Iren Sawas kan ong Doaropwehn Kasukuhl ong Mihting en Mour oh Kalohk
© 2024 Watch Tower Bible and Tract Society of Pennsylvania
NOVEMBER 4-10
SOAHNG KESEMPWAL KAN SANG MAHSEN EN KOHT | MELKAHKA 105
“E Kin Ketin Tamataman Sapwellime Inou Lapo Kohkohlahte”
Ia Duwen Atail Kak Kakehlaka Atail Pwoson Sapwellimen Siohwa Inou en Sampah Kapwo?
11 Medewehla ekei soahng kan me Siohwa ketin inoukihong sapwellime aramas akan mahso me mwomwen sohte kak pweida. E ketin mahsanihong Eipraam oh Sara me ira pahn nainekihda pwutak men ni ara mahla. (Sen. 17:15-17) E pil ketin mahsanihong Eipraam me kadaudoke kan pahn sapwenikihla Kenan. Erein sounpar tohto me kadaudok en Eipraam kan, mehn Israel ko, wia lidu kei nan Isip, ele e mwomwen me inowo sohte pahn pweida. Ahpw e pweida. Mwuhr, Siohwa ketin pakairki me Elisapet pahn nainekihda seri men, mendahki e mahlahr. Siohwa pil ketin mahsanihong meipwono Mery me e pahn kaipwidi sapwellime Ohlo. Met pahn kapwaiada inou me Siohwa ketin wiahda sounpar kid kid kei mwoweo nan mwetuwel en Ihden!—Sen. 3:15.
12 Ni atail kin medewehla inou kan koaros me Siohwa ketin wiahda oh ia duwen eh ketin kapwaiada, kitail wehwehki me e sapwellimanki manaman laud. Eri, atail pwoson sapwellime inou en sampah kapwo pahn kehlailla. (Wadek Sosua 23:14; Aiseia 55:10, 11.) Met kahrehiong kitail en kaunopada mwahu en sewese meteikan en wehwehki me inou en sampah kapwo kaidehn ouraman ehu. Pein Siohwa ketin mahsanihki duwen lahng kapw oh sampah kapw: “Mahsen pwukat me lelepek oh mehlel.”—Kaud. 21:1, 5.
it-2 1201 par. 2
Mahseno
Kepikipik kan me momour oh me sohte mour koaros kin peikiong mahsen en Koht, oh Koht kin ketin doadoahngki mepwukat pwehn kapwaiada kupwure kan. (Me 103:20; 148:8) Sapwellime mahsen me likilik; e pil kin ketin tamataman en kapwaiada dahme e kin ketin inoukihda. (Deu 9:5; Me 105:42-45) Duwehte me e ketin mahsaniher, sapwellime mahsen “kin mour poatopoat”; e uhdahn pahn pweida.—Ais 40:8; 55:10, 11; 1Pi 1:25.
Ire Kesempwal kan
w86 11/1 19 par. 15
Me Pwulopwul kan—Omw Pwukoa nan Peneinei Ehu me Peren oh Miniminpene
15 ‘Re pirekihdi nehn [Sosep] kan selmete, selmete kan pirapiriong ni tepinwere; lao lel ahnsou me sapwellime mahsen pweida, mahsen en Siohwa me kamwakelehda ih.’ (Me 105:17-19, NW) Erein sounpar 13, Sosep lokolok nin duwen ladu men oh me sensel men lao sapwellimen Siohwa inou kan pweida. Dahme e lelohng kahrehiong ih en koahiekla. Ia duwe, Sosep pahn koapworopworkihte “mahsen en Siohwa,” mendahki e mi nan irair apwal kan? E pahn kamwahwihala eh irair kaselel kan, oh kakairada irair kan me e anahne me duwehte kanengamah, aktikitik, ahneki nanpwungmwahu kehlail rehn Koht oh koasoanehdi teng en kapwaiada eh pwukoa kan mehnda ma apwal? Eri Sosep uhdahn pweida, pwe e rasehng kohl me kin kamwakelda, oh inenen mwakelekella oh kesempwalla ong Koht, me ketin doadoahngki ih sang ahnsowo kohla ong doadoahk kesempwal kan.—Senesis 41:14, 38-41, 46; 42:6, 9.
NOVEMBER 11-17
SOAHNG KESEMPWAL KAN SANG MAHSEN EN KOHT | MELKAHKA 106
‘Re Manokehla Koht me Ketin Kapitirailla’
Ihs me Men Iang Siohwa?
13 Mehn Israel ko masepwehkada ni arail kilang manaman kapwuriamwei en Koht, eri Moses kohdahla pohn Nahna Sainai oh wilianiraildi oh pato ong Siohwa. (Eks. 20:18-21) Re tehkada Moses eh pwand en pwuredi rehrail. Mwomwen me aramas ako pahn mihla nan sapwtehno ahpw sohte emen me pahn kaweid irail. Dahme irail pahn wia? Ele mehn Israel ko kin nohn koapworopworki arail sounkaweido, Moses. Irail pwunodada oh ndaiong Aaron: “Komw wiahiong kiht emen kohten me pahn kahluwei kiht, pwe se sehselahr dahme wiawihong ohl menet Moses, me kahreikitodo sang Isip.”—Eks. 32:1, 2.
