Iren Sawas kan ong Doaropwehn Kasukuhl ong Mihting en Mour oh Kalohk
May 6-12
SOAHNG KESEMPWAL KAN SANG MAHSEN EN KOHT | 2 KORINT 4-6
“Kitail Sohte Kin Uhdi”
Pwangada Ahpw Sohte Pwangahkihda Papah Siohwa
16 Ni mehlel, e keieu kesempwal en apwalih atail pali ngehn. Ma mie atail nanpwung mwahu rehn Siohwa Koht, mehnda ma kitail pahn pwangada ni paliwar, ahpw kitail sohte pahn pwangada ni atail papah Ih. Siohwa “kin ketin kakehlahda me luwet oh me pwangadahr kan.” (Aiseia 40:28, 29) Wahnpoaron Pohl, me pein kilang mehlelpen mahsen pwukat, ntingihdi: “Ih kahrepen at sohte kin loaltikla. Pwe ma paliwarat kin luhluwetala, a pali ngenit kin kekehlailla rahn koaros.”—2 Korint 4:16.
17 Menlau tehk lepin mahsen pwukat “rahn koaros.” Met wehwehki me kitail pahn ale sawas sang rehn Siohwa rahn koaros ni atail pahn idawehn oh kapwaiada koasoandi kan me Siohwa koasoanehdi ong sapwellime aramas akan. Emen sister me, ni lelepek, wia doadoahk en misineri erein sounpahr 43, kin lelohng ahnsou kan me e kin pwangada ni paliwar oh pil ahnsou kan me e kin kapehd tikitikla. Ahpw, e sohte kesehla ah doadoahk en papah Siohwa. E koasoia: “I kin ahn ahi koasoandi en pirida mwadang ni menseng pwe mwohn I pahn wia ahi doadoahk, I kin kapakap ong Siohwa oh wadek sapwellime Mahsen. Koasoandi wet kin sewese ie en dadaurete lel met.” Kitail kak likih sapwellimen Siohwa sawas oh kehl ma kitail pahn “rahn koaros” kapakap ong Ih oh doudouloale duwen sapwellime irair kaselel kan oh sapwellime inou kan.
it-1-E 724-725
Dadaurete
E pil kin kesempwal en dehr kesehla koapworopwor me Kristian akan ahneki, koapworopworki en mour soutuk oh solahr dihp. Mehkihla pehn sounpelian kan pil sohte kak kauwehla koapworopwor wet. (Ro 5:4, 5; 1De 1:3; Kau 2:10) Lokolok me kin wiewiawi rahnpwukat pahn mwomwen sohrala ma kitail pahn kapahrekiong pweidahn koapworopwor lingan wet. (Ro 8:18-25) En medewehla irair en mour soutuk pahn kahrehiong soangen lokolok koaros, mendahki ma pil uhdahn uk ni ahnsowo me wiawi, pahn wia mehkot “ongete ahnsou kis oh me marahra.” (2Ko 4:16-18) Emen eh kin tamataman me kahpwal kan kin ongete ahnsou kis oh kolokol eh koapworopwor en Kristian kak pere ih sang sohla ahneki koapworopwor oh salelepekla ong Siohwa Koht.
Raparapahki Soahng Kesempwal kan Sang Mahsen en Koht
w12-E 2/1 28-29
“Kahrehiong Siohwa en Ketin Sirei”
David Splane me wia kisehn Pwihn me Kin Apwalih Mwomwohdiso nan Sampah Pwon kasawiher oaralap en Paipel wet. (2 Korint 4:7) Soangen pai kesempwal dahieu met? Iei loalokong me aramas kin ihte ese de loalokong me aramas kin kapwaiada? Sounkapahreko sapengki: “Soh. Pai kesempwal me wahnpoaron Pohl koasoakoasoiao iei ‘doadoahk en kalohk’ en ‘kasansalehda me mehlelo.’” (2 Korint 4:1, 2, 5) Brother Spane katamankihong tohnsukuhl ko me sounpwong limau me re wie sukusukuhlkier kin kaunopada irail ong pwais tohrohr ong doadoahk en kalohk. Pwais wet iei mehkot me irail pahn uhdahn kesempwalki.
