Iren Sawas kan ong Doaropwehn Kasukuhl ong Mihting en Mour oh Kalohk
© 2024 Watch Tower Bible and Tract Society of Pennsylvania
MAY 6-12
SOAHNG KESEMPWAL KAN SANG MAHSEN EN KOHT MELKAHKA 36-37
“Ke Dehr Pwunodki Aramas Suwed akan”
Dahme Pahn Sohrala ni Wehin Koht Eh Pahn Kaunda?
4 Ia duwen aramas suwed kan ar kin kamwakid atail mour ahnsou wet? Wahnpoaron Pohl nda me ni imwin rahn akan, e pahn mie “ahnsou apwal ekei.” Mwuhr e pil nda: “Aramas suwed oh me likamw akan pahn nantihweite sang ni me suwed ong ni me suwedsang.” (2 Tim. 3:1-5, 13) Met wiawihongehr uhk? Me tohto rehtail kin lelohng lokolok sang aramas suwed kan. Ekei irail sohte kin song en ekihla soahng suwed kan me re kin wia. Ekei kin mwomwehda sewese aramas, ahpw ni mehlel re wia aramas suwed kei. Ahpw, mehnda ma pein kitail sohte lelohng lokolok sang tiahk lemei, kitail kin mwekidkihte wiewiahn aramas suwed kan. Kitail kin mworuskihla atail rong duwen arail wiewia lemei kan ong seri, me mah, oh meteikan me sohte kak pein doare irail. Mwomwen wiewiahn aramas suwed pwukat kin duwehte mwomwen mahn lawalo de ngehn saut kei. (Seims 3:15) E kaperen en ese me Mahsen en Siohwa kin kihong kitail koapworopwor.
Siohwa Kin Ketin Kapaiahda Irail kan me Kin Kasalehda Mahk
10 Kitail kin kauwehla pein kitail ni atail kin kadakadaur lingeringer. Siohwa ketin kupwurki kitail en ahneki popohl sang ni atail kihsang lingeringer me kin rasehng wisik toutou ehu. (Wadek Episos 4:31, 32.) E ketin kangoange kitail en “dehr pwunod de lingeringer.” (Mel. 37:8) Ma kitail idawehn kaweid wet, met pahn sewese kitail. Ni atail kin kadakadaur lingeringer pahn emen me kansensuwedihkitailla, kitail kak kauwehla atail roson en war oh madamadau. (Lep. Pad. 14:30) Atail kin lingeringerte pahn emen sohte pahn kamedekihala aramaso, duwehte ma kitail pahn nim pwoisin, kaidehn aramaso me pahn lelohng keper. Ahpw, ni atail kin mahkohng meteikan, e kin wia kamwahu ong pein kitail. (Lep. Pad. 11:17) Kitail kin ahneki popohl oh kak doulahte papah Siohwa.
“Rapahki Ahmw Peren Rehn Siohwa”
20 Mwurin met, “irail me aktikitik kan pahn sapwenikihla sampah.” (Melkahka 37:11a) Ahpw, ihs aramas “aktikitik pwukat”? Lepin lokaia wet “aktikitik” kin kohsang lepin lokaia ehu me kin wehwehki “en wiahla aramas aktikitik.” Ei, irail “aktikitik kan” kin ni karakarahk awiawih Siohwa en kapwungala kopwung sapwung kan me kin wiaiong irail. “Re pahn paiamwahu oh popohl.” (Melkahka 37:11b) Pil ni ahnsouwet, kitail kin diarada popohl nan paradais en ni pali ngehn me kin pid mwomwohdisohn Kristian mehlelo.
Ire Kesempwal kan
it-2-E 445
Kumwukumw, Nahna
Tengedi, poatopoat, de ileile. Nahna kan kin tengedi oh poatopoat. (Ais 54:10; Apa 3:6; pil kilang Me 46:2.) Kahrehda ni ahnsou me sounmelkahkao koasoia duwen sapwellimen Siohwa irair pwung eh rasehng “nahna kan” (Me 36:6) ele dahme e koasoakoasoia kin wehwehki me sapwellimen Siohwa irair pwung sohte kin mwekid. De, pwehki nahna kan ar kin ileile, met ele wehwehki me sapwellimen Koht irair pwung kin uhdahn ileilehsang ahn aramas. (Pil kilang Ais 55:8, 9.) Me pid wudekdien pwohl isuh en sapwellimen Koht engieng, Kaudiahl 16:20 mahsanih: “Nahna kan sohte dierekda.” Met kin kasalehda me soahng kan me ileile duwehte nahna kan sohte pil pahn pitsang sapwellimen Koht engieng.—Pil kilang Ser 4:23-26.
MAY 13-19
SOAHNG KESEMPWAL KAN SANG MAHSEN EN KOHT MELKAHKA 38-39
Sohla Kin Nohn Nsensuwedkihla Omw Wiahda Sapwung
Kilangwohngete Mwowe ong Ahnsou Kohkohdo
12 Wadek 1 Sohn 3:19, 20. Ekei pak kitail koaros kin nsensuwedkihla sapwung me kitail wiahda. Karasepe, ekei kin nsensuwedla pwehki soahng kan me re wia mwohn ar esehla padahk mehlel. Ekei kin nsensuwedla pwehki sapwung me re wiahda mwurin ar papidaisla. Soangen pepehm pwukat kin wiawi. (Rom 3:23) Ei mehlel, kitail kin men wia dahme pwung. Ahpw “kitail koaros kin sapwungala.” (Seims 3:2; Rom 7:21-23) Mendahki atail sohte kin perenki pepehm en nsensuwedkihla sapwung me kitail wiahda, e kak wia kamwahupatail. Dahme kahrehda? Pwehki atail nsensuwedkihla sapwung kan me kitail wiahda kak kamwakid kitail en wiahda wekidekla kan oh koasoanehdi teng en dehr pwurehng wia sapwung ko.—Ipru 12:12, 13.