Ire Kesempwal kan
Ire Kesempwal akan Sang Nan Pwuhk Kesiluh oh Kapahieu en Melkahka kan
106:36, 37. Iretikitik pwukat kin kasalehda me kaudokiong dikedik kin duwehte wia meirong ohng ngehn saut akan. Met kin wehwehki me aramas emen me kin doadoahngki dikedik kin mih pahn manaman en ngehn saut. Pwuhk Sarawi kalekehkin kitail oh mahsanih: “Nei kompoakepahi ko, kumwail en kadohwaneweisang kumwail koht likamw akan!”—1 Sohn 5:21.
NOVEMBER 18-24
SOAHNG KESEMPWAL KAN SANG MAHSEN EN KOHT | MELKAHKA 107-108
“Kapingkalahngan ong KAUN-O, Pwehki Ih me Kalahngan”
Mwomwohdiso Pahn Kapinga Siohwa
2 Mwomwohdiso sohte kin wiahte wasa me pwihn en aramas akan kin kohpene ie. E sohte kin doakedoake tohn kousoan ieute, de pwihn en aramas me ahnekihpene irair tehieu, de irail akan me perenkihpene soahng tehieu. wia pwihn en aramas akan en wasahn kousoan ehu de pwihn en aramas akan me kohsang irair tehieu de aramas akan me kin pwungkihpene dahme re mwahuki duwehte mwadong ape. Ni pali teieu, koasoandi en mwomwohdiso kin wiawi keieu ong kapingpen Siohwa Koht. Sang mahsie, sapwellimen Koht aramas akan kin pokonpene ong kahrepe wet nin duwen pwuhken Melkahka ah kin kasalehda. Melkahka 35:18 mahsanih: “I ahpw pahn kapingkalahngan ong komwi mwohn pokon en sapwellimomwi aramas akan; I pahn kapinga komwi mwohrail koaros.” Duwehte met, Melkahka 107:31, 32 kin kangoange kitail: “Re uhdahn pahn kapinga KAUN-O pwehki sapwellime limpoak poatopoat, oh manaman kapwuriamwei kan me e ketin wiahiongirailehr. Re uhdahn pahn kalohki roson lapalap wet nan pokon en aramas akan oh kapinga mwohn wie kupwur en me mah kan.”
Kapingkalahngan ong Siohwa oh E Pahn Ketin Kupwuramwahwihiuk
4 Kitail anahne nanti laud pwe kitail en kolokolte atail kapingkalahngan ong Siohwa. Keieu, kitail anahne pohnese kapai kan me Siohwa ketikihong emenemen kitail. Oh kitail pil anahne medemedewe kanahieng ia duwen kapai pwukat ar kin kasalehda sapwellimen Koht limpoak laud ong kitail. Ni sounmelkahkao eh wia met, e inenen pwuriamweikihla soahng kapwuriamwei kan koaros me Siohwa ketin wiahiong ih.—Wadek Melkahka 40:5; 107:43.
Ire Kesempwal kan
it-2 420 par. 4
Mohap
Mwuhr, ni ahnsou me Depit kakaun nin duwen nanmwarki men, Israel oh Mohap kin mahwenpene. Mehn Mohap kan uhdahn lohdi oh kin nohpwei ong Depit. E sansal me ni imwin mahweno, silikis riau en sounpei en Mohap ko kamakamala. E mwomwen me Depit kauwendi oh kairekehla irail, ih eri sohngedi irek wet pwehn kilang sounpei depe pahn wia silikis riau me pahn kamakamala oh silikis ehu me pahn momourte. (2Sa 8:2, 11, 12; 1Kr 18:2, 11) Mwein kakete nan mahwenohte me Penaia, nein Sehoiada, “kemehla nein Ariel en Mohap nah pwutak riemen.” (2Sa 23:20; 1Kr 11:22, NW) En Depit eh kalowehdi mehn Mohap kan kapwaiada dahme Palaam kohpada sounpar daulih 400 mwowe ni eh nda: “Nanmwarki men pahn ketin pwarada nan wehio, rasehng usu ehu, e pahn ketieisang nan Israel, rasehng rakim lingaling ehu. E pahn ketin kauwehla kaunen wehin Mohap kan, oh kamwomwala me akalapalap oh lemei kan koaros.” (Nem 24:17) Pweidahn kokohp wet me kahrehda sounmelkahkao koasoia me Koht kin ketin wiahki Mohap sapwellime “dahl en epwinek.”—Me 60:8; 108:9.
NOVEMBER 25–DECEMBER 1
SOAHNG KESEMPWAL KAN SANG MAHSEN EN KOHT | MELKAHKA 109-112
Utung Nanmwarkio Sises!
Ire Kesempwal akan Sang Nan Pwuhk Kelimau en Melkahka kan
110:1, 2—Dahme “[Sapwellimen Depit] Kaun,” Sises Krais, ketin wia nin doken ah ketiket ni pali maun en Koht? Mwurin Sises iasada, e ketidahla nanleng oh ketidiong ni pali maun en Koht wasa me e ketin awiawih lao lel nan pahr 1914 pwe en ketin tepiada sapwellime kaunda nin duwen Nanmwarki men. Erein ahnsou me e awiawih, Sises tepiada sapwellime kaun pohn irail sapwellime me keidi kan, kaweid irail nan arail doadoahk en kalohk oh katohnpadahk, oh pil kaunopada irail pwe ren iang ih ketin kakaun nan sapwellime Wehi.—Madiu 24:14; 28:18-20; Luk 22:28-30.
Aramas Akan Me Kin Pelian Koht Sohte Pahn Pweida!
