‘Rongamwahu Wet Pahn Lohkseli’!
1. Ia duwen atail ese me sohte mehkot kak kauhdi doadoahk en kalohk?
1 Sohte mehkot kak kauhdi Siohwa sang kapwaiada kupwure. (Ais. 14:24) Mendahki eh mwomwen me e pahn apwal ong Sounkopwung Kidion oh nah ohl 300 ko en kana ni arail mahweniong mehn Midian 135,000 ko, Siohwa mahsanihong ih: “Kohwei, oh sang ni omw kehl koaros kapitala Israel sang mehn Midian akan. Ngehi me kadaruhkewei.” (Sounkopwung 6:14) Doadoahk dahieu me Siohwa kin ketin utung rahnwet? Sises mahsanih: “Rongamwahu en Wehin Koht pahn lohkseli wasa koaros nin sampah.” (Mad. 24:14) Sohte me pahn kak kauhdi sapwellime doadoahk en dehr pweida!
2. Dahme kahrehda kitail kak kasik me Siohwa pahn ketin sewese emenemen kitail nan kalohk?
2 Siohwa Kin Ketin Sewese Emenemen Kitail: Mendahki kitail kin kamehlele me Siohwa pahn ketin sewese sapwellime Sounkadehde kan nin duwen pwihn ehu, kitail kak kasik me Siohwa pahn ketin sewese emenemen kitail? Erein ahnsou ehu me Pohl anahne sawas, e pehm me Siohwa kin ketin doadoahngki sapwellime Ohlo Sises pwehn sewese ih. (2 Tim. 4:17) Kitail pil kak kamehlele me Siohwa pahn ketin kapaiada emenemen kitail ni atail kin nannanti pwehn kapwaiada kupwure.—1 Sohn 5:14.
3. Nan soangen irair dah kei me Siohwa kin ketin sawas?
3 Ia duwe, pwunod en ehuehu rahn kin kihsang omw kehl en iang kalohk? “E kin ketin kakehlahda me luwet” akan. (Ais. 40:29-31) Ke kin lelohng uhwong oh kalokolok? “Mweidohng KAUN-O omw kahpwal akan, eri e pahn ketin doareiukala.” (Mel. 55:22) Ekei pak ke kin pehm me ke sohte kak kalohk? “Kohwei! Pwe I pahn seweseiuk pwe ke en kak lokaia.” (Eks. 4:11, 12) Ke kin ahneki kahpwal en soumwahu me kin katikala omw kak iang kalohk? Siohwa kin ketin kesempwalki oh kak ketin doadoahngki omw kin wia uwen omw kak mehnda ma e tikitik.—1 Kor. 3:6, 9.
4. Ia duwen atail kin kamehlele Siohwa pahn kamwakid kitail?
4 Siohwa kin ketin “kapalahr nin lime . . . oh sohte emen kak katokihedi.” (Ais. 14:27) Ni atail kin kamehlele sapwellimen Siohwa kapai nan atail kalohk, eri kitail en kalohk ni eimah sang ni manaman en Siohwa.—Wiewia 14:3.