13 Ahpw kitail kakete nohn nsensuwedkihla sapwung me kitail wiahda pil mwurin atail koluhla oh Siohwa ketin mahkohng kitailehr. Soangen nsensuwedla wet kak keper. (Mel. 31:10; 38:3, 4) Dahme kahrehda? Tehk karasepen emen sister me kin nsensuwedkihla sapwung kan me e wiahda mahso. E nda: “I pehm me sohte katepen ei pahn doadoahk laud nan sapwellimen Siohwa doadoahk pwehki I kakete sohte iang komourla.” Pali laud en kitail ele ahneki soangen pepehm wet. Eri kitail anahne kanahieng en dehr nohn nsensuwedkihla sapwung me kitail wiahda. Dahme kahrehda? Pwehki Sehdan pahn uhdahn peren ma kitail uhdihsang papah Siohwa, mendahki Siohwa ketin mahkohng kitailehr!—Pil kilang 2 Korint 2:5-7, 11.
w02-E 11/15 20 par. 1-2
Ia Duwen Atail Kak Wiahiong Atail Mour en Katapan Mwohn Siohwa?
RAHN akan en atail mour kin mwomwen malaulau oh mwotomwot. Sounmelkahka Depit kin medemedewe uwen mwotomwot en mour oh eri kapakapki: “‘Maing KAUN, ia erein ei pahn momour? Iahd me I pahn mehla? Komw mahsanihong ie iahd me ei mour pahn imwisekla.’ Ia uwen mwotomwot en ei mour! Mwohn silangomwi ei mour likamwete sohte mehkot. Mehlelete me mour en aramas rasehng tumwenieng.” Depit kin nsenohki en mour ni ahl me pahn kaperenda Koht, sang ni eh lokaia oh eh wiewia kan. Ni eh kasalehda eh koapworopworki Koht, e patohwan: “Pwe komwihte me I patohwan koapworopworki.” (Melkahka 39:4, 5, 7) Siohwa ketin karonge eh kapakap. E kin ketin tetehk mwahu en Depit wiewia kan oh ketin kapaiahki ih.
E kin mengei kitail en kin kedirepw minit koaros nan rahn ehu oh atail mour kin kedirepwkihla wiewia kan. Met kak kahrehiong kitail en ahneki kapwunod laud, ahpw mehlel ni atail kin men wia soahng tohto ahpw sohte itar ahnsou en wia soahng pwukat koaros. Ia duwe atail pwunod kin duwehte ahn Depit—en mourki mour ehu me kin kaperenda Koht? Ni mehlel, Siohwa kin ketin tetehk oh kasakasawih emenemen kitail. Mpen sounpar 3,600 samwalahro, Sohp, ohl emen me kin lemmwiki Koht pohnese me Siohwa kin ketin kilang eh wiewia kan oh kin ketin wadekedi kahk koaros me e kin wia. Sohp eri peidengki: “Dahme I pahn kak sapengki Koht ni eh pahn ketidohn kadeikiehda?” (Sohp 31:4-6, 14) Kitail kak uhdahn wiahiong atail mour en katapan mwohn Koht ni atail kin wiahda koasoandi kan me mwohneki kaudokiong Koht, peikiong sapwellime kehkehlik kan, oh doadoahngki mwahu atail ahnsou. Kitail en tehk kanahieng ire pwukat.
Pwurehng Kamwahwihala Omw Nanpwungmwahu Rehn Siohwa
Kalapw kapakap ong Siohwa. Semomwo Siohwa ketin mwahngih me ma ke kin ahnekihte pepehm en suwedki sapwung me ke wiahdao, e pahn kak apwal ong uhk en kapakap ong ih. (Rom 8:26) Ahpw ken “poadidiong kapakap,” oh padahkihong Siohwa ia uwen omw men kompoakepahnki ih. (Rom 12:12) Andrej koasoia: “I uhdahn namenengki oh suwedki dahme I wiahdao. Ahpw mwurin ehuehu ahi kapakap, I kin nsenamwahula. Loalei kin meleileidi.” Ma ke sehse dahme ke pahn kapakapki, kilang kapakap kan en Nanmwarki Depit ni eh koluhla, me kileldi nan Melkahka 51 oh 65.
Ire Kesempwal kan
Kadehdehda me Kowe Aramas Likilik Men
16 En kaunda pein kitail uhdahn kesempwal ma kitail men meteikan en likih kitail. Irair kaselel wet pahn sewese kitail en nennenla ni atail ale kasongosong en kasalehda soahng ehu me kitail en dehr padahkihong meteikan. (Wadek Lepin Padahk 10:19.) E kak apwal ong kitail en kaunda pein kitail ni atail kin doadoahngki social media. Ma kitail sohte kanahieng, kitail kakete sapwungala oh kasalehda soahng rir kan ong aramas tohto. Ni ahnsou me kitail kihpeseng ireo nan Internet, kitail sohte kak kaunda mwomwen ekei ar pahn doadoahngki ireo de uwen laud en kahpwal me met pahn kahrehda. En kaunda pein kitail pil kin sewese kitail en kak nennenlahte ni sounuhwong kan ar song en pitih kitail en kasalehda soahng kan me kak kahpwalihala riatail Kristian kan. Met kakete wiawi ni ahnsou me pwolihs kan kapeidakih kitail nan sahpw ehu me atail doadoahko keinapwidi. Kitail kak kapwaiada kaweido me kitail “sohte pahn nda mehkot” nan soangen irair pwukat oh pil irair teikan. (Mel. 39:1) Kitail anahne wia aramas likilik kei rehn aramas koaros, sohte lipilipil ma rehn atail peneinei, kompoakepatail, riatail Kristian kan, de meteikan. Oh pwehn wia emen me likilik, kitail anahne kaunda pein kitail.
MAY 20-26
SOAHNG KESEMPWAL KAN SANG MAHSEN EN KOHT MELKAHKA 40-41
Dahme Kahrehda Kitail en Sewese Meteikan?
Irail me Kin Kihwei ni Kadek Kin Wia Aramas Peren kei
16 Aramas akan me uhdahn kadek sohte kin kasalehda kadek pwehki re kasik aramas en dupukohng irail soahng kan. Sises mahsanih: “Ni omw pahn kin wia kamadipw ehu, luke me semwehmwe, me kisehn paliwere mwoator, me dangepel, oh me maskun; oh ke pahn peren pwehki ar sohte kak lukeiuklahng ni imwarail pwe ken mwenge.” (Luk 14:13, 14) Paipel mahsanih: “Ke en sapan oh . . . Ke pahn alehki kupwuramwahu en wiewia pwukat.” E pil mahsanih: “Meid pai irail kan me kin nsenohki apwalih me semwehmwe kan.” (Lep. Pad. 22:9; Mel. 41:1) Ei mehlel, kitail en kihkihwei pwehki kitail uhdahn kin peren ni atail sewese meteikan.