3 Aramas kin uhwong Sapwellimen Siohwa aramas akan sangete nan tepin pahr kan en nan senturi karieisek. Nan sahpw tohto, ohl mwersuwed akan kin nantihong kerempwa—oh kauhdi—doadoahk en lohkiseli rongamwahu en Wehin Koht. Atail imwintihti, Tepil, me kin “kohkohseli duwehte laion emen me kin weriwer, raparapahki ihs me e pahn kadallehla” kin pain irail. (1 Piter 5:8) Mwurin “ahnsoun Mehn Liki kan” imwiseklahr nan pahr 1914, Koht ketin kamanahla sapwellime Ohl en wiahla Nanmwarki kapw ong sampah, oh mahsanihong ih: “Komwi en kaunda sapwellimomwi imwintihti kan.” (Luk 21:24; Melkahka 110:2) Krais doadoahngki sapwellime kehl nin duwen nanmwarki men oh e sikensang Sehdan nanleng oh saliehdi ih en mihmi sampah. Pwe Tepil ese me e ahnsou mwotomwotlahr, e kin lingeringer kowahlap pahn irail Kristian me keidi kan oh iengarail kan. (Kaudiahl 12:9,17) Ia imwilahn irail akan me kin kapwkapwurehong arail pelian Koht?
be 76 par. 2
Kekeirda oh Koahiekla
Kaweid en doadoahngki omw koahiek kin pidada omw men tiengla mwowe oh mwekid. Ia duwe, ke kin tiengla mwowe en iang meteikan nan doadoahk en kalohk? Ke kin rapahki ahnsou mwahu kan en sewese tohnmwomwohdiso kan me kapw, pwulopwul, de luwet? Ke kin toukihda pein uhk ken iang kamwakele Wasahn Kaudok de sawas ni soangsoangen ahl akan ni mihting tohrohr kan? Ke kak ekei pak iang wia sawaspen pioneer? Ke kak papah nin duwen pioneer men de sewese mwomwohdiso ehu wasa me anahne laud mie? Ma kowe brother men, ke kin nantihong ale pwais ni omw kapwaiada koasoandi kan en Paipel me ke anahne wia pwehn kak wia sounsawas kan oh elder kan? Omw men kihda sawas oh ale pwukoa iei kilelepen omw koahiekla.—Mel. 110:3.
Ire Kesempwal kan
it-1 524 par. 2
Inou Lap
Inou Lap en Wia Samworo Duwehte Melkisedek. Inou lap wet sansalda nan Melkahka 110:4, oh sounnting en Paipel en pwuhken Ipru doadoahngki ire wet ong Krais nan Ipru 7:1-3, 15-17. E wia inou lap ehu me wiawihda nanpwungen Siohwa oh Sises kelehpw. E sansal me Sises mahsanih duwen met ni ahnsou me e ketin wiahda inou lap en wehio rehn sapwellime tohnpadahk kan. (Lu 22:29) Sang dahme Siohwa ketin inoukihda, Sises Krais, sapwellimen Koht Ohlo nanleng, pahn wia samworo men nin duwen koasoandi en Melkisedek. Melkisedek wia nanmwarki oh samworo en Koht emen nin sampah. Sises Krais pahn sapwellimanki pwukoahn Nanmwarki oh Samworo Lapalap nanleng, a kaidehn nin sampah. Ni ahnsou me e ketidahla nanleng, e sapwellimankihla pwukoa wet oh e pahn ketin wia pwukoa wet kohkohlahte. (Ipr 6:20; 7:26, 28; 8:1) Inou lap wet pahn kadoadoahk kohkohlahte, pwehki pahn sapwellimen Siohwa kaweid, Sises pahn wia Nanmwarki oh Samworo Lapalap kohkohlahte.—Ipr 7:3.
DECEMBER 2-8
SOAHNG KESEMPWAL KAN SANG MAHSEN EN KOHT | MELKAHKA 113-118
Ia Duwen Atail Kak Kasalehda Atail Kalahngan ong Siohwa?
En Kehlailkihda Limpoak
13 Mahsen en Sises nan iretikitik wet kin kasansalehda me keieu kesempwal kitail en poakohng Siohwa. Ahpw, kitail sohte kin ipwikihdi limpoak unsek ong Siohwa. Limpoak iei irair ehu me kitail anahne nantihong en kekeirada. Ni ahnsou me kitail tepin rong duwen Siohwa, kitail men karanih Ih. Ekis ekis, kitail sukuhliki iaduwen e kaunopada sampah ong aramas akan. (Senesis 2:5-23) Kitail sukuhliki duwen sapwellime wiewia kan ong aramas akan, e sohte kesehla aramas akan ni ahnsou me dihp tepida wiawi, ahpw e koasoanehdi sawas kan en wiawi pwehn doarehla kitail. (Senesis 3:1-5, 15) E kin kadek ong irail akan me kin lelepek, oh e ketikihda sapwellime Iehros pwehn mahkong dipatail kan. (Sohn 3:16, 36) Lalaudlahn loalokong pwung wet kin sewese atail kalahngan ong Siohwa en kekeirada. (Aiseia 25:1) Nanmwarki Depit mahsanih me e kin poakohng Siohwa pwehki sapwellimen Siohwa epwel limpoak. (Melkahka 116:1-9) Rahnwet, Siohwa kin apwalih, kahluwa, kakehle, oh kangoange kitail. Ni atail kin kalaudehla atail sukuhliki duwen Ih, atail limpoak pil kin kehlailda.—Melkahka 31:23; Sepanaia 3:17; Rom 8:28.
