Doadoahk me Keieu Kaperen
1. Mehnia doadoahk kin wiawi pwehn sewese aramas en esehla Siohwa nan atail ahnsou?
1 Peren laud kipehdi mohngiong en irail ako me kilang kamwahulahn soumwahu kan ni mwehin tepin Kristian ako. (Luk 5:24-26) Nan atail ahnsou, kitail kin peren nan atail doadoahk en sewese meteikan en esehla Siohwa. (Kaud. 22:1, 2, 17) Ia uwen eh kaperen en kin wadek rohng kan me kin kasalehda sapwellimen Siohwa Mahsen oh manaman eh kin wekidala mour en aramas akan! Ahpw me keieu kaperen iei en iang kisehn doadoahk wet ni omw kin wia onop en Paipel kaukaule oh e kin kekeirda.
2. Soangen peren dah kitail kin ahneki ni atail kin padahkihong emen padahk mehlel?
2 Ia mwaren Koht? Dahme kahrehda e ketin mweidohng me suwed en mihmihki? Dahme Wehin Koht pahn wiahiong tohnsampah? Kitail sohte kin perenkihte atail sapengla peidek pwukat ahpw kitail pil kin peren ni atail kin kilang peren me tohnsukuhlo kasalehda ni eh kin sukuhlki duwen padahk mehlel. (Lep. Pad. 15:23; Luk 24:32) Ni tohnsukuhl men eh kin kekeirda, e pahn kin tepida doadoahngki mwaren Siohwa, wekidala mwomwen eh likou oh kapwat, uhdihsang wiewia keper kan oh tepida kalohk ong meteikan. Ma e kekeirda oh wiahda eh inou oh papidaisla, e pahn wiahla riatail de iengetail tohndoadoahk. Ehuehu ewen kahk pwukat kin wia kahrepen atail kin peren.—1 Des. 2:19, 20.
3. Dahme kitail kak wia pwehn tapiada ehu onop en Paipel?
3 Ke Kak Iang Wia Doadoahk Wet? Ma ke men iang wia doadoahk me keieu kaperenet, peki rehn Siohwa kapai wet en wia onop en Paipel, oh omw wiewia en pahrekiong omw kapakap. (1 Sohn 5:14) Kalohk ahnsou oh wasa me aramas kak dierek ie. Ahnsou koaros me konehng, kangoange irail en onop Paipel. (Ekl. 11:6) Ni omw kin diar emen me perenki rong oh padokedi weren padahk mehlel reh, pwurehng pwurala pwehn kalamwur.—1 Kor. 3:6-9.
4. Dahme kahrehda kitail en ahneki madamadau en karuwaru ni atail nantihong kangoange meteikan en onop Paipel?
4 Mie aramas tohto me kin men esehla dahme pwung. Ihs me pahn sewese kaitarala arail anahn en esehla Siohwa? (Seims 4:8; Mad. 5:6) Kitail en toukihda pein kitail pwehn sewese kanekehla doadoahk en kalohk oh katohnpadahk mwohn ahnsoun dondol eh pahn imwisekla.—Ais. 6:8.