Kataman me Pahn Wiawi Kin Kihong Kitail Ahnsou Mwahu en Kasalehda Kalahngan

1. Katamano kin kihda ahnsou tohrohr en wia dah?

¹ Kataman me pahn wiawi nan April 14 kihda ahnsou tohrohr en kakairada oh kasalehda atail kalahnganki sapwellimen Siohwa kupwuramwahu. Koasoi me mi nan Luk 17:11-18 kin kasalehda ia sapwellimen Siohwa oh Sises madamadau ong pepehm en kalahngan. Meid kansensuwed, pwe emente sang rehn ohl tokutok ehko me isaneki ahnsou mwahu en kasalehda eh pepehm en kalahngan. Ni ahnsou kohkohdo, kisakis en meirong tomwo pahn kahrehda soangen soumwahu koaruhsie en mwahula oh met pahn kahrehda mour soutuk en kak wiawi! Ni ahnsowo, rahn koaros kitail uhdahn pahn kalahngankihong Siohwa pwehki kapai pwukat. Ahpw ia duwen atail pahn kasalehda atail kalahngan erein wihk kan me kohkohdo?

2. Ia duwen atail kak kakairada atail kalahnganki meirong tomwo?

² Kakairada Kalahngan: Pepehm en kalahngan kin miehla pwehki ahn emen eh kin medemedewe mehkot. Pwehn sewese kitail kakairada atail kalahnganki meirong tomwo, koasoandi tohrohr ong wadawad en Paipel ong Kataman kin kohda nan Tetehk Paipel Ehuehu Rahn 2014 oh New World Translation, appendix B12 (me kapw) oh kalendar. Kitail soh tehkpene ire wet nin duwen peneinei ehu? Atail wia met pahn kalaudehla atail kalahnganki meirong tomwo. Oh met pahn sewese atail wiewia mwahu kan.​—2 Kor. 5:14, 15; 1 Sohn 4:11.

3. Ni ahl dah kan me kitail kak kasalehda atail kalahngan, erein sounpwong en Kataman?

³ Kasalehda Kalahngan: Kalahngan kin sansalkihda wiewia. (Kol. 3:15) Ohl tokutok me diren kalahngano nantihong rapahkihda Sises oh kasalehiong eh kalahngan. Uhdahn e pahn pil ngoangki koasoiaiong meteikan duwen manaman me kamwahwihala ih. (Luk 6:45) Ia duwe, atail kalahnganki meirong tomwo pahn kamwakid kitail en ngoangki iang doadoahk en pakairki duwen Katamano? En wia sawaspen pioneer men de kalaudehla atail iang kalohk erein sounpwong kan mwohn lel mwurin Katamano iei ehu elen kasalehda atail kalahngan. Ni soutuk en rahn en Katamano, ma atail mohngiong diren kalahngan, met pahn kamwakid kitail en kasamwo irail kan me pahn kohdo oh sewese sapengala arail peidek kan.

4. Dahme kitail kak wia pwe kitail en dehr koluhkihla mehkot ni Kataman wet?

⁴ Ia duwe, ih kaimwiseklahn Kataman me kitail pahn wia met? (1 Kor. 11:26) Kitail sehse. Ahpw ihme kitail ese iei me ma e pahn sohla wiawi, eri e pahn sohla ehu ahnsou mwahu oh tohrohr ong kasalehda kalahngan. Ke pahn isaneki ahnsou mwahu met? Atail koasoi me kasalehda atail kalahngan oh soahng kan me kitail kin doudouloale en kin kaperenda Siohwa, me kupwurkalahngan ni eh wia Sounketikihda meirong tomwo.​—Mel. 19:14.