Kaunopada me Kapw kan en Dadaur Pahn Kalokolok kan
1 Ni ahnsou me emen kin tepida onop Paipel oh ‘men ahneki mour mwahu me miniminiong Krais Sises,’ Sehdan kin nantihong en uhwong irail. (2 Tim. 3:12) Uhwong kak kohsang rehn ienge tohndoadoahk kan, tohnsukuhl kan, oh mehn mpe kan. E kin kak uhdahn apwal ni ahnsou me arail peneinei me uhwong kan kin leme me re kin wia met pwehn sewese irail.—Mad. 10:21; Mark 3:21.
2 Uhwong Wet Kokohpdahr: Me kapw kan anahne wehwehki me kalokolok pahn mie oh met kin kasalehda me irail wiahlahr sapwellimen Sises tohnpadahk mehlel kan. (Sohn 15:20) Ekei pak ahn me uhwong kan arail sawehwe duwen Sounkadehdehn Siohwa kan me kahrehiong irail en uhwong. Tamataman me lokolongki saroh pwehki kitail kin idawehn Sises oh peikiong Koht kin imwikihla peren laud. (Wiewia 5:27-29, 40, 41) Katamanki me kapw kan me Siohwa pahn kin ketin sewese irail ni limpoak. (Mel. 27:10; Mark 10:29, 30) Arail dadaur lelepek kin kasalehda me re uhki sapwellimen Siohwa pwung en kaunda.—Lep. Pad. 27:11.
3 Kesempwalpen Loalokong Pwung: Katengehdiong nan madamadau en noumw tohnsukuhl en Paipel duwen kesempwalpen kaukaule ale loalokong pwung mendahki kahpwal kan me re pahn kin lelohng. Sehdan kin doadoahngki uhwong kan pwehn kauhdi dahme irail sukuhlkier pwehn dehr tengedi nan arail mohngiong. (Lep. Pad. 4:23; Luk 8:13) Re anahne kaukaule ale loalokong pwung en Mahsen en Koht pwe ren kak katengehdi arail pwoson.—Mel. 1:2, 3; Kol. 2:6, 7.
4 Anahne Dadaur: Dadaur kin kesempwal oh e kak kapwarehda wah mwahu kan nan soangen kahpwal koaros. (Luk 21:16-19) Ni ahnsou me me kapw kan kin dadaur pahn kalokolok kan, irail oh pil meteikan pahn paiekihda. Re kin pehm me Siohwa kak ketin kapaiada laud irail kan me kin dadaur ni lelepek.—Seims 1:12.
5 Wahnpoaron Pohl kin perenkihda kekeirdahn rie Kristian kan nan Deselonika. E kalahngankihong Koht pwehki irail, oh me tohto rehrail me e sewese en esehla padahk mehlel. (2 Des. 1:3-5) Ma kitail kaunopada mwahu tohnsukuhl en Paipel kan, kitail pil kak ahneki soangen peren oh nsenamwahu duwehte me Pohl ahneki.