwellime manaman “kin sansalda mehlel rehn me luwet akan.” Iaduwen met kin wiawi? Ni limpoak, Koht ketin ketikihong Pohl kehl me e anahne pwehn sewese ih en powehdi kasongosong kan me kin lelohng ih. Kahrehda, ahn Pohl a dadaur oh likih Siohwa ni unsek kin kasalehong koaros me sapwellimen Koht manaman kin sewese ih en “kana,” edetehn e wia ohl luwet oh dipan emen. Medemedewe pepehm akan en Tepilo, me kin akamaiki me aramas akan kin papah Koht ihte ni ahnsou arail mour kin nsenamwahu oh ni ahnsou re sohte kin lelohng kahpwal akan. Ahpw, lelepek me Pohl kaselehda kin mwomwen “pohr mesen sounlikamwo”!

⁶ Mwohn e wiahla Kristian, Pohl kin iang Sehdan pelian Koht oh kaloke Kristian akan, oh ih emen Parisi me kin paieki paien sampah kan pwehki e ipwidi rehn aramas kepwepwe oh paiamwahu. Ahpw, mwuhr, Pohl kin papah Siohwa oh Krais nin duwen “me keieu tikitik rehn wahnpoaron ako.” (1 Korint 15:9, New World Translation) Oh e kin, ni lamalam aktikitik, uhpaiong manaman en governing body en Kristian nan keieun senturi. Oh pil, e kin dadaurete ni lelepek mendahki tek kamedek kis kohieng ni paliware. Edetehn Sehdan kin lingeringerda, kasongosong nan eh mour sohte kin kahrehong ngoang me Pohl kin kasalehda en tikitikla. Pohl sohte kin mweidong pein ih en manokehla koapworopworo me e pahn iang Krais kakaun nan Wehin nanleng. (2 Timoty 2:12; 4:18) Sohte tek kis me inenen kamedek pahn kak kauwehla eh ngoang. Eri, duwehte kitail: kitail en kolokolte atail ngoang! Pwehki Siohwa kin sewese kitail en powehdi kasongosong kan me kin lelohng kitail, E kin ketikihong kitail pwais kesempwal ehu en sewese Ih en kasalehda me Sehdan kin wia sounlikamw men.​—Lepin Padahk 27:11.

Sapwellimen Siohwa Sawas kan Me Kesempwal

7, 8. (a) Rahnwet, ni ahl dahieu Siohwa kin kakehlahda sapwellime ladu kan? (b) Dahme kahrehda wadek Paipel oh onop rahn koaros kin wia mehkot inenen kesempwal ong sewese kitail en powehdi tek kamedek kis kohieng ni paliwaratail kan?

⁷ Rahnwet, Siohwa kin kakehlahda irail Kristian lelepek kan ki sapwellime ngehn sarawi, sapwellime Mahsen, oh atail pirien en Kristian akan. Duwehte wahnpoaron Pohl, kitail kak mweidong Siohwa atail pwunod akan ni atail kin kapakap ong Ih. (Melkahka 55:22) Edetehn Koht ele mwein sohte pahn kihsang rehtail kasongosong kan, ahpw e kak ketikihong kitail erpit en powehdi atail kahpwal akan, mendahki kasongosong kan kin inenen apwal en dadaur. Siohwa kak ketikihong kitail kehl ieu​—“kehl ieu me siksang dahme kitail kin ahneki”​—ong sewese kitail en dadaurete.​—2 Korint 4:7, NW.

