Sukuhl Ehu Me Kin Kak Sewese Kitail Nan Atail Mour
1 Ni atail kin tehk ire kan me kohda nan pwuhk kan me kitail pahn doadoahngki nan Theocratic Ministry Sukuhl nan 2006, kitail en nantihong pwe kitail en paiekihda padahk en Paipel kan ni atail kin medemedewe iaduwen padahk pwukat kin pid atail papah Siohwa oh atail mour en ehu ehu rahn. Kitail men koasoanehdi nan kapehdatail en doadoahngki dahme kitail kin sukuhliki.—Sohn 13:17; Pilipai 4:9.
2 Wiahda Pasapeng kan: Koasoandi en Theocratic Ministry Sukuhl en pahr wet kin mweidohng tohnmwomwohdiso en pil kareireihkihla arail ahnsou en kasalehda duwen ire kesempwal kan me irail perenki sang wadawad en Paipel pil ehu minit. Met wehwehki me brother me pahn wia “Ire Kesempwal kan Sang Wadawad en Paipel” anahne kanahieng pwehn dehr daulih minit limau. Irail me pahn kihda arail pasapeng kan pahn tamataman me irail pahn koasoi sekond 30te. Ma tohnmwomwohdiso pahn koasoanehdi mwahu dahme irail pahn nda, emen emen irail kak kihda ire ehu me mwahu erein sekond 30 de mwotomwotsang. Met wehwehki me tohnmwomwohdiso ehk kak koasoi erein minit limau.
3 Padahk kan me Pahn Kawehwe Mwahu: Brother kan me pahn wia Padahk Keieu oh pil Padahk me kasalehda ire kesempwal kan sang wadawad en Paipel anahne kasalehda iaduwen ire pwukat pahn kak sewese kitail nan kalohk oh pil nan atail mour en ehu ehu rahn. Brother kan me wia padahk pwukat pahn wia laudsang ihte sewese sounrongorong kan en mwekidki dahme irail sukuhliki. Brother pwukat pahn kasalehda dahme kitail anahne wia, ia mwomwen atail pahn wia met, oh ia kamwahupen kapwaiada met. Brother kan kak kasalehda ire kesempwal pwukat oh kak nda, “Iet kaweid me kin kak kohwong kitail sang ire wet,” de “Iet mwomwen atail pahn kak doadoahngki ire wet nan kalohk.” Elder kan oh ministerial servant kan me wehwehki duwen anahn en mwomwohdiso pahn nantihong kasalehda iaduwen kitail kak doadoahngki nan atail mour dahme kitail kin sukuhliki.
4 E pahn mwahu ma brother kan me wia padahk pwukat pahn doadoahngki karasepe mwahu kan sang nan Paipel. Mwurin brothero kasalehda duwen karasepe ieu sang Paipel, e kak nda, “Mwein ke pil kin lelohng nan soangen irair duwehte met.” Brother kan pahn tehk me karasepe kan me irail pahn doadoahngki pahn pahrekiong audepen padahk en Pwuhk Sarawi oh kaweid en “ladu lelepek oh loalokong.”—Madiu 24:45.
5 Ma aramas emen ahneki erpit, met wehwehki me e kin doadoahngki loalokong oh wehwe pwehn sewese ih nan ah mour. “Erpit me keieu kesempwal en alehda.” (Lepin Padahk 4:7) Ni atail pahn doadoahngki erpit me kitail alehda sang atail iang Theocratic Ministry Sukuhl, kitail en pil ehukihong meteikan dahme kitail sukuhliki oh sewese irail en pil doadoahngki nan arail mour.