w09 7/15 29 par. 4-5
Kalahnganki Dahme Ke Alehdi—Kihda ni Mohngiong Unsek
Sounmelkahkao idek : “Dahme I kak meirongkihong KAUN-O dupuk en sapwellime kalahngan ong ie?” (Mel. 116:12) Soangen kamwahu dah kan me e alehdier? Siohwa ketin kakehlaka ih erein ahnsou ehu me e kin “masak oh pwunod.” Patehng met, Siohwa pil ketin ‘doarehla ih sang mehla.’ Eri met e men “dupuk” ong Siohwa ni ahl ehu me e kak. Dahme sounmelkahkao kak wia? E koasoia: “I pahn patohwanohng dahme I inoukidahr.” (Mel. 116:3, 4, 8, 10-14) E koasoanehdi teng en dehr kauwehla eh inou kan koaros me e wiahda ong Siohwa oh en pil kapwaiada eh pwukoa kan koaros.
Ke pil kak wia soahngohte. Ia duwen? Sang ni omw pahn mourki mour ehu me kin ahnsou koaros idawehn sapwellimen Koht kosonned oh kaweid kan. Eri tehk mwahu me omw kaudok ong Siohwa en kin keieu kesempwal nan omw mour oh ken pil mweidohng sapwellimen Koht manaman en kaweid uhk ni mehkoaros me ke kin wia. (Ekl. 12:13; Kal. 5:16-18) Ei, ni mehlel, ke sohte kak dupuk ong Siohwa mehkoaros me e ketin wiadahr ong uhk. Ahpw Siohwa kin ketin “pereperen” ni eh mahsanih me ke toukihda pein uhk pwehn papah ih ni mohngiong unsek. (Lep. Pad. 27:11) Ia uwen eh wia pwais kaselel ehu en kaperenda Siohwa ni ahl wet!
Mehn Kasukuhl kan me Kitail Kak Sukuhlkihsang Pwuhken Lipai
9 Keriaun mehn kasukuhl: Kitail kin papah Siohwa pwehki atail kalahngan ong ih. Kitail pahn sukuhlki mehn kasukuhl wet ni atail tehkpene duwen meirong en kaminimin kan me mehn Israel kan kin wia. Nan pwuhken Lipai, kitail sukuhlki me mehn Israel men kak kihda meirong en kaminimin nin duwen meirong en “kapingkalahngan” ehu. (Lip. 7:11-13, 16-18) E kin wia meirong wet, kaidehn pwehki e anahne wia, ahpw pwehki e men wia met. Eri aramaso kin nsenki toukihda meirong wet pwehki e poakohng eh Kohto, Siohwa. Aramas me kihda meirongo, eh peneinei, oh samworo kan pahn kang uduk en mahno me meirongala. Ahpw mie wasa kei ni mahno me kin meirongala ongete Siohwa kelehpw. Wasa dah kei me?
10 Kesiluh en mehn kasukuhl: Pwehki limpoak, kitail kin patohwanohng Siohwa dahme keieu mwahu rehtail. Siohwa ketin wiahki wih en mahn wasa me keieu mwahu ni mahn akan. E pil ketin kasalehda ni oaritik me mie wasa kei ni mahno, iangahki mwidihlik ko, me uhdahn kesempwal. (Wadek Lipai 3:6, 12, 14-16.) Eri Siohwa kin uhdahn ketin kupwurperenki ni mehn Israel men eh nsenki toukihda ong ih wasa mwahu pwukat. Mehn Israelo me toukihda soangen meirongo kin kasalehda eh uhdahn men patohwanohng Koht dahme keieu mwahu reh. Ni ahlohte, Sises perenki patohwanohng Siohwa uwen eh kak koaros sang ni eh kin papah Ih pwehki eh limpoak ong Ih. (Sohn 14:31) Ong Sises, en wiewia kupwuren Koht kin uhdahn kaperen; e kin uhdahn ketin poakohng sapwellimen Koht kosonned kan. (Mel. 40:8) Ia uwen Siohwa eh kin ketin kupwurperenkihda ni eh mahsanih duwen Sises eh nsenki papah ih!
11 Atail papah Siohwa kin duwehte meirong en kaminimin ko pwehki e duwehte atail kin kasalehiong Siohwa atail pepehm ong ih. Kitail kin patohwanohng Siohwa dahme keieu mwahu rehtail, oh kitail kin wia met pwehki kitail poakohng ih sang mohngiongitail unsek. Ia uwen Siohwa eh kin ketin kupwurperenkihda ni eh mahsanih tohnkaudok rar rar kei ar papah ih pwehki arail poakohng ih oh pil sapwellime ahl akan! Ni atail tamataman me Siohwa kin ketin mwahngih oh kesempwalki kaidehn ihte dahme kitail kin wia ahpw pil dahme kahrehda kitail kin wia met, e kak uhdahn kamweitkitailla. Karasepe, ma kowe emen me mah oh sohla kak wia soahng tohto me ke men wia, kamehlele me Siohwa ketin mwahngih laudsang omw soh itar kan. Ele ke pehm me dahme ke kin patohwanohng Siohwa uhdahn tikitik, ahpw Siohwa ketin mwahngih duwen limpoak me ke ahneki me kin kamwakid uhk ken wia dahme ke kak wia. E kin ketin kupwurperenki dahme ke kak patohwanohng ih ni uwen omw kak.
