Diar Peren nan Doadoahk en Katohnpadahk
“Kohwei wasa koaros oh padahkihong tohn wehi kan koaros; pwe re en wiahla nei tohnpadahk.”—MAD. 28:19.
1-3. (a) Ia pepehm en me tohto ni arail kin onop Paipel rehn meteikan? (b) Soangen peidek dah kan kitail pahn koasoiapene?
EMEN sister me iang mwomwohdisohn Kristian en lokaiahn Hindi nan Wehin Amerika ntingihdi: “Kereniong sounpwong siluh I kin wie onohnop rehn peneinei en Pakistan ehu. Eri re wialahr kompoakepahi mehlel kei. Pilen mesei kat kin kereda ni ei kin medewehla me irail pahn kereniong pwurala Pakistan. Ahpw met kaidehn ongete arail pahn samwalahr ahpw e kin pil kohsang peren me I ahneki ahnsou me I kin padahkihong irail duwen Siohwa.”
2 Mie pak ke ahneki soangen peren me duwehte en sister menet me kin kohsang onop en Paipel rehn emen? Sises oh sapwellime tohnpadahk kan kin diar peren laud nan arail doadoahk en katohnpadahk. Ni ahnsou me tohnpadahk 70 me Sises kasukuhlihada pwurodo oh koasoia duwen kaperen en arail doadoahko, pein Sises pil “direkihla peren laud en nan kupwure.” (Luk 10:17-21) Pil duwehte rahnwet, tohto kin diar peren nan doadoahk en katohnpadahk. Nan pahr 2007, sounkalohk pwerisek oh peren kan kin wia onop en Paipel rehn aramas wene rar lime lopw nan ehuehu sounpwong.
3 Ahpw mie ekei sounkalohk kan me saikinte iang ahneki peren en wia onop Paipel. Ele ekei saikinte wia met nan pahr kan me neklahr. Soangen kahpwal dah kan me kitail kin lelohng ni atail kin nantihong wia onop en Paipel rehn meteikan? Ia duwen kitail kak powehdi kahpwal pwukat? Oh soangen kating dah kan kitail kin ale ni atail wia uwen atail kak en peikihong sapwellimen Sises kaweid en “kohwei wasa koaros oh padahkihong tohn wehi kan koaros; pwe re en wiahla nei tohnpadahk”?—Mad. 28:19.
Soangen Kahpwal kan me Kak Kihsang Atail Peren
4, 5. (a) Ia duwen me tohto nan sahpw akan kin mwekidki atail doadoahk en kalohk? (b) Kahpwal dahkei me sounkalohk kan kin lelohng nan ekei wasa?
4 Nan ekei sahpw akan, aramas akan kin perenki ale neitail pwuhk kan oh kin men onopki Paipel rehtail. Pwopwoud ehu sang Australia me met kin wia doadoahk en kalohk nan Zambia ntingihdi: “Ei, e mehlel me Zambia uhdahn wia wasa kaselel ehu en kalohk. Kalohk pohn ahl akan uhdahn kaperen! Aramas akan kin kohdo reht, oh ekei kin idek duwen nait makasihn kan.” Nan ehu pahr ko me nekilahr, riatail kan nan Zambia kin onop rehn aramas 200,000. Met kin wehwehki me emen sounkalohk kin onop Paipel rehn aramas tohto sang emen.
5 Ahpw nan ekei wasa, sounkalohk kan kin apwaliki kihla pwuhk oh pil onop Paipel kaukaule rehn meteikan. Dahme kahrehda? Pak tohto, aramas akan sohte kin mi ni imwarail kan ahnsou me sounkalohk kan kin lella wasa ko, oh me re kin tuhwong kan sohte kin nsenohki duwen mehkan me pidada palien lamalam. Mwein re tikida nan peneinei ehu me sohte mie arail palien lamalam, de ele re kailongkihlahr tiahk en mwalaun me re kin kilang nan kaudok likamw akan. Ahn aramas akan arail irair en kaudok ong Koht kin rasehng pelin sihpw me sohte silepahr oh sohla epwelparail. (Mad. 9:36) Ihme kahrehda soangen aramas pwukat sohte kin perenki koasoia mehkot me pidada Paipel.
