Iren Sawas kan ong Doaropwehn Kasukuhl ong Mihting en Mour oh Kalohk
August 5-11
SOAHNG KESEMPWAL KAN SANG MAHSEN EN KOHT | 2 TIMOTY 1-4
“Koht . . . Sohte Kin Kahrehiong Kitail en Masepwehk”
Me Pwulopwul kan—Kasalehda Amwail Kekeirda
9 Pwehn sewese Timoty, Pohl katamankin ih mwuhr: “Koht kin ketikihong kitail kaidehn irair en masak, ahpw kehl oh limpoak oh madamadau pwung.” (2 Tim. 1:7, NW) “Madamadau pwung” iei en ahneki koahiek en madamadau. E pil kin pid koahiek en kilangwohng soahng nin duwen dahme wiawi ahpw kaidehn nin duwen dahme ke mwahuki en wiawi. Ekei me pwulopwul soakoahiek kan kin kasalehda irair en masak oh song en kihsang kapwunod kan sang arail madamadau ni arail kin meir nohk daulihla de kilang kasdo ahnsou reirei, doadoahngki wini suwed de kalapw sakaula, kalapw iang kamadipw kan, de wia dipen nenek. Kristian kan ale kaweid en “kesehla mouren seupwoson Koht oh ineng suwed en sampah, oh ahneki madamadau pwung, oh momourki mour pwung oh sarawi nin sampah wet.”—Taitus 2:12, NW.
‘Kumwail Kommwad Oh Kehlail!’
7 Pohl nting ohng Timoty mahsanih: “Pwe ngehn sarawi me Koht kin ketikihong kitail sohte kin kahrehiong kitail masak, ahpw sapwellime ngehno kin ketin audehkinkitailda manaman . . . Eri, ke dehr namenengki omw kadekadehde atail Kauno.” (2 Timoty 1:7, 8; Mark 8:38) Mwurin kitail wadek mahsen pwukat, pein idek rehtail: ‘I kin namenengki ai pwoson, de I kin eimah? Nan ai wasahn doadoahk (de wasahn sukuhl), I kin padahkiong aramas teikan me ngehi emen Sounkadehdehn Siohwa, de I kin song en ekihla met? I kin namenengki ahi weksang aramas teikan, de I kin perenki met pwehki ai nanpwung mwahu rehn Siohwa? Ma emen kin namenengki kalohki Rongamwahu de sohte men utungada padahk ehu me aramas tohto sohte kin pwungki, eri aramas menet anahne tamanda sapwellimen Siohwa kaweid me e ketikihong Sosua: “Kommwad oh kehlailda.” Dehr manokehla: madamadau en iengetail tohndoadoahk kan de tohnsukuhl akan sohte kesempwal, ahpw kupwuren Siohwa oh Sises Krais me keieu kesempwal ong kitail.—Kalesia 1:10.
Raparapahki Soahng Kesempwal kan Sang Mahsen en Koht
Raparapahki Pai kan me Mehlel
13 Timoty wia ohl pwoson men. Mwurin Pohl eh kahdaneki Timoty “sounpei loalopwoat emen en Krais Sises,” Pohl ndaiong: “Sounpei men me kin pwahtiet nan eh doadoahk kin men kapwaiada nsenen eh kaun, oh e sohte kin pingkihda wiewiahn irail kan me kaidehn sounpei.” (2 Tim. 2:3, 4) Sapwellimen Sises tohnpadahk kan rahnwet, iangahki irail kan me kin doadoahngki pali laud en arail ahnsou ong papah Siohwa me tohto sang rar, kin wia uwen arail kak en doadoahngki ahn Pohl kaweid. Re kin pelianda soahng kan me sampah noahrok wet kin kasongehki irail. Re kin tamataman kaweid wet: “Pekihsang emen mwohni, ke ahpw pahn wiahla lidun aramas me ke pekihsang mwohnio.” (Lep. Pad. 22:7) Sehdan men kitail en doadoahngki atail ahnsou oh kehl koaros pwehn doadoahk ong koasoandi en palien pesines kan en eh sampah. Ekei kin lohn mwohni laud pwehn pwainda ihmw, sidohsa, sukuhl laud, de pil pwain kamadipw en kapwopwoud ehu. Ma kitail sohte kanahieng, kitail kak mihla nan pweipwand erein sounpar tohto. Kitail kin kasalehda loalokong ni atail kin kihsang soahng kan me sohte nohn kesempwal nan mour, soikala wia pweipwand kan, oh katikala atail doadoahngki mwohni. Ni ahl wet kitail pahn ahneki saledek en papah Koht ahpw kaidehn en liduwih koasoandi en palien pesines kan rahnwet.—1 Tim. 6:10.
