Kasalehda Kalahngan ong Sapwellimen Koht Kisakis me Keieu Laud
1. Dahme kahrehda kitail kin uhdahn kalahngan ong Siohwa?
1 Nanpwungen sapwellimen Siohwa “kisakis mwahu koaros,” tomw me sapwellime Ohlo patohwanda iei me keieu laud. (Seims 1:17) Tomwo kahrehiong soangen kapai tohto me iangahki mahkpen dipatail kan. (Ep. 1:7) Kitail kin ahnsou koaros kalahnganki met. Ni ahnsoun Kataman, kitail kin men kihong ahnsou pwehn doudouloale kisakis kesempwal wet.
2. Ia duwen atail peneinei oh emenemen kitail kak kalaudehla atail kalahngan ong tomwo?
2 Kalaudehla Atail Kalahngan: Pwehn kalaudehla kalahngan en omw peneinei, ke sou doadoahngki amwail ahnsoun Kaudok en Peneinei ni soutuk kan pwehn kousapahlih ire kan duwen tomwo ni wihk kan mwohn Kataman en March 30? Pil wia wadawad en Paipel ong Katamano ehuehu rahn nin duwen peneinei ehu. Emenemen en medewe ia duwen tomwo eh wia kapai ehu ong ih oh ia duwen eh kamwakid eh madamadau duwen Siohwa, pein ih, meteikan oh pil ni ahnsou kohkohdo. Ke pil pahn diar me e pahn wia sawas laud ma ke kin sukuhlki koul rioapwoat me kitail pahn doadoahngki ni Katamano, iei koul nempe 40 oh 44.—Mel. 77:12.
3. Ia duwen atail kak kasalehda atail kalahngan?
3 Kasalepen Atail Kalahngan: Atail kalahnganki tomwo pahn kamwakid kitail en padahkihong meteikan duwen Siohwa oh sapwellime limpoak ni eh ketin poaronehdo sapwellime Ohlo. (Mel. 145:2-7) Erein sounpwong kan en March, April oh May, ekei peneinei kan kak kasalehda arail kalahngan ni arail pahn koasoanehdi emen de ekei en iang wia sawaspen pioneer. Ma met sohte kak wiawi, ke kak “isaneki ahnsou mwahu koaros” pwehn kalaudehla omw iang kalohk? (Ep. 5:16) Atail kalahngan pahn pil kamwakid kitail en sewese meteikan en kohdo iang kitail towehda Katamano. (Kaud. 22:17) Tepida ntingihdi eden irail kan me ke kin pwurehng pwurala rehrail, tohnsukuhl en Paipel kan, kisehn omw peneinei kan, tohndoadoahk kan oh mehn mpomw kan me ke men luke. Oh wia uwen omw kak pwehn iang kihseli doaropwehn luhk ong Katamano.
4. Soangen ahl dah kan me kitail kak doadoahngki ahnsoun Katamano?
4 Ahnsoun Katamano kin wia ahnsou mwahu pwehn kasalehiong Siohwa ia uwen atail kalahnganki sapwellime kisakis ong aramas kan koaros. Eri, kitail en doadoahngki ahnsou wet pwehn kalaudehla oh kasalehda atail kalahnganki tomwo oh “kapai lapalap kan en Krais me sohte kak nekila.”—Ep. 3:8.