6. Soangen pepehm en sou itar dah me ekei kin ahneki?
6 Ekei sounkalohk lelepek kan kin lelohng soangsoangen kahpwal teikan me kakete kihsang arail peren. Mahs re kin pwerisek nan doadoahk en kalohk ahpw met irail sohla pwehki soumwahu de mahla. Pil medewehla ekei mehn kerempwa teikan me kitail kak ahneki. Karasepe, ke kin pehm me ke sohte kak en wia onop en Paipel rehn meteikan? Ele omw pepehm kin duwehte en Moses ni ahnsou me Siohwa poangoak ong ih en kohla rehn Parao. Moses ahpw patohwan: “Maing, KAUN, komw dehr ketin poaroneiehla. I sohte kin kak pato mwohn pokon, a met ni omwi pil mahseniong ie, I pil sohte kakohng. I me soakoahiek en pato, oh loweiet me toutou.” (Eks. 4:10) Pepehm en sou itar kak duwehte pepehm en sohte kak pweida. Ele kitail pehm me kitail sohte wia sounpadahk unsek kei kahrehda kitail kin pwunodki me kitail sohte kak sewese irail en wiahla tohnpadahk emen. Eri kitail kin pilada en dehr wia onop en Paipel rehrail pwehki kitail sohte men ahneki pepehm wet. Ia duwen kitail kak powehdi met?
Kaunopada Omw Mohngiong
7. Dahme kin kamwakid Sises nan sapwellime doadoahk en kalohk?
7 Keieu en kahk me kitail en wia iei en kaunopada atail mohngiong. Sises mahsanih: “Aramas mwahu men kin kapwarehda mehkan me mwahu pwehki eh mohngiong direki me mwahu.” (Luk 6:45) Pepehm en nsenohki meteikan kin kamwakid Sises nan sapwellime doadoahk en kalohk. Karasepe, ni ahnsou me e mahsanihada en mehn Suhs kan kin dohlahsang Koht, “e kin kupwureirailla.” E mahsanihong sapwellime tohnpadahk kan: “Rahket me inenen laud. . . . Kumwail eri kapakap oh peki rehn Kaunen rahket pwe en ketin kadarodo tohndoadoahk tohto pwe re en iang doadoahk.”—Mad. 9:36-38.
8. (a) Dahme kitail anahne medemedewe? (b) Dahme emen tohnsukuhl en Paipel koasoia kak padahkihong kitail?
8 Ni atail kin wia doadoahk en katohnpadahk, e mwahu kitail en kin medewe ia uwen laud atail kin paiekihda pwehki emen kihong eh ahnsou pwehn onop Paipel rehtail. Pil medewe duwen aramas akan kitail tuhwong nan kalohk oh ia uwen arail pahn paiekihda rong padahk me kitail kin wahla rehrail. Emen lih ntingla ni ohpis en Sounkadehdehn Siohwa kan nan wasa me e kin kousoan ie: “I men ndahiong kumwail ia uwen ei kalahnganki Sounkadehde kan me kin kohdo onop rehi ni imweio. Ele mie pak re kin pwangahkihda ei kin kalapw idek peidek oh kahrehiong irail en mihmi werei. Ahpw re kin inenen kanengamahiong ie oh perenki ehukihong ie dahme re sukuhlki. I kalahngankihong Siohwa oh Sises pwehki ei esehla irail.”
