Ke Kin Ale Kasukuhl Sang Rehn Siohwa ni Uwen Omw Kak?

1. Ia duwen Siohwa eh kin ketin kilangwohng kasukuhl?

¹ Siohwa atail Sounpadahk Lapalap ketin kupwurki “padahkih” kitail. (Ais. 30:20) E ketin tapiada kasukuhl mwurin e ketin kapikada sapwellime Meseniho. (Sohn 8:28) Mwurin Adam eh pelianda Koht, Siohwa sohte ketin uhdihsang wia kasukuhl. E kin ketikihda kaweid ong aramas soh unsek kan.—Ais. 48:17, 18; 2 Tim. 3:14, 15.

2. Soangen kasukuhl dah me wiewiawi met?

² Rahnwet, Siohwa kin ketin kaukaweid koasoandi en kasukuhl me keieu laud nan poadopoad. Nin duwen Aiseia kohpada, meh rar kei nan sampah kin kohla ni nahnao me tehnpas en Siohwa mi ie. (Ais. 2:2) Dahme irail kohlahng wia? Irail kolahng ale kasukuhl sang rehn Siohwa. (Ais. 2:3) Nan pahr en kalohk 2010, Sounkadehdehn Siohwa kan kin wiahda mpen awahn kalohk lik wenesapw, padapadahkihong aramas akan padahk mehlel en Paipel. Patehng met, ehuehu wihk, mie kasukuhl en Paipel me kin wiawi nan mwomwohdiso daulih lopw limekid (105,000) nan sampah. Pil mie pwuhk kan me wia sawaspen Paipel me pwihn en ladu lelepek oh loalokong kin wiahda ni lokaia daulih 500.

3. Ia duwen omw iang paiekihda kasukuhl me Siohwa ketikihda?

³ Paiekihda Laud: Kitail inenen paiekihda atail kin ale kasukuhl sang rehn Koht. Kitail sukuhlkier me mie mwaren Koht oh me e kin ketin nsenohkin kitail. (Mel. 83:18; 1 Pit. 5:6, 7) Kitail sukuhlkier pasapengpen ekei peidek kesempwal kan en mour, duwehte: Dahme kahrehda aramas kin lokolok oh mehla? Ia duwen ei kak ahneki peren mehlel? Ia kahrepen mour? Siohwa ketikihongehr kitail kaweid pwe kitail en kak “pweida.”—Sos. 1:8.

4. Soangen kasukuhl tohrohr dah kan me mie ong sapwellimen Koht ladu kan? Dahme kahrehda kitail anahne sukuhlki uwen atail kak sang rehn Siohwa?

⁴ Patehng met, Siohwa ketikihdahr kasukuhl tohrohr pwehn sewese sapwellime ladu tohto ren kak kalaudehla arail papah ih. Pali 4-6 kasalehda ekei mehn kasukuhl pwukat. Mendahki ma atail irair kan kahrehda kitail sohte kak alehdi ekei kasukuhl pwukat, ia duwe, kitail kin isaneki kasukuhl kan me mieier rehtail? Sounpadahk kan nan sukuhl oh meteikan kin kalapw kangoange neitail me pwulopwul kan ren kohla sukuhl laud. Eri ia duwe, kitail kin kangoange irail ren wiahda mehn akadei en papah Koht oh alehdi kasukuhl me keieu mwahu sang reh? En sukuhlki uwen atail kak sang rehn Siohwa pahn sewese kitail ahneki mour nsenamwahu ahnsou wet oh pil kohkohlahte.—Mel. 119:105; Sohn 17:3.

Ekei Kasukuhl kan nan Sapwellimen Siohwa Pwihn

Kasukuhl en Esehla Nting oh Wadawad

• Kahrepe: Pwehn kasukuhlih aramas ren esehla nting oh wadawad pwe ren kak wia pein arail onop Paipel oh padahkihong meteikan duwen padahk mehlel.

• Ia Uwen Werei: Nin duwen me anahn.

• Ia Wasa: Nan atail Wasahn Kaudok.

• Ihs me Kak Iang: Sounkalohk kan oh me kin onop Paipel kan.

• Ia Duwen Omw Kak Iang: Elder kan nan mwomwohdiso kin koasoanehdi kasukuhl pwukat ma mie anahnepe oh kin kangoange koaros me kak paiekihda ren iang towehda.