Sapwellimen Siohwa Aramas akan Kin “Sohpeisang Wiewia Suwed kan”
10 Rahnwet, mwekid en kesehla oh uhwongada kaudok mehlel sohte kin kalapw wiawi nan mwomwohdiso. Ahpw kitail pil kin rong soangen padahk kan me uhwong Paipel. Sohte lipilipil ia wasa me padahk pwukat kohsang ie, kitail anahne koasoanehdi teng en sohpeisang. E sohte wia elen loalokong en rong de kilang irail kan me kesehla oh uhwongada kaudok mehlel, sohte lipilipil ma nan Internet de pil ni soangen ahl teikan. Mendahki kitail men sewese soangen aramaso, ma kitail koasoiong irail, kitail pahn sapeikiong Koht. E ketin kehkehlikihong kitail en liksang douluhl mwekid en kesehla oh uhwongada kaudok mehlel.
August 12-18
SOAHNG KESEMPWAL KAN SANG MAHSEN EN KOHT | TAITUS 1–PAILIMWON
“Idihada Sounapwalih kan”
w14-E 11/15 28-29
Peidek kan Sang Sounwadawad kan
Mendahki Paipel sohte kawehwehda ni oaritik ia duwen idihdida koaros kin wiawi mahso, kitail kin ese ekei kasalepen ia duwen met eh kin wiawi. Kitail kin rong me ni Pohl oh Parnapas ara pwurupwuralahng ara wasahn kousoan sang ara tepin seiloak en misineri, “ira pil idihada sounapwalih kei ong irail nan ehuehu mwomwohdiso, wia kapakap iangahki kaisihsol, ira ahpw mweidala irail ong Siohwa, me re pwosonlahr.” (Wiewia 14:23) Sounpar kei mwuri, Pohl ntinglahng Taitus me kin iangih seiloak, nda: “I pwilkinuhkedi nan Krihd pwe ken kapwungala soahng kan me sapwung oh idihada sounapwalih kan nan ehuehu kahnimw, nin duwen me I kaweidkin uhk.” (Taitus 1:5) Duwehte Timoty, me kin iang wahnpoaron Pohl seiloakla wasa tohto, e pil ale soangen manamanohte. (1 Tim. 5:22) Eri, e sansal me sounapwalih me kin seiloak kan me kin wia soangen pilipil pwukat, a kaidehn wahnpoaron oh ohl mah kan nan Serusalem.
Ni pwihn me Kin Apwalih Mwomwohdiso nan Sampah Pwon en Sounkadehdehn Siohwa kan ar kin medewe duwen koasoandi en Paipel wet, re wekidala mwomwen arail kin idihada elder oh sounsawas akan. Sang ni September 1, 2014, idihdidahn emen brother kin wiawi nin duwen met: Emen sounapwalih me kin seiloak kin tehk mwahu brother kan me pwihn en elder kan men en idihdida. Erein eh kin mwemweitla ni mwomwohdiso kan, e pahn song en esehla irail pwukat, ni eh pahn iang irail nan doadoahk en kalohk ma kak. Mwurin eh koasoiong pwihn en elder kan duwen ire pwukat, sounapwalih me kin seiloako pahn pwukoahki idihada elder oh sounsawas kan nan mwomwohdiso kan me e kin apwalih. Ni ahl wet, koasoandio kin kereniong duwehte koasoandi me tepin Kristian akan kin wia.
