Iren Sawas kan ong Doaropwehn Kasukuhl ong Mihting en Mour oh Kalohk
October 5-11
SOAHNG KESEMPWAL KAN SANG MAHSEN EN KOHT | EKSODUS 31-32
“Tangasang Tiahk en Pwongih Dikedik”
En Koahiekla nin Duwen Kristian—“Rahn Lapalap en Kaun-o Kerendohr”
En doadoahngki dahme kitail sukuhlki sang Paipel sohte mengei, keieu ma kitail mi nan irair apwal kan. Karasepe, mwurinte Siohwa ketin kapitala mehn Israel kan sang Isip, irail “pelianda Moses” oh kin pwurepwurehng ‘men song KAUN-O.’ Dahme kahrehda? Pwehki sohte itar nimarail pihl. (Eks. 17:1-4) Saikinte lel sounpwong riau mwurin arail wiahda inou ong Koht oh pwungki en kapwaiada “mehkoaros me KAUN-O ketin mahsanih,” irail uhd sapeikiong sapwellime kosonned me pid kaudok ong dikedik en eni. (Eks. 24:3, 12-18; 32:1, 2, 7-9) Mehn Israel ko masepwehkada pwehki Moses wereila sohte mi rehrail ni eh ale padahk ni Nahna Orep? Ia duwe, irail medemedewe me mehn Amalek kan pahn pwurehng mahweniong irail, oh reh sohte pahn kana pwehki Moses sohte mi rehrail pwehn kapahda peh ko duwehte dahme e wia mahs? (Eks. 17:8-16) Met kak wiawi, ahpw sohte lipilipil kahrepe dah me reh ahneki, mehn Israel kan ‘sohte men peik.’ (Wiewia 7:39-41) Pohl kangoange Kristian kan en ‘nantihong uwen arail kak’ pwehn ‘dehr alasang sapeik’ me mehn Israel kan kasalehda ni ar masak pidelong nan Sapwen Inowo.—Ipru 4:3, 11.
Peikiong Koht oh Paiekihda Sapwellime Inou kan me E Ketin Kahukihla
Siohwa ketin mwadang tepida wia dahme e ketin inoukihong mehn Israel ko nan sapwellime inowo. E ketin pilada samworo kan me pahn papah nan impwal tohrohr ehu ong kaudok. Doadoahk en samworo ko pahn sewese aramas soh unsek kan ren ahneki nanpwungmwahu rehn Koht. Ahpw mendahki mehn Israel ko inoukihong Koht arail mour, re mwadangete sapeikiongla ih. Re sohte wia dahme re inoukihda oh “katoutouwihala nan kupwuren Koht Sarawien Israel.” (Mel. 78:41) Karasepe, ni ahnsou me Moses mihmi ni Nahna Sainai oh Siohwa ketikihong ih ekei kaweid kan, mehn Israel ko sohla kanengamah oh tepida sohla pwoson Koht. Re medewe me Moses kohkohsang irail. Eri re wiahda sansal en kou kohl ehu oh ndaiong aramas ko: “Israel, iet atail koht me kahluweikitodo sang Isip.” (Eks. 32:1, 4) Irail eri tepida poaridi oh wia meirong ong sansalo, ahpw re nda me re wie kaukaudokiong Siohwa. Ni Siohwa eh ketin mahsanihada me re wie kaukaudokiong sansalo, e ketin mahsanihong Moses: “Re wetsangehr nan ahl me I kilelehiong irail re en kin idawehn.” (Eks. 32:5, 6, 8) Sang ahnsowo kohdo, mehn Israel kan wiahda inou tohto teikan ong Koht ahpw re kin pwurepwurehng sohte kapwaiada dahme re inoukihda ren wia.—Nemp. 30:2.
Ihs me Men Iang Siohwa?
