Iren Sawas kan ong Doaropwehn Kasukuhl ong Mihting en Mour oh Kalohk
July 1-7
SOAHNG KESEMPWAL KAN SANG MAHSEN EN KOHT | KOLOSE 1-4
“Kapwuhrasang Mehn Mahso, oh Pwuhriong me Kapwo”
Sapwellimen Koht Manaman en Kaweid Uhk A Kaidehn Elen Madamadau en Sampah
12 Ia duwe, ei irair kin kasalehda sapwellimen Koht madamadau de elen madamadau en sampah? (Wadek Kolose 3:8-10, 13.) Elen madamadau en sampah kin kangoange ahnepen aramas. (Kal. 5:19-21) Dahme kin kamwakid kitail kin sansalda kaidehn ahnsou me soahng koaros kin mwahu, ahpw ni ahnsou me kahpwal mie, duwehte ma emen riatail Kristian eh pohnsehsehla kitail, de kansensuwedihala kitail de wia dihp ong kitail. Pil ni ahnsou me kitail kin mihmi ni imwatail, ele e kin sansalda ma kitail kin mweidohng sapwellimen Koht manaman de elen madamadau en sampah en kamwakid kitail. Kitail anahne kasawih pein kitail. Idek rehmw, ‘Erein sounpwong weneu samwalahro, ei irair kin duwehla irair en Krais de e pwuralahng mwomwen ei kin lokaia oh wiewia suwed kan?’
13 Sapwellimen Koht manaman kak sewese kitail en ‘pwilikihdi mour mering en mahso iangahki eh wiewia kan’ oh ‘pwuhriong nan likoun mour kapw en aramas kapw.’ Met pahn sewese kitail en kalaudehla atail limpoak oh kadek. Kitail pahn kin men mahkohng meteikan, mehnda ma mie kahrepe kitail en kaulimki irail. Ni atail kin kilang sapwung kan, kitail solahr pahn kasalehda “mwakar koaros, soangen ineng suwed koaros, soangen lingeringer koaros, soangen men pei koaros, soangen lahlahwe koaros, soangen kailok koaros.” Ahpw kitail pahn nantihong en “loallamwahupene.”—Ep. 4:31, 32.
Ke Wiliakapwalahr?
18 Ma kitail men Mahsen en Koht en kawiliakapwala kitail, kitail anahne wia laudsang ihte wadek oh sukuhlki. Aramas tohto kin wadek Paipel oh ese dahme e mahsanih. Mwein ke tuhwongehr soangen aramas duwehte met nan kalohk. Ekei pil kak wadlikiala oh nda ire kei nan Paipel. Ahpw met sohte kin wekidala mwomwen arail madamadau de arail mour. Dahme kahrehda? Pwehki Mahsen en Koht kin kawiliakapwala aramas akan ihte ma re mweidohng ire ko en sair mohngiongirail. Kitail anahne doudouloale dahme kitail wadek sang Paipel. Kitail anahne pein idek rehtail: ‘I kamehlele me met kaidehn ihte padahk en pelien lamalam ehu? I kilangehr mehn kadehde nan ei mour me met uhdahn padahk mehlel? I kin doadoahngki nan ei mour dahme I sukuhlki oh sohte wiahki me I en ihte padahkihong meteikan? I kamehlele me dahme I sukuhlki kin kohsang rehn Siohwa, duwehte e ketin mahmahseniong ie?’ Ma kitail kin doudouloale soangen peidek pwukat, kitail pahn karanihala Siohwa. Ni ahnsou me dahme kitail sukuhlki kin sair mohngiongitail, kitail pahn mwekidki wiahda wekidekla kan nan atail mour me kin kaperenda kupwuren Koht.—Lep. Pad. 4:23; Luk 6:45.
19 Ma ahnsou koaros kitail kin wadek Paipel oh doudouloale, met kak sewese kitail en pousehlahte wia dahme Pohl koasoia: “Kumwail pwilikidier mour mering en mahso iangahki eh wiewia kan; oh met kumwail pwuhriongehr nan likoun mour kapw en aramas kapw. Iei aramas kapw me Koht, Sounwiepe, kin ketin onohne sapahl ahnsou koaros.” (Kol. 3:9, 10) Ma kitail uhdahn wehwehki dahme Paipel kin padahngki oh doadoahngki dahme kitail sukuhlki, met pahn kamwakid kitail en pwuhriong ni mour kapw en Kristian me kak perekitail sang ahn Sehdan lidip kan.