Ire Kesempwal kan
w12 5/15 22 par. 1-2
Peidek kan Sang Sounwadawad kan
Sounmelkahka men koulki: “Ia uwen toutoun kupwur en KAUN-O ni emen sapwellime aramas akan eh kin mehla!” (Mel. 116:15) Siohwa kin uhdahn ketin kesempwalki mouren sapwellime tohnkaudok kan koaros. Ahpw lepin lokaia kan me kileldi nan Melkahka 116 sohte dokedokehte mehlahn aramas emen.
Ni padahk en mehla ehu eh pahn wiawi ong Kristian emen, e sohte konehng en doadoahngki Melkahka 116:15 ong me mehlao, mehnda ma e wia sapwellimen Siohwa ladu lelepek men lao e mehla. Dahme kahrehda? Pwehki dahme sounmelkahkao koasoia ahneki wehwe laud. Met wehwehki me e nohn pweilaud ong Koht en ketin mweidohng sapwellime aramas loalopwoat kan koaros ren mehla.—Kilang Melkahka 72:14; 116:8.
DECEMBER 9-15
SOAHNG KESEMPWAL KAN SANG MAHSEN EN KOHT | MELKAHKA 119:1-56
“Ia Duwen Mwahnakapw Men Eh Kak Dadaur Eh Mour Mwakelekel?”
w87 11/1 18 par. 10
Ke Kin Kolokolete Mour Mwakelekel?
10 Pohl kehkehlingki nan Episos 5:5: “Pwe kumwail eseier oh uhdahn wehwehki met, me aramas me kin wia tiahk samin me pid wia nsenen pwopwoud de me kin samin de me kin noahrok me iei ehu soangen pwongih dikedik, sohte pahn sohsohki Wehin Krais oh Koht.” Ahpw ehuehu sounpar, me kid kei kin alehdi kaweid kehlail de piskenkihla arail wia tiahk samin me pid wia nsenen pwopwoud, oh wiahda ‘dihp ong pein paliwararail.’ (1 Korint 6:18) Met kin kalapw kohsang arail sohte ‘kin kapwaiada sapwellimen [Koht] kosonned kan.’ (Melkahka 119:9) Karasepe, Kristian tohto sohla kin kanahieng arail wiewia kan ni ahnsou me re kohla mwemweit. Pwehki irail kin sohla nsenohki patehng tohnmwomwohdiso, irail kin tepida kompoakepahnkihla irail me kaidehn Sounkadehde me pil kohla mwemweit. Ekei Kristian kan kin nda me dene ‘aramas pwukat uhdahn mwahu,’ kahrehda re kin iang irail wia soahng kan me mwomwen sohte konehng. Meteikan pil kin nohnla patehng iangarail tohndoadoahk kan. Emen elder kin nohn patehng ienge tohndoadoahk lih men, kahrehda e kohkohsang eh peneineio oh uhd kousoanla rehn liho! Met imwikihla eh piskenla. Ia uwen mehlel en iren Paipelo me mahsanih: “Werek suwed kin kauwehla tiahk mwahu”!—1 Korint 15:33.
“Sapwellimomwi Mehn Kataman Kan Me Wia Kaperenpei”
SIOHWA ketikihong sapwellime aramas akan mehn kataman kan pwe en sewese irail nan ahnsou apwal akan. Ekei mehn kataman pwukat kin pwarada nan ahnsou en atail kin wia atail wadawad en Paipel, a ekei kin kohda ni ahnsoun padahk oh ekei kin kohda ahnsou me meteikan kin pasapeng nan mihding en Kristian kan. Kitail esehier pali laud en mehkan me kitail kin wadek de rong. Ele kitail koasoiaier soangen ire pwukat. Ahpw, pwehki kitail kin mengei en manokehla, ihme kahrehda kitail anahne en kin ahnsou koaros katamankin kitail duwen kupwuren Siohwa kan, sapwellime kosonned oh kaweid kan. Kitail anahne perenki sapwellimen Koht mehn kataman de kaweid kan. Irail kin kangoange kitail oh kin sewese kitail en kihong atail madamadau ohng kahrepe kan me pahn kamwekid kitail en alehda soangen mour me koht kupwurki. Ihme, sounmelkahkao koulki ohng Siohwa: “Sapwellimomwi mehn kataman kan me wia kaperenpei.”—Melkahka 119:24.
w10 4/1 24 par. 2
Mesomwen en Sohpeisang Mehkan me Sohte Katepe!
2 Ahpw dahme kitail kin kilang pil kak kahrehiong kitail nan kahpwal. Ehupenehn atail koahiek en kilang wasa oh atail madamadau kin kehlail, ihme dahme kitail kin kilang kak kahrehda oh kakehlaka ineng kan nan mohngiongitail. Oh pwehki kitail kin mour nan sampah ehu me suwed oh roporop me Sehdan me Tepil kin kakaun, kitail kin kalapw kilang kilel kan me kak kahrehiong kitail en wia pilipil sapwung, mendahki atail kilang ni ahnsou kiste. (1 Sohn 5:19) Ihme kahrehda sounmelkahkao peki rehn Koht: “Komw kupwure ie, pwe mesei kat en dehr kilang mehkan me sohte katepe; Komw ketin kolokol ei mour nan sapwellimomwi ahl.”—Mel. 119:37, NW.