Mehn Israel ko ese me e sapwung en kaudokiong dikedik kan. (Eks. 20:3-5) Ahpw sohte pwand, irail tepida kaudokiong kouwol kohl men! Mendahki arail sapeikiong sapwellimen Siohwa kehkehliko, irail pein pitih irail ni arail medewe me re kin ieiang Siohwa. Aaron pil kahdaneki kaudok en kouwol wet “sarawi pwe en wauneki KAUN-O”! Dahme Siohwa ketin wia? E mahsaniong Moses me aramas ako “sapwungalahr” oh re wetsangehr nan ahl me E ketin “kilelehiong irail re en kin idawehn.” Siohwa uhdahn ketin engiengda pahrail me kahrehda e ketin medewedahr en kasohrehla wehio pwon.—Eks. 32:5-10.
Raparapahki Soahng Kesempwal kan Sang Mahsen en Koht
“Mie Ahnsou” ong Doadoahk oh Kommoal
Ia duwe, sapwellimen Siohwa oh Sises mehn kahlemeng kan me pid doadoahk laud kin wehwehki me kitail sohte anahne kommoal? Uhdahn soh. Siohwa sohte kin ketin ngirala, eri e sohte anahne kommoal. Ahpw Paipel mahsanih me mwurin Siohwa eh ketin kapikada nanleng oh sampah, e ketin ‘tokedi sang eh doadoahk oh kommoaldi.’ (Eks. 31:17) Met kadehdehda me erein ahnsou kis Siohwa ketin uhdihsang sapwellime doadoahk en kepikipik oh kupwurperenkihda dahme e ketin wiahda. Oh mendahki Sises ketin doadoahk laud erein eh ketiket sampah, e pil ketikihongete ahnsou pwehn kommoal oh iang sak rehn kompoakepah kan.—Mad. 14:13; Luk 7:34.
Kitail Sapwellimen Siohwa Aramas
Ma kitail men adatail kan en mihmihte nan sapwellimen Siohwa “pwuhk” en kataman, mie mehkot me kitail anahne wia. Malakai nda me kitail anahne ‘lemmwiki Siohwa oh wauneki mwareo.’ Ma kitail kaudokiong emen de mehkot tohrohr, Siohwa pahn ketin irisasang adatail nan sapwellime pwuhko!—Eks. 32:33; Mel. 69:28.
Eri e sohte itar en ihte inoukihong Siohwa en wia kupwure oh papidaisla. Kitail wia mepwukat pak ehute, ahpw kaudokiong Siohwa kin pidada mwomwen atail mour. Rahn koaros, erein atail mour, kitail anahne kadehdehda sang ni atail wiewia kan me kitail kin peikiong Siohwa.—1 Pit. 4:1, 2.
October 12-18
SOAHNG KESEMPWAL KAN SANG MAHSEN EN KOHT | EKSODUS 33-34
“Sapwellimen Siohwa Irair Kaselel kan”
it-2-E 466-467
Ahd
Kepikipik kasansalehda duwen Koht eh ketin ieias, ahpw met sohte kasalehda mwaren Koht. (Me 19:1; Ro 1:20) Pwe aramas en ese mwaren Koht kin laudsang en ihte esehla ahdo. (2Kr 6:33) E kin wehwehki en uhdahn ese Aramaso—kupwure kan, sapwellime wiewia kan oh irair kan me sansalda nan sapwellime Mahsen. (Pil kilang 1Na 8:41-43; 9:3, 7; Neh 9:10.) Met sansalda sang Moses, ohl emen me Siohwa ketin ‘mwahngih sang ni ede,’ me iei, uhdahn ketin mwahngih. (Eks 33:12) E wia kapai ehu ong Moses en kilang linganlahn Siohwa oh pil ‘rong lohkpen mwaren Siohwa.’ (Eks 34:5, NW) Lohk wet kaidehn en ihte kapwukapwurehiong mwaro Siohwa ahpw met iei lohkpen duwen sapwellimen Koht irair kan oh wiewia kan. “Siohwa, Siohwa, Koht emen me kadek kalahngan oh kupwurkalahngan, sohte kin mwadang lingeringerda, oh diren limpoak loalopwoat oh mehlel, oh kasalehda limpoak loalopwoat lel dih kid, me kin mahkohng sapwung oh dihp oh kauwehla kosonned kan, ahpw e sohte mwahn pahn mweidohng me suwed en sohte ale kalokepe, e pahn wadohng seri kan oh nein neirail seri kan kalokepen sapwung en ar pahpa kan, lel dih kesiluh oh dih kapahieu.” (Eks 34:6, 7, NW) Duwehtehte, en Moses koulo duwen mahsen ko me nda “pwe I pahn lohki mwaren Siohwa,” kin kasalehda sapwellimen Koht wiewia kan ong Israel oh kawehwehda sapwellime irair.—Deu 32:3-44.