Raparapahki Soahng Kesempwal kan Sang Mahsen en Koht
it-2-E 169 par. 3-5
Wehin Koht
“Wehin Sapwellime Ohl Kompoak.” Rahn eisek mwurin Sises eh ketidahla nanleng, ni Pendekos pahr 33, sapwellime tohnpadahk kan ahneki mehn kadehde me e “ketin kasapwiladahngehr ni palimaun en Koht” ni ahnsou me Sises ketin kamwerehdi sapwellimen Koht manaman pohrail. (Wiewia 1:8, 9; 2:1-4, 29-33) ‘Inou lap kapwo’ eri tepida doadoahk rehrail, oh re wiahla poahsoanpen “wehi sarawi” kapw ehu, Israel en Koht.—Ipr 12:22-24; 1Pi 2:9, 10; Kal 6:16.
Krais met ketier ni palimaun en Semeo oh ih me Tapwin mwomwohdiso wet. (Ep 5:23; Ipr 1:3; Pil 2:9-11) Paipel kasalehda me sang Pendekos pahr 33 kohla, wehi ehu kokoudahr pwehn kaweid sapwellime tohnpadahk kan. Ni ahnsou me wahnpoaron Pohl ntinglahng tepin Kristian kan nan Kolose, e koasoakoasoia duwen Sises Krais nin duwen me e sapwellimankiher wehi ehu: “[Koht] ketin kapitkitailsang manaman en rotorot oh ketin kasaukitaillahng nan wehin sapwellime Ohl kompoak.”—Kol 1:13; pil kilang Wi 17:6, 7.
Wehin Krais sang Pendekos pahr 33 kohdo, wiahier wehi soh sansal ehu me kin kakaun Israel en Koht, Kristian akan me keikihdi sapwellimen Koht manaman pwehn wiahla sapwellimen Koht seri kan. (Soh 3:3, 5, 6) Ni ahnsou me Kristian pwukat me keikihdi sapwellimen Koht manaman ale ketingparail nanleng, re sohla pahn iang kisehn irail kan pohn sampah me mi pahn kaundahn wehin Krais, ahpw re pahn wiahla nanmwarki kei rehn Krais nanleng.—Kau 5:9, 10.
Ire Kesempwal akan Sang nan Pwuhken Kalesia, Episos, Pilipai, oh Kolose
2:8—Soahng dah kan me Pohl kaweidki kitail en liksang? E kaweidki en liksang soahng kan me kin wia kisehn ahn Sehdan sampah—mehkan de mour en koasoandi kan me kin wiahda, kahluwa, de kamwakid irair en sampah. (1 Sohn 2:16) Nanpwungen mepwukat iei loalokong widing mwahl en aramas akan, men kepwehpwehla, oh pil kaudok likamw akan en sampah.
July 8-14
SOAHNG KESEMPWAL KAN SANG MAHSEN EN KOHT | 1 DESELONIKA 1-5
“Kumwail Kangkangoange oh Kangkakehlailih Emenemen”
“Wauneki Mehlel Irail kan me Wie Doadoahk Rehmwail”
12 En “kaweid” mwomwohdiso kin pidada laudsang wia padahk. Lepin lokaia “apwahpwalih” me kileldi nan 1 Timoty 3:4 ahneki wehwe teieu. Pohl koasoia me sounapwalih men anahne wia ohl men me kin “apwahpwalih mwahu eh peneinei, oh nah seri kan pahn peikiong ni wahu unsek.” Wasaht lepin lokaia “apwahpwalih” kin sansal me e pidada kaidehn ihte padahkih nah seri kan ahpw pil wenla mwowe nan eh peneinei oh sawas pwe “nah seri kan pahn peikiong ni wahu unsek.” Ei, elder kan kin apwalih mwomwohdiso pwe ren sewese koaros ren peikiong Siohwa.—1 Tim. 3:5.