Ihs me kin pwukoahki soangsoangen pwukoa me pid soangen koasoandi wet? Ahnsou koaros, “ladu lelepek oh loalokong” me kin keieu pwukoahki kamwenge papah teikan. (Mad. 24:45-47) Pwukoa wet kin iangahki wia roporop nan Paipel sang ni sawas en sapwellimen Koht manaman, pwehn kin kihda kaweid sang ire mehlel en Paipel kan duwen ia mwomwen mwomwohdiso nan sampah pwon eh pahn kin koasoansoandi. Ladu lelepeko me pil kin idihada sounapwalih me kin seiloak kan koaros oh Pwihn me Kin Apwalih Ohpis en Sounkadehdehn Siohwa kan. Ehuehu ohpis kin uhd kihda soangen sawas me anahn pwe idihdida pwukat en kin idawehn koasoandi. Ehuehu pwihn en elder pahn kin pwukoahki tehk ni keneinei ma emenemen brother me re utung en iang idihdida nan sapwellimen Koht mwomwohdiso, kin kasalehda soangen koahiek me Paipel kin kaweidki. Emenemen sounapwalih me kin seiloak ahneki pwukoa kesempwal en tehk mwahu oh pil kapakapki duwen koasoi en utuht kan me kohsang elder kan, mwohn eh pahn idihada ohl koahiek kan.
Raparapahki Soahng Kesempwal kan Sang Mahsen en Koht
w89-E 5/15 31 par. 5
Peidek kan Sang Sounwadawad kan
E sohte pwungki douluhl koasoi en lipilipilki aramas me kin wiawihong mehn Krihd kan. Kitail kak kamehlele met, pwe Pohl ese me pohn dekehn Krihd mie Kristian mwahu kan me Koht ketin kupwurki oh keiehkiniraildi sapwellime manaman. (Wiewia 2:5, 11, 33) Mie Kristian poadidi kan me itar en wiahda mwomwohdiso kan nan “kahnimw koaros.” Mendahki Kristian pwukat kaidehn aramas unsek kei, kitail kak kamehlele me irail sohte kin likamw oh kapehden mwenge; pwe ma iei eri irail sohte pahn aiahnekihte kupwuramwahu en Siohwa. (Pilipai 3:18, 19; Kaudiahl 21:8) Duwehte atail kin kilang dahme kin wiawi nan wehi koaros, mwein mie mehn Krihd mohngiong mehlel kan me kin nsensuwedkihla tiahk sohte konehng en aramas me pidakihirailpene kan, oh eri kin mwadang mwekidki rohng me Kristian akan kin walahng irail.—Esekiel 9:4; pil kilang Wiewia 13:48.
Ire Kesempwal akan Sang nan Pwuhken Taitus, Pailimwon, oh Ipru
15, 16—Dahme kahrehda Pohl sohte idek rehn Pailimwon en kapitala Onesimus? Pohl men kapwaiada eh pwukoa en ‘padapadahngki duwen Wehin Koht oh kapahrengki duwen Kaun Sises Krais.’ Ihme kahrehda, e pilada en dehr pidada ire kan me pid duwen koasoandi kan en kalidu.—Wiewia 28:31.
August 19-25
SOAHNG KESEMPWAL KAN SANG MAHSEN EN KOHT | IPRU 1-3
“Poakohng me Pwung oh Kailongki me Suwed”
Kapinga Krais Nanmwarkio me Sapwellimanki Lingan!
