Kadek-Sapan Kin Wahdo Peren
NIN DUWEN sounapwalih en Kristian limpoak emen, Wahnpoaron Pohl kin nsenohki laud ienge kan me iang pwoson. (2 Korint 11:28) Ihme kahrehda, nan pahr 50 samwa en tepin pahr kan en Kristian, Pohl koasoanehdi rikirikpenen mwohni ong Kristian semwehmwe kan nan Sudia, oh e kin doadoahngki ahnsou mwahu wet pwehn padahkih mehn kasukuhl kesempwal ehu duwen kadek-sapan. Pohl kasalehda kesempwalpen kihkihwei ni peren oh e pil kasalehda me met Siohwa kin keieu kesempwaliki: “Eri, emenemen en kihda eh kisakis duwen me e koasoanehdi nan kapehde, kaidehk ni mehnseiren de ni mwomwen idihd; pwe Koht kin ketin poakohng me kin perenki kihwei mehkot.”—2 Korint 9:7.
Semwehmwe, Ahpw Kadek-Sapan
Pali moron en Kristian kan nan tepin pahr sohte kin ndand rehn aramas teikan. Pohl kasalehda me “malaulau nanpwungarail me manaman.” Re kin wia aramas “luwet” oh aramas “mwahl en sampah.” (1 Korint 1:26-28) Karasepe ehu, Kristian kan me kin koukousoan nan Masedonia kin “inenen semwehmwe” oh “mih pahn lokolok.” Mendahki met, mehn Masedonia karakarahk me pwoson ko peki kapai en kihda sawas en mwohni ong “sawas ong me sarawi kan”; oh dahme re kihda, Pohl kasalehda: “laud sang uwen me re kak”!—2 Korint 8:1-4.
Mendahki met, uwen laud en kisakiso kaidehn ihme kin kadehde uwen sapan en kisakiso. Ahpw, dahme kamwekid madamadau en aramaso en kihda kisakiso, oh en aramaso men kisakis oh dahme kamwekid mohngiongih me kesempwal. Pohl kasalehong Kristian mehn Korint kan me madamadau oh mohngiong koaros kin iang pidada kihda kisakis kan. E mahsanih: “Pwe I ese mehlel duwen amwail kin men sawas, oh I kin suweikin kumwail ong mehn Masedonia kan, . . . pwe amwail ngoang kin kamwekidada me tohto rehrail.” Irail Kristian mehn Korint kan ‘koasoanehdier nan kapehdihr’ en kisakiswei ni sapan.—2 Korint 9:2, 7, New World Translation.
‘Me Nsenki’
Wahnpoaron Pohl ele kin medemedewe ehu karasepe mahso duwen kisakiswei ni kadek-sapan, me wiawi nan sapwtehn sounpahr 1,500 samwa mwohn eh ahnsou. Keinek 12 en Israel saledek sangehr ahr sensel nan Isip. Met re miher ni utupen Nahna Sainai, oh Siohwa kehkehlikiong irail en kauwada ehu impwal sarawi ong kaudok oh en audehkihda dipwisoun kaudok kan. Met anahne kepwe tohto, oh wehio ale luhk en kihda sawas.
Iaduwen mehn Israel kan mwekidiki met? “Emenemen nin duwen me e nsenki ahpw patohwanohng Kauno [“Siohwa,” NW] eh meirong mehn wiahda Impwal me Kauno [“Siohwa,” NW] pahn ketiket loale. Re wahdo soahng koaros me anahnepe mie ong ni kaudok oh mehn wia likoun samworo kan.” (Eksodus 35:21) Wehio kihda kisakis sapan? Ehi, uhdahn! Ripoht wet kohwong Moses: “Aramas akan wahpenehr dipwisou tohtohsang me kitail anahne ong doadoahk me Kauno [“Siohwa,” NW] ketin koasoanehdier kitail en wia.”—Eksodus 36:5.