⁸ Iaduwen kitail kin alehdi soangen sawas wet? Kitail anahne kaukaule onop Mahsen en Koht, oh iei wasa me kitail pahn diarada sapwellime sawas kan me kin uhdahn kak kamweitkitailla. (Melkahka 94:19) Kitail kin wadek nan Pwuhk Sarawi duwen sapwellimen Koht ladu kan ni ahr kin wia pekipek ni ngidingid ong sapwellime sawas. Sapwellimen Siohwa pasepeng kan kin kalapw pid mahsen en kamweit akan, me kin mwahu ong kitail en doudouloale. Onop Mahsen en Koht pahn kakehle kitail pwe “kehl ieu me siksang dahme kitail kin ahneki kin kohsang rehn Koht a kaidehn aht.” Nin duwen kitail anahne kang uhdahn mwenge rahn koaros pwe paliwaratail en kak ale ketihnain oh kehlailda, eri, kitail pil anahne “tungoale” sang mahsen en Koht rahn koaros. Kitail kin wia met? Ma kitail kin wia met, ih ahnsou kitail pahn kilang me “kehl ieu me siksang dahme kitail kin ahneki” kin sewese kitail en dadaurete pahn sohte lipilipil kalokolok kan me kin rasehng tek kamedek kan.

9. Iaduwen elder kan pahn kak sewese aramas akan me kin song en powehdi arail kahpwal akan?

⁹ Kristian elder kan me kin lemmwiki Koht pil kak “rasehng wasahn rukusang kisinieng oh melimel” ni ahnsoun kahpwal akan. Elder kan me men pahrekihong mahsen wet me kohsang powe, kin ni lamalam aktikitik peki rehn Siohwa en kihong irail “loloakong en irail me kin ale sukuhl laud” pwe irail en kak koahiekihla kihda pasepeng pwung ong irail me pahtoulahr kan. Lokaia kan me kin kohsang rehn elder kan pahn kak rasehng kisin keteu me kin “kalamwur” atail madamadau kan oh kamweitala kitail ni ahnsoun apwal akan. Ma elder kan pahn “doadoahngki lokaia konehng kan ong irail kan me nan kapehd tikitikla,” irail pahn kak sewese riarail brother oh sister kan ni pali ngehn me mwein kin luwetala oh nan kapehd tikitik pwehki tek kis kohieng nan paliwarail kan.​—Aiseia 32:2; 50:4; 1 Deselonika 5:14.

10, 11. Iaduwen sapwellimen Koht ladu kan pahn kak kangoange mehteikan me kin kin lelong kahpwal laud akan?

¹⁰ Sapwellimen Siohwa ladu kan koaros kin iang kisehn sapwellime peneinei en Kristian me kin miniminpene. Ei, “mehnda ma kitail me tohto, ahpw kitail wia warteieu,” oh kitail “anahne en poakpene.” (Rom 12:5; 1 Sohn 4:11) Iaduwen kitail kin kapwaiada pwukoa wet? Nin duwen pwuhken 1 Piter 3:8, kitail kin wia met sang ni atail kin kasalehda “limpoak oh kadek” ong irail koaros me iang pwoson mehlel. Ong irail akan me kin song en powehdi tek kamedek kis kohieng nan paliwarail kan, mehnda ma irail pwulopwul de mah, kitail koaros kak kasalehda atail kin nsenohkin irail. Iaduwen kitail kak wia met?

¹¹ Kitail anahne en pehmtikihong arail lokolok kan. Ma kitail kin kasalehda me kitail sohte kin nsenohki irail, de kitail kin mwomwen pohnsehsehla me irail kin lelohng kahpwal akan, met pahn kakete kalaudehla arail kahpwal akan, mendahki kitail sohte uhdahn men wia met. Atail kin pehmtikihong irail akan me kin lelohng kasongosong kan pahn kak sewese kitail en kanahieng dahme kitail pahn koasoiong irail, ia mwomwen kitail pahn koasoiong irail, oh atail wiewia kan ong irail. Atail pahn kin ahneki madamadau en pweida oh kangoange aramas akan me kin lelohng kahpwal kan pahn kak katikitikihala kamedek kan me kin kohsang tek kamedek akan. Kitail kak sewese irail laud.​—Kolose 4:11.

Iaduwen Ekei Aramas Kin Powehdi Arail Kahpwal akan

12-14. (a) Dahme emen Kristian me alehdi soumwahu en kanser wia pwen sewese ih en dadaurete? (b) Ni ahl dah kei rien lih menet brother oh sister kan ni pali ngehn sewese oh kangoange ih?