Sukuhl ong Sapwellimen Koht Doadoahk

• Kahrepe: Pwehn kasukuhlih sounkalohk kan ren koahiekla nin duwen sounkalohk oh sounpadahk kan en rongamwahu en Wehio.

• Ia Uwen Werei: Erein.

• Ia Wasa: Nan atail Wasahn Kaudok.

• Ihs me Kak Iang: Sounkalohk kan koaros oh pil irail kan me kin werekiong mwomwohdiso, me kin pwungki padahk kan nan Paipel, oh me arail mour kin pahrekiong kaweid kan en Paipel.

• Ia Duwen Omw Kak Iang: Koasoiong sounapwalih en Sukuhl ong Sapwellimen Koht Doadoahk.

Sukuhlki Ehu Lokaia Tohrohr

• Kahrepe: Pwehn kasukuhlih sounkalohk kan ren kalohki rongamwahwo nan ehu lokaia tohrohr.

• Ia Uwen Werei: Sounpwong pahieu de limau. Sukuhl kin kalapw wiawi ni menseng en Rahn Kaunop erein awa ehu de riau.

• Ia Wasa: Nan atail Wasahn Kaudok.

• Ihs me Kak Iang: Sounkalohk adamwahu kan me men kalohk ong irail kan me kin doadoahngki lokaia en sahpw teikan.

• Ia Duwen Omw Kak Iang: Ohpis en Sounkadehdehn Siohwa kan nan wasao me pahn koasoanehdi ma anahnepe mie.

Kokoudahn Wasahn Kaudok kan

• Kahrepe: En kauwada oh onohnsapahlda Wasahn Kaudok kan. Met kaidehn sukuhl ieu, ahpw irail sounsawas kan me kin toukihda arail ahnsou ren iang koasoandi wet kin ale kasukuhl ong soahng tohto pwehn kak sewese kokoudahn ihmw kan.

• Ia Uwen Werei: Pahsan irair en sounsawas me toukihda eh ahnsou.

• Ia Wasa: Wasa kan me mi pahn epwelpen Pwihn me kin apwalih kokoudahn Wasahn Kaudok kan. Ekei me kin toukihda arail ahnsou kak iang sawas wasa doh kan me kahpwal kan lelohng duwehte melimel, rerrer en sahpw ape.

• Dahme Emen Anahne Wia: Riatail Kristian kan anahne wia emen me papidaisehr oh me pwihn en elder kan pwungki. E kak mie arail koahiek de soh.

• Ia Duwen Omw Kak Iang: Audehda doaropwe me adaneki Kingdom Hall Volunteer Worker Questionnaire (S-82) sang rehn elder kan nan mwomwohdiso.

Sukuhl en Pioneer

• Kahrepe: Pwehn sewese pioneer kan ren kapwaiada ni unsek arail pwukoa en kalohk.—2 Tim. 4:5.

• Ia Uwen Werei: Wihk riau.

• Ia Wasa: Ohpis en Sounkadehdehn Siohwa kan nan wasao me pahn koasoanehdi. E kin kalapw wiawi ni atail Wasahn Kaudok.

• Dahme Emen Anahne Wia: Ong irail kan me iangehr pioneer sounpar ehu de tohto sang.

• Ia Duwen Omw Kak Iang: Sounapwalih me kin seiloak kin kairehkin irail kan me iangehr pioneer erein sounpar ehu de tohto sang.

Sukuhl ong me Kapw kan nan Pedel

• Kahrepe: Kasukuhl wet kin wiawihda pwehn sewese irail me kapw kan nan Pedel pwe ren kak pweida nan arail doadoahk wasao.

• Ia Uwen Werei: Awa ehu nan ehuehu wihk erein wihk eisek weneu.

• Ia Wasa: Pedel.

• Dahme Emen Anahne Wia: Anahne wia kisehn tohnpeneinei en Pedel ahnsou werei de pahn mihmihki nan Pedel erein sounpar ehu de tohto sang.

• Ia Duwen Omw Kak Iang: Towe kan nan Pedel me kak iang.

