Doadoahngki Ahmw Ahnsou Ni Ahl me Konehng
1 Atail ineng en men kaperenda Siohwa kin kamwekid kitail en kesempwaliki soahng ngenin kan. Sapwellime Mahsen kin kaweid kitail en ‘rapahki mahs Wehin Koht’ oh “pilada dahme keieu mwahu.” (Madiu 6:33; Pilipai 1:10) Iaduwen kitail kak doadoahngki atail ahnsou ong wiewia kan me pid Wehio oh kihong wiewia teikan me sohte nohn kesempwal en keriau nan atail mour?—Episos 5:15-17.
2 Rapahki Mahs Wehin Koht: Koasoanehdi mwahu ahmw ahnsou pwe ke sohte pahn kesehla ahmw ahnsou ong wiewia kan me sohte kesempwal. Ekei sounkalohk kan kin ntingihdi nan neirail calendar mehnia rahn me irail pahn iang kalohk. Mwurin irail wia met, irail sohte kin mweidong mehkot en kauwehla arail ahnsou en iang kalohk. Kitail pil kak wia met ni atail kin koasoanehdi atail ahnsou ong iang mihding kan koaros, wia pein atail onop Pwuhk Sarawi, oh iang kapokon kan. Sounkalohk tohto kin koasoanehdi arail ahnsou ehu ehu rahn pwe en tepikihda rahno de imwikihla rahno wadek Pwuhk Sarawi. Kitail kak koasonehdi ahnsou ong wiewia kesempwal kan koaros me pahn sewese kitail en kakehlailih atail pali ngehn, oh kitail en dehr mweidong wiewia teikan en kauwehla koasoandi wet.—Eklesiasdes 3:1; 1 Korint 14:40.
3 Dehr Nohn Daulihala Doadoahngki Sampah wet: Nan ekei sahpw akan, e mengei aramas en iang mwadong kan oh mehn kamweit kan, iangahki wiewia teikan. Aramas tohto kin doadoahngki ahnsou laud en kilang TV de doadoahngki computer. Ahpw, ma kitail pahn soupisengki mwadong kan de nohn doadoahngki computer kan me sampah wet kin kihda, met pahn kahrehong kitail en lelohng nsensuwed. (1 Sohn 2:15-17) Ihme kahrehda, Pwuhk Sarawi kin kangoange kitail en dehr nohn daulihala doadoahngki sampah wet. (1 Korint 7:31) Sang ni atail kin rong kaweid wet, kitail kak kasalehong Siohwa me kitail kin keieu kesempwaliki sapwellime kaudok.—Madiu 6:19-21.
4 Kereniong koasoandi wet pahn kaimwisekla. Aramas akan me kin rapahki mahs Wehin Koht kin ahneki peren mehlel oh Koht pahn ketin kupwure irail. (Lepin Padahk 8:32-35; Seims 1:25) Eri, e pahn mwahu kitail en doadoahngki atail ahnsou ni ahl me konehng.