Iren Sawas kan ong Doaropwehn Kasukuhl ong Mihting en Mour oh Kalohk
September 7-13
SOAHNG KESEMPWAL KAN SANG MAHSEN EN KOHT | EKSODUS 23-24
“Dehr Idawehnla Pokono”
Ke Alehdi Ire Mehlel kan Koaros?
Ke kin perenki kadarala e-mail de text ong kompoakepahmw kan? Ni omw kin kilang koasoi ehu nan nuhs de rong duwen koasoipen dahme wiawi, ke kin pehm me ke duwehte soun ripoht en nuhs men me men mwadangete kadarpeseng rohngo? Mwohn omw pahn kadar e-mail de text, pein idek rehmw: ‘I uhdahn ese me koasoi pwoatet mehlel? I alehdi ire mehlel kan koaros?’ Ma ke ekis peikasal, ke kakete kihpeseng koasoi likamw kan. Eri ma ke sohte uhdahn ese me koasoio mehlel, dehr kadarpeseng. Alehte irisala!
Pil mie ehu keperpen en kadarpeseng e-mail oh text kan ahpw sohte medewe mahs. Nan ekei sahpw, atail doadoahk kin keinapwidi. Soun uhwong kan sang sahpw pwukat kak kadarpeseng koasoi kan me wiawihda pwehn kamasak kitail de kahrehiong kitail en lemelemehk suwedki emenemen. Medewehla dahme wiawi nan Soviet Union en mahso. Pilismen kan me kin doadoahk ni rir, me adaneki KGB, kihpeseng koasoi likamw kan me dene ekei riatail brother kan me me tohto ese, pangalahr sapwellimen Siohwa aramas akan. E kansensuwed me tohtohn riatail Kristian ko kamehlele koasoi likamw pwukat oh kohkohsang sapwellimen Siohwa pwihn. Ahpw mwuhr, me tohto rehrail pwurodo, ahpw ekei soh. Irail kan me sohte pwurodo mweidohng koasoi likamw pwukat en kauwehla arail pwoson. (1 Tim. 1:19) Ia duwen atail kak soikala soangen kahpwal wet? Dehr kadarpeseng koasoi likamw de koasoi kan me sohte mie kadehdehpe. Dehr kamehlele mehkoaros me ke rong. Ahpw tehk mwahu me ke alehdi ire mehlel kan koaros.
it-1-E 11 par. 3
Aaron
E konehng kitail en tehk me pak siluh ko me Aaron sapwungala, e mwomwen me kaidehn ih me tapiada wiewia sapwungo, ahpw e mwomwen me e mweidohng irair en perki dahme meteikan medewe de dahme meteikan men en wia me kahrehiong ih en wetsang elen wia me pwung. Ahpw mehlel me pid keieun eh sapwungo, e kak doadoahngki kaweid me kehkehlingki: “Dehr idawehn pali moron en aramas ni ar wia me sapwung.” (Eks 23:2) Ahpw mwurin mwo, Pwuhk Sarawi kin doadoahngki edeo ni ahl waun, oh sapwellimen Koht Ohl, erein eh ketiket sampah, pohnese me sang ni kosonned, peneinei en Aaron me kin wia doadoahk en samworo kan.—Me 115:10, 12; 118:3; 133:1, 2; 135:19; Md 5:17-19; 8:4.
it-1-E 343 par. 5
Maskun
Wiahda pilipil sapwung nan mwoalen kopwung pwehki kadeik mwersuwed kin wia kilelepen maskun. Oh kaweid tohto nan Kosonnedo kin uhwong pwain emen en wia tiahk sapwung, kisakis kan, de lipilipilki aramas, pwehki soahng pwukat kak kamaskunihala sounkopwung men oh irehdihsang sohte lipilipilki aramas ni ahnsoun kopwung. “ale kisakis ieu sang emen pwe en pwainehng uhk ke en wia mehkot me sohte pwung, . . . soangen kisakis wet kin karotongehla aramas.” (Eks 23:8) “Kisakis kan kin karotongehla mesen me loalokong.” (Deu 16:19) Sohte lipilipil ia uwen sounkopwung men eh pwung oh wehwehki mwahu soahng kan, ale kisakis sang emen me iang pidada iren kopwung ehu kakete kamwakid ih, mehnda ma e ese met de soh. Sapwellimen Koht kosonned medewehier mwahu ia uwen kisakis iangahki en natih meteikan eh kin uhdahn karotongehla aramas, pwe kosonnedo koasoia: “Dehr uhpalihki me semwehmwe kan, de masak me kepwehpwe kan.” (Lip 19:15) Kahrehda, me pid en natih meteikan de idawehnla pali moron en aramas, sounkopwung men sohte pahn wiahda kadeik ehu en uhwong me kepwehpwe ihte pwehki re kepwehpwe.—Eks 23:2, 3.