Sounkapahreko kasalehda me “sah pwehl kan” kin dokedoke paliwar uduk. E kasalehda wekpeseng en sah me wiawihkihda pwehl oh me wiawihkihda kohl. Sah me wiawihkihda kohl sohte kin kalapw kadoadoahk. Ahpw sah me wiawihkihda pwehl kin wiawihda pwehn kadoadoahk. Ma kitail kin kihdi pai kesempwal ehu nan sah kohl, ele kitail pahn medemedewehte saho duwehte atail kin medemedewe pai kesempwal me mi loaleo. Brother Splane koasoia: “Kumwail tohnsukuhl kan sohte pahn men aramas en tetehk kumwail. Pwe nin duwen misineri, kumwail men kahluwalahng aramas akan rehn Siohwa. Kumwail sah pwehl aktikitik kei.”
Woneweite Kalaudehla Omw Limpoak en Kristian
7 Ahpw ia duwen kitail? Ia duwen atail kak ‘langahda douluhl mohngiongitail’ ni atail kasalehda limpoak? Irail kan me mahki sounpar ehute de tikida nan soangen irair me duwehpene ele pahn mengeiki en kasalehda limpoak ong emenemen. Oh irail me kin perenki soangen mehn kamweit teieu kin kalapw werekpene. Ahpw ma soahng kan me kitail kin perenki wia rehn ekei Kristian kin katohre kitailsang meteikan, kitail anahne en ‘langahda douluhl mohngiongitail.’ E pahn wia elen erpit en idek rehtail: ‘I kin kalapw iang kalohk de wiewia teikan rehn riei Kristian kan likin irail me I kin patehng? Nan atail Wasahn Kaudok, I sohte kin nohn men ehuong me kapw akan pwehki I kin medewe me irail anahne mahs warohng wiahla kompoakepahi? I kin rahnmwahwih koaros me mah oh me pwulopwul kan nan mwomwohdiso?’
May 13-19
SOAHNG KESEMPWAL KAN SANG MAHSEN EN KOHT | 2 KORINT 7-10
“Atail Doadoahk en Sawas”
w98-E 11/1 25 par. 1
“Koht Ketin Kupwurki me Kin Perenki Kihwei”
Keieu, Pohl padahkihong mehn Korint kan duwen mehn Masedonia kan arail kin mwekidki doadoahk en sawaso eh wia mehn kahlemeng mwahu. Pohl ntingihedi: “Erein arail mi nan kahpwal pwehki songosong laud, irail kasalehda arail peren laud oh arail sapan mendahki irail uhdahn semwehmwe.” Mehn Masedonia ko sohte anahne emen en kamwakid irail. Ahpw Pohl koasoia me re “pein peki reht ni ngidingid pwais kaselel en kihwei ni kadek.” Kitail pahn kalaudehla atail kalahnganki sapan me mehn Masedonia ko kasalehda ni kadek ni atail pahn medemedewe me pein irail me “uhdahn semwehmwe.”—2 Korint 8:2-4.
kr-E 209 par. 1
Doadoahk en Sawas
AHNSOWO mpen pahr 46, oh Sudia mi nan irair en lehk laud. Mehn Suhs me wia sapwellimen Krais tohnpadahk kan me kin kousoan wasao sohte kak pwainda krein me inenen pweilaud pwehki malaulaute me mie ahnsowo. Re kin men mwenge oh pahn uhdahn duhpekla. Ahpw, re pahn kereniong kehn perepen limen Siohwa ni ahl ehu me sapwellimen Krais tohnpadahk teikan saikinte kehn sangete mahs. Dahme pahn kereniong wiawi?
kr-E 209-210 par. 4-6
Doadoahk en Sawas
4 Nan nah keriaun kisinlikou ong mehn Korint kan, Pohl kawehwehda me Kristian kan ahneki doadoahk ehu me wia pali riau. Mendahki nein Pohl kisinlikowo kohwong Kristian keidi kan, rahnwet, eh koasoi ko pil kin kadoadoahk ong sapwellimen Krais “sihpw teikan.” (Sohn 10:16) Keieun pali en atail doadoahk en sawas iei “doadoahk en sewese aramas akan en pwurehng ale kupwuramwahu en Koht,” me iei, atail doadoahk en kalohk. (2 Kor. 5:18-20; 1 Tim. 2:3-6) A pali teio kin pid doadoahk ehu me kitail kin wia pwehki iengatail tohnkaudok teikan. Ih met me Pohl koasoiahki “doadoahk en sawas.” (2 Kor. 8:4) Ahpw me pid mahseno “doadoahk en sewese aramas akan en pwurehng ale kupwuramwahu en Koht” oh “doadoahk en sawas,” ira koaros, lepin lokaia me kawehwehdiong “doadoahk” iei kawehwehn lepin lokaiahn Krihso di·a·ko·niʹa. Dahme kahrehda met kesempwalki?