Ire Kesempwal kan
Likih Sapwellimen Siohwa Mahsen
2 Ehu ire kesempwal me pwuhken Melkahka 119 kin kasalehda iei kesempwalpen sapwellimen Koht mahsen. Soun nting menet wiahda koul wet nin duwen soandi en alphabet kan, mwein pwen wia mehn kataman ieu. Iretikitik 176 kin poahsonda pohn irereklahn lepin nting kan en alphabet en lokaiahn Ipru. Ni lokaiahn Ipru, koul wet kin audaudkihda stanza 22 oh lain 8 kin tepikihda ehu lepin nting ohte. Melkahka wet kin koasoiada duwen sapwellimen Koht mahsen, kosonnedo, mehn kataman kan, koasondi kan. Ni atail pahn koasoaiada pwuhken Melkahka 119, kitail pahn doadoahngki kawehwehn Pwuhk Sarawi pwung ieu ni lokaiahn Ipru nan artikel wet oh nan artikel en mwurin met. Ni atail kin doudouloale duwen dahme sapwellimen Siohwa aramas akan kin lelong sangete mahs oh pil leledo ahnsouwet, met pahn kak kalaudehla atail wehwehki duwen koul wet me sang Koht oh kalaudehla atail kalahnganki sapwellimen Koht Mahsen iei Pwuhk Sarawi.
DECEMBER 16-22
SOAHNG KESEMPWAL KAN SANG MAHSEN EN KOHT | MELKAHKA 119:57-120
Ia Duwen Atail Kak Dadaurete Pahn Kahpwal kan
“Ia Uwen Ei Poakohng Sapwellimomwi Kosonnedo!”
2 E konehng ken pein idek rehmw, “Iaduwen sapwellimen Koht kosonnedo kak wia mehn kansenamwahu oh kaperen ohng sounmelkahkao?” Dahme kin kakehle ih iei ah likih me Siohwa kin nsenohki ih. Sang ni ah wehwehkihla duwen sawas en limpoak kan me kin kohsang ah kapwaiada kosonnedo, e kin kahrehong sounmelkahkao en peren, mendahki soangen kahpwal kan me eh imwintihti kan kin wiahiong ih. E kilangada duwen kadek en Siohwa ni ah kin ehuiong ih. Oh pil, kapwaiada kaweid sang sapwellimen Koht kosonned kahrehong sounmelkahkao en loalokongla sang ah imwintihti kan oh pil kahrehong en pil kak mourla. Ah kapwaiada kosonnedo kin kihong ih meleilei oh en ahneki nsen mwakelekel.—Melkahka 119:1, 9, 65, 93, 98, 165.
Ke Kin Poakohng Sapwellimen Siohwa Mehn Kataman Kan Sang Mohngiongomw Unsek?
3 Sounmelkahka menet kin kesempwaliki sapwellimen Koht mehn kataman kan oh e koulki met: “I sohte pahn pwand, ahpw I pahn mwadang kapwaiada sapwellimomwi mahsen kan. Aramas suwed akan wiahdahr arail mehn lidipih ie, ahpw I sohte manokehla sapwellimomwi kosonnedo.” (Melkahka 119:60, 61) Sapwellimen Siohwa mehn kataman kan kin sewese kitail en dadaur pahn kalokolok kan pwehki kitail kin likih me Samatail nanleng pahn kak kihsang mehn lidip kan me kohsang atail imwintihti kan. Ni ahnsou me konehng, e kin kasaledek kitail sang mehn lidip kan pwe kitail pahn kak pousehla wia doadoahk en kalohki Wehio.—Mark 13:10.
Ire Kesempwal akan Sang Nan Pwuhk Kelimau en Melkahka kan
119:71—Soangen kamwahu dah me kak kohsang atail lelohng kalokolok? Atail lelohng kahpwal kan kak padahkiong kitail en kalaudehla atail kehliki Siohwa, oh kitail en ngidingid kapakap ong Ih, oh kalaudehla atail loalenohng onop Paipel oh kapwaiada dahme e kin mahsanih. Kapatahiong met, atail kin lelohng kalokolok ni ahnsou en apwal kak kasalehda atail soh unsek kan me kak kapwungpwungla. Kalokolok sohte pahn wiahiong kitail en ahnekihda kailok ma kitail wiahki irairo en kamwahuwihkitailla.
“Iang Sengiseng Rehn me Kin Sengiseng kan”
3 Samatail limpoak, Siohwa, iei me kin keieu ketikihda nsenamwahu me kitail anahne. (Wadek 2 Korint 1:3, 4.) E ketin wia mehn kahlemeng me keieu mwahu duwen emen me kin wehwehki pepehm en meteikan, oh e ketin inoukihong sapwellime kan: “Iei ngehi me kakehleikumwailda.”—Ais. 51:12; Mel. 119:50, 52, 76.
5 Kitail kak uhdahn kamehlele me Siohwa pahn ketin sewese kitail. Eri kitail en kin ahnsou koaros saledek en kapakap ong ih oh kasalehda atail nsensuwed laud oh pahtou. Ia uwen eh kansenamwahu en ese me Siohwa kin ketin mwahngih atail pepehm kan oh kin ketikihong kitail nsenamwahu me kitail anahne! Ahpw ia duwen eh kin ketin wia met?
