Eimah, ahpw Kameleilei
1 Aramas tohto me kitail kin kalohk ong kin kasalehda dahme irail kamehlele me sohte kin pahrekiong Padahk mehlel en Paipel. Mendahki kitail anahne kalohk ni eimah, kitail pil men “ahneki popohl rehn aramas koaros” oh liksang en kansensuwedih aramas akan ma sohte anahne. (Rom 12:18; Wiewia 4:29) Iaduwen kitail kak kasalehda eimah ahpw kameleilei ni atail kin kalohki rongamwahu en Wehio?
2 Diarada Ire kan me Kitail kak Pwungkihpene: Emen me kin kameleilei kin liksang akamai. En song en kapwungala dahme tohnihmw kin uhdahn kamehlele sohte pahn kamwekid ih en men rong. Ma e nda mehkot sapwung, mwein kitail kak kasalehda ni koahiek ehu ire me kitail kak pwungkihpene. Ma kitail pahn koasoia duwen dahme kitail koaros kin kamehlele, mwein met pahn kak kihsang ah pepehm en sohte men rong oh sair ah mohngiong.
3 Ma kitail pahn mendahkihla ahn tohnihmw madamadau me sohte pwung, met wehwehki me kitail pahn kawekila padahk mehlel? Soh. Atail pwukoa nin duwen Kristian sounpapah kan iei, kaidehn en kapwungala madamadau sapwung kan koaros me kitail kin diarada, ahpw en kalohki rongamwahu en Wehin Koht. (Madiu 24:14) Kitail sohte anahne pwuriamwei oh wiahkihda mehkot me laud ni ahnsou me tohnihmw kasalehda ah madamadau me sapwung, ahpw kitail kak kilangwohng met ahnsou mwahu en wehwehki ah madamadau.—Lepin Padahk 16:23.
4 Kasalehda Wahu: Mie ahnsou me kitail anahne eimah pwehn kasalehda padahk sapwung kan. Ahpw nin duwen aramas kameleilei kan, kitail en dehr kapailok oh doadoahngki lokaia kan me kin mwamwahleki irail kan me kin kamehlele oh padahngki padahk sapwung kan. Ma kitail pahn kasalehda me kitail mwahu sang irail, met pahn kahrehiong irail en sohte men rong, ahpw ma kitail pahn kasalehda aktikitik oh kadek, met pahn kak ritingada madamadau en aramas akan me kin poakohng me mehlel. En kasalehda wahu ong irail kan me rongorong kitail oh dahme irail kamehlele kak kamengei ong irail en ale atail padahk.
5 Wahnpoaron Pohl wauneki padahk kan me aramas akan me e kalohk ong kin nantihong oh song en kasalehda rongamwahuo ni ahl me kak sair mohngiongarail. (Wiewia 17:22-31) E kin perenki “wialahr soahng koaros rehn aramas koaros, pwehn komourala ekei irail.” (1 Korint 9:22) Kitail pil kak wia met ni atail kin kameleilei ni atail kin eimah oh kalohki rongamwahu.