17 Ni Pohl eh kasalehda dahme Sises mahsanih me “kihwei kin kaperen sang ale,” e sohte koasoakoasoiahte duwen en kihwei kepwe kan. Kitail pil kak kihkihwei ni atail pahn kangoange aramas akan, kihda kaweid sang nan Paipel, oh sawas me uhdahn konehng. (Wiewia 20:31-35) Sang ni dahme Pohl nda oh wia, e padahkihong kitail ia uwen eh kesempwal en kasalehda sapan ni atail toukihda atail ahnsou, kehl, nsenoh, oh limpoak.
18 Sounroporop kan me kin sukuhlki wiewiahn aramas pil diarada me en kihkihwei kin kahrehiong aramas akan en peren. Nin duwen me ehu pwuhk koasoia, aramas akan kin nda me arail peren kin laudla ma irail wia soahng mwahu kan ong meteikan. Sounroporop kan nda me ni atail kin sewese meteikan, kitail kin pehm me mie wehwehn oh kahrepen atail mour. Ekei irail pwukat kangoange aramas akan en wia doadoahk en tounmetei pwe ren kalaudehla arail roson oh peren. Ni mehlel, dahme irail diarada sohte wia mehkot kapwuriamwei ong kitail, pwehki Sounkapikpatail, Siohwa, kin ketin ahnsou koaros mahsanih me en kihkihwei kin kahrehiong kitail en peren.—2 Tim. 3:16, 17.
Siohwa Pahn Ketin Sewese Iuk
7 Ahpw ma ke soumwahu, Siohwa pahn ketin kansenamwahwihiukala oh seweseiuk, duwehte me e ketin wia ong sapwellime ladu kan mahs. Nanmwarki Depit ntingihedi: “Meid pai irail kan me kin nsenohki apwalih me semwehmwe kan; KAUN-O pahn ketin sewese irail nan arail apwal. KAUN-O pahn ketin sinsile irail oh kolokol arail mour.” (Mel. 41:1, 2) Depit sohte ndinda me irail ko me momour ahnsowo me kasalehda arail nsenohki me semwehmwe kan sohte pahn mehla. Eri ia duwen Siohwa eh pahn ketin sewese aramas mwahwo? Depit kawehwehda: “KAUN-O pahn ketin sewese irail ni ar pahn soumwahu oh e pahn ketin kakehlairailda.” (Mel. 41:3) Siohwa uhdahn mwahngih lokolok me sapwellime ladu kan kin ahneki, oh e sohte kin ketin manokehla irail. E kak ketikihong irail eimah oh erpit. Siohwa ketin kapikada paliweren aramas ni soangen ahl ehu me kak pein mwahula.
Kahlemengih Sapwellimen Siohwa Irair en Kadek
17 Mendahki atail kasalehda kadek kin mwahu ong kitail, kahrepe keieu kesempwal me kitail kin kasalehda kadek iei pwehki kitail men kahlemengih Siohwa oh kawahuihala ih. Ih me ketin wia Utupen limpoak oh kadek. (Lep. Pad. 14:31) E ketin wia mehn kahlemeng unsek ong kitail. Eri kitail wia uwen atail kak koaros en kahlemengih Koht sang ni atail kasalehda kadek. Eri kitail pahn karanihala riatail Kristian kan oh ahneki nanpwungmwahu rehn aramas akan.—Kal. 6:10; 1 Sohn 4:16.
Ire Kesempwal kan
it-2-E 16
Siohwa
Audepen Paipel pwon kin pidada kadehdehdahn sapwellimen Siohwa pwuhng en kaunda, oh met kin kasalehda kupwuren Siohwa Koht me keieu kesempwal: kasarawihlahn mwareo. Soangen kasarawihla wet kin wehwehki en kihsang karaun likamw koaros me kin kohwong mwaren Koht. Ahpw laudsang met, tohnleng kan nanleng oh aramas akan nin sampah koaros en kin wauneki oh kasarawihla mwar wet. Eri met wehwehki me irail pahn men pohnese oh wauneki sapwellimen Siohwa pwuhng en kaunda, oh irail perenki papah ih, oh kapwaiada kupwure pwehki arail poakohng ih. En Depit kapakapo ong Siohwa nan Melkahka 40:5-10 kasalehda ni sansal soangen madamadau wet oh kasarawihla mehlel en mwaren Siohwa. (Tehk ia duwen wahnpoarono eh doadoahngki ire kan nan melkahka wet ong Sises Krais nan Ipr 10:5-10.)
MAY 27–JUNE 2
SOAHNG KESEMPWAL KAN SANG MAHSEN EN KOHT MELKAHKA 42-44
Uhdahn Paiekihda Kasukuhl Sang Rehn Koht
Ire Kesempwal akan Sang nan Pwuhk Keriau en Melkahka kan
42:4, 5, 11; 43:3-5. Ma peian mie mehkot pwarada, me pein kitail sohte mehkot kitail kak wiahiong, oh kahrehiong atail en tohrohrwei sang mwomwohdiso ki lepin ahnsou, katamanpen peren en soangen werekpene wet me kitail kin wia mahso pahn kak kolokol kitail. Nin tapio, e pahn kakete kalaudehla atail loaloid, ahpw e pahn kin kataman me Koht iei atail wasahn ruk oh me kitail anahne pahsan Ih ong doarepatail.
w12-E 1/15 15 par. 2
Wiahiong Omw Ahnsoun Onop en Kaperen oh Katapan
1 KAPAKAP: Keieun kahk iei en kapakap. (Mel. 42:8) Dahme kahrehda? Kitail anahne wiahki onop en Mahsen en Koht kisehn atail kaudok. Kahrehda, kitail anahne peki rehn Siohwa en ketikihong kitail irair en madamadau pwung oh pil sapwellime manaman. (Luk 11:13) Barbara me wia misineri men ahnsou reirei koasoia: “I kin ahnsou koaros kapakap mwohn ei pahn wadek de onopki Paipel. Mwurin mwo, I kin pehm me Siohwa kin ketin ieiang ie oh me e ketin kupwurki dahme I wiewia.” Kapakap mwohn onop kin kahrehiong atail madamadau oh mohngiong en uhdahn alehda padahk mehlel kan me kitail pahn onopki.