w09-E 5/1 18 par. 3-5
Ni Siohwa Eh Kin Ketin Kawehwehda Pein Ih
Tepin irair me Koht ketin kasalehda duwen ih iei me ih “Koht emen me kadek kalahngan oh kupwurkalahngan.” (Iretikitik 6, NW) Nin duwen me emen saman koasoia, lepin lokaiahn Ipru me kawehwe “kadek kalahngan” kasalehda duwen Koht “eh kin ketin poakehla, duwehte pahpa men ong nah seri kan.” Lepin lokaia “kupwurkalahngan” pahrekiong lepin lokaia me kin kasalehda mwekid ehu, me “kin kasalehda poakehla emen sang ni aramas emen me ahneki mehkot eh kin kihong emen me anahne.” Eri sansal me Siohwa kin ketin kupwurki kitail en ese me e kin ketin apwalih sapwellime tohnkaudok kan duwehte pahpa oh nohno kan ar kin apwalih neirail seri kan—ni limpoak oh nsenoh laud ong ar anahn akan.—Melkahka 103:8, 13.
Mwuri, Siohwa mahsanih me e sohte kin “mwadang lingeringerda.” (Iretikitik 6) E sohte kin mwadang lingeringerda pahn sapwellime ladu kan nin sampah. Ahpw, e kin ketin kanengamahiong irail, kanengamahiong arail sapwung kan ni eh kin ketikihong irail ahnsou ren wekidala elen diparail kan.—2 Piter 3:9.
Koht ketin doula mahsanih me e ketin “diren limpoak loalopwoat oh mehlel.” (Iretikitik 6, NW) Limpoak loalopwoat iei irair kesempwal ehu me Siohwa ketin wiahda nanpwungen ih oh sapwellime aramas akan, nanpwungmwahu ehu me teng, poatopoat. (Deuderonomi 7:9) Siohwa me pil utupen mehlel. E sohte kak ketin likamw de pil sohte me kak pitihedi ih. Pwehki ih me “Koht en mehlel,” kitail kak uhdahn pwoson mehkoaros me e ketin mahsanih, iangahki sapwellime inou kan ong ahnsou kohkohdo.—Melkahka 31:5, NW.
w09-E 5/1 18 par. 6
Ni Siohwa Eh Kin Ketin Kawehwehda Pein Ih
Pil ehu mehkot me uhdahn mehlel me Siohwa ketin kupwurki kitail en ese duwen ih iei me e kin ketin mahkohng “sapwung oh dihp.” (Iretikitik 7, NW) E kin ketin “onopadahr en mahk” ong me dipan akan. (Melkahka 86:5, NW) Pil ni ahnsowohte, Siohwa sohte kin ketin pohnsehsehla suwed kan. E ketin kawehwehda me “e sohte mwahn pahn mweidohng me suwed en sohte ale kalokepe.” (Iretikitik 7, NW) Koht sarawi oh pwung pahrek sohte pahn ketin mweidohng me kin nsenki wiahda dihp kan en sohte ale kalokepe. Ni ahnsou keren de mwuhr imwilahn ar wiewiahn dihp kan pahn lelohng irail.