Raparapahki Soahng Kesempwal kan Sang Mahsen en Koht
“Dehr Manokehla en Kadekohng Mehn Liki kan”
Siohwa sohte ihte ketin kehkehlikihong mehn Israel ko en wauneki mehn liki kan, e kupwurki irail en tamataman ia arail pepehm ni ahnsou me re wia mehn liki kei. (Wadek Eksodus 23:9.) Pil mwohn mehn Israel ko wiahla lidu kei nan Isip, mehn Isip ko sohte kin perenki irail pwehki ar weksang irail. (Sen. 43:32; 46:34; Eks. 1:11-14) Mouren mehn Israel ko uhdahn apwal ni ahnsou me re wia mehn liki kei. Siohwa kupwurki irail en tamataman ahnsowo oh ren kin kadekohng mehn liki kan.—Lip. 19:33, 34.
it-2-E 393
Maikel
1. Ihete tohnleng sarawi likin Kapriel me ede sansal nan Paipel, oh ih kelehpw “tohnleng me keieu lapalap.” (Sud 9) Wasa me mwar wet tepin pwarada ie iei nan kaeisek en irelaud nan pwuhken Daniel, me kawehwehda Maikel nin duwen “emen tohnleng lapalap ako”; e ketido pwehn ketin sewese tohnleng dehu tikitik men me “soupeidi en wehin Persia” uhwongada. Maikel mwarenki “tohnleng silepe en Israel,” “tohnleng lapalap . . . , me kin sinsile [nein Daniel] aramas akan.” (Da 10:13, 20, 21; 12:1) Met kasalehda me Maikel iei tohnlengo me ketin kahluwa mehn Israel kan nan sapwtehno. (Eks 23:20, 21, 23; 32:34; 33:2) Met utung ire mehlel wet me “Maikel, tohnleng me keieu lapalap ketin uhkihong Tepil paliweren Moses.”—Sud 9.
September 14-20
SOAHNG KESEMPWAL KAN SANG MAHSEN EN KOHT| EKSODUS 25-26
“Me Keieu Kesempwal nan Impwal Sarawio”
it-1-E 165
Kohpwahn Inou Lapo
Mwohmw oh Koasoandi. Tepin soahng me Siohwa ketikihong Moses, ni eh ketikihong kaweid en kauwada impwal sarawio, iei mwohmwen oh koasoandi en Kohpwao, pwe iei me keieu kesempwal nan impwal sarawio oh nan impwal en mehn Israel. Uwen laud en kohpwao reireiki kiupid 2.5, tehlapki kiupid 1.5, oh ilehki kiupid 1.5 (c. 111 x 67 x 67 cm; 44 x 26 x 26 ins). E wiawihkihda tuhke akesia, oh kidikidkihla loale oh liki kohl tohr. “Mehn kapwat kohl” ehu me wia elin kapwat me “kapilkipene” kadoken kohpwao. Pali keriau en Kohpwao, me iei pweineo, wiawihkihda kohl ten, kaidehn ihte tuhke me kidikidkihla kohl, oh uwen reirei oh tehlap duwehte paliweren kohpwao. Kerup me sukusukda sang kohl me mi pohn pweinen kohpwao, oh emenemen ira mi ni imwi riau en pweineo sohpeipene, moangara ko poaridi, oh ira kapahda pehra ko oh koaduhpwalihdi Kohpwao. (Eks 25:10, 11, 17-22; 37:6-9) Pil ehu eden pweinen kohpwa wet iei “mwoalen kadek kalahngan” de “pweineo.”—Eks 25:17; Ipr 9:5, ntp; kilang PROPITIATORY COVER.