Ia en mehn Israel kan arail irair en palien mwohni oh dipwisou ahnsowo? Sohte werei mwohn mwo, re wia lidu kei, ‘doadoahk apwal kin itonehng irail,’ re ahneki ‘mour apwal en kalidu,’ “mour nan lokolok.” (Eksodus 1:11, 14; 3:7; 5:10-18) Ihme, re sohte kepwehpwe. Mehlel, mehn Israel kan mweselsang sahpw me re kalidu pah ni ahr wahsang pelin sihpw kan, kuht kan, oh kou kan. (Eksodus 12:32) Ahpw, mehpwukat sohte tohto, pwehki mwurinte arail mweselsang Isip, re kompileinki me sohte kanarail uduk oh pilawa.—Eksodus 16:3.
Eri, iawasa mehn Israel ko kihsang ie dipwisou kesempwal kan me re kihda ong kauwada impwal sarawio? Sang rehn mehn Isip ko. Paipel mahsanih: “Mehn Israel ko eri . . . peki rehn mehn Isip ko soangen dipwisou kesempwal me duwehte silper oh kohl oh likou. . . . [Mehn Isip ko] kihong irail dahme re peki.” Wiewiahn kisakis kadek-sapan pwukat me mehn Isip kan wiahda kin wia kapai ehu sang rehn Siohwa, kaidehn sang rehn Parao. Pwuhk Sarawi mahsanih: “Kauno [“Siohwa,” NW] ketin kupwurehla pwe mehn Israel ko en keniken pahn mehn Isip ko, iei me mehn Isip ko kihong irail dahme re pekipeki rehrail.”—Exodus 12:35, 36.
Eri, medewehla, ia pepehm en mehn Israel kan. Dih kan kin ale lokolok sang ni kalidu oh semwehmwe. Ahpw, mwurin mwo, re saledekla oh ahneki kepwe kesempwal tohto. Ia arail pepehm en kihwei ekei kisakis ko? Ele, re kakete lemeleme me re pwainda kisakis pwukat oh re ahneki pwung en nainekihla. Ahpw, ni ahnsou me luhk kohwong irail ren kihda sawas en mwohni oh dipwisou pwehn utungada kaudok mwakelekel, re wia met—kaidehn ni mehnseirin de ni kisekol! Re sohte manokehla me Siohwa me kahrehda ren kak ahneki dipwisou ko. Ihme kahrehda, re kihda silper oh kohl oh mahn tohto. Re “men wia met sang mohngiongarail.” ‘Nsenerail kamwekid irail.’ E uhdahn wia “meirong en tohnmetei ehu ong Siohwa.”—Eksodus 25:1-9; 35:4-9, 20-29; 36:3-7.
Mwadang Kihkihwei
Uwen laud en kisakis ehu sohte kin uhdahn kadehde kadek sapan en aramaso me kihda kisakiso. Ehu rahn, Sises Krais kin kilikilang en aramas kan kin kesehdi mwohni nan dewen meirong nan Tehnpas Sarawio. Aramas kepwehpwe kan kin kesehdi mwohni tohto, ahpw Sises kupwurperenkihda e kilang liohdi semwehmwe men ah kesehdi sens tohntoal riau me sohte wede. E mahsanih: “Liohdi menet eh meirong laud sang mehlel en meteiko koaros ahr meirong. . . . Lih menet sang nan eh semwehmwe e meirongkihla mehkoaros me e naineki oh kin mourki.”—Luk 21:1-4; Mark 12:41-44.
Mahsen en Pohl ong mehn Korint kan kin pahrekiong madamadau wet en Sises. Ni ahnsou me e kin pidada kihda sawas pwehn sewese me pwoson semwehmwe kan, Pohl mahsanih: “Pwe ma kumwail pahn ngoangki kihwei, Koht pahn kin kupwurperenki uwen me kumwail pahn kak kihwei, ahpw e sohte pahn kupwurperenki amwail kihwei mehkot me kumwail sohte kak.” (2 Korint 8:12) Ehi, kihda sawas kan kaidehn en wiawi pwehn siaipene de kapahrekpene duwen ahn ihs me keieu laud. Emen en kihda uwen me e kakohng, oh Siohwa kin kupwurperenki kisakis sapan.
