Omw Padahk en Kamwakid Tohnihmw kan
1. Dahme atail padahk anahne wia ong tohnihmw kan ni atail kin doadoahngki mahsen en Koht?
1 Duwehte wahnpoaron Pohl, sounkalohk pweida kan kin wehwehki me “padahkihong aramas akan mahsen en Koht ni mehlel,” kin laudsang ihte wadek sang nan Paipel. (2 Tim. 2:15) Ia duwen atail padahk kak kamwakid tohnihmw kan ni atail kin doadoahngki mahsen en Koht?—Wiewia 28:23.
2. Ia duwen atail kak sewese tohnihmw en kalaudehla arail wauneki Mahsen en Koht?
2 Mweidohng Mahsen en Koht en Mahsen: Keieu, kasalehda dahme Paipel mahsanih ni ahl me kahrehiong tohnihmwo en wauneki sapwellimen Koht erpit nan Paipel. Atail likih Mahsen en Koht kak kamwakid tohnihmwo en rong kanahieng ni atail wadek iren Paipel ehu. (Ipru 4:12) Kitail kak nda: “I diarada me e mwahu en kilang ia sapwellimen Koht madamadau ong ire wet. Tehk dahme e mahsanih nan ire wet.” Ma kak, mweidohng Mahsen en Koht en mahsen sang ni omw pahn wadek nan Paipel.
3. Dahme ke kak wia pwehn sewese tohnihmwo en wehwehki iren Paipel me ke doadoahngkio?
3 Keriau, kawehwehda iren Paipel me ke doadoahngkio. Aramas tohto kin apwalki en wehwehki nin tepin arail wadek ehu iren Paipel. Pali laud en ahnsou kitail anahne kawehwe ia duwen iren Paipelo eh kin dokedoke dahme kitail koasoiao. (Luk 24:26, 27) Kasalehda lepin lokaia kesempwal kan. Ma ke doadoahngki peidek ehu, ke kak esehda ma tohnihmwo wehwehki iren Paipelo.—Lep. Pad. 20:5; Wiewia 8:30.
4. Ia kesiluh en ahl me kitail anahne wia pwe atail padahk en kak kamwakid tohnihmwo?
4 Sewese Tohnihmwo en Medewe Iren Paipel kan: Kesiluh, nantihong en sair mohngiong oh madamadau en tohnihmwo. Sewese tohnihmwo en kilang ia duwen iren Paipelo eh dokedoke eh mour. En sewese tohnihmwo en medemedewe duwen iren Paipel kan kak kamwakid ih en wekidala eh madamadau. (Wiewia 17:2-4; 19:8) Karasepe, mwurin atail wadek Rom 10:13, kitail kak sewese ih en medewe ia duwen eh kin esehla eden emen kin wia mehkot kesempwal pwehn kakairada nanpwungmwahu rehn aramaso. Mwuri, kitail kak idek, “Ke leme me esehla mwaren Koht pahn kamwahwihala omw kapakap?” En sewese tohnihmwo en kak doadoahngki iren Paipelo nan eh mour kin kasalehda kesempwalpen Mahsen en Koht. Soangen wiepen padahk wet sang Mahsen en Koht kin kamwakid irail me mohngiong mehlel kan en kaudokiong Koht mehlel oh ieias me iei Siohwa.—Ser. 10:10.