“Ahneki Popohl Rehn Aramas Koaros”
1. Mehnia kaweid en Paipel kitail anahne doadoahngki ni ahnsou me kitail tuhwong tohnihmw kan me lingeringer?
1 Sapwellimen Siohwa aramas akan kin perenki popohl oh kitail kin kalohki popohl. (Ais. 52:7) Ahpw ekei pak, kitail kin tuhwong irail kan me lingeringerki atail kalohkla ni imwarail. Dahme pahn sewese kitail en ahneki popohl nan soangen irair pwukat?—Rom 12:18.
2. Dahme kahrehda e kesempwal kitail en wehwehki irair en tohnihmwo?
2 Anahne Wehwehki Arail Irair: Mendahki ekei kin lingeringer pwehki arail uhwong padahk mehlel, mwein ekei kin lingeringerki kahrepe teikan me sohte pid atail kalohk. Mwein kitail kohla ni ahnsou me sohte mwahu ong irail. Ele tohnihmwo nsensuwedki pein eh kahpwal kan. Ma rongamwahwo me kalingeringerihada, kitail en taman me e wia met pwehki mie me pitipitih. (2 Kor. 4:4) Atail wehwehki eh irair pahn sewese kitail en kolokol meleilei oh pohnese me e sohte lingeringer pahtail.—Lep. Pad. 19:11.
3. Ia duwen atail kak wauneki tohnihmwo?
3 Kasalehda Wahu: Me tohto nan atail wasahn kalohk kin tengediong dahme re kamehlele. (2 Kor. 10:4) Re ahneki pwuhng en pilada ma re men rong de soh. Uhdahn kitail sohte men kahrehiong tohnihmwo en medewe me kitail ese Paipel laudsang ih. Ma emen ndaiong kitail en kohkohla, kitail anahne kohkohla.
4. Ia mwomwen atail pahn lokaia ni kadek?
4 Lokaia Kadek: Mehnda ma re kauwe kitail, kitail anahne sapeng irail ni meleilei oh kadek. (Kol. 4:6; 1 Pit. 2:23) Kitail en song koasoia mehkot me re pahn men rong, a kaidehn mehkot me kak kahrehda akamai. Ele kitail kak idek rehn tohnihmwo kahrepen arail uhwong kitail. Ahpw ekei pak, e keieu mwahu en dehr pousehlahte koasoi pwe kitail en dehr kalaudehla eh lingeringer.—Lep. Pad. 9:7; 17:14.
5. Kamwahu dah kan kohsang atail kin ahneki popohl nan doadoahk en kalohk?
5 Ma kitail kin ahneki popohl, tohnihmwo ele pahn tamataman atail wiewia oh pahn rong sounkalohko me pahn kalohkla reh mwuhr. (Rom 12:20, 21) Mendahki ma e pousehlahte uhwong kitail, mwein ehu rahn e pahn wiahla riatail Kristian. (Kal. 1:13, 14) Sohte lipilipil ma e pahn men de sohte men sukuhlki padahk mehlel, kitail pahn kawauwihala Siohwa oh kalinganahla atail padahk kan ma kitail kanengamah oh kasalehda popohl.—2 Kor. 6:3.