Mendahki sohte me kak uhdahn kakepwehpwehla Siohwa, me ketin sapwellimaniki mehkoaros, en tohnkaudok kan kihda sawas kin wia kapai ehu me kin mweidohng irail ahnsou mwahu en kasalehda ahr limpoak ong ih. (1 Kronikel 29:14-17) Kisakis kan me re kihda, kaidehn mehn liksansal mwahu de ong kahrepe roporop teikan, ahpw sang ni lamalam pwung oh pwehn kalaudehla kaudok mehlel, kin wahdo peren oh iangahki kapai en Koht. (Madiu 6:1-4) Sises mahsanih: “Kihkihwei me kaperen sang ale.” (Wiewia 20:35) Kitail kak iang ahneki peren wet ni atail pahn kihda atail kehl nan atail papah Siohwa oh kihsang ekis mwohni de dipwisou sang atail kepwe kan ong mehn utungada kaudok mehlel oh sewese irail ko me warohng ale kisakis pwukat.—1 Korint 16:1, 2.
Ineng en Kihwei Rahnwet
Rahnwet, Sounkadehdehn Siohwa kan kin perenki kilang kalohkpen “Rongamwahun Wehin Koht” me wie kekeirada nan sampah pwon. (Madiu 24:14) Erein sounpahr eisek ni imwin senturi 20, aramas tohto sang me 3,000,000 papidaisla pwehn kadehdehda arail inou ong Siohwa Koht, oh mwomwohdiso kapw 30,000 wiawihda. Ehi, silikis ehu en mwomwohdisohn Sounkadehdehn Siohwa me mieiehr rahnwet kokoudahr erein sounpahr eisek samwalahro! Pali laud en kekeirada wet kin kohsang doadoahk laud en Kristian ohl mehlel oh lih mehlel kan me kin kihda arail ahnsou oh kehl pwehn pwarek mehn mperail kan oh padahkiong irail duwen kupwuren Siohwa. Ekei kekeirada kan kin kohsang doadoahk en misineri kan, me kin kohsang imwarail kan oh sapwarail kan oh seiloaklahng sahpw doh kan pwehn sewese wasa pwukat ki doadoahk en kalohki Wehio. Kekeiradao kin imwikihla wiawihdahn circuit kapw kan, me kahrehda konehng en idiada sounapwalih kapw kan en circuit pwukat. Patehngete met, Paipel tohto pil anahn pwehn kadoadoahk nan kalohk oh onop me pein emen kin wia. Pwuhk en sawaspen Paipel tohto pil anahn. Nan sahpw tohto, rahn ohpis kan kin kalaudla de wilialihkihdi me laud kan. Sawas kan sang sapwellimen Siohwa aramas kan kin sewesehda anahn pwukat.
Anahnepen Kingdom Hall kan
Ehu anahn laud kin sansalkihda kekeirada en nempehn Sounkadehdehn Siohwa kan iei Kingdom Hall kan. Roporop kan me wiawihda nan tepin pahr 2000 kin kasalehda duwen anahnpen Kingdom Hall tohto sang 11,000 nan sahpw semwehmwe kan, wasa kan me mwohni kin tikitik. Tehk duwen Angola. Mendahki erein sounpahr tohto, tohnsahpwo kin mahwenpene nanpwungarail, sounkalohk en Wehio kin keirkihda erein ehu ehu sounpahr persent 10. Ahpw, pali moron en mwomwohdiso 675 nan sahpw laud wet en Aperika kin tuhpene ong mihding likin ihmw. Mie Kingdom Hall 22te nan sahpwo, oh sang nanpwungen Kingdom Hall pwukat, ihte me 12 me oahsdi powe.