9. Dahme Sises kin ketin kilengwohng? Ia duwen kitail kak kahlemengih ih?
9 Kaidehn koaros kin pwungki sapwellimen Sises padahk kan. (Mad. 23:37) Ekei kin idawehn ih erein ahnsou kis ahpw mwuri solahr pwungki ekei sapwellime padahk kan oh “solahr men idawehn.” (Sohn 6:66) Ahpw Sises sohte ketin mweidohng met en kahrehiong ih en ahneki pepehm me sapwellime padahk kan sohte katepe. Mendahki ma ekei war kan me e ketin kamwerehdi sohte kapwarehda wah, Sises ketin kilangwohngete kamwahupen doadoahk me e kin ketin wia. E mwahngih me mwaht akan mwahuwongehr en dondol oh ketin kupwurperenkihda eh sewese doadoahk wet. (Wadek Sohn 4:35, 36.) Ahpw ia duwe, kitail kak kilengwohng atail wasahn kalohk me ehu rahn e kak wiahla wasahn dondol mwahu ehu, ahpw dehr medemedewehte me e sohte wia pwelmwahu? Kitail tehk ia duwen kitail kak kolokol madamadau pwung ong met.
Kalohk Pwe Ken Onop Paipel Rehn Meteikan
10, 11. Dahme ke kak wia pwehn kolokol omw peren?
10 Soumwet men kin padokedi war kan pwehn dolung wah kan ehu rahn. Pil duwehte, kitail anahne en kalohk pwe kitail en tapihada onop Paipel rehn meteikan. Ahpw ia duwen ma ke kin kaukaule kalokalohk ahpw sohte kalapw diarada aramas nan imwarail akan de pil sohte kak pwurehng tuhwong irail akan me ke tuhwong mahs? Met kin inenen kaweikek. Met pahn kahrehda ken sohla iang kalohk? Uhdahn soh! Kitail kin pwurepwurehng tuhwong aramas tohto sang ni elen kalohk wet me kitail wiewia sangete mahs.
11 Pwehn kolokol atail peren, kitail kak katehlapahla wiepen atail kalohk, ele ni atail pahn kapatahiong ekei ahl akan pwehn kak tuhwong aramas akan? Karasepe, ke iangehr kalohk ong aramas akan pohn ahl akan de nan wasahn arail doadoahk kan? Ke kak doadoahngki telephone oh eker aramas akan de ale nempehn telephone sang irail akan me ke kalohk ong pwehn kak koasoi ong irail mwuhr? Sang ni ahmw kin kasalehda omw poadidi oh koahiek en padahk nan kalohk, ke pahn perenkihda diar irail akan me kin mwekidki rongamwahu en Wehio.
En Dadaurete Ni Aramas akan Ar Sohte Nsenohki
12. Dahme kitail en wia ma tohto nan atail wasahn kalohk sohte kin nsenohki rong?
12 Ia duwen ma tohto nan ahmw wasahn kalohk sohte kin nsenohki palien lamalam? Ke kak katapiada ahmw koasoi ni ahl ehu me pahn kahrehiong irail en men rong? Wahnpoaron Pohl ntingwohng rie Kristian kan nan Korint: “I wiahkin ie mehn Suhs emen nindokon ei kin doadoahk rehn mehn Suhs akan. . . . Pil duwehte, rehn mehn liki kan me sohte mihmi pahn Kosonnedo, I wiahkiniehla aramas me sohte mi pahn Kosonned en mehn Suhs kan.” Dahme kahrehda Pohl ndahki met? E koasoia: “Eri, I wialahr soahng koaros rehn aramas koaros, pwe I en komourala ekei irail nin duwen eh kak pahi.” (1 Kor. 9:20-22) Ia duwe, kitail kak wia duwehte met oh rapahki ire kan me aramas akan nan atail wasahn kalohk pahn men rong? Aramas tohto me sohte kin perenki sarawi kin men kamwahwihala nanpwungen arail peneinei. Ele irail kin pil raparapahki ia kahrepen mour. Ia duwen, kitail kak ehukihong irail duwen rongamwahu en Wehio ni ahl ehu me re pahn men rong?
13, 14. Ia duwen atail kak kalaudehla atail peren en wia doadoahk en katohnpadahk?