“Dehr Mweidohng Pehmw kan en Mwoatohtdi”
11 Siohwa pil kin ketin kakehlakakitailkihda kasukuhl me kitail alehdihsang atail mihting kan, mihting tohrohr kan oh pil sukuhl en sapwellimen Siohwa pwihn. Kaiahn wet kak sewese kitail en papah Koht ni madamadau pwung, wiahda mehn akadei kan, oh apwalihala atail pwukoahn Kristian tohto kan. (Mel. 119:32) Ke kin nantihong alehdi kehl sang kaiahn me Siohwa kin ketikihda?
12 Siohwa ketin sewese mehn Israel ko en kalowehdi mehn Amalek oh mehn Idiopia ko, oh e ketikihong Nehmaia oh mehn Suhs ko kehl pwehn kanekehla arail onohnsapahlih dihd en Serusalem. Ni ahlohte, Koht pahn ketikihong kitail kehl en pousehlahte nan atail doadoahk en kalohk mendahki pein atail pwunod kan oh ahn aramas ar uhwong oh sohte nsenohki rong. (1 Pit. 5:10) Siohwa sohte pahn ketin wiahda manaman pwehn kihsang atail kahpwal kan met. Ahpw, kitail anahne wia atail pwukoa. Ia duwen? Kitail anahne wadek Paipel rahn koaros, kaunopada ong mihting kan oh iang towehda wihk koaros, pousehlahte wia onop oh kaudok en peneinei, oh likih Siohwa nan kapakap. Kitail dehr mweidohng mehkot en kerempwa kitail sang soahng kan me Siohwa ketikihda pwehn ketin kakehlakahda oh kangoange kitail. Ma ke pehm me pehmw kan mwoatohtdi nan soangen irair pwukat, peki sapwellimen Koht sawas. Kowe eri kilang ia duwen sapwellime manaman eh ‘wie doadoahk loalomw ahnsou koaros, pwe ke en materek oh kak kapwaiada kupwure.’ (Pil. 2:13) Ahpw ia duwe, ke kak kakehlakahda pehn meteikan?
Ire Kesempwal kan
it-1-E 1242
Kidien Wel kan
Paipel kin pwurupwurehng wiahda karasaras kan duwen kidi en wel kan. Ni Sohp eh kawehwehda eh pahtou, e koasoia me e wialahr “rien kidien wel kan.” (Sop 30:29, NW) Me pid sapwellimen Koht aramas akan ar lohdi oh namenekla, sounmelkahkao ele koasoakoasoia wasahn mahweno me kidi en wel kan pokonpene ie pwehn kangala me kamakamala kan (Pil kilang Me 68:23), ni eh sengiseng koasoia: “Komw ketin kamwuteikitpenehr wasa me kidien wel kan kin mi ie.” (Me 44:19, NW) En Papilon eh kapilpene Serusalem kahrehda lehk lapalap nan pahr 607 Mwohn Krais, oh met imwikihla nohno kan ar lemeiong neirail seri kan. Eri konehng en Seremaia eh kasalehda wekpeseng en lemei en “nei aramas akan” oh en kidi en wel kan ar kin apwalih wahrail kan.—Kou 4:3, 10.
JUNE 3-9
SOAHNG KESEMPWAL KAN SANG MAHSEN EN KOHT MELKAHKA 45-47
Koul Pwoat Duwen Kapwopwoud en Nanmwarki Men
Perenkihda Kapwopwoud en Sihmpwulo!
8 Wadek Melkahka 45:13, 14a. Lih kamwohdo “kapwatadahr pwe en tuhwong eh pwoud” ni kapwopwoudo oh “ia uwen eh kaselel!” Kaudiahl 21:2 kin kapahrekihong lih kamwohdo kahnimw ehu, Serusalem Kapw. Kahnimw en nanleng wet kin lingalingki “lingan en Koht” oh e rasehng “kisin takai kesempwal, me adaneki sasper, oh mwakelekel duwehte kilahs.” (Kaud. 21:10, 11) Pwuhken Kaudiahl kawehwehda lingan en Serusalem Kapw wet. (Kaud. 21:18-21) Ia uwen lih kamwohd menet eh kaselel! Ih met me kitail pahn kasik sang kapwopwoud en nanmwarki men nanleng.
9 Lih kamwohdo pakahrlahng Ohl Kamwohdo, Nanmwarki Mesaiao. E ketin kaunopadahr oh kamwakelehkihda lih kamwohdo sapwellimen Koht mahsen. Lih menet me “mwakelekel” oh sohte “mehkot samin” reh. (Ep. 5:26, 27) Lih kamwohdo pil anahne kapwatada ni ahl me konehng kamadipwo. Oh ih met me e wia. “Kohl me wia dereht en eh likou,” oh “ni eh kapwatkihda soangen kapwat kaselel pwukat, eh ahpw pakahrlahng rehn nanmwarkio.” Ni kapwopwoud en Sihmpwulo, “e mweimweiongehr lih kamwohdo en kapwatkihda likou min oh mwakelekel. (Likou mwakelekel, iei en sapwellimen Koht aramas akan ar wiewia mwahu kan.)”—Kaud. 19:8.
Dahme Kaudiahl Mahsanihki Duwen Omw Mour Ahnsou Kohkohdo?
10 Ia duwen Siohwa eh pahn ketin mwekidki uhwong wet? E ketin mahsanih: “I pahn engiengda kowahlap.” (Esek. 38:18, 21-23) Kaudiahl irelaud 19 kasalehda dahme pahn wiawi mwuhr. Siohwa ketin kadarala Sapwellime Ohlo pwehn pere sapwellime aramas akan oh kalowehdi arail imwintihti kan. “Karis en sounpei kan en nanleng,” me iei tohnleng lelepek kan oh 144,000 ko, pahn iang Sises mahweniong Kok en Makok. (Kaud. 17:14; 19:11-15) Ia pahn imwilahn mahwen wet? Iei kasohrlahn aramas koaros oh pwihn koaros me kin uhwong Siohwa!—Wadek Kaudiahl 19:19-21.