it-1-E 166 par. 2
Kohpwahn Inou Lapo
Kohpwao iei kohpwa sarawi ehu me kin nekinekid mehn kataman sarawi kan de mehn kadehde, audepen takai riapalio, de Kosonned Eiseko. (Eks 25:16) “Sah kohl ehu . . . me audaudki manna iangahki nein Aaron sokono me mpwek kei poahnsdahsang ie” pil iang mi nan Kohpwao ahpw mwuhr kohsang ahnsou kis mwohn en Solomon tehnpas sarawio eh kokouda. (Ipr 9:4; Eks 16:32-34; Nem 17:10; 1Na 8:9; 2Kr 5:10) Mwohnte Moses eh mehla, e kihong samworo mehn Lipai kan ehu “pwuhken sapwellimen Koht Kosonned” oh kihong kaweid me pwuhko en nekdekdiong, kaidehn nan loale, ahpw “limwahn Kohpwahn Inoun KAUN-O, amwail Koht. . . . Oh wia mehn kadehde ong sapwellime aramas akan.”—Deu 31:24-26.
it-1-E 166 par. 3
Kohpwahn Inou Lapo
E kin dokedoke Koht eh ketiket wasao. Kohpwao kin dokedoke Koht eh ketiket wasao erein eh poadopoad. Siohwa ketin inoukihda: “I pahn tuhwong uhk wasao, oh pohn pweinen Kohpwao nanpwungen kerup riemeno.” “Iei wasa me I kin pwarada ie nan pelien depwek pali pohnangin pweinen kohpwahn Inowo.” (Eks 25:22; Lip 16:2) Samuel ntingihedi me Siohwa “kin ket nan mwoale pohn kerup kan.” (1Sa 4:4, NW); kahrehda kerup ko kin dokedoke sapwellimen Siohwa “kuruma.” (1Kr 28:18) Kahrehda, “ni ahnsou me Moses patohla nan Impwalo pwehn patohong KAUN-O, e ahpw rongada duwen KAUN-O e ketin mahmahseniong sang pohn pweinen Kohpwahn Inowo nanpwungen kerup riemeno.” (Nem 7:89) Mwuhr, Sosua oh Samworo Lapalap Pineas pil kin wia kalelapak rehn Siohwa mwohn Kohpwao. (Sos 7:6-10; Sk 20:27, 28) Ahpw, samworo lapalapo kelehpw me kin pedolongala nan Wasa Sarawiheo oh kilang Kohpwao, rahn ehu nan pahr ehu, kaidehn pwehn patohong Siohwa, ahpw pwehn kapwaiada Kasarawien Rahnen Tomw.—Lip 16:2, 3, 13, 15, 17; Ipr 9:7.
Raparapahki Soahng Kesempwal kan Sang Mahsen en Koht
it-1-E 432 par. 1
Kerup
Sansal en kerup kan mi ni kepwe kan en impwal sarawio ni eh kokouda nan sapwtehno. Ni imwi riau en pohn pweinen Kohpwao mie kerup riemen me sukusukda sang kohl. Ira sohpeipene oh poaridiong pweinen kohpwao ni mwomwen kaudok. Emenemen ira mie ara pehnpihr riau uhdahla oh kohpeseng pohn pweineo ni mwohmw en pere oh silasil ehu. (Eks 25:10-21; 37:7-9) Pil, masloalen pweinen likoun impwalo oh kahdeng me irepeseng Wasa Sarawio oh Wasa Sarawiheo mie sansal en kerup kei deideida powe.—Eks 26:1, 31; 36:8, 35.
it-2-E 936
Pilawahn Kasansal
Keik eisek riau me kohdi pohn tehpel ehu nan perehn Wasa Sarawi en impwal sarawio de tehnpas sarawio oh me kin wilialihkihdi me kapw kan ni ehuehu rahnen Sapad. (Eks 35:13; 39:36; 1Na 7:48; 2Kr 13:11; Neh 10:32, 33) Ni lokaiahn Ipru ong pilawahn kasansal iei “pilawa en meseo.” Lepin lokaia “mese” kin ekei pak wehwehki “mwowe” (2Ki 13:23), eri pilawahn kasansalo mi mwohn silangin Siohwa nin duwen meirong ehu me kin kaukaule mi mwohn silangi. (Eks 25:30) Pilawahn kasansalo pil kin wehwehki “pilawa koasoakoasoakda” (2Kr 2:4, NW), “lopwon en pilawa” (Mr 2:26), oh pil “lopwon” (Ipr 9:2).
