Sewese Tohnihmwo en Medemedewe
1. Soangen padahk dah me keieu mwahu nan doadoahk en kalohk?
1 Mehnia elen padahk me pahn pweida mwahu nan kalohk—ehu me sohte kin mweidohng tohnihmwo en kasalehda eh madamadau de ehu me pahn sewese ih en medemedewe oh sapeng peidek kan ni pwung? Wahnpoaron Pohl kin padahk ong mehn Suhs nan Deselonika ni ahl mwahu wet oh met kin imwikihla “ekei irail ahpw kamehlele.” (Wiewia 17:2-4) Dahme kin pidada omw kin padahk ong meteikan ni ahl me re kak iang koasoi oh kasalehda arail madamadau?
2. Ia duwen atail kak alasang mehn kahlemeng en Pohl ni atail kin kalohki rongamwahu?
2 Medemedewe Arail Pepehm oh Irair en Wasao: Pwehn sewese aramas akan nan atail wasahn kalohk ren kihda arail madamadau oh iang koasoi, kitail anahne medemedewe arail pepehm kan. Pohl tapiada padahk ong mehn Krihk kan nan Areopakus me sohte kin kamehlele Koht sang ni eh koasoia soahng kan me re ese oh pwungki. (Wiewia 17:22-31) Eri, ni omw pahn kaunopada omw padahk kan, medemedewe dahme aramas akan nan omw wasahn kalohk kin kamehlele oh dahme irail sapwungki. (1 Kor. 9:19-22) Ma tohnihmwo pahn sapwungki dahme ke koasoia, eri song en koasoiahte dahme kumwa koaros kamehlele oh wia omw padahko sang ireo.
3. Ia duwen atail doadoahngki mwahu peidek kan kak sewese kitail en padahk ong meteikan?
3 Doadoahngki Mwahu Peidek kan: Kitail sohte kak kaweid soun seiloak men pwe en lella wasa me e pahn kohla ie ma kitail sehse ia wasa e mie. Pil duwehte, kitail sohte kak sewese tohnihmwo en wehwehki atail padahk ma kitail sehse eh madamadau. Mwohn Sises eh pahn ketin padahk ong aramas akan, e kin kalapw doadoahngki peidek kan pwehn esehda madamadau en aramaso. Karasepe, ni ahnsou me emen ohl idek reh, “Dahme I uhdahn pahn wia pwe I en kak ale mour soutuk?,” Sises ketin men ese dahme en ohlo madamadau mwohn eh ketin sapeng eh peideko. (Luk 10:25-28) Pil ahnsou me Piter kihda pasapeng sapwung, Sises ketin doadoahngki mwahu peidek kan oh kapwungala eh madamadau. (Mad. 17:24-26) Eri, ma tohnihmwo idek peidek ehu de kasalehda madamadau sapwung, kitail kak doadoahngki peidek kan pwehn sewese ih en medemedewe ire kan.
4. Dahme kahrehda kitail anahne sewese tohnihmwo en medemedewe atail padahk kan?
4 Ni ahnsou me kitail kin sewese tohnihmwo en medemedewe atail padahk kan, kitail kin alasang Sounpadahk Lapalapo, Sises, oh pil ekei sounkalohk koahiek kan ni mwehin tepin Kristian kan. Kitail kin kasalehda kadek oh wahu ong tohnihmwo. (1 Pit. 3:15, 16) Imwilahn met, tohnihmwo pahn perenki mweidohng kitail en pwurala reh.