Iren Sawas kan ong Doaropwehn Kasukuhl ong Mihting en Mour oh Kalohk
June 3-9
SOAHNG KESEMPWAL KAN SANG MAHSEN EN KOHT | KALESIA 4-6
“‘Sipai en Karasaras Pwoat’ me Mie Wehwepe ong Kitail”
it-1-E 1018 par. 2
Akar
Nin duwen wahnpoaron Pohl eh kawehwehda, Akar karasahda mehkot nan sipai ni karasaras. E karasahda wehin Israel me patehng Siohwa sang ni inou lap en Kosonned me wiawihda ni Nahna Sainai. Inou lapo wiahda “lidu kei.” Pwehki irair en dihp en aramas akan, wehio sohte kak kapwaiada koasoandi en inou lapo. Pahn inou lapo mehn Israel ko sohte wiahla aramas saledek kei ahpw irail wia aramas dipan ekei me warohng kamakamala; ihme kahrehda re wia lidu kei. (Soh 8:34; Ro 8:1-3) Serusalem ni ahnsoun Pohlo duwehte Akar, pwe Serusalem me wia poahsoan kaun oh wia wiliepen pwihn en pwilidak en mehn Israel kan, diarada me pein ih oh nah seri kan kin wia lidu kei. Kristian keidi kan, iei seri en “Serusalem powe,” me ni karasaras kin dokedoke sapwellimen Koht lih. Serusalem wet, duwehte Sara lih maiaudahr, me sohte douluhl wiahla lidu men. Ahpw me duwehtehte Aisek me lelohng lokolok sang rehn Ismael, eri pil duwehte seri en “Serusalem powe,” me saledekla pwehki sapwellime Ohlo, lelohng kalokolok ni pehn seri en Serusalem me kaliduhlahr. Ahpw en Akar oh nah pwutako ara pekeusla, kin wehwehki Siohwa eh pahn ketin soikala pwilidak en mehn Israel ko nin duwen wehi ehu.—Kal 4:21-31; pil kilang Soh 8:31-40.
Ahneki Pwoson Kehlail me Wehio Pahn Kapwaiada Kupwuren Koht
11 Inou kan me kohsang inou en Eipraam tepida pweida ahnsou me kadaudok en Eipraam kan sohsohkihdi Sapwen Inowo. Ahpw, Paipel kasalehda me inou wet pahn wahdo kapai kan me laudsang met. (Kal. 4:22-25) Wahnpoaron Pohl kawehwehda me kadaudoken Eipraam me keieu kesempwalo iei Sises Krais. Pohl pil kawehwehda: “Ma kumwail sapwellimen Krais, eri, kumwail kadaudok en Eipraam, oh kumwail pahn ale dahme Koht ketin inoukidahr.” Eri, Kristian keidi meh 144,000 ko pil wia kisehn kadaudoko pwehki Krais sapwellimanki irail. (Kal. 3:16, 29; Kaud. 5:9, 10; 14:1, 4) Liho nan inowo me wiawihda nan mwetuwel en Ihden iei sapwellimen Koht pwihn me mi nanleng. Liho adaneki “Serusalem en nanleng” me wiawihkihda tohnleng lelepek kan. (Kal. 4:26, 31) Inou en Eipraam inoukihda me kadaudoken liho pahn wahdo kapai kan me sohte imwi ong tohnsampah.
Raparapahki Soahng Kesempwal kan Sang Mahsen en Koht
w09-E 4/1 13
Ke Kin Ese Duwen Met?
Dahme kahrehda Sises ketin likwerihki Siohwa “Apa, Ipa” nan sapwellime kapakap?
Lepin lokaiahn Aramaiko ʼab·baʼʹ kak wehwehki “pahpa” de “Maing Sahm.” Ni pak siluh ko koaros me lepin lokaia wet pwarada nan Paipel, e wia kisehn kapakap oh e kin dokedoke Sahmo nanleng, Siohwa. Ia kesempwalpen lepin lokaia wet?