September 21-27
SOAHNG KESEMPWAL KAN SANG MAHSEN EN KOHT | EKSODUS 27-28
“Dahme Kitail Kak Sukuhlkihsang en Samworo Likou kan?”
it-2-E 1143
Urim oh Dumim
Ekei saman kan en Paipel kamehlele me Urim oh Dumim wia mehn usuhs kei. Nan en James Moffatt’s kawehwehn Eksodus 28:30 mepwukat adaneki “mehn usuhs sarawi kan.” Ekei kin kose me mepwukat iei kisin lapi siluh kei, ehu mie nting me nda “ei,” ehu nda “soh,” oh mehteio sohte nting powe. Re pahn kese mepwukat, pwehn sapengala peidek me kohda, ma lapi me sohte ntingo me pwarada eri sohte mie pasapeng. Meteikan medewe me mweinele mepwukat iei takai patapat riau, apali pwetepwet oh pali teio toantoal. Ni ahnsou me re kin kesehdi mepwukat, ma wasa pwetepwet riau me mi powe e kin wehwehki “ei,” a ma pali toantoal riau “soh,” oh ma pali me toantoal oh pwetepwet me pwarada met wehwehki sohte pasapeng. Ehu ahnsowo, ni Sohl eh idek rehn samworou ma e pahn pwurehng mahweniong mehn Pilisdia kan, e alehdi pasapeng soh. E pehm me emen nanpwungen nah ohl ako dipada, ih eri patohwan peki: “Komw ketin kasalehda ni takai Dumim.” Sohl oh Sonadan wisiksang nanpwungen irail ako me mi wasao; mwurin mwo, re ahpw kese mehn usuhs ko pwehn pilada nanpwungara. Nan ire wet pekipeko, “Kasalehda ni takai Dumim,” mwomwen weksang en kese mehn usuhs, mendahki e mwomwen me mwekid riau pwukat duwepenehte.—1Sa 14:36-42.
it-1-E 849 par. 3
Temwe
Samworo Lapalap en Israel. Nan Israel, mwohn en samworo lapalapo lisoaropo, ni temwen samworou, mie mete kohl patapat ehu nda, “kilel en kasarawio,” me powe mie ‘perperdahn sidamp ehu’ en lepin lokaia “Sarawi iei sapwellimen Siohwa.” (Eks 28:36-38, NW; 39:30, NW) Nin duwen kaun en wiliepen Israel ong sapwellimen Siohwa kaudok, e konehng samworo lapalapo en kin wiahiong eh pwukoa en kin sarawi, oh nting wet pil pahn wia mehn kataman ehu ong mehn Israel kan koaros duwen anahnepen en kin ahnsou koaros sarawi ong pwukoahn Siohwa kan. Met pil wia karasepe ehu me pahrekiong Samworo Lapalapo, Sises Krais, oh Siohwa ketin kasarawihala en wia pwukoahn samworo wet me kin utung sapwellimen Koht sarawi.—Ipr 7:26.
Wauneki Siohwa Sang Omw Kin Kasalehda Wahu
Petehkpe tohrohr anahne en wiawi pwehn kasalehda wahu ni atail pahn kaudokiong Siohwa. Eklesiasdes 5:1 mahsanih: “Kanahieng ni omw pahn patohlahng nan Tehnpas Sarawio.” Kaweid kin kohieng Moses oh Sosua en kihsang ara suht kan ni ara pahn mih wasa sarawi. (Eks. 3:5; Sos. 5:15) Ira anahne en wia met pwehn kasalehda wahu. Samworo kan en Israel anahne en likawih sarmada linen “pwe re en dehr kin sansal suwed.” (Eks. 28:42, 43) Met kin perehsang irail en dehr sansal suwedla ni ahnsou me irail kin papah ni pei sarawi. Peneinei en samworo kan koaros anahne en kolokol sapwellimen Koht koasoandi wet ong duwen arail en kasalehda wahu.
Raparapahki Soahng Kesempwal kan Sang Mahsen en Koht
w12-E 8/1 26 par. 1-3
Ke Kin Ese Duwen Met?
Ia wasa takai kesempwal ko me mi ni perehpen mwaremwaren samworo lapalap en Israelo kohsang ie?
Mwurin mehn Israel ko ar kohkohsang Isip oh pedolong nan sapwtehno, Koht ketikihong irail kehkehlik kan pwe ren wiahda perehpen mwaremwareo. (Eksodus 28:15-21) Perehpen mwaremwareo mie takai rupi, topas, emerald, turkuois, sapair, sasper, leshem, akat, amedist, krisolaid, oniks oh seid. Ia duwe, mehn Israel kan kak alehdi soangen takai pwukat?