8 Nan pahr 1914, Siohwa ketin idihada sapwellime Ohlo nin duwen Nanmwarki en Wehin Mesaia nanleng. Sises pahn ketin ‘kakaun sapwellime kan ni me pwung,’ eri kitail kak kamehlele me sapwellime kaunda pahn ahnsou koaros pahrek oh pwung. E sapwellimaniki pwuhng en kaunda pwehki Siohwa me ketin idihada ih. Sapwellimen Sises kaunda pahn “poatopoat kohkohlahte.” Kitail uhdahn pohlki atail papah Siohwa pahn kaundahn Nanmwarki me e ketin idihada.
Kapinga Krais Nanmwarkio me Sapwellimanki Lingan!
7 Wadek Melkahka 45:6, 7. Pwehki Sises ketin uhdahn poakohng dahme pwung oh ketin kalahdeki soahng koaros me kakete kihsang wahu me Semeo sapwellimaniki, Siohwa ketin keiehdi ih nin duwen Nanmwarki en Wehin Mesaia. Siohwa ketin keiekihdi Sises “peren” laudsang me e ketikihong “nanmwarki teikan,” me iei nanmwarki kan en Suda me pil wia kadaudok en Depit. Ni ahl dah? Keieu, pein Siohwa me ketin keiehdi Sises. Keriau, Siohwa ketin keiehdi Sises pwehn kaunda nin duwen Nanmwarki oh pil wia Samworo Lapalap. (Mel. 2:2; Ipru 5:5, 6) Kesiluh, Sises sohte ketin keikihdi leh ahpw e ketin keikihdi sapwellimen Koht manaman. Mwuhr, e ketin kaunda sang nanleng, a kaidehn nin sampah.
Raparapahki Soahng Kesempwal kan Sang Mahsen en Koht
it-1-E 1185 par. 1
Sansal
Sises kin ketin ahnsou koaros kasalehda me e rasehngete Semeo?
Sapwellimen Koht Mesenih, me mwuhr wiahla aramaso Sises, kin kasalehda me e rasehng Semeo. (2Ko 4:4) E sansal me sapwellimen Koht Ohlo iei ih me Koht ketin mahsanihong: “Kitail [“Kita,” NW] pahn wiahda aramas rasehng kitail [“kita,” NW],” raspene wet nanpwungen sapwellimen Koht Ohlo oh Sahmo, me wia Sounkapikadao mieier sang ni ahnsou me sapwellimen Koht Ohlo kepikipikda. (Sen 1:26; Soh 1:1-3; Kol 1:15, 16) Ni ahnsou me e wia aramas unsek men oh ketiket pohn sampah, e kin ketin kasalehda irair en Semeo oh soangen Koht dahmen ih ni uwen me aramas kakohng wia, kahrehda e kak mahsanih, “mehmen me kilangieier pil kilangehr Sahmo.” (Soh 14:9; 5:17, 19, 30, 36; 8:28, 38, 42) Ahpw soangen duwepenehte wet uhdahn sansalda ni ahnsou me Sises ketin iasada nin duwen ngehn emen oh Semeo, Siohwa Koht ketikihong “manaman koaros . . . nanleng oh sampah.” (1Pi 3:18; Md 28:18) Pwehki Koht ketin kasapwilada Sises ong “nan dehu lapalap ehu,” sapwellimen Koht Ohlo kin ahnsou wet kasalehda lingan en Sahmo ni uwe ehu me laudsang dahme e ahneki mwohn eh ketisang nanleng oh ketidihdo sampah. (Pil 2:9; Ipr 2:9) Eri met ih “me kin ketin kasalehda sapwellimen Koht lingan oh kasalepen Koht ni unsek.”—Ipr 1:2-4.
it-1-E 1063 par. 7
Nanleng
Mahsen kan nan Melkahka 102:25, 26 kin kadoadoahk ong Siohwa Koht, ahpw wahnpoaron Pohl doadoahngki lepin lokaia pwukat ong Sises Krais. E wia met pwehki sapwellimen Koht Iehroso iei Wiliepen Koht me E ketin doadoahngki pwehn kapikada audepen nanleng oh sampah. Pohl kasalehda wekpeseng en sapwellimen Koht Ohlo eh mour poatopoat oh kepikipik teikan, me Koht, ma e ketin kupwurki, kak ketin “welikirailpene duwehte likou puhp ehu,” oh ketikihla ehu wasa.—Ipr 1:1, 2, 8, 10-12; pil kilang 1Pi 2:3.