Ehu dikseneri en Paipel (The International Standard Bible Encyclopedia) koasoia: “Lokaia mengei en ni mwehin Sises, ʼabbāʼ kin kalapw kadoadoahk nin duwen lepin lokaia me pahpa oh nah seri kan me kerenpene kin kalapw doadoahngki nanpwungarail oh pil kin kasalehda wahu.” Met iei elen likwer me limpoak oh e wia kisehn lepin lokaia kan me seri men kin tepin esehla. Sises ketin doadoahngki lepin lokaia wet nan pekipek ngidingid ehu me e ketin wia rehn Semeo. Nan mwetuwel en Kedsemeni awa keite mwohn eh ketin pwoula, Sises ni kapakap likwerihki Siohwa lepin lokaia “Apa, Ipa.”—Mark 14:36.
Pwuhko pil doula koasoia: “ʼAbbāʼ nin duwen wiepen likwer ehu ong Koht uhdahn sohte kin kadoadoahk nan nein mehn Suhs pwuhk kan erein mwehin mehn Krihs oh Rom, pwehki e mwomwen pahn kasohwauwih Koht ma aramas pahn likwerihki ih lepin lokaiao.” Ahpw, “Sises . . . eh ketin doadoahngki lepin lokaia wet nan kapakap iei kasalepen Eh sapwellimanki nanpwungmwahu tohrohr keren rehn Koht.” Iren Paipel riau teiko me “Abba” pil pwarada loale—koaros wahnpoaron Pohl me ntingihdi—kin kasalehda me tepin Kristian kan pil kin doadoahngki nan arail kapakap kan.—Rom 8:15; Kalesia 4:6.
w10-E 11/1 15
Ke Kin Ese Duwen Met?
Dahme wahnpoaron Pohl koasoakoasoia duwe ni ahnsou me e nda me e weuwa “kilel en sapwellimen Sises ladu” ni paliwereo?—Kalesia 6:17.
▪ En Pohl koasoio kakete kihda wehwe kei nan madamadau en sounrongorong kan ni mwehin tepin Kristian ko. Karasepe, mete uhdahn karakar ehu kin kadoadoahk ni mwehin mehn mahs ako pwehn wia kilelepen me selidi kan nan mahwen, me kin pirap nan imwen kaudok kan, oh lidu me kin tang kan. Ni eh kin kadoadoahk ong aramas ni ahl wet, kilelo kin wia kilelepen sohte waun.
Ahpw kaidehkin ahnsou koaros kilel pwukat kin wia kasalepen sohte waun. Mehn mahs tohto kin doadoahngki kilel pwukat pwehn kasalehda me re wia tohn keinek ehu de ehu soangen pelien lamalam. Karasepe, Dikseneri me kin Kawehwe Lepin Lokaia kan nan Kadehde Kapw (Theological Dictionary of the New Testament) koasoia: “Mehn Siria kan kin kasarawihong pein irail koht Hadad oh Atargatis sang ni kilel kan me kohdiongehr pohn kumwutin pehrail de tepinwererail . . . Tehn tuhke ivy ehu kin kohdiong pohn sounpwongih Dionysus men.”
Me tohto rahnpwukat me kin kihda koasoi kan duwen Paipel kin medewe me Pohl kin koasoakoasoia duwen ohla kei ni paliwere me wiawihong erein eh doadoahk en misineri. (2 Korint 11: 23-27) Ahpw mwein Pohl koasoakoasoia duwen mwomwen eh mour—kaidehn uhdahn kilel kei—pwehn kasalehda ih nin duwen Kristian men.