Ni mwehin Paipel, aramas akan kin kesempwalki takai kesempwal kan oh netikihla mepwukat. Karasepe, mehn Isip kan mahso, kin ale takai kesempwal kan sang wasa doh kan, me rahnwet wasa ko iei Iran, Afghanistan oh ele pil India. Nan wasahn weir takai kesempwal kan nan Isip mie soangsoangen takai kesempwal kan. Kaunen Isip kan kelehpw me ahneki manaman nan wasa kan me mie soahng kesempwal kan nan sahpw kan me re kakaun. Sohp kawehwehda ia duwen aramas en eh mwehio ar kin doadoahngki pwoahr kan oh pahn pwehl kan pwehn rapahki takai kesempwal kan. Pil patehng soahng kan me kin weiweida sang nan pwehl, sapair oh topas me Sohp kin koasoia.—Sohp 28:1-11, 19.
Pwuhken Eksodus kasalehda me mehn Israel kan “wahsang en mehn Isip ko” kepwe kesempwal kan ni ahnsou me re kohkohsang sahpwo. (Eksodus 12:35, 36) Eri mweinele mehn Israel ko kihsang Isip takai kan me re doadoahngkihong perehpen mwaremwaren samworo lapalapo.
it-1-E 1130 par. 2
Sarawi
Mahn oh Wahnsahpw akan. Mesenihen kou, sihpw oh kuht kan wia mehkot sarawi ong Siohwa oh re sohte anahne pweipweida sapahl. Re pahn meirongala, oh pahn mie pweisen samworo kan me kasarawilahr sang mepwukat. (Nem 18:17-19) Meirong en tepin wah kan oh eisek kis ehun soahng kan wia mehkot sarawi, oh pil meirong kan koaros oh kisakis kan koaros me kasarawilahr ong doadoahk en wasa sarawi en tehnpas sarawio. (Eks 28:38) Soahng koaros me sarawi ong Siohwa kin katohrohrla oh aramas sohte kak mwamwahliki de pil doadoahngki ni ahl sohte lipilipil. Karasepe ehu iei kosonned me pid eisek kis ehu. Ma ohl emen katohrehla pwaiso en wia eisek kis ehu, duwehte eh wahn wihd, oh mwuri ih de emen tohnimweo sapwungala wahla ekis mepwukat pwehn doadoahngki ni imweo, duwehte ong kuk, ohlo pahn dipikihda eh kauwehla sapwellimen Koht kosonned me pid soahng sarawi kan. Kosonnedo koasoanehdi me e pahn wiahda pweipwei ehu ong wasa sarawio me pahrekiong uwen me e doadoahngkihla patehng persent 20, likin meirongki sihpw wol me roson mwahu sang pelin sihpwo nin duwen eh meirong. Kahrehda, wahu laud kin konehng soahng sarawi kan me ong Siohwa.—Lip 5:14-16.
September 28–October 4
SOAHNG KESEMPWAL KAN SANG MAHSEN EN KOHT | EKSODUS 29-30
“Kisakis Ehu ong Siohwa”
it-2-E 764-765
Kileldi
Ni Nahna Sainai. Sang ni sapwellimen Siohwa kehkehlik keieun kileldi wiawi erein mehn Israel kan ar kauwada imwarail impwal kan ni Nahna Sainai ni keriaun sounpwong en keriaun pahr mwurin ar seiloak sang Isip. Pwehn sewese Moses nan pwukoa wet, kaun emen pahn pilipilda sang ehuehu keinek en ale pwukoa wet oh apwalih kileldi me wiawi nan eh keineko. Ohl koaros me kileldi me mahki sounpar 20 kohda—sohte ihte pwukoahki iang sounpei—ahpw Kosonnedo pil kapwukoahkin irail me kileldi kan ren kihda daksis en moahng ehu en elep en sekel ($1.10) ong doadoahk en impwal sarawio. (Eks 30:11-16; Nem 1:1-16, 18, 19) Patpene irail me kileldi kan lel meh 603,550, mehn Lipai kan sohte kapatapatohng, pwe re sohte iang sohsohki sahpw. Irail pwukat sohte kin pwain daksis en impwal sarawio oh sohte anahne iang sounpei.—Nem 1:44-47; 2:32, 33; 18:20, 24.