Raparapahki Soahng Kesempwal kan Sang Mahsen en Koht
Ire Kesempwal akan Sang Nan Pwuhken Eksodus
33:11, 20—Iaduwen Koht a “ketin salohng” Moses? Mahsen pwukat kin kihda madamadau en aramas riemen wie koasoakoasoi. Moses kin koasoiong weliepen Koht emen oh pil ale mahsen en kaweid en Siohwa sang rehn weliepe menet. Ahpw, Moses sohte kilang Siohwa, pwehki ‘sohte aramas emen kak kilang Koht ahpw momour.’ Ni mehlel, Siohwa sohte ketin salohng oh mahsen ong Moses. Pwuhken Kalesia 3:19 mahsanih me Koht ketikihong “tohnleng kan Kosonnedo . . . ahpw aramas emen me wia wiliepe ong aramas akan.”
Tehk Pwe Ken Mwohneki Mahs Dahme Kesempwal!
Kehkehlik kin wiawihong ohl koaros en Israel iangahki ohl proselyte kan koaros nan sahpwo en kin pokonpene pwehn kaudokihong Siohwa pak siluh nan sounpar ehu. Ni arail kin wehwehki me arail peneinei pwon pahn paiekihda ni pali ngehn soahngen ahnsou pwukat, tapwin peneinei tohto kin koasoanehdi me arail pwoud oh neirail seri kan en iang irail kohla kaudok. Ahpw ihs me pahn pere imwarail kan oh arail mwaht akan sang imwintihti kan ni ahnsou me peneinei koaros kohla kaudok? Siohwa ketin inoukihda: “Sohte emen me pahn men song kalowehdi sapwamwail nindoken amwail pahn kin wiewia sarawi siluh pwukat.” (Eksodus 34:24) Mehn Israel kan anahne pwoson pwe ren kamehlele me ma irail pahn mwohneki mehkan me ngehnin, re sohte pahn katiasang mehkot ni war. Siohwa kin mehlel ong sapwellime mahsan? Ehi!
October 19-25
SOAHNG KESEMPWAL KAN SANG MAHSEN EN KOHT | EKSODUS 35-36
“Ale Sawas Pwehn Wia Sapwellimen Siohwa Doadoahk kan”
w14-E 12/15 4 par. 4
Siohwa Uhdahn Kin Ketin Kapaia me Kin Perenki Papah
Dahme kin uhdahn kaperenda kupwuren Siohwa iei, kaidehn meirong en dipwisou kan, ahpw irail me kin perenki papah me kin utungada kaudok mehlel. Re pil kin mwekidki en toukihda ar ahnsou oh doadoahk laud. Ireo mahsanih, “lih koahiek koaros ngkoalki pehrail kan.” Mehlel, “lih koahiek koaros me arail mohngiong kamwakid irail ngkoalehda wunen kuht.” Oh pil, Siohwa ketikihong Pesalel “koahiek oh saman oh dehdehki . . . soangen doadoahk koaros.” Ni mehlel, Koht ketin audehkihda Pesalel oh Oliap koahiek me ira anahne pwehn wia soangen doadoahk koaros me e ketin kehkehlingkihong ira.—Eks. 35:25, 26, 30-35.
Sapwellimen Koht Manaman Kin Kaweid me Lelepek kan Mahs
Emen sapwellimen Siohwa ladu me mour ni mwehin Moseso oh pil ale sawasepen sapwellimen Koht manaman iei Pesalel. Eh karasaras kin padahkihong kitail ia duwen sapwellimen Koht manaman eh kin kaweid kitail. (Wadek Eksodus 35:30-35.) Siohwa ketin pilada Pesalel en tiengla mwowe oh wiahda kepwe kan me anahn ong impwal sarawio. Ia duwe, Pesalel ese ia duwen eh pahn wiahda kepwe kan mwohn kokoudahn impwalo? Mwein. Ahpw mahs, mwein e kin wiahda en mehn Isip kan arail piloak. (Eks. 1:13, 14) Eri ia duwen eh pahn kak wia doadoahk apwal wet? Siohwa “ketin audehkidahr sapwellime manaman oh ketikihong koahiek oh saman oh dehdehki ni soangen doadoahk koaros en kalingan, ong ni pilahnihada soangen mwahi kan.” Met sewese en koahiekla wiahda soangsoangen kepwe kesempwal oh lingan kan. Koht ketin kalaudehla koahiek me Pesalel oh Oliap ahneki ni eh ketikihong ira sapwellime manaman. Ele ira koledi mwahu pwehki ara kak doadoahk oh padahkihong meteikan duwen arail pahn pil wia soangen doadoahko.