June 10-16
SOAHNG KESEMPWAL KAN SANG MAHSEN EN KOHT | EPISOS 1-3
“Sapwellimen Siohwa Koasoandi oh Doadoahk en Koasoandio”
it-2-E 837 par. 4
Rir Sarawio
Wehin Mesaiao. Nan dahme Pohl ntingihedi, e kasalehda ni unsek kaudiahl en rir sarawi en Krais. Nan Episos 1:9-11, e koasoia duwen Koht eh ketin kasalehda “rir sarawi” en kupwure, oh koasoia: “Nin duwen me e ketin kupwurperenki oh me e ketin koasoanedier. Rir sarawi wet kin pidada wiawihdahn koasoandi ehu ni kaimwiseklahn ahnsou me kileldier, pwe en kihpene mehkoaros rehn Krais, soahng kan nanleng oh soahng kan nin sampah. Ei, rehn Krais me se kin miniminiong oh idihdidahr nin duwen serien sohso kei, pwehki se pilipildahr mwowe nin duwen koasoandi en Koht me kin ketin kapwaiada soahng koaros me e ketin koasoanedier nin duwen kupwure.” “Rir sarawi” wet kin pidada koperment ehu, iei Wehin Koht me Mesaia kakaun. “Soahng kan nanleng,” me Pohl koasoakoasoia duwe, iei serien sohso en Wehin nanleng rehn Krais. “Soahng kan nin sampah” iei irail kan nan sampah me mi pahn kaundahn Wehi wet. Sises kawehwehiong sapwellime tohnpadahk ko me rir sarawio kin pidada Wehio ni eh mahsanihong irail: “E mweimweiong kumwail en wehwehki rir sarawi en Wehin Koht.”—Mr 4:11.
Siohwa Ketikihpene Sapwellime Peneinei
3 Sapwellimen Siohwa wiewia kan oh kupwure kan kin pahrekpene. Eri, ni ahnsou me e ketin pilada, Koht ketin tepida wiahda koasoandi kan pwehn kaminiminpene sapwellime aramas oh tohnleng kan koaros. (Wadek Episos 1:8-10.) E ketin koasoanehdi mepwukat en wiawi ni kahk riau. Keieu, Koht ketin kaunopada irail me keidi kan pwe ren mi nanleng, wasa me re pahn pousehlahte doadoahk pahn kaundahn Sises Krais. E tepida wiawi ni Pendekos pahr 33, ahnsou me Siohwa tepida ketikihpene irail kan me pahn iang Krais kaunda nanleng ni eh ketin keieiraildi. (Wiewia 2:1-4) Pwehki meirong en Krais, Koht ketin kilangwohng me keidi kan nin duwen me pwunglahr kei reh oh warohng mour. Me keidi kan ese me re pwekpwekdahr nin duwen “sapwellimen Koht seri.”—Rom 3:23, 24; 5:1; 8:15-17.
4 Keriau, Koht ketin kaunopada irail kan me pahn kousoan nan Paradais nin sampah. Irail pwukat kin pwungki kaundahn Wehin Mesaia, me iangahki Krais oh pil me keidi kan nanleng. Pokon kalaimwuno me pitsang Armakedon iei irail me pahn tepin mour nan Paradais. (Kaud. 7:9, 13-17; 21:1-5) Eri, erein sounpar kid me Krais pahn kaunda, aramas lik kei pahn iasada pwe ren iang pokon kalaimwuno kousoan nin sampah. (Kaud. 20:12, 13) Medewehla uwen laud en ahnsou kitail pahn ahneki pwehn kasalehda me kitail kin miniminpene! Pokon kalaimwuno oh irail kan me pahn iasada iei ‘soahng koaruhsie nin sampah.’ Ni kaimwiseklahn sounpar kido, re pahn ale kasongosong. Koaros me lelepek kan pahn pwekpwekda nin duwen “sapwellimen Koht seri kan” nin sampah.—Rom 8:21; Kaud. 20:7, 8.
Raparapahki Soahng Kesempwal kan Sang Mahsen en Koht
Dehr Mweidohng Mehkot en Kahudi Omw Pahn Alehdi Lingan
15 Ia duwen atail kak sewese meteikan ren alehdi lingan sang rehn Koht? Ehu ahl iei sang atail mehn kahlemeng en dadaurete. Wahnpoaron Pohl ntinglahng mwomwohdisohn Episos koasoia: “I peki rehmwail, kumwail dehr kin nan kapehd tikitingkihla ei kin lokolongkin kumwail; pwe mehkoaros kin wiawi ong ni kamwahupamwail [“kalinganpamwail,” NW].” (Ep. 3:13) Dahme kahrehda Pohl nda me eh kahpwal kan kin wia kalinganpen mehn Episos ko? Sang ni eh papah rie Kristian ko mendahki kahpwal kan, Pohl kasalehiong irail me en papah Koht anahne keieu kesempwal ong Kristian men. Ma Pohl uhdihsang eh papah ni ahnsou me e lelohng apwal kan, ele rie Kristian ko pahn medewe me arail nanpwungmwahu rehn Siohwa, arail doadoahk en kalohk, oh arail koapworopwor sohte kesempwal. Sang eh mehn kahlemeng en dadaurete, Pohl kasalehiong rie ko me en wia sapwellimen Krais tohnpadahk kin kesempwal sang tounmetei koaros.