5 Sang ni eh doadoahngki lepin lokaiahn Krihkohte ong doadoahko koaros, Pohl kadokepene doadoahk en sawas iangahki ekei wiepen kalohk me mwomwohdiso en Kristian kan kin wia. E koasoiaier mwowe: “Mie soangsoangen doadoahk kan, ahpw Kaun mehtehmen; oh mie soangsoangen wiewia kan, . . . Ahpw [soahng pwukat] koaros kin wiawi sang ni manamanohte.” (1Kor. 12:4-6, 11) Ni mehlel, Pohl kin kadokepene soangsoangen sawas nan mwomwohdiso ong doadoahk en “papah.” (Rom 12:1, 6-8) E sohte kapwuriamwei me e pehm me e konehng en kihong eh ahnsou pwe “en papah riatail kan”!—Rom 15:25, 26.
6 Pohl sewese mehn Korint kan ren kilang dahme kahrehda doadoahk en sewese me anahne sawas kan kin wia kisehn arail doadoahk oh kaudok ong Siohwa. Tehk eh kahrepe: Kristian akan me kin kihda sawas kin wia met pwehki re kin “peikiong rongamwahu duwen Krais.” (2 Kor. 9:13) Ihme kahrehda, ni arail inengieng kapwaiada sapwellimen Krais padahk kan, Kristian kan kin sewese iengarail kan nan pwoson. Pohl koasoia me wiewiahn kadek me irail kin kasalehda ong riarail kan iei kasalepen “sapwellimen Koht kadek sapan lapalap.” (2 Kor. 9:14; 1 Pit. 4:10) Ihme kahrehda, en koasoakoasoia duwen sewese riatail brother kan me anahne sawas, me iangahki doadoahk en sawas, Kahn Iroir en December 1, 1975 (lokaiahn wai), kasalehda ni pwung ni eh koasoia: “Kitail en dehr peikasalki me Siohwa Koht oh sapwellime Ohl Sises Krais kin ketin uhdahn kesempwalki soangen doadoahk wet.” Ei doadoahk en sawas wia kisehn doadoahk en papah Koht me kesempwal.—Rom. 12:1, 7; 2 Kor. 8:7; Ipru 13:16.
kr-E 196 par. 10
Ia Wasa Mwohni Kin Kohsang Ie ong Doadoahk en Wehio kan
10 Keieu, kitail kin toukihda sawas pwehki kitail kin poakohng Siohwa oh kin men wia “dahme kin kaperenda ih.” (1 Sohn 3:22) Siohwa kin ketin kupwurperenki tohnkaudok men me kin toukihda eh sawas sang nan eh mohngiong. Kitail pahn tehkpene en wahnpoaron Pohl koasoia duwen Kristian kan ar kin kihda sawas. (Wadek 2 Korint 9:7.) Kristian mehlel men kaidehn emen me sohte kin men sawas de idihdiong en kihda sawas. Ahpw, e kin kihda sawas pwehki e “koasoanedier nan eh mohngiong” en wia. Me iei, e kin kihda sawas mwurin eh kin medemedewe anahn ehu oh ia duwen eh kak kihda sawaso. Siohwa kin ketin kesempwalki sounkihda sawas menet pwehki “Koht kin ketin poakohng me kin perenki kihwei.” Pil ehu kawehwe nda: “Koht kin ketin poakohng aramas akan me kin mwahuki kihwei.”
Raparapahki Soahng Kesempwal kan Sang Mahsen en Koht
Mwekidki Sapwellimen Koht “Kisakis Kesempwal”
2 Pohl ese me meirong en Sises kin kamehlelehiong kitail me sapwellimen Koht inou kaselel koaros pahn pweida. (Wadek 2 Korint 1:20.) Met wehwehki me sapwellimen Koht “kisakis kesempwal” kin pidada soahng teikan likin meirong en Sises. E kin pidada irair mwahu oh limpoak loalopwoat koaros me Siohwa pahn ketin kasalehiong kitail ni ahnsou kohkohdo. E apwal en kawehwehda soangen kisakis kesempwal wet ni ahl ehu me kitail kak uhdahn wehwehki. Ia pahn atail pepehm ong kisakis kesempwal wet? Oh ia duwen kisakis wet eh pahn kamwakid kitail en kaunopada ong Kataman en pwoulahn Krais me pahn wiawi Niesil en March 23, 2016?
g99-E 7/8 20-21
E Sapwung en Pohlki Mehkot?
