Doadoahngki jw.org nan Omw Kalohk

Neitail Web Site wia mehn doadoahk kesempwal ehu en sewese kitail kihpeseng rongamwahwo en “lelohng ni irepen sampah.” (Wiewia 1:8) Pali laud en tohnihmw kan sohte kak pein diar jw.org. Ahpw re pahn esehla duwen met ihte ma sounkalohk men kasalehiong irail.

Sounapwalih me kin seiloak kihong kasdo wet “Dahme Kahrehda Ken Onopki Paipel?” nan nah cellphoneo oh kasalehiong meteikan ahnsou koaros ma kak. Karasepe, ni eh kin kalohk ihmw lel ihmw, e kin nda: “I pwarodo ni ahnsou mwotomwot pwehn sewese aramas akan en diarada pasapengpen peidek kesempwal siluh pwukat: Dahme kahrehda sampah wet nohk diren kahpwalki? Ia duwen Koht eh pahn ketin kamwahuiala? Oh ia duwen atail kak powehdi ni ahnsouwet? Kasdo mwotomwot wet pahn kasalehda peidek pwukat.” Sounapwaliho kin alehte padik kisin pwoaten en kasalehda duwen kasdo oh kilang mwomwen tohnihmwo eh pahn mwekidki met. Kasdo wet uhdahn kaselel me kahrehiong pali laud en aramas akan ar sohte kak sohpeisang lao nek kasdo. Eri sounapwalih me kin seiloako kin nda: “Ke ahpwtehn rong me ke kak peki onop en Paipel nan online. Pwehki ei mi me, I kak kasalehiong uhk ni mwotomwot ia duwen omw pahn wia met.” Ma tohnihmwo mwahuki, sounapwaliho kin kawehwehda ia duwen ara pahn onopki pwuhken Rohng Mwahu. Ma tohnihmwo sohte eh ahnsou, sounapwaliho kin koasoanehdi en wia met ni eh pahn pwurala. Ni eh kin kohla wasahn nim koahpi oh mwenge pwehn kommoal, e kin koasoiaiong emen me mwomwohd limwah duwehte dahme e kin nda rehn tohnihmw kan mwurin eh tepin tuhwong aramaso. Ke kin doadoahngki jw.org nan omw doadoahk en kalohk?