cl-E 299 par. 21
“Pwehn Esehla Limpoak en Krais”
21 Lepin lokaiahn Krihs me kawehwehdiong “en esehla” kin wehwehki en esehla “sang ni soahng kan me emen kehnehr de wiahier.” Ni atail kin kasalehda limpoak ni ahl me Sises kin ketin wia—ni soh roporop kihda pein kitail pwehki meteikan, ni atail kin poakeirailla kihong irail arail anahn akan, mahk ong irail sang nan atail mohngiong—kitail ahpw pahn kak wehwehki ni mehlel sapwellimen Sises pepehm kan. Ni ahl wet, pwehki atail kehnehr, atail “esehla limpoak en Krais pahn laudsang uwen atail dehdehki.” Oh kitail en dehr manokehla me uwen laud en atail kin nantihong kahlemengih Krais, ih uwen atail pahn karanihala meno me Sises kin ni unsek kahlemengih, atail Koht limpoak, Siohwa.
June 17-23
SOAHNG KESEMPWAL KAN SANG MAHSEN EN KOHT | EPISOS 4-6
“Pwuhriong Tehtehn Mahwen Koaros Sang Rehn Koht”
Me Pwulopwul kan—Kesihnenda Teng oh Pelianda Tepil
WAHNPOARON Pohl kin kapahrekiong Kristian kan sounpei kei. Kitail mi nan mahwen ehu, oh uhdahn mie atail imwintihti men! Kitail sohte kin mahweniong aramas, ahpw kitail kin mahweniong Sehdan oh ngehn suwed kan. Irail wia sounpei kei erein sounpar kid kei oh re uhdahn mai en pei. Eri mwein e mwomwen me kitail sohte kak kana nan mahwen wet, ahpw mehlel ma kitail pwulopwul. Ia duwe, me pwulopwul kan kak kana oh pelianda imwintihti kehlail pwukat? Ei, re kak oh re kin kana! Dahme kahrehda? Pwehki re kin ale kehl sang rehn Siohwa. Pil ehu, duwehte sounpei kan me kaiahnda mwahu, re kin ‘pwuhriong nan tehtehn mahwen koaros me Koht ketikihong irail’ pwe ren kaunopada ong mahwen.—Wadek Episos 6:10-12.
Me Pwulopwul kan—Kesihnenda Teng oh Pelianda Tepil
4 Duwehte mehn kateng ehu, padahk mehlel me kitail sukuhlkihsang Mahsen en Koht kin pere kitail sang padahk likamw kan. (Sohn 8:31, 32; 1 Sohn 4:1) Oh ni atail kin kalaudehla atail sukuhlki en poakohng padahk mehlel sang Mahsen en Koht, e pil pahn mengeila ong kitail en mourki kosonned kan en Koht, de en ‘perehki mwaremwaratail kan perehpen pwung.’ (Mel. 111:7, 8; 1 Sohn 5:3) Pil ehu, atail wehwehkihla laud padahk mehlel pwukat pahn kalaudehla atail kak uhki padahk pwukat ni atail pelian atail imwintihti kan.—1 Pit. 3:15
7 Sapwellimen Siohwa koasoandi pwung kan, me kin pere “mohngiongitail,” de soangen aramas dah kitail, kak karasahiong mehn perepen mwaremwaratail. (Lep. Pad. 4:23) Sounpei men sohte pahn wiliankihdi mehn perepen mwaremwareo pil ehu mehn perepe mete me luwet. Ni ahlohte, kitail en dehr wiliankihdi sapwellimen Siohwa koasoandi kan ong dahme pwung ong dahme kitail medewe me pwung. Met sohte wia elen loalokong en pere pein mohngiongitail. (Lep. Pad. 3:5, 6) Ihme kahrehda kitail anahne kaukaule tehk me perepen mwaremwaratail kin pere mohngiongitail.