Nan Palien Paipel ni Lokaiahn Krihk, lepin lokaia wet, kau·khaʹo·mai, me kawehwehdi ong “pohlki, perenkihda, suweiki,” kin kadoadoahk nan soangen koasoi me mwahu oh suwed koaros. Karasepe, Pohl koasoia me “kitail en peren pwehki koapworopwor en alehdi sapwellimen Koht lingan.” E pil kaweidki: “Mehmen me kin suwei, a en suweiki Siohwa.” (Rom 5:2; 2 Korint 10:17) Met wehwehki me kitail en kin suweiki Siohwa nin duwen atail Koht, pepehm ehu me pahn kahrehiong kitail en perenkihda mwareo me mwahu oh sapwellime adamwahu.
May 20-26
SOAHNG KESEMPWAL KAN SANG MAHSEN EN KOHT | 2 KORINT 11-13
“En Pohl Eh ‘Kisin Tek Kis’”
w08-E 6/15 3-4
Kehlail Mendahki Luwet kan
Pil emen nanpwungen sapwellimen Koht ladu lelepek ko patohwan idek rehn Siohwa en ketikihsang “kisin tek kis,” kahpwal ehu me apwal en mwahula. Wahnpoaron Pohl peki rehn Koht ni ngidingid pak siluh pwehn saledek sang kahpwal wet. Sohte lipilipil dahkot mwo, duwehte kisin tek kadongodong kis, e kak kauwehla en Pohl peren nan eh kin papah Siohwa. Ong Pohl e duwehte e kin wie popohr ih. Sapwellimen Siohwa pasapeng iei: “Ei kadek sapan kin itarohng uhk, pwe ei manaman kin unsekla ni omw kin luwet.” Siohwa sohte ketikihsang kisin tek kiso me mi ni paliwereo. Pohl anahne peiong kahpwal wet, ahpw e pil nda: “Ni ahnsou me I kin luwet, ih ahnsou me I kehlail.” (2 Kor. 12:7-10) Ia wehwehn eh koasoio?
Siohwa “Pahn Ketikihong Ngehn Sarawi Irail kan me Peki Reh”
17 Nin duwen pasapengpen ahn Pohl kapakap kan, Koht mahsanihong ih: “Ei kalahngan itarohng uhk; pwe ei manaman kin sansalda mehlel rehn me luwet akan.” Pohl koasoia: “Ihme I kin perenki oh suweiki ei luwet akan, pwe I en kin pehm manaman en Krais rehi [‘manaman en Krais me duwehte impwal ieu kin pwaindi ie,’ New World Translation of the Holy Scriptures—With References].” (2 Korint 12:9; Melkahka 147:5) Kahrehda, Pohl kin pehm me sang rehn Krais, sapwellimen Koht mehn perepe kehlail kin pwaindi ih duwehte impwal ieu. Rahnwet, Siohwa kin ketin sapeng atail kapakap kan ni ahl me duwehte met. E kin ketikihdi sapwellime mehn perepe duwehte impwal ieu pohn sapwellime ladu kan.
18 Mehlel, impwal sohte kin kauhdi keteu sang ah mweredi de kisinieng sang ah ipihp, ahpw e kin wia mehn perepe sang soahng pwukat. Duwehte met, impwal me wiawihkihda “manaman en Krais” sohte kin kauhdi kasongosong akan en wiawiong kitail de kahpwal akan en lelong kitail. Ahpw, e kin kihda mehn perepe ni pali ngehn ong irair keper kan en sampah wet oh uhwong kan sang eh kaun, Sehdan. (Kaudiahl 7:9, 15, 16) Ihme kahrehda, mendahki ma ke kin lelong kahpwal ehu me sohte kin ‘kohsang rehmw,’ ke kak kamehlele me Siohwa kin ketin mwahngih ahmw kahpwal kan oh e kin sapeng ahmw kin “peki sapwellime sawas.” (Aiseia 30:19; 2 Korint 1:3, 4) Pohl ntingihdi: “Koht me uhdahn mehlel, oh e sohte pahn ketin mweidohng kumwail en ale songosong me kumwail sohte kak powehdi; ahpw ahnsoun songosong, e pahn ketikihong kumwail kehlail pwe kumwail en kak dadaur oh pitsang nan songosongo.”—1 Korint 10:13; Pilipai 4:6, 7.