“Wauneki Mehlel Irail kan me Wie Doadoahk Rehmwail”
19 Dahme ke pahn wia ma ke alehdi kisakis ehu me wiawihda ong uhk? Ia duwe, ke pahn kasalehda omw kalahngan sang ni omw kin doadoahngki? Siohwa ketin doadoahngki Sises pwe en ketikihong uhk “sapwellime kisakis en aramas akan.” Ehu ahl ken kasalehda me ke kin kalahnganki kisakis pwukat iei sang omw kin rong kanahieng padahk en elder kan oh song en doadoahngki kaweid kan me re kasalehda. Ke pil kak kasalehda omw kalahngan sang ni omw kin wia pasapeng mwahu kan nan mihting kan. Sewese doadoahk me elder kan kin tiengla mwowe wia me duwehte doadoahk en kalohk. Ma ke paiekihda kaweid me ke alehdi sang emen elder, ke sou ndaiong ih met? Patehng mepwukat, ke sou kasalehda omw kalahngan rehn arail peneinei kan? Ken tamataman me ni elder men eh kin doadoahk laud nan mwomwohdiso, eh peneinei kin tounmeteikihla arail ahnsou me re kak ahneki reh.
“Kasalehda Limpoak Mehlel ni Wiewia kan”
13 Sewese irail kan me luwet. Kehkehlik sang Paipel me kitail en “sewese me luwet akan, oh kanengamahiong aramas koaros” kak kasonge atail limpoak ma e kin uhdahn mehlel. (1 Des. 5:14) Riatail tohto me luwet mahs kin mwuhr kehlailla nan arail pwoson. Ahpw ekei kin anahne atail kanengamah oh sawas laud. Ia duwen atail kak sewese irail? Kitail kak doadoahngki Paipel pwehn kangoange irail, kitail kak luke irail en iang kitail kalohk, de kitail kak ihte rong ni arail kin koasoi. Pil ehu, kitail en dehr ihte medewe me riatail kan “kehlail” de “luwet.” Ahpw kitail en pohnese me kitail koaros ahneki kehl oh pil luwet akan. Pil wahnpoaron Pohl wehkada me mie eh luwet akan. (2 Kor. 12:9, 10) Kitail koaros anahne sawas oh kangoang sang meteikan.
Alasang Sapwellimen Sises Aktikitik oh Eh Kin Ketin Poakehla Aramas
16 Atail lokaia ni elen limpoak. Atail pepehm en poakehla aramas pahn kamwakid kitail en “kakehlaka irail kan me nan kapehd tikitik” sang ni mwomwen atail lokaiahiong irail. (1 Des. 5:14) Dahme kitail kak nda pwehn kangoange irail? Kitail kak ndaiong irail ia uwen atail nsenohkin irail. Kitail kak kapinga irail oh sewese irail en kilang arail irair kaselel oh koahiek kan. Kitail kak katamankihong irail me Siohwa me ketin sewese irail en diarada padahk mehlel, eri re uhdahn kesempwal mwohn silangih. (Sohn 6:44) Kitail kak kamehlelehiong irail me Siohwa uhdahn ketin nsenohki sapwellime ladu kan me “nan kapehd tikitiklahr” de “sohla ar koapworopwor.” (Mel. 34:18) Atail lokaia ni elen limpoak kak kansenamwahwihala irail kan me nsensuwed.—Lep. Pad. 16:24.
Raparapahki Soahng Kesempwal kan Sang Mahsen en Koht
it-1-E 863-864
Nenek
Nenek iei tiahk suwed ehu me emen kak pisikenkihsang mwomwohdisohn Kristian. (1Ko 5:9-13; Ipr 12:15, 16) Wahnpoarono kawehwehda me Kristian men me wiahda dipen nenek kin dihpiong pein paliwere, ni eh doadoahngki eh dipwisoun kaparapar ni kahrepe suwed. E wiahda dihp laud me kauwehla eh nanpwungmwahu rehn Koht, oh kasaminehla sapwellimen Koht mwomwohdiso, oh kahrehiong pein ih nan keperpen ale soumwahu suwed me kohsang tiahk en wia nsenen pwopwoud. (1Ko 6:18, 19) E kin kauwehla pwuhng en rie Kristian akan (1De 4:3-7) sang ni eh (1) wahlong samin, tiahk kanamenek oh adsuwed nan mwomwohdiso (Ipr 12:15, 16), (2) kauwehla tiahk mwakelekel en mehmeno me e wiahda dipen nenek reho, oh ma ih kiripw men, e sohte mwakelekel ni eh pahn pwopwoudida, (3) kauwehla adamwahu en eh peneinei, oh pil (4) wiahda mehkot me kansensuwedihala pahpa oh nohno de ohl pwopwoud de en aramas me e wiahda dipen nenek reho eh inoun pwopwoud. E kin mwamwahliki, kaidehn aramas ahpw Koht. Ahn aramas kosonned ele pahn de sohte pahn mweidada nenek, ahpw Koht pahn ketin kihong kalokepen dipeo.—1De 4:8.