¹² Pwehki kaimwiseklahn imwin rahn pwukat kerendohr, kahpwal akan me kin rasehng “tepin medek en neitik” kin wie lalaudla ehuehu rahn. (Madiu 24:8) Eri, kasongosong kan pahn lelohng aramas koaros nin sampah, keieu irail sapwellimen Siohwa ladu lelepek kan me kin nantihong kapwaiada sapwellime kupwur kan. Karasepe ieu, medemedewe duwen emen Kristian me kin iang doadoahk en kalohk kaukaule. Toahkte kan padahkiong ih me e soumwahukihda kanser, oh irail anahne kihsang wasahkis nan paliwere (salivary oh lymphatic glands). Ni ahnsou me ih oh eh pwoud ohl esehda duwen soumwahu me e ahneki, ira mwadangete sohpeiong Siohwa ni kapakap oh peki sawas. Ni ahnsou mwuhr, e koasoia me ni ahnsou me ira wia kapakap wet, ira ahneki popohl oh meleilei. Ahpw, e kin anahne dadaurete mendahki ekei ahnsou e kin ahneki ahnsou suwed akan, keieu ni ahnsou me e kin luwetkihla wini kan me e kin alehdi ong eh soumwahuo.

¹³ Sister menet nantihong sukuhliki duwen soumwahu en kanser, pwehn sewese ih en dadaurete. E wia peidek kan rehn toahkte kan. Oh pil, nan makisihn en The Watchtower, Awake!, oh pwuhk en Kristian akan me kin pid oaralap wet, e diarada artikel kan me pid mouren en aramas akan me ahneki soumwahu wet oh re kin kasalehda iaduwen irail kin kak dadaurete oh kanengamah. E pil kin wadek iren Paipel kan me kin pid ahneki soumwahu laud oh iren Paipel pwukat kin kasalehda iaduwen sapwellimen Siohwa kehl kin sewese sapwellime aramas akan en dadaurete mendahki kahpwal akan.

¹⁴ Ehu artikel me koasoia duwen powehdi pwunod akan, doadoahngki mahsen loalokong pwukat: “Aramas me sohte kin men patehng meteikan kin nsenohkihte pein irail.” (Lepin Padahk 18:1) Artikel wet kihda kaweid wet: “Dehr kelekelepw.”a Sistero koasoia: “Aramas tohto ndaiong ie me re kin kapakapkin ie; ekei kin doadoahngki telephone pwehn koasoiong ie. Elder riemen kin ahnsou koaros doadoahngki telephone pwehn koasoiong ie. I kin ale wahn rohs kan oh kisinlikou tohto. Ekei aramas kaunopada kenei mwenge kan. Oh pil aramas tohto kin pein tohnmeteikihla arail ahnsou en wahla ie ni imwen wini pwehn ale epwelpen imwen wini.”

15-17. (a) Iaduwen emen Kristian kin powehdi kahpwal akan me kohsang aksident kan? (b) Sawas dahieu me irail akan nan mwomwohdiso kihda?

¹⁵ Nan New Mexico, U.S.A., emen sapwellimen Siohwa ladu me wereilahr papah Siohwa pak riau lelohng aksident ni ahnsou me e dake sihdosa. Tepinwere oh pwopwe ohla, met kin kalaudehla eh soumwahu en kakon medek me e kin dadaurete sounpar 25 samwa. E koasoia: “I kin apwaliki kolada moangeiet oh pwekada mehkot me toutou sang paun limau. Ahpw, kapakap ngidingid ong Siohwa kin kihong ie sawas laud. Oh pil, artikel kan nan The Watchtower me kitail onopkiher kin pil kihda sawas laud ong ie. Ehu artikel koasoia duwen pwuhken Maika 6:8 kawehwehda me lamalam karakarahk ni atail kin iang Koht kekeid kin wehwehki me pein emen pahn wehwehki duwen wiewia kan me e sohte kak wia pwehki eh luwet akan ni paliwar de soumwahu. Ire wet kin sewese ie en wehwehki me mendahki I soumwahu, sohte konehng ien nsensuwed pwehki ai ahnsou en iang doadoahk en kalohk kin tikitik sang dahme I men wia. Papah Koht ki mohngiong mwakelekel kin wia mehkot keieu kesempwal.”