Ire Kesempwal kan
Ire Kesempwal akan Sang Nan Pwuhk Kelimau en Melkahka kan
119:96—Ia wehwehn ‘mehkoaros ar sohte unsek’? Wasaht, sounmelkahka menet kin koasoakoasoia duwen irair en soh unsek en aramas akan. Mwein ele e kin medemedewe duwen ahn aramas ah medemedewe duwen dahme unsek ah nohn pwek. Weksang met, sapwellimen Koht kosonned sohte irepe. Sapwellime kosonned akan oh kaweid akan kin konehng soangen irair en mour koaros. New International Version koasoia: “Ohng soahng unsek koaros I kilang irepe, ahpw sohte irepen sapwellimomwi kosonnedo.”
DECEMBER 23-29
SOAHNG KESEMPWAL KAN SANG MAHSEN EN KOHT | MELKAHKA 119:121-176
Ia Duwen Omw Pahn Soikala Soahng Kamedek kan
Mweidohng Sapwellimen Koht Kosonned oh Ire Mehlel kan en Kaiahne Kadeikpen Loalomw
5 Ma kitail men sapwellimen Koht kosonned kan en sewese kitail, kitail anahne wia laudsang en ihte wadek de ese ia wehwehn. Kitail anahne poakohng oh wauneki kosonned pwukat. Paipel mahsanihong kitail: “Kumwail tatki me suwed, oh kesempwalki dahme mwahu.” (Eimw. 5:15) Ahpw ia duwen atail kak wia met? Kitail anahne sukuhlki en kilangwohng soahng kan duwehte Siohwa eh kin ketin kilangwohng soahng kan. Medewehla duwen met. Medewehla me ke sohte kin meir mwahu, oh omw toahkteo ndaiong uhk ken kang mwenge me mwahu ong omw roson, eksersais, oh wiahda wekidekla kan nan omw mour. Ke idawehn eh kaweid, oh e pweida mwahu! Ia pahn omw pepehm ong kaweid me toahkteo kihda?
6 Ni ahlohte, Sounkapikpatail ketikihong kitail kosonned kan pwehn pere kitail sang imwila suwed en dihp oh pil en kamwahwihala elen atail mour. Karasepe, Paipel padahkihong kitail me kitail en dehr likamw, pirap, wia tiahk samin me pid nsenen pwopwoud, kasalehda tiahk lemei, de wia sohte lipilipil soahng kan me pid wunahni. (Wadek Lepin Padahk 6:16-19; Kaud. 21:8) Ni atail pehm imwila mwahu kan sang atail peikiong Siohwa, atail limpoak ong ih oh sapwellime kosonned kan kin laudla.
w93 4/15 17 par. 12
Me Pwulopwul kan—Dahme Kumwail Kin Rapahki?
12 Me keieu kesempwal iei ke anahne sukuhlki en kailongki, tatki, oh kasautki me suwed. (Melkahka 97:10) Ia duwen omw kak kailongki dahme mwomwen kaperen de kansenamwahu nin tapio? “Kumwail dehr pitida: Kumwail sohte kak pitih Koht. Pwe dahme aramas kin kamwarak, ih me e pahn pil dolung; pwehki me kin kamwarak ong kamwahupen ineng en uduk pahn dolung mehla sang ineng en uduk.” (Kalesia 6:7, 8) Ni omw lelohng kasongosong en lohdi pahn omw ineng suwed, medewehla duwen imwila suwed me keieu laud—ia uwen omw pahn kamedekihala Siohwa Koht. (Pil kilang Melkahka 78:41.) Pil medewehla duwen omw pahn kakete liseianda de alehdi soumwahu suwed me duwehte AIDS. Medewehla omw pahn lokolongki nsensuwed laud oh sohla wauneki pein kowe. Pil mie imwila suwed kan me pahn mihmihte rehmw ahnsou werei. Emen lih Kristian koasoia: “Ngehi oh ei pwoudo iangehr wia nsenen pwopwoud rehn meteikan mwohn aht tuhpene. Mendahki kiht koaros Kristian kei met, aht wiewiahn mahso me kin kahrehda sen kin akamaipene oh luwangki emenemen.” Tamataman me ke pil pahn kak luhssang omw pwukoa nan mwomwohdiso de pil piskensang nan mwomwohdisohn Kristian. (1 Korint 5:9-13) Ia duwe, mie katepen omw kesehla soahng kesempwal tohto pwehn nsenamwahu ong ahnsoukiste?
Ire Kesempwal kan
Kamehlele me Sapwellimen Koht “Mahsen Pwon me Mehlel”
2 Nin duwen sapwellimen Siohwa ladu kei, kitail kamehlele me ih “Koht en mehlel” oh kin ahnsou koaros ketin kupwurki dahme mwahu ong kitail. (Mel. 31:5, NW; Ais. 48:17) Kitail ese me kitail kak likih dahme kitail wadek nan Paipel, me ‘sapwellimen Koht mahsen pwon me mehlel.’ (Wadek Melkahka 119:160.) Kitail pwungki dahme emen ohl me samanih poadopoad en Paipel ntingihdi: “Sohte mehkot me Koht ketin mahsanih likamw de sohte pahn pweida. Sapwellimen Koht aramas akan kak likih dahme e ketin mahsanih pwehki irail likih ih.”