“Komourpamwail Kerendohr”!
14 Dahme pahn wiawi mwurin Kok en Makok tepida mahweniong sapwellimen Koht aramas akan? Paipel mahsanih me Nein-Aramas “pahn poaronepeseng sapwellime tohnleng kan ong ni keimw pahieu en sampah pwe re en kapokonepene sapwellimen Koht pilipil kan sang ni imwin sampah koaros.” (Mark 13:27; Mad. 24:31) Doadoahk en kapokonepene wet sohte kin dokedoke ahnsou me Kristian keidi kan tepin pilipilda. Oh e pil sohte dokedoke kaimwiseklahn kileldi en me keidi kan me mihmihte sampah. (Mad. 13:37, 38) Kaimwiseklahn kileldi wet pahn wiawi mwohnte tepidahn kahn kamakam kowahlapo. (Kaud. 7:1-4) Eri, doadoahk en kapokonepene dahieu me? Ih ahnsou me me keidi kan me mihmihte sampah pahn ale ketingparail oh kohdahla nanleng. (1 Des. 4:15-17; Kaud. 14:1) Mwekid wet pahn wiawi ahnsou ehu mwurin Kok en Makok eh tepida eh uhwongo. (Esek. 38:11) Mwuhr, nin duwen me Sises mahsanih, “me lelepek kan pahn lingalingla nan Wehin Samarailo duwehte ketipin.”—Mad. 13:43.
15 Aramas tohto nan pwihn en Kristian likamw kan kin kamehlele me ni ahnsou me Sises pahn ketido pwehn kaunda sampah, re pahn kak kilang ih oh irail koaros eri pahn kohdahla nanleng ni paliwar uduk. Ahpw Paipel kasalehda ni sansal me aramas sohte kak kilangki meserail pwarodohn Sises. E mahsanih: “Kilel en Nein-Aramas pahn pwarada pahnlahng” oh e pil mahsanih me Sises pahn ketido “pohn depwek en pahnlahng kan.” (Mad. 24:30) Paipel pil mahsanih me “soangen paliwar me wiawihdasangete uduk oh nta sohte kak iang sohsohki Wehin Koht.” Eri, irail kan me pahn kohdahla nanleng anahne mahs “kiewekla ni ahnsoutehkis, ni marepteieu, ni ahnsou me kaimwiseklahn sowi pahn pepeuk.” (Wadek 1 Korint 15:50-53.) Eri, luhwen me keidi kan pahn ni ahnsoutehkis kapokonpene.
