Soikala Soahng Pwukat ni Ahnsoun Onop Paipel

Koasoakoasoi Pali Laud en Ahnsou: Dehr medewe me kowe me anahne kawehwehda soahng koaros. Sises kin ketin doadoahngki peidek kan pwehn sewese aramas akan en medewe oh ahnekihda madamadau pwung. (Madiu 17:24-27) Peidek kan kin sewese onopo en kaperen oh seweseiuk en wehwehki dahme noumw tohnsukuhlo kin wehwehki oh kamehlele. (be-E 253 par. 3-4) Ni ahnsou me ke idek peidek ehu, kanengamah oh awih en sapengala. Ma en tohnsukuhlo eh pasapengo sapwung, sewese ih en wehwehki pasapeng pwung sang ni omw pahn doadoahngki ekei peidek kan, ahpw dehr padahkihong ih pasapeng pwungo. (be-E 238 par. 1-2) Koasoi ni uwen me konehng pwehn mweidohng tohnsukuhlo en koledi madamadau kapw kan.​—be-E 230 ¶4.

Kihda Ire kan me Nohn Tohto: Dehr kapatahiong ire kan koaros me ke esehier duwen oaralapo. (Sohn 16:12) Koasoiahte ire kesempwalo nan parakrapo. (be-E 226 par. 4-5) Ire pisetik kan, pil ire kan me kaperen en esehla, kak irehdi ire kesempwalo en sansalda. (be-E 235 par. 3) Ahnsou me tohnsukuhlo wehwehkihda ire kesempwalo, doulahng parakrap en mwuri.

Ihte Kanekehla Parakrap kan: Atail mehn akadei iei en sair mohngiong, kaidehn kanekehla parakrap kan. (Luk 24:32) Doadoahngki kehl en sapwellimen Koht Mahsen sang ni omw pahn koasoiahte iren Paipel kesempwal kan me mi nan iren mehn kasukuhlo. (2 Kor. 10:4; Ipru 4:12; be-E 144 par. 1-3) Doadoahngki karasaras mengei kan. (be-E 245 par. 2-4) Medewe ahn tohnsukuhlo eh kahpwal kan oh soahng kan me e kamehlele, oh koasoanehdi onopo pwehn pwungiong eh anahn kan. Idek peidek me duwehte mepwukat: “Ia omw pepehm duwen soahng kan me ke sukusukuhlki met?” “Dahme met padahkihong kita duwen Siohwa?” “Kamwahu dah kan me ke kak kilang ma ke kapwaiada kaweid wet?”​—be-E 238 par. 3-5; 259 par. 1.