¹⁶ E pil koasoia met: “Irail elder kan kin ahnsou koaros kapinga ie ai kin nantiong iang towehda mihding kan oh iang doadoahk en kalohk. Irail me pwulopwul kan kin rahnmwahuwih ie oh pwoalehdi ie. Irail pioneer kan me inenen kadek ong ie oh ni rahn akan me I kin luwetala, irail kin kalapw koasonehdi arail koasoandi kan pwehn sewese ie. Ni ahnsoun keteu, irail ni kadek kin kahre ie en pwurehng pwurala rehn aramas akan me perenki rong de re kin luhke ie en iang irail kohla rehn irail akan me kin onop Paipel rehrail. Oh pwehki I sohte kak weuwa ahi kopwou en kalohk, sounkalohk teikan kin kihong nei pwuhk kan nan arail kopwou ni ahnsou me kitail kin kalohk.”

¹⁷ Kilang iaduwen irail elder pwukat nan mwomwohdiso oh iengarail pwoson akan kin sewese sister riemen pwukat en powehdi arail kahpwal akan me kin rasehng tek kamedek kan. Irail kin kihda arail sawas ni ahl me konehng oh kadek kahrehda met kin lel ara anahn akan en pali ngehn, paliwar, oh pil anahn en pepehm akan. Met sou kin kangoange iuk en sewese brother oh sister kan me kin lelohng kahpwal akan? Kumwail me pwulopwul kan pil kak sewese aramas teikan nan amwail mwomwohdiso me kin lelohng tek kamedek kan me kohieng ni paliwarail kan.​—Lepin Padahk 20:29.

18. Kangoang dahieu kitail kak diarada ni ahnsou me kitail wadek duwen mour en aramas akan me ntingihdi nan makisihn en Watchtower oh Awake!?

¹⁸ Makisihn kan en Watchtower oh Awake! kin ntingihdi koasoipen Sounkadehdehn Siohwa tohto me powehdier kahpwal akan, oh kin nannantihong powehdi kahpwal kan nan arail mour pil rahnwet. Ni ahmw pahn kin kaukaule wadek artikel pwukat, ke pahn kilang me riatail brother oh sister kan ni pali ngehn nin sampah pwon kin dadaurete kahpwal en mwohni kan, kompoakparail kan mehlahr pwehki rerrer en sahpw, lapake, melimel, oh lelong keper kan en mahwen. Ekei kin soumwahukihda soumwahu laud kan me kin kahrehong irail en sohlahr kehlail oh irail sohla kak wia doadoahk kan me re kak wia mahs. Aramas tohto sohlahr kak wia soahng mengei kan nan mour, ahpw ong me kehlail kan, e sohte kin wia mehkot apwal. Arail soumwahu kan kin wia kasongosong laud ieu ong irail, keieu ni ahnsou me re sohlahr kak iang doadoahk en Kristian akan uwen me re mwahuki. Ia uwen laud arail kalahngan ong sawas oh utung me riarail brother oh sister kan, pwulopwul oh mah, kin kihong irail!

Dadaur kin Kahrehda Peren

19. Dahme kahrehda Pohl kak kolokolte eh peren mendahki e kin lelong kasongosong kan oh eh luwet akan me kin rasehng tek kamedek kan?

¹⁹ Pohl kin perenkihda en kilang iaduwen Koht kin ketin kakehlahda ih. E koasoia: “Ihme I kin perenki oh suweiki ei luwet akan, pwe I en kin pehm manaman en Krais rehi. Eri, ihme I perenkihda ni ei kin soumwahu, ni ei kin sekenikenla, ni ei kin diar apwal oh kamakam oh lokolok pwehki Krais. Pwe ni ei kin luwet, iei ahnsou me I kin kehlail.” (2 Korint 12:9, 10) Pwehki sang pein dahme e kin lelong, Pohl kin kak koasoia met: “Oh I pil sohte koasoia met pwehki ei pehm me kumwail keseielahr, pwe I ahnlahr oh itarki dahme I kin ahneki. I wehwehkiher duwen ei pahn momourki soahng kan me sohte itar, oh pil duwen ei pahn momourki soahng kan me depasang ei anahn akan. I padahngkiher met: I pahn kak nsenamwahu wasa koaros oh ahnsou koaros, mehnda ma I med de duhpek, mehnda ma I ahneki dipwisou me depasang ei anahn, de me tikitiksang. I kakohng mehkoaros sang ni manamano me Koht kin ketikihong ie.”​—Pilipai 4:11-​13, NW.