10 Duwehte suht ko me sounpei en Rom kan kin suhtihada pwehn sewese irail en pweida nan mahwen, suht kan me kitail kin suhtihada ni karasaras kin sewese kitail en “waseli Rongamwahu en popohl.” (Ais. 52:7; Rom 10:15) Ahpw, ekei pak kitail anahne eimah pwehn kalohk. Bo, me sounpar 20, nda: “I kin masak en kalohk ong iengei tohnsukuhl kan. I medewe I namenek. Ei kin tamanda ahnsowo, I sehse ia kahrepen I en namenek. Ahnsouwet I kin perenki kalohk ong iengei tohnsukuhl kan.”
Me Pwulopwul kan—Kesihnenda Teng oh Pelianda Tepil
13 “Ketieu kisiniei” dahieu me Sehdan kak kasikihkin uhk? Ele e kin uhwong uhk ni eh kin wiahda likamw kan duwen Siohwa. Sehdan men ken medewe me Siohwa sohte ketin poakohng uhk oh me sohte emen kin nsenohkin uhk. Ida, me sounpar 19, nda: “I kin kalapw medewe me Siohwa sohte kin ketin karanih ie oh e sohte kupwurki wia Kompoakepahi.” Dahme e wia ni eh kin ahneki soangen pepehm wet? “Mihting kan kin kalaudehla ei pwoson. I kin kalapw mwomwohdte wasao oh sohte iang pasapeng, I kin medewe me sohte me men rong dahme I pahn koasoia. Ahpw met, I kin kaunopada ong mihting kan oh song en iang pasapeng pak riau de siluh. E apwal, ahpw I kin nsenamwahula ni ei wia met. Oh riei Kristian kan kin uhdahn kangoange ie. I kin ahnsou koaros kohkohsang ni mihting kan oh ese me Siohwa kin ketin poakohng ie.”
16 Duwehte lisoarop ehu eh kin pere moangen sounpei men, atail “koapworopwor en mour soutuk” kin pere atail madamadau. (1 Des. 5:8; Lep. Pad. 3:21) Atail koapworopwor kin sewese kitail en medemedewehte sapwellimen Koht inou kan oh sohte mworuskihla atail kahpwal kan. (Mel. 27:1, 14; Wiewia 24:15) Ahpw ma kitail men atail koapworopwor en pere kitail, met anahne uhdahn mehlel ong kitail. Kitail anahne doadoahngki atail “lisoarop,” a kaidehn en kol ni pehtail!
20 Wahnpoaron Pohl nda me Mahsen en Koht kin duwehte kedlahs ehu. Siohwa ketikihong kitail kedlahs wet. Ahpw kitail anahne doadoahngki ni koahiek pwehn pere atail pwoson de kamwahwihala elen atail madamadau. (2 Kor. 10:4, 5; 2 Tim. 2:15) Ia duwen omw kak kamwahwihala omw koahiek? Sebastian me sounpar 21, nda: “I kin ntingihedi ehu iretikitik sang ehuehu irelaud nan ei wadawad en Paipel. I kin kihkihpene iren Paipel kan me I keieu perenki.” Met kin sewese ih en wehwehki mwahu sapwellimen Siohwa madamadau. Daniel pil nda: “Ni ei kin wia ei wadawad en Paipel, I kin pilada iretikitik kan me I medewe pahn kak sewese aramas akan me I tuhwong nan kalohk. I diarada me aramas akan kin perenki rong ni arail kilang me ke kin uhdahn nsenohki duwen Paipel oh me ke kin wia uwen omw kak pwehn sewese irail.”