13 Tohtohla sounkalohk kan kin kalaudehla arail peren sang arail doadoahk en katohnpadahk, mehnda ma ekei wasa, pali laud en aramas akan sohte kin nsenohki rong. Ia duwen? Sang arail kin sukuhlki ehu lokaia tohrohr. Pwopwoud ehu me mahki sounpar 60 diarada me mie tohnsukuhl en China oh arail peneinei kid kei kin kousoan nan wasa me ara mwomwohdiso kin kalohk ie. Ohlo koasoia: “Pwehki met, e kangoange kiht en sukuhlki lokaiahn China. Mehnda ma se doadoahngkihla ahnsou laud rahn koaros pwehn sukuhlki lokaia wet, se ahneki peren pwe se kakehr onop Paipel rehn mehn China tohto nan at wasahn kalohk.”
14 Mehnda ma ke sohte kak sukuhlki ehu lokaia tohrohr, ke kak doadoahngki kisin pwuhk me oaralap Rongamwahu ong Aramas en Wehi Koaros (Good News for People of All Nations) ni ahmw pahn tuhwong irail akan me lokaiahki ehu lokaia tohrohr. Ke pil kak ale oh doadoahngki sawaspen Paipel kan me mi ni arail lokaia. Mehlel me ahnsou oh doadoahk laud kin anahn pwehn koasoiong irail kan me arail lokaia oh tiahk kan weksang atail. Ahpw dehr pohnsehsehla mouren kaweid wet nan Mahsen en Koht: “Aramas me kin kamwarak werentuhke tohto, eh pahn dolung wa tohto.”—2 Kor. 9:6.
Tohnmwomwohdiso Pwon Iang Sawas
15, 16. (a) Dahme kahrehda tohnmwomwohdiso pwon kin iang pidada katohnpadahk? (b) Sawas dahieu me irail me mah kan kin kihda?
15 En katohnpadahk kaidehn doadoahk en aramas tehmen. Ahpw koaros tohnmwomwohdiso kin iang sawas. Dahme kahrehda? Sises mahsanih: “Pwe ihme aramas koaros pahn esehki me kumwail nei tohnpadahk, ma kumwail pahn limpoakpene.” (Sohn 13:35) Ei, ni ahnsou me tohnsukuhl en Paipel kan kin iang towehda mihting kan, irail kalapw mwekidki limpoak me kin sansalda nan mwomwohdiso. Emen tohnsukuhl en Paipel ntingihdi: “I kin uhdahn perenki towehda mihting kan. Aramas kan wasao kin inenen kadek ong ie!” Sises mahsanih me irail kan me wiahla sapwellime tohnpadahk kak ale uhwong sang rehn arail peneinei kan. (Wadek Madiu 10:35-37.) Ahpw e ketin inoukihda me nan mwomwohdiso, e pahn tohtohla ‘riarail, inarail, oh neirail kan’ me kin ahneki nanpwungmwahu rehn Siohwa.—Mark 10:30.
16 Riatail brother oh sister me mah kan kin kihda sawas laud ong kekeirdahn tohnsukuhl en Paipel kan. Ni ahl dahieu? Mendahki irail sohte kak wia onop en Paipel rehn ekei, arail pasapeng kangoang kan nan mihting en mwomwohdiso kan kin kakehlaka pwoson en koaros me kin rong irail. Arail momourki mour “pwung” ahnsou reirei kin wahdo lingan ong mwomwohdiso oh kamwakid me mohngiong pwung kan ong sapwellimen Koht pwihn.—Lep. Pad. 16:31.
Powehdi Masak
17. Dahme kitail kak wia pwehn powehdi pepehm en soakoahiek?
17 Ia duwen ma ke medewe me ke soakoahiek en wia onop en Paipel rehn emen? Tamanda me Siohwa kin ketin sewese Moses ni e ketikihong ih sapwellime manaman oh pil rie ohl Aaron pwehn sewese ih. (Eks. 4:10-17) Sises ketin inoukihda me sapwellimen Koht manaman pahn sewese kitail nan doadoahk en kalohk. (Wiewia 1:8) Sises pil kin ketin koasoanehdi en kin wad riemen nan kalohk. (Luk 10:1) Eri ma e apwal en wia onop en Paipel rehn emen, kapakap oh peki sapwellimen Koht manaman en sewese kin uhk erpit. Iang emen me kak kangoange iuk oh ahneki koahiek pwehn seweseiuk. E kin kakehlaka atail pwoson en tamanda me Siohwa kin ketin pilada “me luwet akan” en sampah pwehn kapwaiada doadoahk kesempwal wet.—1 Kor. 1:26-29.