Sukuhl ong Elder kan oh Sounsawas kan

• Kahrepe: Pwehn kaiahne elder kan oh sounsawas kan ren ese wia arail pwukoahn apwalih mwomwohdiso. (Wiewia 20:28) Pwihn me Kin Apwalih Mwomwohdiso nan Sampah Pwon iei me kin koasoanehdi iahd me e pahn wiawi.

• Ia Uwen Werei: Nan sounpar samwalahr ko, e kin wiawihki rahn ehu elep ong elder kan, a rahn ehu ong sounsawas kan.

• Ia Wasa: Atail Wasahn Kaudok de Kapokon kan.

• Dahme Emen Anahne Wia: Emen anahne wia emen elder de sounsawas men.

• Ia Duwen Omw Kak Iang: Sounapwalih me kin seiloak me kin luke elder kan oh sounsawas kan ren iang.

Sukuhl en Elder kana

• Kahrepe: Pwehn sewese elder kan ren ese wia arail pwukoa nan mwomwohdiso.

• Ia Uwen Werei: Rahn limau.

• Ia Wasa: Ohpis en Sounkadehdehn Siohwa kan nan wasao me pahn koasoanehdi. E kin kalapw wiawi ni atail Wasahn Kaudok de Kapokon kan.

• Dahme Emen Anahne Wia: Emen anahne wia emen elder.

• Ia Duwen Omw Kak Iang: Ohpis en Sounkadehdehn Siohwa kan nan wasao me kin luke elder kan en iang.

Sukuhl ong Sounapwalih me Kin Seiloak oh Arail Pwoud kanb

• Kahrepe: En sewese sounapwalih kan me kin seiloakla ni mwomwohdiso kan ren koahiekla apwalih mwomwohdiso kan oh pwe ren “doadoahk laudki arail padahk oh peneu,” oh wia sounsilepen mwomwohdiso.—1 Tim. 5:17; 1 Pit. 5:2, 3.

• Ia Uwen Werei: Sounpwong riau.

• Ia Wasa: Ohpis en Sounkadehdehn Siohwa kan nan wasao me pahn koasoanehdi.

• Dahme Emen Anahne Wia: Emen anahne wia emen sounapwalih me kin seiloak.

• Ia Duwen Omw Kak Iang: Ohpis en Sounkadehdehn Siohwa kan nan wasao me kin luke sounapwalih kan me kin seiloak oh arail pwoud kan.

Sukuhl en Paipel ong Brother Kiripw kanc

• Kahrepe: Pwehn kaunopada elder oh sounsawas kiripw kan ren pil alehda ekei pwukoa kan. Pali laud en irail kan me kesepwil sang sukuhl wet pahn pekederla wasa kan me anahne sawas nan sapwarail. Ekei rehrail ele pahn pekederla nan ehu sahpw tohrohr ma re kak.

• Ia Uwen Werei: Sounpwong riau.

• Ia Wasa: Ohpis en Sounkadehdehn Siohwa kan nan wasao me pahn koasoanehdi. E kin kalapw wiawi ni atail Wasahn Kaudok de Kapokon kan.

• Dahme Emen Anahne Wia: Brother kiripw kan sang sounpar 23 lel 62 oh me ahneki roson mwahu me men papah wasa kan me anahnepe mie ong doadoahk en Wehio. (Mark 10:29, 30) Re anahne wiewiahte elder de sounapwalih erein sounpar riau.

• Ia Duwen Omw Kak Iang: Ma sukuhl wet kin wiawi wasa kan me ohpis en Sounkadehdehn Siohwa kan nan wasao kin apwalih, mihting pahn wiawi ong irail kan me men iang ni ahnsoun kapokon kan. Ire teikan me pid met pahn kohda erein mihtingo.

Sukuhl en Paipel ong Pwopwoud Kristian kand

• Kahrepe: Pwehn kihong kasukuhl tohrohr ong pwopwoud kan pwe sapwellimen Siohwa pwihn en kak doadoahngki irail. Pali laud en irail kan me kesepwil sang sukuhl wet pahn pekederla wasa kan me anahne sawas nan sapwarail. Ekei rehrail ele pahn pekederla nan ehu sahpw tohrohr ma re kak.

• Ia Uwen Werei: Sounpwong riau.