11 Song medewehla ia pepehm en irail me lelepek kan nin sampah me pitsang kasohrlahn sapwellimen Koht imwintihti kan! Ahnsowo pahn uhdahn kaperen! Ahpw mendahki e pahn mie peren laud nanleng ni ahnsou me Papilon Lapalap pahn kasohrala, pil mihete mehkot me pahn kaperen sang met. (Kaud. 19:1-3) Met iei “kapwopwoud en Sihmpwulo,” me wia mwekid uhdahn kesempwal ehu nan pwuhken Kaudiahl.—Kaud. 19:6-9.
12 Iahd me kapwopwoudo pahn wiawi? Irail meh 144,000 ko koaros pahn mi nanleng mwohnte mahwen en Armakedon pahn wiawi. Ahpw, kaidehn ih ahnsowo me Sihmpwulo pahn kapwopwoudla. (Wadek Kaudiahl 21:1, 2.) Kapwopwoud en Sihmpwulo pahn wiawi mwurin mahwen en Armakedon oh kasohralahn sapwellimen Koht imwintihti kan koaros.—Mel. 45:3, 4, 13-17.
it-2-E 1169
Mahwen
Ni kaimwiseklahn mahwen wet, sampah pahn ahneki popohl erein sounpar kid. Pweidahn melkahkao me mahsanih, “[Siohwa] kin ketin katokehdi mahwen wasa koaros nin sampah; e kin ketin katimpeseng arep kan, oh kauwehla kesik ketieu kan, e kin ketin isikala nein sounpei kan mehn sansar kan,” wiawi ni ahnsou me Koht ketikihong popohl nan sapwen Israel ni eh ketin kauwehla nein imwintihti kan dipwisoun mahwen kan. Mwurin Krais eh ketin kalowehdi irail nan mahwen en Armakedon, popohl mwuledek pahn kipehdi sampah pwon. (Mel. 46:8-10) Aramas akan me Koht kupwuramwahwihki mour soutuk pahn wekidohng “neirail kedlahs akan ni mehn deipwel, oh neirail ketieu kan ni naip en pal tuhke” oh re sohla pahn sukuhlki duwen mahwen. Pwe Siohwa “Wasa Lapalahpie, me ketin inoukidahr met.”—Ais 2:4; Mai 4:3, 4.
Ire Kesempwal kan
Dahme Pahn Sohrala ni Wehin Koht Eh Pahn Kaunda?
9 Dahme pahn wiliandi pwihn mwersuwed kan? Ia duwe, e pahn mie pwihn ehu nin sampah mwurin Armakedon? Paipel mahsanih: “Kitail koapworopwor oh awiawih lahng kapw oh sampah kapw, wasa me pwungen kalahngan en Koht pahn poadada ie poatopoat, duwen eh ketin inoukidahr.” (2 Pit. 3:13) Lahng oh sampah meringo iei koperment mwersuwed kan oh aramas ako me re kin kaunda. Mwurin ar sohrala, dahme pahn wiliandi irail? “Lahng kapw oh sampah kapw.” Lahng kapwo kin dokedoke koperment kapw ehu me iei Wehi me Sises oh meh 144,000 ko pahn kaunda. Sampah kapwo kin dokedoke aramas akan me mi pahn kaundahn Wehin Koht. Wehi wet me mi pahn kaundahn Sises pahn ni unsek kasalehda sapwellimen Siohwa irair en meleilei. (1 Kor. 14:33) Eri ‘sampah kapwo’ sohte pahn pingiping. E pahn mie ohl mwahu kan me pahn apwalih. (Mel. 45:16) Krais oh pil meh 144,000 ko pahn kaweid ohl pwukat. Medewehla ahnsowo me pwihn ehute me sohte kak mwersuwedla pahn wiliandi pwihn mwersuwed koaros!
JUNE 10-16
SOAHNG KESEMPWAL KAN SANG MAHSEN EN KOHT MELKAHKA 48-50
Pahpa Nohno kan—Kakehlaka en Omw Peneinei Ar Likih Sapwellimen Siohwa Pwihn
Kaudok Mehlel Pahn Kalaudehla Omw Peren
11 Kitail kin kaudokiong Siohwa ni atail kin onopki sapwellime Mahsen oh padahkihong neitail seri kan duwen ih. Ni rahnen Sapad, mehn Israel kan sohte kin doadoahk oh re kin doadoahngki rahno pwehn kakehlakahla arail nanpwungmwahu rehn Siohwa. (Eks. 31:16, 17) Me lelepek kan kin padahkihong neirail seri kan duwen Siohwa oh sapwellime kupwuramwahu. Rahnwet, kitail pil anahne wiahda ahnsou en wadek oh onopki Mahsen en Koht. Met wia kisehn atail kaudok ong Siohwa, oh pahn sewese kitail en karanihala ih. (Mel. 73:28) Oh ni atail kin iang atail peneinei onop, kitail kak sewese neitail seri kan en kakairada nanpwungmwahu keren rehn Samatail limpoako nanleng.—Wadek Melkahka 48:13.
w11-E 3/15 19 par. 5-7
Mie Kahrepen Omw Pahn Peren
“Kumwail sapwellimen Koht aramas akan, kumwail kapar pidahki Saion, oh wadekada wasa kehlail kan en kahnimw wet; kumwail tehk mwahu kehl kan oh kasawih kelen mahwen kan, pwe kumwail en kak patohwanohng dih en mwuhr kan.” (Mel. 48:12, 13) Sounmelkahkao kangoange mehn Israel kan ren keidahla karanih Serusalem pwehn kilang wasao. Ke kak medewehla en peneinei en Israel kan ar kin tamanda ahnsou kan me re kin seiloaklahng kahnimw sarawi wet pwehn wia kasarawi kan oh kilang tehnpas sarawi lingano? Met ele kamwakid irail en patohwanohng dih en mwuhr kan” duwen met.
Medewehla duwen lih nanmwarki en Sipa, me nin tapio sohte kamehlele ripoht kan duwen en Solomon kaunda lingan oh erpit laud. Dahme kamehlelehiong ih me soahng kan me e kin rong duwe uhdahn mehlel? E koasoia, “I sohte kamehlele dahme I rong I lao patohdo oh pein patohwan.” (2 Kron. 9:6) Ei, dahme kitail kin ‘pein patohwanki’ mesatail kin kak kamwakid laud kitail.