Sapwellimen Koht Manaman Kin Kaweid me Lelepek kan Mahs
Kitail pil ese me sapwellimen Koht manaman me kaweid Pesalel oh Oliap pwehki soangen doadoahk kaselel kan me ira wiahda. Soahng kan me ira wiahda mihmihki ahnsou werei. Kereniong mwurin sounpar 500 aramas ako wie doadoahngkihte kepwe ko. (2 Kron. 1:2-6) Rahnwet, pali laud en aramas akan me kin wiahda kepwe kan oh men meteikan en kawauwih irail. Ahpw Pesalel oh Oliap weksang irail pwe ira kin men wahu koaros en kowohng Siohwa.—Eks. 36:1, 2.
Raparapahki Soahng Kesempwal kan Sang Mahsen en Koht
Sukuhliki Sapwellimen Siohwa Ahl Akan
Kesempwaliki mahs mehkan me ngehnin. Kaweid kohwong Wehin Israel en dehr nsenohkihla anahn en war akan oh kahrehiong ar kasokala wiewia kan en pali ngehn. Mour en mehn Israel akan uhwongete rapahki mehkan me sohte katepe. Siohwa kin ketin katohrehla ahnsou nan ehu ehu wihk ah koasonehdi en wia ahnsou sarawi, ahnsou me koasoandi ohngete wiewia kan en kaudok ong Koht mehlelo. (Eksodus 35:1-3; Nempe kan 15:32-36) Ehu ehu pahr, ahnsou tohrohr kin koasoandi ong kasarawi kan. (Lipai 23:4-44) Soangen ahnsou pwukat kin kihda ahnsou mwahu aramas akan en kin koasoiapene nanpwungarail duwen sapwellimen Siohwa wiewia kehl akan, irail en pil katakataman sapwellime ahl akan, oh en pil kasalehda kalahngan pwehki sapwellime irair mwahu kan koaros. Nin duwen pwihn en aramas ieu me kin kasalehda arail lelepek ong Siohwa, irail pahn keirada nan arail lahn Koht oh limpoakohng Ih oh pahn alehdi sawas en keid nan sapwellimen Siohwa ahl akan. (Deuderonomi 10:12, 13) Mour en kaweid akan koaros me mih nan Kosonnedo kin wia kamwahu ong sapwellimen Siohwa ladu kan nan rahnwet.—Ipru 10:24, 25.
Kadek-Sapan Kin Wahdo Peren
Eri, medewehla, ia pepehm en mehn Israel kan. Dih kan kin ale lokolok sang ni kalidu oh semwehmwe. Ahpw, mwurin mwo, re saledekla oh ahneki kepwe kesempwal tohto. Ia arail pepehm en kihwei ekei kisakis ko? Ele, re kakete lemeleme me re pwainda kisakis pwukat oh re ahneki pwung en nainekihla. Ahpw, ni ahnsou me luhk kohwong irail ren kihda sawas en mwohni oh dipwisou pwehn utungada kaudok mwakelekel, re wia met—kaidehn ni mehnseirin de ni kisekol! Re sohte manokehla me Siohwa me kahrehda ren kak ahneki dipwisou ko. Ihme kahrehda, re kihda silper oh kohl oh mahn tohto. Re “men wia met sang mohngiongarail.” ‘Nsenerail kamwekid irail.’ E uhdahn wia “meirong en tohnmetei ehu ong Siohwa.”—Eksodus 25:1-9; 35:4-9, 20-29; 36:3-7.