August 26–September 1
SOAHNG KESEMPWAL KAN SANG MAHSEN EN KOHT | IPRU 4-6
“Wia Uwen Omw Kak Pwe Ken Pedolong nan Sapwellimen Koht Kommoal”
Dahkot—Sapwellimen Koht Kommoal?
3 Mie kahrepe riau me kitail kak nda me keisuhwen rahno saikinte imwisekla ni mwehin Sises oh tepin Kristian akan. Keieu, kitail medewehla dahme Sises mahsanihong sapwellime imwintihti kan me kin kauwe ih pwehki eh ketin kamwahwihala me soumwahu kan ni rahnen Sapad. Re medewe me e sapwung pwehki Kosonned en Moses eh koasoia me rahnen Sapad iei rahn en kommoal sang doadoahk. Sises ketin sapeng irail mahsanih: “Semei kin ketin doadoahk ahnsou koaros, oh pil ngehi, I uhdahn pahn doadoahk.” (Sohn 5:16, 17) Ia wehwehn sapwellime mahsen? Dahme e ketin mahsanih wehwehki: “Semei oh ngehi kin wia soangen doadoahk tehieu. Semei kin ketin doadoahk erein sapwellime rahnen Sapad me kin reireiki sounpar kid kei, oh e pil kin ketin pousehlahte doadoahk, ihme I pil kak doadoahkki rahnen Sapad.” Sapwellimen Sises mahsen kan kasalehda me keisuhwen rahn me iei rahn me Koht ketin kommoaldihsang sapwellime doadoahk en kapikada audepen sampah saikinte imwisekla lel ni mwehin Sises. Ahpw, Koht kin ketin wie doadoahkte pwe en ketin kapwaiada kupwure ong aramas oh sampah.
4 Mie kahrepe keriau me kitail esehki me keisuhwen rahno saikinte imwisekla ni mwehin Sises oh tepin Kristian kan. Wahnpoaron Pohl ntingihedi duwen sapwellimen Koht kommoal nan nah kisinlikou ong mehn Suhs kan. Irelaud 4 nan nah kisinlikouo, mwohn eh kapwurehda mahsen kan sang Senesis 2:2, Pohl ntingihedi: “Kitail kan me pwoson, kitail pahn pedolong oh kommoaldi.” (Sen. 2:2; Ipru 4:3, 4, 6, 9) Met kasalehda me keisuhwen rahno saikinte imwisekla ahnsou me Pohl ntingihdi met. Eri, iahd keisuhwen rahno pahn imwisekla?
5 Pwe kitail en sapengala peidek wet, kitail anahne tamataman me Siohwa ketin kesempwalikihla keisuhwen rahno. Senesis 2:3 mahsanihong kitail: “E ahpw ketin kupwuramwahwih keisuhwen rahno, oh ketin kasarawihala.” Siohwa ketin kasarawihala rahno pwehki eh ketin pilada rahno en wia rahn me e pahn ketin kanekehla kupwure ong sampah. E ketin kupwurki ohl oh lih peik kan en mour nin sampah oh apwalih soahng koaros nin sampah. (Sen. 1:28) Pwe kupwure ong sampah en pweida, Siohwa Koht oh Sises Krais me wia “Kaunepen rahnen Sapad” kin “ketin doadoahk ahnsou koaros.” (Mad. 12:8) Eri, sapwellimen Koht rahnen kommoal kin wiewiawihte lao lel e pahn ketin kapwaiada kupwureo. Met pahn imwisekla ni imwin sounpar kid en kaundahn Krais.