it-1-E 502
Kisakis
Ekei kisakis kan kin kohsang ni kehkehlik en Kosonnedo. Ni ahnsou me Moses wadek mehn Israel ko, ohl koaros me mahki sounpar 20 kohda pahn kihda pweinen pweipwei sapahl ehu ong eh mour, “elep en sekel [mweinele $1.10] nin duwen wadawad en sekel en wasa sarawio.” Met iei “kisakis ong Siohwa” pwehn kak wiahda tomw ong arail mour oh “pwehn utung doadoahk me kin wiawi nan impwal en mihtingo.” (Eks 30:11-16, NW) Nin duwen me soupoad en Suhs Josephus kasalehda (The Jewish War, VII, 218 [vi, 6]), mwuhr “daksis sarawi” wet kin pweipweidi sounpar koaros.—2Kr 24:6-10; Md 17:24; kilang TAXATION.
w11-E 11/1 12 par. 1-2
Ke Kin Ese Duwen Met?
Ia mwomwen doadoahk kan nan tehnpas en Siohwa ar kin pweipweila?
Ekei doadoahk kan en tehnpaso kin wiawi sang ni daksis kan, kalapw sang ni mwohni me re kin kihda sang ni kosonned. Ahpw soangen wiepen daksis teikan pil kin kadoadoahk. Karasepe, ni ahnsoun kokoudahn impwal sarawio, Siohwa ketin kaweidki Moses en rikpene elep en silper sekel sang emenemen mehn Israel me kileldi, nin duwen “kisakis ong Siohwa.”—Eksodus 30:12-16.
Ele, met wiahla tiahk ehu ong emenemen mehn Suhs en sawaskihda uwen mwohni wet nin duwen daksis en impwalo sounpar koaros. Ih daksis wet me Sises ketin kehkehlingkihong Piter en pwain sang ni sens ehu me kohsang nan ewen mwahmwo.—Madiu 17:24-27.
Raparapahki Soahng Kesempwal kan Sang Mahsen en Koht
it-1-E 1029 par. 4
Peh
Kidahng Peh kan Powe. Likin en doahkete, peh kan me kohdi pohn aramas de mehkot ehu kin ong soangen kahrepe kan. Ahpw, wehwehn mwekid wet, iei pilipil ong pwukoa ehu, en kasalehda duwen aramas de mehkot ehu pwehn pohnese irail, ni soangen ahl ehu. Erein kasarawien kesepwildahn samworo lapalap, Aaron oh nah pwutak kan pahn kin pwil pehrail kan pohn moangen koupwulo oh moangen sihpw wol riemen ko me pahn meirongala, eri met kasalehda me mahn pwukat meirongala ong irail pwehki ar pahn wiahla samworo kan ong Siohwa Koht. (Eks 29:10, 15, 19; Lip 8:14, 18, 22) Ni eh idihada Sosua en wiliandi ih nin duwen kehkehlik en Koht, Moses pwil peho pohn Sosua, me kin “diren kupwurokong” oh kak kahluwa mehn Israel kan ni pwung. (De 34:9) En pwil peh pohn aramas akan kin kasalehda me irail me pahn alehdi kapai ehu. (Sen 48:14; Mr 10:16) Sises Krais ketin doahke, de pwil lime ko pohn ekei aramas me e ketin kamwahwihala. (Md 8:3; Mr 6:5; Lu 13:13) Kisakis en sapwellimen Koht manaman pil kin ekei pak kowohng wahnpoaron kan sang ni emen eh pwil peh pohrail.—Wi 8:14-20; 19:6.
it-1-E 114 par. 1
Keidi, Keiehdi
Nan Kosonned me Siohwa ketikihong Moses, e ketikihda wiepen doaloahda lehn keio. Met mehkot tohrohr ehu en kapatapene mehn doal keieu mwahu kan—mir, sinamon, kalamus, kasia oh lehn olip. (Eks 30:22-25, NW) Aramas emen pahn kamakamala ma e wiahda mehn doal wet oh doadoahngkihong mehkot de kahrepe ehu me sohte ahneki mweimwei. (Eks 30:31-33) Met karasahda uwen kesempwal oh sarawi en pilipildahng pwukoa me manamanla sang ni keikihdi en leh sarawio.