October 26–November 1
SOAHNG KESEMPWAL KAN SANG MAHSEN EN KOHT | EKSODUS 37-38
“Pei Sarawi kan en Impwal Sarawio oh Duwen Mepwukat nan Kaudok Mehlel”
it-1-E 82 par. 3
Pei sarawi
Pei sarawi en warpwohmwahu. Pei sarawi en warpwohmwahu (pil adaneki “pei sarawi kohlo” [Eks 39:38]) pil wiawihdahsang tuhke akesia, kadokeo oh ni keile ko kidikidkihla kohl. Mehn kapwat kohl ehu pidakihpene kadokeo. Pei sarawio tehlapki cm 44.5 (ins 17.5) oh ilehki cm 89 (piht 2.9), oh pil mie “kode kan” me uhieisang ni keimw pahieu ko powe. Rihng kohl riau me wiawihda ong mehn kadillong tuhkehn wisik ko me wiawihkihda akesia kidikidkihla kohl, oh rihng pwukat kohdiong pahnangin mehn kapwat kohlo ni pali koaros en pei sarawio. (Eks 30:1-5; 37:25-28) Warpwohmwahu tohrohr ehu kin isihsda pohn pei sarawi wet pak riau rahn koaros, nimenseng oh nin soutik. (Eks 30:7-9, 34-38) Ire teikan pil koasoia duwen kadoadoahkpen mehn isik warpwohmwahwo, de dewen mwoaluso ong isik warpwohmwahu, oh sansal me mepwukat pil kin kadoadoahk ong pei sarawi en warpwohmwahwo. (Lip 16:12, 13; Ipr 9:4; Kau 8:5; pil kilang 2Kr 26:16, 19.) Wasa me pei sarawi en warpwohmwahwo mi ie iei nan impwal sarawio mwohnte kahdeng en Wasa Sarawiheo kahrehda ireo koasoia me e mi “mwohn Kohpwahn Inowo.”—Eks 30:1, 6; 40:5, 26, 27.
it-1-E 1195
Warpwohmwahu
Warpwohmwahu sarawio me kadoadoahk nan impwal sarawi en sapwtehno wiawihdahsang kepwe pweilaud kan me mwomwohdiso sawaskihda. (Eks 25:1, 2, 6; 35:4, 5, 8, 27-29) Ni Koht eh ketikihda soahng pahieu ong doaloapene met, Siohwa ketin mahsanihong Moses: “Ale soangen uwehte ieu sang ni dipwisou pwohmwahu pwukat—stakte, onika, kalpanum oh warpwohmwahu tohr. Doaloapene pwehn wiahda warpwohmwahu, duwehte lehn wai. Kihong soahl pwe en mwakelekel oh sarawi. Sukpene apali lao wiahla pehs oh wahla nan Impwalo oh kamwerehdi mwohn Kohpwahn Inowo. Wiahki warpwohmwahu wet mehkot me uhdahn sarawi.” Mwuri, pwehn kasalehiong irail uwen sarawi en warpwohmwahwo oh me met pahn kadoadoahk ong Ih kelehpw, Siohwa ketin doula mahsanih: “Mehmen me wiahda warpwohmwahu duwehte met ong pein eh doadoahk, e sohla pahn wia kisehn nei aramas akan.”—Eks 30:34-38; 37:29.
