Kanahieng ni Omw Kin Wia Doadoahk en Kalohk
1. Dahme kahrehda kitail anahne kanahieng ni atail kin kalohk?
1 “Duwehte sihpw kei . . . nanpwungen kidien wel kan,” sapwellimen Koht aramas akan kin kalohk “nanpwungen aramas suwed oh dipan akan.” (Mad. 10:16; Pil. 2:15) Ripoht kamasepwehk duwen uhpenehn aramas akan, pwihnen aramas lemei kan oh wiewia lemei en pirap aramas kin kalapw wiawi. Met kadehdehda me aramas suwed kan kin kohsang “ni me suwed ong ni me suwedsang.” (2 Tim. 3:13) Soangen kaweid dah kan en Paipel me kitail kak doadoahngki me pahn sewese kitail en uhdahn “kanahieng” nan wasahn kalohk?—Mad. 10:16.
2. Soangen irair dah kan me pahn kahrehiong uhk ken kohkohla sang wasao oh kalohk ehu wasa tohrohr?
2 Mwekid ni Loalokong: Lepin Padahk. 22:3 kin kasalehda kesempwalpen loalokong en pere kitail sang kahpwal. Mwasamwasahn! Irair en wasa me kin kalapw meleilei kakete wekila ni soh kasikpe. Mwein ke pahn kilang tohtohlahn mwekid en pilismen de aramas pokonpene nanial. Ekei pak tohnihmw pahn ndaiong uhk me kakete mie keper. Ke dehr mihmi wasao pwehki ke men ese dahme pahn wiawi ahpw e wia elen loalokong ken mwadang kohkohla oh pousehlahte kalohk ehu wasa tohrohr.—Lep. Pad. 17:14; Sohn 8:59; 1 Des. 4:11.
3. Ia duwen kaweid en Eklesiasdes 4:9 eh kin pid atail doadoahk en kalohk?
3 Doadoahkpene: Eklesiasdes 4:9 mahsanih: “Aramas riemen mwahusang emente.” Mendahki omw kin ahnla kelehpw kalohk, e sou pahn keper en wia met ahnsou wet? Nan ekei wasa e sohte kin keper. Ahpw nan ekei wasa e kin keper ong sister men de me pwulopwul men en kelehpw kalohk ihmw lel ihmw, ni mehlel mwurin kihrlahn ketipin. Dahme wiawiher kadehdehda me iengen emen me kin tetehk mwahu kin uhdahn kesempwal. (Ekl. 4:10, 12) Tehk mwahu emenemen tohn omw pwihn en kalohk. Ma ke pahn kohkohla sang wasahn kalohk, padahkihong meteikan me iang mi nan wasahn kalohk.
4. Dahme kitail kak wia pwehn pere tohnmwomwohdiso koaros?
4 Nin duwen irail me kin “apwahpwalih” kitail, elder kan kin pwukoahki kihda kaweid me anahn nan atail wasa. (Ipru 13:17) Kitail kin kamehlele me Siohwa pahn ketin kapaia kitail ni atail kin kasalehda aktikitik oh utung irail ni unsek. (Maika 6:8; 1 Kor. 10:12) Sapwellimen Koht ladu kan koaros pahn kin wia doadoahk en kadehde me kin pweida mwahu nan atail wasahn kalohk, ahpw kitail anahne kanahieng ahnsou koaros.