Dehr Katihasang Ahmw Limpoak me Ke ahneki nin Tepio
1 Sises me linganla kaweidih mwomwohdiso nan Episos nan keieun-senturi: “Iet mehkot me I suwedki rehmw: omw limpoakohng ie tikitiklahr, e sohte duwehte omw limpoak en mahso.” (Kaudiahl 2:4) E sansal, me tohto sohlahr ahneki limpoak ong Siohwa me re ahneki nin tepio. Ni ahnsou me kitail suksukuhliki padahk mehlel, kitail kekeirada limpoak kehlail ong Koht oh mehn mpatail, oh limpoak wet kamwekid kitail en ngoangki ehukihong meteikan koapworopwor me kitail ahpwtehn diarada. Dahme kak irekitail sang katihasang limpoak me kitail ahneki nin tepio oh sang sohlahr ngoangki doadoahk en kalohk?
2 Pein Onop oh Iang Towehda Mihding: Dahme kamwekid kitail en kekeirada limpoak ong Koht oh mehn mpatail ni ahnsou me kitail tepin sukuhliki padahk mehlel? Kaidehn sang soahng koaros me kitail sukuhlikier duwen Siohwa sang ni atail onop en Pwuhk Sarawi? (1 Sohn 4:16, 19) Kahrehda, pwe atail limpoak en “lalaudla,” kitail anahne pousehlahte ale loalokong pwung, tehk mwahu “nan wasa rir kan en kupwur en Koht.”—Pilipai 1:9-11; 1 Korint 2:10.
3 En kolokol koasoandi mwahu en pein onop kin inenen apwal ni imwin rahn akan me kin dirkihla kapwunod kan oh kedirepw kan. (2 Timoty 3:1) Kitail anahne koasoanehdi ahnsou nan atail koasoandi pwehn ale mwengehn ngehn. En kaukaule iang towehda mihding kan me inenen kesempwal, pwe “duwen atail ese Rahnen Siohwa kerendohr.”—Ipru 10:24, 25.
4 Doadoahk en Kalohk: En ngoangki iang doadoahk en kalohk kin sewese kitail en kolokol atail limpoak me kitail ahneki nin tepio. Ni atail kin kalohki rongamwahu, kitail kin katamankin pein kitail sapwellimen Siohwa inou limpoak kan, oh met kin sewese kitail en kolokol atail koapworopwor en kehlail oh atail limpoak en momour. Pwehn padahki padahk mehlel kan en Paipel, kitail anahne wia research oh wehwehki ni sansal padahk pwukat, oh met kin kakehle atail pwoson.—1 Timoty 4:15, 16.
5 Siohwa warohng en ale soahng koaros, iangahki atail limpoak. (Kaudiahl 4:11) Ke dehr mweidong ahmw limpoak en tikitikla. Kolokol ahmw limpoak me ke ahneki nin tepio en kehlail ni ahmw kin ngoangki wia pein onop en Paipel, kaukaule iang towehda mihding, oh pil ngoangki kasalehiong meteikan dahme ke keieu kesempwalki.—Rom 10:10.