Raparapahki Soahng Kesempwal kan Sang Mahsen en Koht
it-1-E 1128 par. 3
Sarawi
Sapwellimen Koht Manaman. Iei kehl en sapwellimen Siohwa manaman me e kin ketin kadarseli oh met kin ahnsou koaros kapwaiada kupwure. E kin mwakelekel, min, sarawi, oh wia mehkot tohrohr me Koht kin ketin doadoahngki. Ihme kahrehda e kahdaneki “sapwellimen Koht manaman,” oh “roson en sapwellimen Koht manaman.” (Me 51:11; Lu 11:13; Ro 1:4; Ep 1:13) Sapwellimen Koht manaman eh kin doadoahk rehn aramas emen kin wia kehl ehu ong me sarawi de me mwakelekel. Tiahk ehu me kin samin de sapwung kin pelianda de “kansensuwedihada” manamano. (Ep 4:30) Mendahki e sohte wia emen me momour, sapwellimen Koht manaman kin kasalehda me Koht me sarawi oh ihme kahrehda manamano kak ‘nsensuwedla.’ En wiewia tiahk suwed ehu kin “kakunla kisiniei en sapwellimen Koht manaman.” (1De 5:19) Ma soangen wiewia wet kin pousehlahte wiewiawi, e pahn “kansensuwedihala mehlel” sapwellimen Koht manaman de kahrehiong en ahneki pepehm en medek, oh met kak imwikihla Koht eh pahn wiahla imwintihti ong emen me kin uhwong. (Ais 63:10) Aramas emen me kansensuwedihada sapwellimen Koht manaman kakete lahlahwe manamano, dihp me Sises Krais mahsanih me sohte pahn ale mahk nan koasoandi en mwehi wet oh pil me kohkohdo.—Md 12:31, 32; Mr 3:28-30; kilang SPIRIT.
it-1-E 1006 par. 2
Noahrok
Kin Sansalda nan Wiewia kan. Noahrok pahn pein sansalda nan ekei wiewia kan me pahn kasalehda en emen eh ineng sapwung oh ineng me uhdahn suwed. Sounnting en Paipel Seims padahkihong kitail me ineng sapwung, ni eh kin ahpada, e kin kanaitikihada dihp. (Sei 1:14, 15) Aramas noahroko eri pahn kak dierekda pwehki eh wiewia kan. Wahnpoaron Pohl koasoia me aramas noahrok men iei emen me kin pwongih dikedik. (Ep 5:5) Pwehki eh ahneki ineng en noahrok, e wiahkihla mehkot me e inangiho eh koht, oh wiahiong met en kesempwal sang papah oh kaudokiong Sounkapikadao.—Ro 1:24, 25.
June 24-30
SOAHNG KESEMPWAL KAN SANG MAHSEN EN KOHT | PILIPAI 1-4
“Dehr Pwunodki Mehkot”
“Sapwellimen Koht Popohl . . . Inenen Laudsang Uwen Atail Dehdehki”
10 Dahme kak sewese kitail en dehr “pwunodki mehkot” ahpw en ahneki “sapwellimen Koht popohl”? Dahme Pohl ndaiong mehn Pilipai ko kasalehda me ni atail kin pwunodki kahpwal ehu, dahme mwahu iei en kapakap. Eri ni atail kin pwunod, kitail anahne kapakapki. (Wadek 1 Piter 5:6, 7.) Ni omw kapakap ong Siohwa, ken uhdahn kamehlele me e ketin nsenohkin uhk. Ahnsou koaros kasalehda omw kalahnganki soangen kapai koaros me ke alehdi. Oh dehr manokehla me Siohwa kak ketin “wiahda mehkan me siksang me kitail kak peki de pil lemehda.”—Ep. 3:20.