“E Kin Ketin Kakehlahda me Luwet oh me Pwangadahr kan”
8 Wadek Aiseia 40:30. Mwein mie soangen koahiek tohto me kitail ahneki, ahpw mie irepen dahme kitail kak wia sang ni pein atail kehl. Met wia mehn kasukuhl ehu ong kitail koaros. Wahnpoaron Pohl kak wia soahng tohto, ahpw e sohte kak wia soahng koaros me e men wia. Ni eh patohwanohng Siohwa duwen eh pepehm, Siohwa ketin mahsanihong ih: “Ei manaman kin sansalda mehlel rehn me luwet akan.” Pohl wehwehki dahme Siohwa ketin mahsanihong ih. Ihme kahrehda e nda: “Ni ei kin luwet, iei ahnsou me I kin kehlail.” (2 Kor. 12:7-10) Ia wehwehn met?
9 Pohl wehwehki me mie irepen dahme e kak wia sang ni pein eh kehl. E anahne sawas sang rehn emen me uhdahn kehlail sang ih. Sapwellimen Koht manaman kak kihong Pohl kehl ni ahnsou me e kin luwet. Oh manamano pil kak wia laudsang. E kak kihong Pohl kehl pwe Pohl en kak kapwaiada soahng kan me e sohte kak wiahda sang ni pein eh kehl. Met pil kak wiawihong kitail. Ni Siohwa eh kin ketikihong kitail sapwellime manaman, kitail pahn uhdahn kehlailda!
Raparapahki Soahng Kesempwal kan Sang Mahsen en Koht
Peidek kan Sang Sounwadawad kan
‘Nanleng kesiluho’ me 2 Korint 12:2 mahsanih duwe ele iei Wehin Mesaiao me Sises Krais oh meh 144,000 ko kaunda, me iei ‘lahng kapwo.’—2 Pit. 3:13.
Met iei “nanleng kesiluh” pwehki Wehio iei kaunda ehu me inenen lapalap oh ileile.
Nan kaudiahlo, ‘paradaiso’ me Pohl “pwekipwekdahla” ie ele dokedoke (1) uhdahn Paradaiso me pahn miehla nin sampah ni ahnsou keren, (2) irair en popohl oh minimin me rasehng paradais me pahn mie ni ahnsowo, pahn mie wereisang irair en popohl me rasehng paradais me mie ni ahnsou wet, oh (3) “paradais en Koht” nanleng pahn pil mie ni ahnsowohte me sampah kapwo mie.
it-2-E 177
Metik
“Metik Sarawi.” Irail tepin Kristian ko, “metik sarawi” (Rom 16:16; 1 Kor. 16:20; 2 Kor. 13:12; 1 Des. 5:26) de “metik en pirien” (1 Pit. 5:14), me kakete kin wiawi nanpwungen ohl de lih akan. Soangen wiepen rahnmwahu wet rehn tepin Kristian kan ele kin duwehte tiahk en mehn Ipru kan mahs me kin rahnmwahuki metik. Mendahki Paipel sohte kihda oaritik kan, “metik sarawi” de “metik en pirien” kin kadehdehda soangen limpoak oh miniminpene me kin wiawi nan mwomwohdisohn Kristian.—Soh 13:34, 35.
May 27–June 2
SOAHNG KESEMPWAL KAN SANG MAHSEN EN KOHT | KALESIA 1-3
“I Ahpw Sohpeiong oh Pelianda”
Ke Iang Pwungki Sapwellimen Siohwa Madamadau en Pwung Pahrek?
16 Wadek Kalesia 2:11-14. Piter masak aramas. (Lep. Pad. 29:25) Piter ese ia sapwellimen Siohwa pepehm ong irail kan me kaidehn mehn Suhs. Ahpw, e masak dahme mehn Suhs ko sang Serusalem me sirkumsaisla pahn medewehkihong eh kin werekiong Kristian kan me kaidehn mehn Suhs. Wahnpoaron Pohl ndaiong Piter me ih aramas mwalaun men. Dahme kahrehda? Pwehki Pohl rong duwen Piter eh uhki irail kan me kaidehn mehn Suhs nan mihting me wiawi Serusalem nan pahr 49. (Wiewia 15:12; Kal. 2:13) Ia pepehm en Kristian ko me kaidehn mehn Suhs me Piter kansensuwedihala? Re pahn mweidohng met en kadipekelekeleirailda? Piter sohla pahn ahneki eh pwukoa kan pwehki sapwung me e wiahdao?