Dahkot—Sapwellimen Koht Kommoal?
6 Koht ketin ni sansal mahsanihong Adam oh Ihp kupwure ong sampah, ahpw ira uhwongada. Mwurin ara sapeik, aramas rar kei pil sapeikla. Sapwellimen Koht aramas akan me iei mehn Israel kan pil kin pwurepwurehng sapeikiong ih. Oh Pohl kaweidkin Kristian akan ahnsowo me ekei irail kakete sapeikla duwehte mehn Israel ko. E ntingihedi: “Eri kitail en wia uwen atail kak en pedolong nan kommoalo, pwe kitail en dehr lohdiong soangen sapeikohte.” (Ipru 4:11, NW) Dahme Pohl koasoia kasalehda ni karasaras me aramas sapeik kan sohte kak pedolong nan sapwellimen Koht kommoal. Ia wehwehn met ong kitail? E wehwehki me ma kitail pahn uhwongada kupwuren Koht, kitail sohte pahn iang kisehn sapwellime kommoal? E kesempwal ong kitail en ese pasapengpen peidek wet, oh kitail pahn koasoiapene duwen met nan iren onop wet. Ahpw keieu, kitail pahn koasoiapene duwen mehn kahlemeng suwed en mehn Israel kan oh kahrepen arail sohte iang sapwellimen Koht kommoal.
Dahkot—Sapwellimen Koht Kommoal?
16 Rahnwet kitail sohte kin kamehlele me Kristian kan anahne peikiong Kosonned en Moses pwe ren komourala. Dahme Pohl koasoiaiong mehn Episos kan uhdahn sansal: “Pwe kalahngan en Koht me komourkumwailla ni pwoson, kaidehn mehkot me sang rehmwail, duwehte amwail wiewia kan, pwe pein sapwellime kupwurkalahngan ong kumwail.” (Ep. 2:8, 9) Eri, ia duwen Kristian kan rahnwet ar kak iang kisehn sapwellimen Koht kommoal? Tamataman me Siohwa ketin pilada sapwellime rahnen kommoal en wia rahn me e ketin kapwaiada kupwure koaros me pid sampah oh aramas peik kan. Siohwa ketin doadoahngki sapwellime pwihn en padahkihong kitail sapwellime koasoandi oh dahme e ketin kupwurki kitail en wia. Kitail kak iang kisehn sapwellimen Siohwa kommoal ma kitail peikiong ih oh utungada sapwellime pwihn.
17 Ahpw ma kitail sapeikiong ladu lelepek oh loalokong de ma kitail pilada en peikiongete dahme kitail medewe me kesempwal, kitail kin uhwongada kupwuren Siohwa. Ma kitail wia met, kitail sohte pahn kak kompoakepahnki ih. Kitail pahn koasoiapene nan iren onop en mwuhr duwen ekei irair kan me kin kihong kitail ahnsou mwahu en kasalehda ma kitail kin peik. Pilipil kan me kitail kin wiahda nan irair pwukat pahn kasalehda ma kitail iangehr kisehn sapwellimen Koht kommoal.
Raparapahki Soahng Kesempwal kan Sang Mahsen en Koht
Peidek Kan Sang Sounwadawad Kan
Nan Ipru 4:12, ia wehwehn “mahsen en Koht” eh “wie momour oh manaman”?
▪ Irelaudo sewese kitail en wehwehki me wahnpoaron Pohl koasoakoasoia sapwellimen Koht mahsen kan me pidada kupwure, duwehte me kitail diar nan Paipel.