it-1-E 82 par. 1
Pei Sarawi
Pei Sarawi kan en Impwal Sarawio. Kokoudahn impwal sarawio, mie pei sarawi riau me wiawihda nin duwen mwohmw me Koht ketikihda. Pei sarawi en meirong isihso (me pil adaneki “pei sarawi pronso” [Eks 39:39]) wiawihkihda tuhke akesia ni mwomwen kohpwa ehu, mweinele sohte kadoke de kapi. E tehlapki meter 2.2 (piht 7.3) oh ilehki meter 1.3 (piht 4.4) iangahki “kode kan” me uhdahsang ni keimw pahieu kan powe. Kili ko koaros kidikidkihla prons. Mehn inihn pasapas ehu me wiawihkihda prons koasoansoandi pahnangin keilen pei sarawio ni “lukopen pei sarawio.” Rihng pahieu koasoansoandi ni keimw pahieu ko koaros limwahn mehn inihn pasapaso, oh rihng pwukat mwomwen duwehte rihng kohte me tuhke akesia riauo me kidikidkihla prons dillong loale pwehn wa pei sarawio. Met ele wehwehki me pwoahr wetikitik wiawihda ni pali riau en pengepengen pei sarawio ong mehn inihn pasapaso en kohlong loale, ni rihng ko eh uhieisang ni pali koaros. Mie soangen madamadau wekpeseng kan duwen ireo nanpwungen irail saman kan, oh me tohto kin medewe me mweinele mie rihng kan ni pwihn riau, keriaun pwihn en rihngo, ong mehn kadillong tuhke ko, me tentenek sang keilen pei sarawio. Mehn doadoahk prons kan wiawihda duwehte mwomwen tehn pwoaht kan oh sapwel kan ong pehs kan, pwohl kan mehn paikerehda ntahn mahn akan, pwohk kan mehn doakoah uduk, oh deupen mwoalus kan.—Eks 27:1-8; 38:1-7, 30; Nem 4:14.
Raparapahki Soahng Kesempwal kan Sang Mahsen en Koht
it-1-E 36
Akesia
Akesia kin mie tuhke tekatek reirei tohto me uhsang ni rah kan me kasangpeseng wasa koaros. Rah pwukat kin kalapw pinipiniong akesia me keren kan pwehn pinipinpene wiahda tuhke tekatek kan; ni soh peikasal met kawehwehda kahrepen plural (tohtohsang ehu) en lepin lokaia shit·timʹ eh kin kalapw kadoadoahk ni nting en Paipel. Akesia kak reireikihla meter 6 lel 8 (piht 20 lel 26), ahpw mwomwe kin kalapw duwehte kisin tuhke mwotomwot me moron. Teh kan medendel oh marahra oh direki rohs masal oangoahng pwohmwahu kan, e kin kapwarehda wah kan me kin kospene. Kilin tuhkeo arekarek oh toantoal oh tuhkeo kekeluwak oh toutou, kahrehda kisin mahn kan sohte kak kauwehla. Soahng pwukat duwen tuhkeo oh eh kin mi nan sapwtehn kahrehda akesia uhdahn mwahu en wia mehn doadoahk en kou ihmw ong impwal sarawio oh dipwisawi kan. Akesia kadoadoahk en wiahda kohpwahn inowo (Eks 25:10; 37:1), tehpel en pilawahn kasansalo (Eks 25:23; 37:10), pei sarawi ko (Eks 27:1; 37:25; 38:1), tuhke kan ong wa mepwukat (Eks 25:13, 28; 27:6; 30:5; 37:4, 15, 28; 38:6), uhr kan ong kahdengo (Eks 26:32, 37; 36:36), oh lepin uhr kan (Eks 26:15; 36:20) oh tuhkehn ndape kan (Eks 26:26; 36:31).
w15-E 4/1 15 par. 4
Ke Kin Ese Duwen Met?
Weksang kilahs en irongen en rahnpwukat, kilahs en irongen en ni mwehin Paipel wiawihkihda mete me litopwla—e kin kalapw prons, ahpw e pil kin kakete koper, silper, kohl oh elektrum. Tepin kilahs en irongen kan me pwarada nan Paipel kin pidada koukoudahn impwal sarawio, tepin wasahn kaudok en Israel. Lih akan me sawaskihda kilahs en irongen kan ong wiawihdahn peisin prons sarawio oh kapio. (Eksodus 38:8) Eri mwomwen me re anahne kapeipeseng kilahs en irongen kan pwe ren kak doadoahngki wiahda met.