Soangen irair wette kin pil wiawi nan Democratic Republic of Congo. Mendahki kereniong mwomwohdiso 300 mih nan poasen kaun en Kinshasa, Kingdom Hall eisekte me mie. Sang nan wehi koaros, sahpw wet me keieu anahne Kingdom Hall tohtosang 1,500. Pwehki kekeirada mwadang me wiawi nan sahpw kan en Pali Mesen Iurop, mwomwohdiso kan me mihmi Russia oh Ukraine ripohtki me re anahne Kingdom Hall epwiki. Kekeirada nan Latin America kin sansalda nan Brazil, wasa me mie Sounkadehde tohto sang 500,000 oh anahnpen Kingdom Hall tohto me uhdahn laud.
Pwehn apwalihala anahn pwukat nan soangen sahpw pwukat, Sounkadehdehn Siohwa kan wiahdaehr koasoandi en kauwada mwadang Kingdom Hall kan. Koasoandi wet kin ale sawas en mwohni sang ni sawas kadek sapan en riatail kan ni pali ngehn wasa koaros nan sampah, pwe mwomwohdiso kan me inenen semwehmwe pahn kak ahneki wasahn kaudok me mwahu.
Duwehte ni mwein mehn Israel kan en mahso, soahng tohto kak wiawihda pwehki Kristian mehlel kan me kin ‘kawauwihki Siohwa ahr dipwisou kesempwal kan.’ (Lepin Padahk 3:9, 10, NW) Governing Body en Sounkadehdehn Siohwa kan men doadoahngki ahnsou mwahu wet en kasalehong koaros me mohngiongarail kamwekid irail en iang kihda arail sawas sang ni pein nsenarail: arail kalahngan loal. Kitail kak koapworopworki me Siohwa pahn pousehlahte kamwekidada mohngiong en sapwellime aramas akan en utungada anahn en doadoahk en Wehio me wiete kekeirada.
Nin doken doadoahk en Wehio ah kekeirada wasa koaros nan sampah, kitail en pousehlahte rapahki ahnsou mwahu kan en kasalehda atail peren oh men kihda atail kehl, ahnsou, oh atail dipwisou kan. Ma kitail wia met, kitail en ahneki peren mehlel me soangen kihkihwei kin wahdo.
[Koakon nan Pali 30]
“MENLAU DOADOAHNGKI NI LOALOKONG!”
“Ngehi sounpahr eisek. I kadarwohng kumwail mwohni wet pwe kumwail en kak pwainda doaropwe de soahng teikan mehn wiahda pwuhk kan.”—Cindy.
“I perenki kadarwohng kumwail mwohni wet pwehn wiahda pwuhk tohto ong kitail. I nekidala mwohni wet pwehn wiahda pwuhk tohto ong kitail. I nekidala mwohni wet sang ahi kin sewese ahi pahpa. Eri, menlau doadoahngki ni loalokong!”—Pam, sounpahr isuh.
“I nsensuwedkihla rong duwen melimelo. I koapworopworki me kumwail sohte lelohng keper en mehla. Mwohni wet [tala $2]: ih uwen mwohni nan nei pangk.”—Allison, sounpahr pahieu.
“Edei Rudy, oh ngehi sounpahr 11. Riei pwutak Ralph sounpahr weneu. Oh riei serepein Judith sounpahr riau elep. Se kin nekidala sang mwohni me aht pahpa oh nohno kin kihong kiht erein sounpwong siluh pwehn sewese riatail brother kan nan wasa kan me ohkihla mahwen. Se nekidala tala $20 oh se men kadarwei mwohni wet.”
“I poakehla brother kan me ohkihla melimel. I koadoahkehda tala $17 iang ahi pahpa doadoahk. I sohte kadarwei mwohni wet ong mehkot tohrohr, eri, I pahn mweidohng kumwail en koasoanehdi dahme kumwail pahn wiahiong.”—Maclean, sounpahr waluh.