July 15-21
SOAHNG KESEMPWAL KAN SANG MAHSEN EN KOHT | 2 DESELONIKA 1-3
“Kasansaldahn Aramas Suwedo”
it-1-E 972-973
Poadidiong Koht
Iet pil ehu ire me rir, me uhdahn weksang douluhl sapwellimen Siohwa “rir sarawi.” Iei ‘rir suwedo.’ Ire wet me rir ong Kristian akan pwehki erein ahnsoun Pohlo, e saikinte sansalda ihs uhdahn “aramas suwedo” nin duwen pwihn sansal ehu. Pil mwurin “aramaso” eh pahn wiahla mehkot, kasalepen ihs ih pahn wiahte mehkot rir ong pali tohtohn aramas pwehki eh suwed kan pahn wiewiawi ni rir oh ni mwomwen poadidiong Koht. Ni mehlel, e pahn wia mwekid en kesehla oh uhwongada kaudok mehlel a kaidehn poadidiong Koht. Pohl koasoia me “rir suwed wet” wiewiahier nan eh ahnsowo, pwehki mie suwed me kin kamwakid mwomwohdisohn Kristian me pahn kedekedeo wiahda pwihn me kesehla oh uhwongada kaudok mehlel. Eri, Sises Krais pahn ketin kasohrehla pwihn wet ni ahnsou me e pahn ketier. ‘Aramaso’ me kin uhwong kaudok mehlel oh me Sehdan kin doadoahngki pahn kasapwilada pein ih “pohn koaros me adaneki ‘koht’ de mehkot me aramas kin pwongih” (Ni lokaiahn Krihs, seʹba·sma). Kahrehda sounpelian Koht lapalap menet me Sehdan kin doadoahngki uhdahn pahn widing oh kahrehiong irail me kin idawehn eh tiahk kan ren kasohrala. Doadoahk en “aramas suwedo” pahn pweida pwehki eh suwed kan kin wie ekiek pahn eh mwalaun en poadidiong Koht.—2De 2:3-12; pil kilang Md 7:15, 21-23.
it-2-E 245 par. 7
Likamw
Siohwa ketin mweidohng “manaman widing” en kowohng aramas akan me pwungki pilada likamw “pwe irail en kamehlele likamw” ahpw kaidehn rongamwahu duwen Sises Krais. (2De 2:9-12) Karasaras en ire mehlel wet wiawi sounpar epwiki kei mwowe me pid Nanmwarkien Israel Eihap. Soukohp likamw kan kamehlelehiong Eihap me e pahn pweida ni eh pahn mahweniong Ramod-kilead, nindoken sapwellimen Siohwa soukohpo Maikaia kohpada duwen kahpwal me pahn wiawi. Nin duwen me kaudiahl me kohwong Maikaiao kasalehda, Siohwa ketin mweidohng ngehn emen en wiahiong nein Eihap soukohp ako ren “wia kokohp likamw.” Met wehwehki me ngehno doadoahngki eh manaman pohrail pwe irail en koasoia, kaidehn me mehlel, ahpw dahme irail men nda oh dahme Eihap men rongasang irail. Mendahki Eihap rongehr rohng suwedo mwohn eh wiawi, ahpw e pilada en mweidohng arail likamw en pitihedi, kahrehda e mehla.—1Na 22:1-38; 2Kr 18.
Raparapahki Soahng Kesempwal kan Sang Mahsen en Koht
it-1-E 834 par. 5
Kisiniei
Piter ntingihedi me “lahng oh sampah en ahnsou wet kin nekinek ong kisiniei.” Audepen iretikitik kan en mwowe oh mwuri oh iren Paipel teikan kasalehda me met kaidehn uhdahn kisiniei ahpw e wia karasaras en kasohrala soutuk. Duwehte Nohliko ni mwehin Nohao eh sohte kasohrehla nanleng oh sampah, ahpw ihte aramas suwed kan, ih pil duwen Sises Krais oh sapwellime tohnleng kehlail kan ar pahn sansalda nan mpwulen kisiniei ehu me pahn imwikihla kasohrala soutuk ongete me suwed kan oh koasoandi suwed wet me irail kin iang.—2Pi 3:5-7, 10-13; 2De 1:6-10; pil kilang Ais 66:15, 16, 22, 24.
it-1-E 1206 par 4
Dahme Kin Kamwakid
“Rohngo Sang Rehn Koht”—Pwung oh Sapwung. Lepin lokaiahn Krihs pneuʹma kin kadoadoahk ni ahl tohrohr ehu nan nein wahnpoaron ko ekei kisinlikou ko. Karasepe, nan 2 Deselonika 2:2, wahnpoaron Pohl kangoange rie Kristian kan nan Deselonika ren dehr pwunodada de mwadang pingida “ma emen nda me rahnen Siohwa leledohr . . . mehnda ma re nda me rohngo sang rehn Koht, de re wadekasang nan kisinlikou me dene se ntingihada.” E sansal me Pohl doadoahngki lepin lokaiao pneuʹma pwehn dokedoke wiepen kapehse, me duwehte “re nda” de “kisinlikou.” Ih kahrepe wet me pwuhket Lange’s Commentary on the Holy Scriptures (pali 126) nda duwen iretikitiko: “Sang ni met me Wahnpoarono koasoakoasoia ire ehu sang rehn ngehn emen, kamwomwadahn kokohp, koasoi en soukohp men.” (Kawehwehdi oh kapwungpwungla sang rehn P. Schaff, 1976) Nein Vincent pwuhko (Word Studies in the New Testament) koasoia: “Sang ngehn. Sang koasoi en emenemen soukohp me iang kapokon en Kristian kan, dene re ahneki manaman en kaudiahl sang rehn Koht.” (1957, Vol. IV, p. 63) Kahrehda, ni ekei kawehwe kan eh kawehwehdi pneuʹma nan ire wet oh pil wasa teikan nin duwen “ngehn,” ekei kawehwe kin nda “rohng sang rehn Ngehno” (AT), “kokohpda” (JB), “dahme kamwakid” (D’Ostervald; Segond [French]), “sang rehn Koht” (NW).