• Ia Wasa: Tepin pwihn en kasukuhl pwukat wiwiawi nan Watchtower Educational Center nan Patterson, New York nan Amerika. Mwurin met, ohpis en Sounkadehdehn Siohwa kan nan ehuehu wasa pahn koasoanehdi ia wasa me met pahn wiawi. Ele e pahn wiawi ni Wasahn Kapokon de Wasahn Kaudok kan.

• Dahme Emen Anahne Wia: Pwopwoud kan sang sounpar 25 lel 50 oh me ahneki roson mwahu me arail irair kak mweidohng irail en papah wasa kan me anahn. Irail anahne ahneki madamadau wet: “Iet ngehi, Maing, komwi ketin poaroneiehla.” (Ais. 6:8) Patehng met, re anahne pwopwoudkier sounpar riau de tohtohsang oh kin doadoahngki pali laud en arail ahnsou ong doadoahk ong Koht oh kin wiewiahte met erein sounpar riau de tohtohsang.

• Ia Duwen Omw Kak Iang: Ma sukuhl wet kin wiawi wasa kan me ohpis en Sounkadehdehn Siohwa kan nan wasao kin apwalih, mihting pahn wiawi ong irail kan me men iang ni ahnsoun mihting tohrohr en rahn ehu. Ire teikan me pid met pahn kohda erein mihtingo.

Sukuhl en Kilead

• Kahrepe: Pwehn kasukuhlih pioneer kan oh irail kan me kin doadoahngki pali laud en ar ahnsou ong doadoahk ong Koht ren wiahla misineri.

• Ia Uwen Werei: Sounpwong limau.

• Ia Wasa: Watchtower Educational Center nan Patterson, New York nan Amerika.

• Dahme Emen Anahne Wia: Ong pwopwoud kan me papidaiskiher sounpar siluh oh re sounpar 21 lel 38 ni ahnsou me re tepin kapidelong neirail doaropwe en pekipek. Irail anahne ese lokaiahn wai, pwopwoudkier sounpar riau de tohtohsang, oh kin doadoahngki pali laud en arail ahnsou ong doadoahk ong Koht oh kin wiewiahte met erein sounpar riau de tohtohsang. Re anahne ahneki roson mwahu. Pioneer kan me papah nan ehu sahpw tohrohr (iangahki misineri kan); sounapwalih me kin seiloak, tohn Pedel, oh irail kan me kesepwilsangehr Sukuhl en Brother kan ong Pwukoa Tohrohr kan, Sukuhl en Paipel ong Brother Kiripw kan, Sukuhl en Paipel ong Kristian Pwopwoud kan pil kak kapidelong neirail doaropwehn pekipek ma re warohng.

• Ia Duwen Omw Kak Iang: Nan ekei ohpis en Sounkadehdehn Siohwa kan nan wasao, mihting ong irail kan me men iang sukuhl wet pahn wiawi ni ahnsoun kapokon kan. Ire teikan me pid met pahn kohda erein mihtingo. Ma sohte soangen mihting wet ni ahnsoun kapokon kan nan omw wasa oh ke men iang, ke kak ntinglahng ohpis en Sounkadehdehn Siohwa kan nan omw wasa.

Sukuhl ong Sounapwalih kan en Ohpis en Sounkadehdehn Siohwa kan oh Arail Pwoud kan

• Kahrepe: Pwehn sewese irail kan me kin apwalih ohpis en Sounkadehdehn Siohwa kan pwehn koahiekla ni arail doadoahk en apwalih imwen Pedel kan, tetehk palien kalohk nan mwomwohdiso kan, apwalih ehuehu wasa de sahpw me re pwukoahki, apwalih palien kawehwe, wiawihdahn oh pekederpeseng en pwuhk kan oh pil pwukoa teikan nan soangsoangen pali kan.—Luk 12:48b.

• Ia Uwen Werei: Sounpwong riau.

• Ia Wasa: Watchtower Educational Center nan Patterson, New York nan Amerika.

• Dahme Emen Anahne Wia: Sounapwalih kan en ohpis en Sounkadehdehn Siohwa kan ong ehuehu wasa, de irail kan me pilipilda ren wia met mwurin sukuhlo me kak iang.

• Ia Duwen Omw Kak Iang:I Pwihn me Kin Apwalih Mwomwohdiso nan Sampah Pwon me pahn luke irail brother kan me kak iang oh arail pwoud kan.

[Nting tikitik me mi pahs]