Ia duwen omw kak sewese noumw seri kan ren “pein patohwan” soahng mwahu kan nan sapwellimen Siohwa pwihn? Ma mie ohpis en Sounkadehdehn Siohwa kan me karanih omw wasahn kousoan, nantihong en mwemweitla wasao. Karasepe, Mandy oh Bethany tikida mwail 900 samwa dohsang Pedel me mi nan wehi me re kin kousoan ieo. Ahpw ara pahpa nohno kin kalapw koasoanehdi ren mwemweitla wasa ko, ahpw mehlel erein neira serepein ko ara kekeirda. Ira koasoia, “Mwohn aht mwemweitla Pedel, se leme me e wia wasahn kakos ehu oh aramas mah kante me kin mi wasao. Ahpw se tuhwong me pwulopwul kan me kin doadoahk laud ong Siohwa oh perenki wia met! Se kilang me sapwellimen Siohwa pwihn sohte wiahte wasa kis nan sahpw me se kin kousoano oh ehuehu ahnsou me se kin mwemweitla Pedel kin kakehlakahda aht pwoson.” Ara pein kilang sapwellimen Koht pwihn kamwakid Mandy oh Bethany en tepida pioneer oh ira pil alehdi luhk en iang papah nan Pedel erein ahnsou kis.
Momour nin Duwen Towe Mehlel en Wehio!
5 Sukuhlki poadopoad en sahpwo. Emen me men wiahla towe mehlel en sahpw ehu ele anahne sukuhlki poadopoad en koperment en sahpwo. Pwehki kitail men wia towe mehlel en Wehin Koht, kitail anahne sukuhlki duwen eh poadopoad uwen atail kak. Kitail anahne alasang mehn kahlemeng en nein Kora pwutak ko nan Israel. Re poakohng Serusalem oh eh wasahn kaudok oh kin perenki koasoia duwen poadopoad en kahnimwo, kaidehn pwehki eh kaselel ahpw pwehki ih me “kahnimw en nanmwarki lapalapo.” Wasahn kaudok nan Serusalem iei wasa me aramas ko kin sukuhlki duwen sapwellimen Siohwa Kosonned kan oh kaudokiong ih ie. Irail me mi pahn kaundahn Siohwa, Nanmwarki en Serusalem, iei irail kan me e kin ketin pwungki oh poakohng. (Wadek Melkahka 48:1, 2, 9, 12, 13.) Nan atail ahnsou, Koht pil ketin sapwellimanki pwihn en aramas ehu nin sampah. Duwehte nein Kora pwutak ko, kitail pil anahne men sukuhlki oh padahkihong meteikan duwen poadopoad en sapwellimen Koht aramas akan. Uwen laud en atail esehla sapwellimen Koht aramas akan oh duwen eh ketin sewese irail, ih uwen laud en atail kamehlele Wehin Koht. Met pahn kakehlakahla atail ineng en kalohki rongamwahu en Wehio.—Ser. 9:24; Luk 4:43.
Ire Kesempwal kan
it-2-E 805
Kepwehpwe
Nin duwen wehi paiamwahu ehu, mehn Israel kan kak mwengemwenge oh niminim ni peren (1Na 4:20; Ekl 5:18, 19), oh arail kepwe kan kin pereirailsang kahpwal kan me semwehmwe kin kahrehda. (Lep 10:15; Ekl 7:12) Ahpw mendahki Siohwa ketin kupwurki mehn Israel kan en nsenamwahuki arail doadoahk laud, (pil kilang Lep 6:6-11; 20:13; 24:33, 34), E pil ketikihda kehkehlik kan me pid keperpen manokehla me Ih me ketin kahrehiong ren kepwehpwehla oh keperpen tepida likihala arail kepwe kan. (Deu 8:7-17; Me 49:6-9; Lep 11:4; 18:10, 11; Ser 9:23, 24) Re alehdi mehn kataman me kepwehpwe kin ongete ahnsou mwotomwot (Lep 23:4, 5), re sohte kak patohwankihong Koht nin duwen pweinen pweipwei sapahl ehu en doareirailsang mehla (Me 49:6, 7), oh sohte katepe ong me melahr akan. (Me 49:16, 17; Ekl 5:15). Koht pil ketin kasalehiong irail me ma re nohn kesempwalki ren kepwehpwehla, met kak kahrehiong ren tepida wia wiewiahn widing kan oh Koht sohla pahn ketin kupwurkin irail. (Lep 28:20; pil kilang Ser 5:26-28; 17:9-11.) Re pil alehdi mehn kangoang en ‘wauneki KAUN-O ni ar pahn meirongkihong wahnsahpw me keieu mwahu.’—Lep 3:9.
JUNE 17-23
SOAHNG KESEMPWAL KAN SANG MAHSEN EN KOHT MELKAHKA 51-53
Wiahda Koasoandi kan Pwehn Soikala Wiahda Sapwung Laud kan
Ia Duwen Omw Kak Pere Mohngiongomw?
4 Nan Lepin Padahk 4:23 (NW), lepin lokaiao ‘mohngiong’ wehwehki loalen emen. Met kin dokedoke pein atail madamadau, pepehm, wiewia, oh ineng kan. E kin pidada uhdahn ihs kitail loalatail, kaidehn ihte mwomwatail ni mas liki.
5 Medewehla ia duwen atail roson en paliwar eh kin karasahda kesempwalpen dahme mi loalatail. Keieu, pwe kitail en ahneki roson mwahu, kitail anahne pilada mwenge me mwahu ong paliwaratail oh kitail anahne kaukaule eksersais. Duwehte met, pwe atail nanpwungmwahu rehn Siohwa en kehlailte, kitail anahne kaukaule wadek Paipel oh sawasepen Paipel kan oh kaukaule kasalehda met ni atail pwoson Siohwa. Kitail kin kasalehiong Siohwa atail pwoson ni atail doadoahngki dahme kitail sukuhlki oh padahkihong meteikan duwen atail pwoson. (Rom 10:8-10; Seims 2:26) Keriau, me pid kitail ni mas liki, ele kitail kin medewe me kitail kehlail mehnda ma ni mehlelo loalatail kitail uhdahn soumwahu. Duwehte met, me pid atail en kaukaule wia atail koasoandi kan en Kristian, ele kitail kin medewe me atail pwoson kehlail, ahpw ineng suwed kan kakete kekeirda loalatail. (1 Kor. 10:12; Seims 1:14, 15) Kitail anahne tamataman me Sehdan men kasaminehkihla kitail eh madamadau. Ele dahme e keieu songosong en wia? Ia duwen atail kak pere pein kitail?