20, 21. (a) Dahme kahrehda kitail kak diarada peren ni atail kin doudouloale duwen “mehkan me kitail sohte kin kilangki mesatail kan”? (b) Ia ekei “mehkan me kitail sohte kin kilangki mesatail kan” me kitail kaskasik en kilang nan Paradais nin sampah?

²⁰ Eri, ma kitail pahn dadaurete mendahki “tek kamedek kis koheing ni paliwaratail kan,” kitail pahn kak ahneki peren laud ni atail kin kasalehong aramas koaros me sapwellimen Siohwa manaman kin sansalda mehlel rehn me luwet akan. Pohl ntingihdi: “Ih met kahrepen at sohte kin loaltikla. Pwe ma palliwarat kin luhluwetala, a pali ngenit kin kekehlailla rahn koaros. Pwe kisin apwal tikitik wet me se lokolongki, pahn kahrehiong kiht lingan soutuk oh lapalap ehu, me siksang mehlel apwal akan en sampah. Pwe kiht se sohte kin nsenohki mehkan me sansal ong kitail, pwe mehkan me sohte sansal. Pwe mehkan me kitail kin kilangki masatail, iei me kin mie ahnsou kis, a mehkan me kitail sohte kin kilangki masatail, ih me soutuk.”​—2 Korint 4:16-​18.

²¹ Pali laud en sapwellimen Siohwa aramas akan nan rahnwet kin ahneki koapworopwor en mour nan sapwellime Paradais nin sampah oh paiekihda kapai kan me E ketin inoukihda. Kapai pwukat kitail “sohte kin kilangki masatail” nan rahnwet. Ahpw, ahnsou me kitail pahn pein kilang kapai pwukat ki mesatail kan pahn mwadang leledo, oh kitail pahn paiekihda kapai pwukat ni ahnsou kohkohlahte. Ehu kapai iei me kitail sohlahr anahne lelong kahpwal akan me kin rasehng tek kamedek kis kohieng ni paliwaratail kan! Sapwellimen Koht Ohl pahn “kauwehla doadoahk en Tepilo” oh “kauwehla Tepil, me kakaun mehla.”​—1 Sohn 3:8; Ipru 2:14.

22. Dahme kitail anahne liki oh nantiong en wia?

²² Ihme kahrehda, sohte lipilipil soahngen tek kamedek kohieng ni paliwaritail kan nan rahnwet, kitail en nantiong dadaurete. Duwehte Pohl, kitail pahn alehdi kehl en dadaurete pwehki Siohwa kin kadek sapan ketkihong kitail sapwellime kehl en sewese kitail. Ni ahnsou kitail kin momour nan Paradais nin sampah, kitail pahn kapinga Siohwa atail Koht rahn koaros duwen wiewia kaselel kan e kin ketin wiaiong kitail.​—Melkahka 103:2.

[Nting tikitik me mi pahs]

Iaduwen Ke Pahn Sapeng?

• Dahme kahrehda oh iaduwen Tepilo kin song en kauwehla lelepek kan en irail Kristian mehlel akan?

• Iaduwen sapwellimen Siohwa manaman kin “sansalda mehlel rehn me luwat akan”?

• Iaduwen irail elder kan oh pil aramas teikan kak kangoange irail akan me kin lelong kahpwal akan?

[Kilel nan Pali 10]

Pak silu Pohl kapakapki me Koht pahn ketin kihsang tek kamedek kis kohieng ni paliware