Rapahki Irail kan me Warohng
1. Ia duwen atail kin kasalehda atail kin kalahnganki pwais en iang wia doadoahk en kalohk?
1 Erein Sises eh ketin wia sapwellime doadoahk en kalohk, e ketin doadoahk laud pwehn ketikihong aramas opampap kan rongamwahu me kansenamwahu. (Ais. 61:1, 2) Nin duwen meninkeder kei oh sounsawas ekei en Krais, kitail ahneki pwais kaselel en kahlemengi sapwellime ngoang ni eh sohte kin pwangahkihda rapahki irail akan me warohng nan atail wasahn kalohk nan rahnpwukat.—Mad. 10:11; 2 Kor. 5:20.
2. Ia duwen Pohl eh kasalehda eh wekidala eh wasahn kalohk? Ia imwilahn met?
2 Mengei en Kawekila: Wahnpoaron Pohl kin ahnla tepida mahs padahk ong mehn Suhs oh mehn liki kan ni sinakoke kan. (Wiewia 14:1) Nan Pilipai, ih oh Sailas kohla oh rapahki aramas akan ‘wasa me ira lemehiong me wasahn kapakap.’ Ira tepida kalohk ong pwihn en lih ehu, oh emen irail iei Lidia me mwadangete alehda padahk mehlel.—Wiewia 16:12-15.
3. Ia pil ekei wasa me kitail pil kak perenki wia doadoahk en kalohk likin kalohk sang ihmw lel ihmw?
3 Patehng omw kalohk en ihmw lel ihmw, ke pahn kak pil kalohk ong aramas akan me ke tuhwong nan wasahn mwemweit kan, nan ohpis kan, nanial kan, wasahn pesines kan oh nan sidohwa kan? Ele mwein ke pahn kak pil kalohk ong irail kan me kin kousoan nan wasa kan me kin keinapwih ni omw pahn doadoahngki kisinlikou oh telephone. Tehk oh wekidala wiepe kan me konehng omw wasahn kalohk pahn kahrehda ken kak ‘kehlail oh dadaur oh loalenohng omw doadoahk ong Kaun-o ahnsou koaros.’—1 Kor. 15:58.
4. Ia pil ekei wiepe kan me kitail kak wia ma atail wasahn kalohk nan sapwatail me tikitik?
4 Sounkalohk tohto ahnekier ahnsou mwahu en kalaudehla arail doadoahk en kalohk ni arail kin kosoulahng ehu mwomwohdiso tohrohr nan arail wasa de nan ehu sahpw tohrohr. Ekei sukuhlki ehu lokaia tohrohr pwehn kak kalohk ong irail kan me kohdohng nan sapwarail.
5. Ia pahn atail pepehm ong ahnsou me kitail mihmi loale? Dahme kitail koasoanehdi en wia?
5 Kitail koaros anahne tamataman me “mwahto iei sampah.” (Mad. 9:37; 13:38) Pwehki kitail miher ni imwin koasoandi suwed wet, emenemen kitail anahne medemedewe mwahu duwen pein atail irair kan, atail koahiek, oh atail ahnsou mwahu kan pwehn kalaudehla atail doadoahk en kalohk. Siohwa kin ketin kamehlelehiong kitail me ma kitail pahn rapahki mahs wehio, e pahn ketin kapai atail kin nannanti en kalaudehla atail doadoahk en kalohk.—Mad. 6:33.