DECEMBER 30–JANUARY 5
SOAHNG KESEMPWAL KAN SANG MAHSEN EN KOHT | MELKAHKA 120-126
Re Sengiseng ni Ar Kamwarak, Ahpw Peren ni Ar Dolung
Meid Pai Irail Oko Me Kin Kalinganahda Koht
10 Ni atail kin alehda mehn wisik en wia tohnpadahk en Sises, kitail kin pelianda Sehdan. Seims 4:7 kamehlelehiong kitail: “Eri, kumwail pelianda Tepil, e ahpw pahn tangasang kumwail.” Met sohte pahn mengei en wia. En papah Koht kitail pahn anahne nanti laud. (Luk 13:24) Ahpw, Pwuhk Sarawi wiahda inou wet nan Melkahka 126:5: “Irail kan me sengiseng nindokon arail kamwakamwarak, re en dolung wahnsapwarail pereperen.” Ei, kitail kin papah Koht men me kin kalahngan oh kadek. E kin “katingih irail kan me kin raparapahki,” oh e kin kapaia irail akan me kin kalinganahda Ih.—Ipru 11:6.
Ia Uwen Kehlail en Omw Pwoson?
17 Ia duwe, ke kin pahtouki mehlahn emen me ke poakohng? Wiahda ahnsou en kakehlakahla omw pwoson koapworopwor en kaiasadao, sang ni omw wadek koasoipen irail kan nan Paipel me iasada sang mehla. Ke kin nsensuwedki emen tohn omw peneinei eh piskenla? Wia pein onop pwehn kadehdehiong uhk me sapwellimen Koht elen peneu iei me keieu mwahu. Sohte lipilipil soangen kahpwal dah me ke lelohng, doadoahngki ahnsowo pwehn kakehlakahla omw pwoson. Padahkihong Siohwa ia uhdahn omw pepehm. Dehr katohre pein uhk, ahpw mihmi karanih riomw Kristian kan. (Lep. Pad. 18:1) Wia soahng kan me pahn seweseiuk en dadaur, mehnda ma ke kin sengisengki dahme wiawihong uhk. (Mel. 126:5, 6) Pousehlahte iang towehda mihting kan, iang kalohk, oh wia pein omw wadawad en Paipel. Oh medemedewehte soahng kaselel kan me Siohwa ketin inoukihda en ketikihong uhk ni ahnsou kohkohdo. Ni omw kilang ia duwen Siohwa eh ketin seweseiuk, omw pwoson ih pahn kehlailla.
Nantiweite Nan Doadoahk Erein Ahnsoun Rahk!
13 Mahsen kan en Melkahka 126:5, 6 kin kihda kamweit laud ong sapwellimen Koht tohndoadoahk en rahket, oh keieu ong irail akan me kin lelong kalokolok: “Irail kan me sengiseng nindokon arail kamwakamwarak, re en dolung wahnsapwarail pereperen! Irail kan me sengiseng nindokon arail weuwa kohwei ar werentuhke kan re en koul oh ngisingiski peren ni arail pahn pwurodo, wa kohdo wahnsapwarail.” Mahsen kan en sounmelkahka menet duwen kamwakamwarak oh dolung wahnsahpw akan kin karasaiong sapwellimen Siohwa epwel mwahu oh kapai kan ong luwen aramas akan me sapahldo sang ahr kin selidi nan Papilon en mahs. Irail me inenen peren ni ahnsou re pitsang Papilon, ahpw ele mwein irail kin sengiseng ni ahnsou re kin kamwakamwarak nan pwel me sohte koadoahke erein sounpar 70 me irail kalipilipla. Ahpw, irail akan me pousehla kamwakamwarak oh wia doadoahk kan en onehda sapahl, irail kin paiekihda oh kilangada wahn en arail doadoahk kan.
14 Mwein kitail kin sengiseng ni ahnsou me kitail kin lelohng kalokolok kan de ni ahnsou me kitail de iengatail pwoson akan kin kamakamki atail wiewia pwung kan. (1 Piter 3:14) Ni atail kin wia doadoahk en rahk, mwein nin tepio kitail kin apwalki doadoahk wet pwehki mwomwen sohte mehkot me kitail kak kasalekihda me atail doadoahk kin pweida. Ahpw, ma kitail pahn pousehla kamwarak oh kalamwurehki pihl, Koht pahn ketin kakairada tuhkeo, oh pak tohto, daulihla dahme kitail kin kasik. (1 Korint 3:6) Met kin sansal sang pweidahn atail doadoahk en kihseli Paipel kan oh sawaspen Paipel kan.
Ire Kesempwal kan
cl 73 par. 15
Manaman en Pere—“Koht me Perehpatail”
15 Keieu, medewehla duwen perepen paliwaratail. Nin duwen sapwellimen Siohwa tohnkaudok kan, kitail kak kasik me Siohwa pahn ketin pere kitail nin duwen pwihn ehu. Pwe ma soh, e pahn mengei ong Sehdan en kalowehdi kitail. Medewehla met: Dahme Sehdan, “kaunen sampah wet,” keieu men wia iei en kasohrehla kaudok mehlel. (Sohn 12:31; Kaudiahl 12:17) Ekei koperment kan me keieu kehlail nin sampah keinapwihdiher atail doadoahk en kalohk oh kin song en kasohrehla kitail douluhl. Ahpw sapwellimen Siohwa aramas akan kin kesihnendahte teng oh sohte uhdi kalohk! Dahme kahrehda wehi kehlail pwukat sohte kak kauhdi doadoahk en pwihn tikitik en Kristian wet me mwomwen luwet? Pwehki Siohwa ketin perehkinkitailla sapwellime pehnpihr kan!—Melkahka 17:7, 8.