Kitail Kak Kolokol Atail Mwakelekel
5 Siohwa pahn ketin sewese kitail en pelianda madamadau samin kan ni atail kin doulahte kapakapki sapwellime sawas. E kin ketikihong kitail sapwellime manaman pwe kitail en ahneki kehl en kolokol atail mwakelekel. Nan atail kapakap, kitail kak patohwanohng Siohwa me kitail men atail madamadau en kaperenda ih. (Mel. 19:14) Ni aktikitik kitail kin peki reh en ketin kasawih ma mie ineng keper kan nan mohngiongitail me kak kahrehiong kitail en wiahda dihp. (Mel. 139:23, 24) Doulahte peki rehn Siohwa en ketin sewese iuk en soikala tiahk samin oh en wia dahme pwung mehnda ma e apwal.—Mad. 6:13.
6 Mwohn atail sukuhlki duwen Siohwa, mwein kitail kin perenki wia soahng kan me e sohte ketin kupwurki, oh ele kitail pil kin pelpeliante ineng sapwung pwukat. Ahpw Siohwa kak ketin sewese kitail en wekila oh wia dahme e ketin kupwurki. Karasepe, mwurin Nanmwarki Depit wiahda dipen kamwahl rehn Padsipa, e koluhla oh peki rehn Siohwa en ketikihong ih “mohngiong mwakelekel” oh en sewese ih en peik. (Mel. 51:10, 12) Mehnda ma atail ineng samin en mahs kan kehlail oh kitail kin pelpeliante, Siohwa kak ketin sewese kitail en ahneki ineng ehu me kehlailasang pwehn peikiong ih oh wia dahme pwung. E kak ketin sewese kitail en kaunda atail madamadau soh unsek kan.—Mel. 119:133.
Ire Kesempwal kan
it-1-E 644
Doek
Mehn Edom men me kin papah nin duwen nein Nanmwarki Sohl kaunen sounsilepen sihpw, me iei pwukoa laud ehu. (1Sa 21:7, NW; 22:9) E sansal me Doek wia emen me iangala lamalam en mehn Suhs. Doek “alehdi kehkehlik en mihmi wasao mwohn silangin Siohwa” nan Nop kakete pwehki e kahukihla inou ehu, de e mi nan irair en samin, de pil kakete tokutok. Ihme kahrehda e pein kilang Samworo Lapalap Ahimelek eh kihong Depit pilawahn kasansalo oh nein Kolaiad kedlahso. Mwuri ni ahnsou me Sohl koasoakoasoiong nah ladu ko oh kasalehda eh lamalam me re uhwong ih, Doek kasalehda dahme e kilang nan Nop. Mwurin Sohl eh ekerpene samworo lapalapo iangahki samworo teikan nan Nop oh mwuri kapeidakih Ahimelek, Sohl ruwese sounsilasil ko ren kemehla samworo ko. Ni ar kahng wia met, Doek rong en Sohl eh ruweso oh ni soh pweiek kemehla samworo 85. Mwurin wiewia inenen suwed wet Doek eri kamwomwala Nop ni eh kemehla towe kan koaros, me pwulopwul oh me mah, pil iangahki neirail mahn kan.—1 Sam. 22:6-20.
Nin duwen me nting kan me mi pohn Melkahka irelaud 52 kasalehda, Depit ntingihdi duwen Doek: “Ke kin koasoanehdi ke en kauwehla meteikan; lowomwen rasehng reise keng pwoat. Ahnsou koaros ke kin kinehda likamw. Ke kin kesempwalki tiahk suwed laud sang tiahk mwahu oh likamw laud sang mehlel. Aramas likamw emen kowe! Ke kin mwahuki kauwehki meteikan omw lokaia kan.”—Me 52:2-4.
JUNE 24-30
TREASURES FROM GOD’S WORD PSALMS 54-56
Koht Kin Ketin Utung Uhk
Ken Loalokong—Lemmwiki Koht!
10 Ehu pak, Depit rapahkihla ah wasahn ruk rehn Akis, nanmwarki en mehn Pilisdia nan kahnimw en Kad, wasa me Kolaiad kohsang ie. (1 Samuel 21:10-15) Sapwellimen nanmwarkio ladu kan kasawihada me Depit wia imwintihti men en arail wehio. Dahme Depit wia nan irair apwal wet? E wehkohng audepen mohngiongi ni ah kapakap ohng Siohwa. (Melkahka 56:1-4, 11-13) Edetehn e mwomwehda me e sahliella pwe en kak pitila, Depit wehwehki me uhdahn Siohwa me kapitala ih ni ah ketin kapaiada ah wiewia kan. Ahn Depit likih Siohwa ki mohngiong unsek oh koapworopworki ih kasalehda me Depit ni mehlel kin lemmwiki Koht.—Melkahka 34:4-6, 9-11.
11 Duwehte Depit, kitail kak kasalehda lemmwiki Koht sang ni atail pahn likih sapwellime inou me e pahn ketin sewesei kitail en powehdi kahpwal kan. Depit mahsanih: “Mweidohng Siohwa pein kowe; likih, e ahpw pahn seweseiuk.” (Melkahka 37:5) Met sohte wehwehki me kitail pahn kesehiong Siohwa atail kahpwal koaros oh sohte wia uwen me kitail kakohng oh kasik me Siohwa en ketin kelehpwiki ah kamwahuwihala atail kahpwal kan. Depit sohte kapakap ohng Koht oh ih eri kesehla mehkoaros oh sohte wia mehkot. E doadoahngki ah koahiek en paliwar oh loalokong me Siohwa ketikihong ih pwehn kamwahuwihala kahpwal me mie ahnsowo. Ahpw, Depit mwahngih me kitail sohte kak koapworopworkihte doadoahk en aramas kelehpw. Kitail anahne pil ahneki soangen pepehm de madamadauohte. Ni atail wiahier soahng koaros me kitail kak wia, kitail kihong luhwe koaros rehn Siohwa. Ni mehlel, pak tohto sohte mehkot kitail kak wia ihte kitail en likih Siohwa. Met iei ahnsou me lemmwiki Koht kin sansalda. Kitail kak ale kamweit sang sapwellimen Depit mahsen en kangoang me mahsanih: “Siohwa kin ketin kompoakepahnki irail kan me kin lemmwiki Ih.”—Melkahka 25:14.