July 22-28
SOAHNG KESEMPWAL KAN SANG MAHSEN EN KOHT | 1 TIMOTY 1-3
“Nantihong Ale Pwais en Doadoahk Mwahu”
Ke Kin Pohnese Anahnepen Kekeirda nan Omw Papah Siohwa?
3 Wadek 1 Timoty 3:1. Wahnpoaron Pohl kin kapinga rie Kristian ko me kin “nantihong ale pwukoa” en sounapwalih kei. Pwe aramas emen en kak ale mehkot me apwal en ale, e pahn anahne nantihong oh ele kapahwei peho pwehn ale. Nna medewehla brother men me men wiahla sounsawas men. E pohnese me e anahne nantihong kakairada eh irair en Kristian. Eri, ni eh wiahla sounsawas men, e kin pousehlahte doadoahk laud pwe en kak wiahla sounapwalih men.
km-E 9/78 4 par. 7
Irail me ‘Alehda Adamwahu’
7 Eri, e mengei en kilang ia kahrepen Pohl eh ndahki soangen ohl pwukat me irail kin “alehiong pein irail adamwahu.” Met kaidehn dahme ekei kin nda, me dene kasapwilada ehu nan imwen sarawi. Ahpw, sounsawas akan me “kin doadoahk mwahu” kak kamehlele me re pahn ale kapai sang rehn Siohwa oh Sises, oh re ahneki wahu oh utuht en tohnmwomwohdiso pwon. E konehng ren alehiong pein irail “saledek laud en koasoia arail pwoson Krais Sises.” Arail kin mehleliong arail pwukoa, kahrehda aramas kin kalahnganki arail doadoahk en papah mwahu; arail pwoson me kehlail oh re kak kadehdehda arail pwoson me sohte kin masak de masak en aramas ar pahn kauwe irail.
Raparapahki Soahng Kesempwal kan Sang Mahsen en Koht
it-1-E 914-915
Irekidien Peneinei
Pwehn onopki oh koasoakoasoia duwen ire pwukat sohte katepe, oh e pil ahpwte sohla katepe ni ahnsou me Pohl ntinglahng rehn Timoty. E sohla kesempwal en kolokol ntingdien irekidien peneinei pwehn kadehdehda mehnia peneinei me emen ipwisang ie, pwehki Koht solahr ketin pohnese ma mie wekpeseng nanpwungen mehn Suhs oh mehn liki kan nan mwomwohdiso. (Kal 3:28) Oh pwuhk kan me kilelehdi irekidien peneinei kan kasalehdahr me Krais kohsang ni kadaudok en Depit. Oh e sohte pahn werei mwurin Pohl eh ntingihedi kehkehlik wet me Serusalem pahn kasohrala, iangahki nein mehn Suhs pwuhk kan. Koht sohte ketin nekinekid soahng pwukat. Kahrehda e konehng Pohl eh kin pwunodki Timoty oh mwomwohdiso kan re de kedirepwkihla wia roporop oh uhkipene ire kan me pid pein arail peneinei, mehkot me sohte pahn sewese pwoson en Kristian kan. Irekidien peneinei me Paipel kihda ihte ong kadehdehda en Krais eh wia Mesaia, irekidien peneinei me keieu kesempwal ong Kristian akan. Irekidien peneinei teikan nan Paipel wia mehn kadehde me audepen Paipel uhdahn mehlel, ni eh kasalehda ni sansal poadopoad kan me pwung oh mehlel.