Ong Irail me Poakohng Siohwa, “Sohte Mehkot me Kak Kahrehiong Arail Pahn Pwupwudi”
12 Piter kin masak dahme ekei kin medewehki ih. E kin kolokol eh lelepek ong Sises oh Siohwa, ahpw ekei pak masak kin kahrehda e wiahda sapwung. Karasepe, pak siluh e kahmahmkihla me e ese Sises. (Luk 22:54-62) Ehu ahnsou, eh wiewia ong ekei Kristian kin mwomwen me irail mwahusang Kristian teikan. Piter ahneki madamadau sapwung oh meteikan nan mwomwohdiso kakete alasang. Eri Pohl kihong Piter kaweid kehlail. (Kal. 2:11-14) Ia duwe, Piter nsensuwedkihla kaweid wet oh uhdihsang tang nan weiren tang ong mour? Soh. E medewe laud duwen dahme Pohl nda, wekidala eh madamadau oh mihmihte nan weiro.
Raparapahki Soahng Kesempwal kan Sang Mahsen en Koht
Papah Koht ni Loalopwoat Mendahki “Soangen Kahpwal Tohto”
20 Ahpw ia duwen kalokolok kan me sohte sansal? Karasepe, ia duwen atail kak powehdi atail pepehm en mworusala? Ehu ahl me keieu mwahu iei en doudouloale sapwellimen Sises meirong. Iei met me wahnpoaron Pohl wia. Ekei pak e kin uhdahn nsensuwed laud. Ahpw e ese me Krais ketin pwoula kaidehn ong aramas unsek ahpw ong me dipan kan duwehte ih. E ntingihedi: “I momourki sang ni ei pwoson sapwellimen Koht Iehroso, me ketin loalloale ie oh meirongkihong Koht pein ih pwehki ngehi.” (Kal. 2:20) Ei, Pohl pwoson meirongo oh kamehlele me meirongo kin kadoadoahk ong pein ih.
21 Ke pil kak paiekihda laud ma ke pwoson meirongo nin duwen kisakis ehu ong pein uhk sang rehn Siohwa. Met sohte wehwehki me pepehm en mworus pahn mwadang sohla mie. Ele ekei anahne dadaur soangen pepehm wet ekei ahnsou lao sampah kapw pahn leledo. Ahpw tamataman me ketingo pahn kohwong irail kan me sohte uhdihsang papah Koht. Rahn koaros kitail kin kerenlahng ahnsou me Wehin Koht pahn pweida. Ahnsou me met pahn wiawi, popohl pahn mi nin sampah oh aramas koaros pahn unsekla. Koasoanehdi teng pwe ken pedolong nan Wehio, mehnda ma ke anahne wia met ni omw lelohng kahpwal tohto.
it-1-E 880
Mehn Kalesia, Kisinlikou ong
En Pohl koasoi me nda, “Mehn Kalesia kan, kumwail me pweipwei,” sohte kasalehda me e kin medewehte soangen keinek ehu me kohsang kadaudok en Gallic me mi paliepeng en Kalesia. (Kal 3:1) Ahpw Pohl panawihekin irail nan mwomwohdisohn wasao pwehki arail mweidohng ekei mehn Suhs kan nanpwungarail en kamwakid irail. Irail iei mehn Suhs kei me songosong en kasalehda me irail pwungla rehn Koht sang ni koasoandi en Kosonned en Moseso ahpw kaidehn ‘pwungla rehn Koht sang ni pwoson’ me inou lap kapwo kihda. (2:15–3:14; 4:9, 10) “Mwomwohdiso kan en Kalesia” (1:2) me Pohl ntingwohng wiawihkihda mehn Suhs oh pil irail kan me kaidehn mehn Suhs. Irail kan me kaidehn mehn Suhs iei irail mehn liki kan me sirkumsaisla oh iangala lamalam en mehn Suhs oh pil mehn liki kan me sohte sirkumsaisla, oh kitail kak kamehlele me ekei irail pwukat wia kadaudok en mehn Celt kan. (Wi 13:14, 43; 16:1; Kal 5:2) Irail koaros kahdaneki Kristian en mehn Kalesia pwehki wasa me irail kin kousoan ie adaneki Kalesia. Audepen kisinlikou wet kasalehda me Pohl ntingwohng irail kan me e uhdahn ese me mi nan palieir en Wehin Rom wet, ahpw kaidehn irail kan me e sehse me mi paliepeng, wasa ehu me e saikinte mwemweitla ie.