18. Ia duwen kitail kak powehdi pepehm en sohte pweida?
18 Ia duwen kitail kak powehdi pepehm en sohte pweida? E pahn mwahu en tamanda me en katohnpadahk sohte duwehte wiahda mwenge me kin poahsoandahte sang pweidahn doadoahk en soun wia mwengeo kelehpw. Ahpw katohnpadahk kin pidada laudsang doadoahk en emente. Siohwa me kin ketin wia pali me keieu kesempwal ni e kin kahluwa emen en karanihala ih. (Sohn 6:44) Kitail oh meteikan nan mwomwohdiso kin wia uwen me kitail kak en doadoahngki wiepen padahk kan pwehn sewese kekeirdahn tohnsukuhl emen. (Wadek 2 Timoty 2:15.) Oh tohnsukuhlo anahne en kapwaiada dahme e sukuhlki. (Mad. 7:24-27) E kansensuwed ma emen kin uhdihsang eh onopki Paipel. Se koapworopworki me tohnsukuhlo pahn wiahda pilipil pwung, ahpw “emenemen kitail uhdahn pahn wehkohng Koht duwen pein ih.”—Rom 14:12.
Kapai Kan
19-21. (a) Soangen kapai dah kan me kitail kin alehdi ni atail onop Paipel rehn meteikan? (b) Ia duwen Siohwa kin kilangwohng koaros me kin iang doadoahk en kalohk?
19 En onop Paipel rehn aramas kan pahn sewese kitail en rapahki mahs Wehio. E pil kin katengehdi laud padahk mehlel nan atail madamadau oh mohngiong. Dahme kahrehda? Emen pioneer me adaneki Barak koasoia: “En onop Paipel rehn meteikan kin kahrehiong uhk en wiahla tohnsukuhl mwahu men en Mahsen en Koht. I diarada me I anahne kakehlailihala dahme I kamehlele mwohn ei pahn kak padahki emen tohrohr.”
20 Ma ke sohte kak diar emen ken onop Paipel reh, met wehwehki me omw kaudok ong Koht sohte katepe? Soh! Siohwa kin ketin kalahnganki atail doadoahk en kapinga ih. Koaros me iang doadoahk en kalohk kin wia “tohndoadoahk kei me kin iang Koht.” Atail onop Paipel rehn emen kin kalaudehla atail peren ni atail kilang duwen en Koht kin ketin kahrehda waro me kitail padokedi en kekeirda. (1 Kor. 3:6, 9) Emen pioneer me adaneki Amy koasoia: “Ni omw kilang emen tohnsukuhl en Paipel kin kekeirda, omw kalahngan ong Siohwa kin laudla mehlel pwehki e ketin doadoahngki iuk en kihong aramaso kisakis kaselel ehu me iei en esehla Siohwa oh ale mour soutuk.”
21 En wia uwen atail kak pwehn tepiada onop en Paipel rehn meteikan pahn sewese kitail en kilangwohngete papah Koht ahnsou wet oh kakehlaka atail koapworopwor en iang paieki sampah kapw. Ki sapwellimen Siohwa sawas, ele kitail kak sewese doarehla irail akan me kin men rong. (Wadek 1 Timoty 4:16.) Met wia kahrepe mwahu ehu kitail en peren!
Ke Tamataman?
• Kahpwal dah kei me kak kerempwa emen en onop Paipel rehn meteikan?
• Dahme kitail kak wia ma pali laud en aramas nan atail wasahn kalohk sohte kin nsenohki sarawi?
• Soangen kating dah kan me kitail kin alehdi ni atail onop Paipel rehn meteikan?
[Kilel kan nan pali 13]
Ke kin kalaudehla wiepen omw kalohk pwehn diar me mohngiong pwung kan?