cl-E 12 par. 15
“Kilang! Iet Ih Atail Koht”
15 Pil ehu lengileng me Siohwa kelehpw sapwellimanki iei “Nanmwarki poatopoat.” (1 Timoty 1:17; Kaudiahl 15:3) Ia wehwehn met? E apwal ong kitail en medemedewe oh wehwehki, ahpw Siohwa ketin poatopoat, ieias sangete mahs oh pil pahn kohkohlahte. Melkahka 90:2 mahsanih: “Komwi Koht poatopoat emen, oh pahn wia Koht kohkohlahte.” Eri Siohwa sohte tapi douluhl; e ketiketier ahnsou koaros. E pwung Koht en ketin mwarenki “Mehmeno me ahneki mour poatopoat”—e ketin mieier erein ahnsou kohkohlahte mwohn mehmen de mehkot nanleng oh sampah miehla! (Daniel 7:9, 13, 22) Ihs me kak peidengki sapwellime pwuhng en wia Kaun Wasa Lapalahpie?
July 29–August 4
SOAHNG KESEMPWAL KAN SANG MAHSEN EN KOHT | 1 TIMOTY 4-6
“Poadidiong Koht Pelian Kepwehpwe”
w03-E 6/1 9 par. 1-2
Sukuhlki Kesempwalpen Esehla Itarki Dahme Ke Ahneki
Dahme kin keieu sewese Pohl en peren oh nsenamwahu iei eh eselahr itarki dahme e ahneki. Ahpw ia wehwehn en esehla itarki dahme emen ahneki? E wehwehki en itarkiher ma soahng kan me keieu anahn mieier. Pohl koasoiaiong ienge sounkalohko Timoty duwen met ni eh nda: “Ni mehlel, emen kak alehdi mehkot laud ma e kin poadidiong Koht oh itarki dahme mie. Pwe kitail sohte wadohng mehkot nin sampah, oh kitail pil sohte kak wahsang mehkot. Eri ma mie kanatail mwenge oh atail likou, kitail pahn kin itarki mepwukat.”—1 Timoty 6:6-8.
Tehk me Pohl koasoia duwen itarki dahme mieier eh dokedoke poadidiong Koht. E pohnese me nsenamwahu mehlel kin kohsang poadidiong Koht, me iei, sang ni emen eh kin mwohneki mahs papah Koht, ahpw kaidehn en ahneki kepwe tohto. ‘Ma mie kene mwenge oh eh likou’ iei me pahn sewese ih en kak pousehlahte poadidiong Koht. Eri ong Pohl kesempwalpen esehla itarki dahme e ahneki iei en koapworopworki Siohwa, sohte lipilipil soangen irair dah e mi loale.
g-E 6/07 6 par. 2
Nantihong en Kepwehpwehla—Ia Duwen met Eh Kak Kamwakid Uhk
Ei, aramas tohto sohte mehkihla arail nantihong kepwehpwehla. Ahpw mour kakete sohrasang irail nindoken arail wie soupisengki raparapahki kepwehpwe. Oh pil mwomwen arail mour kak apwal ma pwunod en doadoahk de mwohni kahrehda ren pwunod laud, sohte meir mwahu, kalapw moang medek, de soumwahu en nan mpwei—soangen soumwahu kan me kak kamwotehla ahn emen mour. Mehnda ma emen pil tehkada eh anahne wekidala dahme e kin keieu kesempwalki nan eh mour, e kakete pwandala. Eh pwoud ele sohla pahn likih ih, nah seri kan ele ohlahr arail pepehm, oh eh roson mwein ohlahr. Ele ekei soahng kan me ohlahr kak kamwahula, ahpw e pahn anahne doadoahk laud. Eri soangen aramas pwukat “kalokehki pein irail medek tohto.”—1 Timoty 6:10.