“Sapwellimen Koht Popohl . . . Inenen Laudsang Uwen Atail Dehdehki”
7 Ni Kristian kan nan Pilipai ar wadek nein Pohl kisinlikowo, dahme re medewe? Pali laud en irail ele tamataman dahme wiawihong Pohl oh Sailas oh duwen Siohwa eh ketin seweseirahla ni soh kasikpe. Iren mehn kasukuhl dahieu me Pohl padapadahkihong irail nan nah kisinlikowo? Met iei: ‘Dehr pwunod. Kapakap, oh ke pahn alehdi sapwellimen Koht popohl.’ Pohl ndaiong irail me sapwellimen Koht popohl “inenen laudsang uwen atail dehdehki.” Ia wehwehn met? Ekei kawehwehn Paipel nda, “inenen laudsang atail ouraman koaros” de “laudsang koasoandi koaros en aramas.” Eri Pohl ndinda me “sapwellimen Koht popohl” inenen kaselel sang dahme kitail kin medewe. Ekei pak kitail sohte ese ia duwen atail pahn apwalihala kahpwal kan, ahpw Siohwa me ketin mwahngih. Oh e kak ketin wia soahng kan ni soh kasikpe.—Wadek 2 Piter 2:9.
“Sapwellimen Koht Popohl . . . Inenen Laudsang Uwen Atail Dehdehki”
16 Dahme pahn wiawi ni atail ale “sapwellimen Koht popohl, me inenen laudsang uwen atail dehdehki”? Paipel mahsanih me met pahn “nekinekid” mohngiongitail oh atail lamalam. (Pil. 4:7) Lepin lokaiahn Ipru me kawehwehdi ong lepin lokaia wet “nekinekid” kin kadoadoahk ong pwihnen sounpei ehu me pwukoahki pere kahnimw ehu. Eri pwihn wet kin nekid de pere aramas akan me kousoan nan kahnimw en Pilipai. Aramas ako kak meir mwahu nipwong kan pwehki arail ese me arail kahnimwo sohte mi nan keper. Pil duwehte, ni atail ahneki “sapwellimen Koht popohl,” kitail sohte kin pwunod oh mohngiongitail oh atail lamalam kak nsenamwahu. Kitail ese me Siohwa ketin nsenohkin kitail oh kupwurki kitail en pweida mwahu. (1 Pit. 5:10) Oh met kin pere kitail sang atail en nohn pwunod de mworusala.
Raparapahki Soahng Kesempwal kan Sang Mahsen en Koht
it-2-E 528 par. 5
Meirong kan
Meirong en wain kan. Kihda meirong en wain kan kin iangahki pali laud en meirong teikan, ahpw met mehlel mwurin mehn Israel ko ar kousoanla nan Sapwen Inowo. (Nem 15:2, 5, 8-10) Meirong wet iei wain (“sakau kehlail”) oh e kin widekdihong pohn pei sarawio. (Nem 28:7, 14; pil kilang Eks 30:9; Nem 15:10.) Wahnpoaron Pohl ntingkiwohng Kristian kan nan Pilipai: “Mehnda ma I mweidala pein ngehi en duwehte meirong en wain me kin wudekdiong pohn meirong en doadoahk sarawi me amwail pwoson kin kahrehiong kumwail en wia, I pahn perenda.” Nan ire wet e doadoahngki karasaras en meirong en wain ni eh kasalehda eh men kihda pein ih ong ienge Kristian akan. (Pil 2:17) Ahnsou kis mwohnte eh mehla, e ntingkilahng Timoty: “I mweidalahr pein ngehi en duwehte meirong en wain me kin wudekidi, oh ahnsoun ei mehla uhdahn keren.”—2Ti 4:6.
“Iasada Keieu”—E Wiawi Ni Ahnsouwet!
5 Mwurin met, irail kisehn “Israel en Koht” me keidi kan anahne iang Kaun Sises Krais nan lingan en nanleng, wasa me re pahn “ieiang Kaun-o kohkohlahte.” (Kalesia 6:16, NW; 1 Deselonika 4:17) Wiewia wet kin adaneki “iasada keieu.” (Kaudiahl 20:6) Ni ahnsou me kaiasada wet pahn imwisekla, e pahn wia ahnsou ong aramas rar kei en iasada pohn sampah ki koapworopwor en ahneki mour soutuk nan Paradais. Kahrehda, sohte lipilipil ma atail koapworopwor iei en kohdahla nanleng de mih pohn sampah, kitail kin uhdahn nsenohki “iasada keieu.” Soangen kaiasada dahieu met? Iahd e pahn wiawi?