Neitail sawaspen Paipel kan kin kalapw doadoahngki Ipru 4:12 pwehn kasalehda me Paipel ahneki manaman en wekidala mouren aramas, oh e inenen konehng kitail en nda met. Ahpw, e pil mwahu en wehwehki dahme Pohl koasokoasoia ni ahnsou me e ntingihedi Ipru 4:12. E kin kangoange Kristian en Ipru ko ren utung sapwellimen Koht koasoandi kan. Tohtohn koasoandi pwukat sansalda nan pwuhk sarawi. Pohl doadoahngki mehn Israel ko me Koht ketin kamaiauda sang Isip nin duwen karasaras ehu. Mehn Israel ko ahneki koapworopwor en pedolong nan sapwen inowo me “reken mwenge oh kepwe,” wasa me re kak uhdahn kommoaldi.—Eks. 3:8; Deud. 12:9, 10.
Met iei sapwellimen Koht koasoandi. Ahpw, mehn Israel ko sohte idawehn sapwellimen Siohwa kaweid oh pil sohte kasalehda pwoson, kahrehda pali laud en irail sohte pedolong nan irair en kommoal wet. (Nemp. 14:30; Sos. 14:6-10) Ahpw Pohl pil nda me mihete “inou en pedolong oh kommoaldi reh [Koht].” (Ipru 3:16-19; 4:1, NW) E sansal me “inou” wet wia kisehn sapwellimen Koht koasoandi. Duwehte dahme Kristian en Ipru ko wia, kitail kak wadek duwen koasoandio oh pil utungada. Pwehn kasalehda ni sansal duwen inou wet eh poahsoandahsang nan Paipel, Pohl doadoahngki mahsen kan ni imwin Senesis 2:2 oh Melkahka 95:11.
Kitail uhdahn kin mwekidki me “inou en pedolong oh kommoaldi reh [Koht] mihmihte.” Kitail likih me koapworopwor me poahsoandahsang Paipel en pedolong oh kommoaldi rehn Koht uhdahn kak wiawi, oh kitail wiahdahr kahk kan pwehn iang pedolong. Kitail sohte kin wia met sang ni atail kin songosong en idawehn Kosonned en Moseso de sang atail wia soahng mwahu kan ihte pwehn pwungla rehn Siohwa. Ahpw, pwehki atail pwoson Koht, kitail kin utungada ni peren sapwellimen Koht koasoandi kan oh pousehlahte wiewia met. Aramas tohto nin sampah pwon pil tepidahr onopki Paipel oh sukuhlki dahme Koht ketin kasalehdahr duwen sapwellime koasoandi. Met kamwakid pali laud en irail en wekidala mwomwen arail mour, kasalehda pwoson, oh papidaisla. Mwomwen arail mwekidki met wia mehn kadehde sansal ehu me “mahsen en Koht wie momour oh manaman.” Dahme Koht ketin kasalehdahier nan Paipel duwen dahme e ketin kupwurki kamwakidadahr atail mour, oh met pahn pousehlahte wie manaman nan atail mour.
it-1-E 1139 par. 2
Koapworopwor
Koapworopwor en mour soutik wet oh mehkot me sohte kin mwerpeseng ong irail akan “me iang ale malipilip en nanleng” (Ipr 3:1) kin uhdahn poahsoankihda mehn kadehde oh iei mehkot me kitail kak uhdahn likih. Soahng riau me utung koapworopwor wet, me iei sapwellime inou oh sapwellime kahula, me kasalehda me Koht sohte kak ketin likamw. Oh koapworopwor wet kin mih rehn Krais, me met sapwellimanki soangen mour me sohte kak mehla nanleng. Ihme kahrehda Paipel mahsanih me koapworopwor wet “rasehng angke ehu ong atail mour, me likilik oh teng, oh me kin waikitaillahng masloalen kahdengo [ni samworo lapalapo eh pedolong nan Wasa Sarawiheo ni Rahnen Tomwo], wasa me Sises me tienglahr mwohtailo ketilahngehr ie pwehki kitail, ih me ketin wialahr samworo lapalap kohkohlahte duwehte Melkisedek.”—Ipr 6:17-20.