g-E 11/08 6 par. 4-6
Ahl Weneu ong Emen Pahn Pweida
Nin duwen atail tehkpene tepin irehn nan ire pwukat, aramas akan me kin nannantihong ren kepwehpwehla pwe ren pweida, kin ni mehlel, raparapahki mehkot me sohte mehlel. Likin arail alehiong pein irail nsensuwed, irail pil alehiong pein irail soangsoangen medek kei. Karasepe, nindoken aramas ar kin nantihong kepwehpwehla, irail kin kalapw tounmeteikihla arail nanpwungmwahu rehn arail peneinei oh kompoakparail kan. Meteikan kin mendahkihla meir—pwehki doadoahk, de pwunod. Eklesiasdes 5:12 mahsanih: “En ohl me kin doadoahk men eh meir kin kansenamwahu, mehnda ma kene mwenge me tikitik de laud; ahpw kepwe tohto me aramas kepwehpwe men ahneki sohte pahn mweidohng ih en meir.”—Hebrew Names Version.
Mwohni sohte wiahte soumas lemei men, ahpw e pil wia soumas widing men. Sises Krais mahsanih duwen “manaman widing en dipwisou kan.” (Mark 4:19) Met kak wehwehki, kepwehpwe kin inoukihda peren, ahpw e sohte pahn kapwaiada inowo. E ihte kin kihong ih ineng en kalaudehla eh pai. Eklesiasdes 5:10 mahsanih: “Aramas me kin poakohng mwohni sohte kak itarki dahme e naineki.”—The New English Bible.
Ni mwotomwot, limpoak en mwohni kin kauwehla emen oh kahrehiong emen en nsensuwedla, weikekla, de pil kauwehla kosonned. (Lepin Padahk 28:20) Dahme kin pidada nsenamwahu oh pweida iei kadek, madamadau en mahkohng, tiahk mwakelekel, limpoak oh nsenohki ahneki nanpwungmwahu rehn Koht.
Raparapahki Soahng Kesempwal kan Sang Mahsen en Koht
Ia Duwen Omw Kak Kolokol Kadeikpen Loalomw en Mwakelekel?
17 Wahnpoaron Piter ntingihdi: “Nan kapehdomwail kan en kin mwakelekel.” (1 Piter 3:16) Kadeikpen loalatail me mwakelekel mwohn silangin Siohwa Koht kin wia kapai laud. E weksang kadeikpen loalen aramas tohto rahnwet. Pohl kin koasoia duwen irail kan me “kadeikpen loalarail kan melahr, pwehki dihp me kakaun irail.” (1 Timoty 4:2) Aramas tohto rahnwet kin ahnla wiahda dihp oh kadeikpen loalarail solahr kin padahkihong irail en dehr wiahda me suwed. Irail sohte kin namenengki arail wiewia kan oh sohte kin lemeleme me re kin wiahda me suwed.
it-2-E 714 par. 1-2
Wadawad Mwohn Pokon
Nan Mwomwohdisohn Kristian. Ni mwehin tepin Kristian akan, me malaulau naineki doaropwe limilim kan en Paipel, kahrehda wadawad mwohn wehipokon kin anahn. Wahnpoaron Pohl kehkehlingki me nah kisinlikou kan en kin wadawad mwohn pokon ni mihting kan en mwomwohdisohn Kristian oh e pil ruwese irail en kihseli nah kisinlikou ko ong mwomwohdiso teikan pwe kisinlikou pwukat en pil kak wadawad ni mwomwohdiso ko. (Kol 4:16; 1De 5:27) Pohl kaweidki sounapwalih Kristian pwulopwul en mwomwohdiso Timoty en pein ‘nantihong eh pwukoahn wadawad mwohn meteikan, kihda kangoang oh padahk kan.’—1Ti 4:13.
Wadawad mwohn pokon anahne wiawi ni maledek. (Apa 2:2) Pwehki wadawad mwohn pokon kin wiawi pwehn kasukuhlih meteikan, sounwadawad mwohn pokon men anahne dehdehki mwahu ire kan me e wadewadek oh pil wehwehki mwahu dahme sounnting en Paipelo men kasalehda, ni eh pahn kin kanahieng eh wadawad pwe en dehr kihda madamadau sapwung de wehwe sapwung ong me rongorong kan. Nin duwen me Kaudiahl 1:3 kasalehda, irail kan me wadek kokohpo ni ngihl laud, oh pil irail me rong lepin mahsen ko oh kin kapwaiada, pahn peren.