Sens Toantoal Riau

Ehu ahl kesempwal me kitail kin utung doadoahk en Wehio iei sang ni atail kin kihda sawas en mwohni ong doadoahk en kalohk me kin wiawi nan sampah pwon. Ahpw ia duwen ma kitail sohte naineki mwohni laud?

Ehu pak Sises ketin mahsanihada liohdi semwehmwe men eh kihda sens toantoal riau pwehn wia eh meirong ong tehnpas sarawio. Limpoak ong Siohwa me kamwakid liohdi menet en “sang nan eh paisuwed e kihdi mehkoaros me e ahneki oh kin momourki.” (Mark 12:41-44) Sises mahsanih met pwehn kasalehda me Siohwa kin uhdahn ketin kesempwalki en liohdio eh meirong. Pil duwehte, Kristian kan ni mwein wahnpoaron ko kin medewe me arail kihda sawas en mwohni kin wia kapai ehu. Irail me semwehmwe oh pil me kepwehpwe kan koaros kin kihda uwen me re kak. Wahnpoaron Pohl koasoia duwen mehn kahlemeng mwahu en mehn Masedonia kan me, mendahki arail semwehmwe, re ngidingidkihong ih en ale ar kisakis kan.—2 Kor. 8:1-4.

Eri, ma kitail kak kihda “sens toantoal riau,” kitail en tamataman me kisin meirong kan kak kohpene oh wiahla meirong laud ehu. Atail kihda sawas me kohsang mohngiongitail pahn kaperenda Samatail nanleng me kin kupwursapan, pwe “Koht kin ketin poakohng me kin perenki kihwei mehkot.”—2 Kor. 9:7.