cl-E 243 par. 9
Sohte Mehkot Kak “Katohreikitailsang Sapwellimen Koht Limpoak”
9 Siohwa pil kin ketin kesempwalki atail kin dadaurete. (Madiu 24:13) Tamataman, Sehdan kin men kitail en sohpeisang Siohwa. Ehuehu rahn me ke kin loalopwoatohngete Siohwa iei pil ehu rahn me ke kin sewese kihda pasapeng ong en Sehdan eh kin kauwe ih. (Lepin Padahk 27:11) Ekei pak e kin apwal en kin dadaurete. Kahpwal en roson, kahpwal en mwohni, kahpwal en pepehm, oh kahpwal teikan kak kahrehiong ehuehu rahn en kin apwal ong kitail. Ni soahng kan me kitail kin kasik eh kin pwandala, met pil kak kahrehiong kitail en mworusala. (Lepin Padahk 13:12) Atail kin dadaur pahn soangen kahpwal pwukat kin uhdahn kesempwal ong Siohwa. Ihme kahrehda Nanmwarki Depit peki rehn Siohwa en ketin ‘kileledi uwen tohtohn pilen mese’ ko oh ni koapworopwor kapatahiong: “E soh ntingdier nan sapwellimomwi pwuhk?” (Melkahka 56:8) Ei Siohwa kin ketin kesempwalki oh tamataman pilen mesatail kan koaros oh lokolok kan me kitail kin dadaur pahn ni atail kin kolokolete atail loalopwoat ong ih. Mepwukat pil kin kesempwal mwohn silangi.
Ia Duwen Limpoak Eh Sewese Kitail en Powehdi Masak
16 Sehdan ese me kitail kin kesempwalki atail mour. Oh e nda me kitail pahn pil kesehla atail nanpwungmwahu rehn Siohwa pwe kitail en kak momour. (Sohp 2:4, 5) Ahpw Sehdan sapwung! Pwehki ih me kin “kahrehda mehla,” Sehdan kin song en doadoahngki atail masak mehla pwehn kahrehiong kitail en kesehla Siohwa. (Ipru 2:14, 15) Ekei pak, irail kan me Sehdan kin doadoahngki kin nda me re pahn kemeikitailla ma kitail sohte kesehla atail pwoson. De ekei pak, Sehdan kin kilang me kitail lelohng irair ehu me kitail kereniong mehla oh kin doadoahngki ahnsowo pwehn kahrehiong kitail en wiahda pilipil sapwung. Toahkte kan de atail peneinei kan me kaidehn Sounkadehde, ele pahn kasonge kitail en ale doken nta me kin kauwehla sapwellimen Koht kosonned. De emen kakete song en kangoange kitail en ale soangen wiepen wini ehu me uhwong kaweid en Paipel.
17 Mendahki kitail sohte men mehla, kitail ese me Siohwa sohte pahn ketin uhdihsang poakohng kitail. (Wadek Rom 8:37-39.) Ni kompoakepahn Siohwa kan ar kin mehla, e kin ketin tamataman irail, duwehte me re momourte. (Luk 20:37, 38) E ketin kupwurki kaiasirailda. (Sohp 14:15) Siohwa ketin pwainla pweipwei laud ehu pwe kitail “en ahneki mour soutuk.” (Sohn 3:16) Kitail ese ia uwen Siohwa eh ketin poakohng oh nsenohkin kitail. Eri kitail en dehr kesehla Siohwa ni ahnsou me kitail soumwahu de kereniong mehla, ahpw kitail en likih me e pahn ketin kansenamwahwihkitailla, ketikihong kitail erpit, oh kehl. Ih met me Valérie oh eh pwoudo wia.—Mel. 41:3.
Ire Kesempwal kan
it-1-E 857-858
Koahiek en Mwahngih Dahme Pahn Wiawi Ahnsou Kohkohdo, Koasoanehdi Dahme Pahn Wiawi
En Sudas Iskariot eh pangala Siseso kapwaiada kokohp oh kasalehda sapwellimen Siohwa oh sapwellime Ohlo koahiek en mwahngih dahme pahn wiawi ahnsou kohkohdo. (Me 41:9; 55:12, 13; 109:8; Wi 1:16-20) Ahpw kitail sohte kak nda me Koht me ketin koasoanedier Sudas en wia met. Kokohp kan kasalehda me kompoakepahn Sises keren men me pahn pangala ih, ahpw ire pwukat sohte kasalehda ni oaritik ihs rehn kompoakepah ko me pahn wia met. Ire mehlel kan en Paipel kasalehda me sapwung madamadau me dene me Koht ketin koasoanedier dahme Sudas pahn wia. Wahnpoaron men koasoia me sapwellimen Koht koasoandi iei: “Ke dehr kin karuwaru en pwil pehmw kan pohn ohl emen; pil dehr iang dipen meteikan; kolokol omw mwakelekel.” (1Ti 5:22; pil kilang 3:6.) Sises ketin loulou pwohng ehu pwon ong Semeo mwohn e pilada wahnpoaron 12 pwehki e kupwurki pilipil wet en wiawi ni erpit oh pwung. (Lu 6:12-16) Ma Koht ketin koasoanedier Sudas en pangala Sises, met pahn kak kasalehda me sapwellimen Koht kaweid kan kin uhpene, oh pil nin duwen ire mehlel en Paipelo, e pahn mwomwen me Koht pil ketin pwukoahki dihp me Sudas wiahda.
Eri e mwomwen me ni ahnsou me e pilipilda pwehn wia wahnpoaron men, sohte madamadau en pangala mi nan en Sudas eh mohngiong. Ahpw e mweidohng ‘kalewen tuhke pwoisin en pwarada’ oh kauwehla ih, oh met imwikihla eh wetsang ahl me pwung, oh tepida keid nan elen Tepil me kin widing oh pirap, a kaidehn elen Koht. (Ipr 12:14, 15; Soh 13:2; Wi 1:24, 25; Sei 1:14, 15; kilang JUDAS No. 4.) Eh mwersuwed ko lelehr ahnsou ehu me Sises kak mwahngih audepen en Sudas mohngiong oh eri kohpada eh pahn pangala ih.—Soh 13:10, 11.