Iren Sawas kan ong Doaropwehn Kasukuhl ong Mihting en Mour oh Kalohk
© 2024 Watch Tower Bible and Tract Society of Pennsylvania
SEPTEMBER 2-8
SOAHNG KESEMPWAL KAN SANG MAHSEN EN KOHT | MELKAHKA 79-81
Poakohng Mwaren Siohwa me Lingan
Pweinen Pweipwei Sapahlo—“Kisakis Mwahu” Ehu Sang Samatailo
5 Ia duwen atail kak kasalehda me kitail poakohng mwaren Siohwa? Sang atail wiewia kan. Siohwa ketin kupwurki kitail en sarawi. (Wadek 1 Piter 1:15, 16.) Met wehwehki me kitail pahn kaudokiong ih kelehpw oh peikiong ih sang ni mohngiongitail unsek. Pil ni ahnsou me kitail lelohng kalokolok, kitail kin wia uwen atail kak en mour ni ahl me Siohwa ketin padahkihong kitail. Ni atail mour pahrekiong sapwellimen Siohwa koasoandi kan, kitail kin kalinganahla mwareo. (Mad. 5:14-16) Kitail kin kadehdehda me sapwellimen Siohwa kosonned kan kin mwahu oh me Sehdan likamw. Kitail sohte unsek, eri kitail uhdahn pahn wiahda sapwung kan. Ahpw ni atail kin wia met, kitail kin koluhla oh wia uwen atail kak en uhdi wia soahng kan me kin kauwehla mwaren Siohwa.—Mel. 79:9.
ijwbv 3 par. 4-5
Rom 10:13—“Likweriong Mwaren Kaun-o”
Ni Paipel eh kin mahsanih “likweriong mwaren Siohwa,” met kin wehwehki laudsang en ihte ese mwaren Koht oh doadoahngki nan kaudok. (Melkahka 116:12-14) E kin pidada en likih Koht oh peksawas reh.—Melkahka 20:7; 99:6.
Sises Krais kin ketin kesempwalki mwaren Koht. Tepin koasoi kan nan sapwellime kapakap en Samato iei: “Samat me ketiket nanleng, mwaromwi en sarawihla.” (Madiu 6:9) Sises pil ketin kasalehda me kitail anahne esehla, peikiong, oh poakohng Ih me ketin mwarenki mwar wet ma kitail men alehdi mour soutuk.—Sohn 17:3, 6, 26.
Ire Kesempwal kan
it-2 111
Sosep
Eden Sosepo Ndandla. Pwehki Sosep me keieu kesempwal nanpwungen nein Seikop pwutak ko, e uhdahn konehng me edeo kin ekei pak kadoadoahk pwehn wiliandi keinek kan koaros en Israel (Me 80:1) de irail kan me wiahla kisehn keinek eisek en wehin Israel me mi paliepeng. (Me 78:67; Ei 5:6, 15; 6:6) Edeo pil kin pwarada nan kokohp en Paipel. Nan en Esekiel kaudiahlo, kadaudok en Sosep pahn ale wasa riau (Ese 47:13), eden Sosep pil ntingdi ni ehu ewen kehl en kahnimwo me adaneki “Siohwa Ketiket Wasao” (Ese 48:32, 35, NW), oh me pid kaminiminpenehn sapwellimen Siohwa aramas akan, ireo mahsanih me Sosep wia kaunen ehu pali nan wehio oh Suda wia kaunen pali teio. (Ese 37:15-26) En Opadaia kokohpo kasalehda me “kadaudok en Sosep kan” pahn iang kamwomwala “kadaudok en Esau kan” (Op 18, NW), oh en Sekaraia kokohpo kasalehda me Siohwa pahn ketin doarehla “kadaudok en Sosep kan.” (Sek 10:6, NW) Sosep me kileldi nin duwen ehu keinek en Israel en Koht, ahpw kaidehn Epraim.—Kau 7:8.
En Sosep eh kileldi nan Kaudiahl 7:8 kasalehda me en Seikop kokohp mwohn eh mehlao pahn pidada Israel en Koht. E kesempwal en tehk me “Koht Manaman en Seikop,” Siohwa Koht, ketikihda Krais Sises nin duwen Silepen Sihpw Mwahu me ketikihda sapwellime mour ong “sihpw kan.” (Soh 10:11-16) Krais Sises iei me pil ketin wia takain pwukakeimw en poahsoano me sapwellimen Koht tehnpas sarawi, me wiawihkihda irail me kisehn Israel en Koht, kin mi powe. (Ep 2:20-22; 1Pi 2:4-6) Oh Silepen Sihpw menet oh Takai wet kin ieiang Koht me Keieu Manamano.—Soh 1:1-3; Wi 7:56; Ipr 10:12; pil kilang Sen 49:24, 25.
SEPTEMBER 9-15
SOAHNG KESEMPWAL KAN SANG MAHSEN EN KOHT | MELKAHKA 82-84
Kalahnganki Pwais kan me Ke Ahneki
Sukuhlkihsang Menpihr en Pahnlahng kan
Mehn Serusalem kan kin wehwehki duwen menpihr me adaneki swallow, me kin kalapw wiahda pasarail kan pahnangin keimwen pwelengen ihmw kan. Ekei kin wiahda pasarail kan nan tehnpas sarawi me Solomon wiahda. Mwomwen me menpihr pwukat me kin wiahda pasarail kan nan tehnpaso nan ehuehu sounpar kin wiahki wasaht wasa sohte keper, wasa me re ke kak apwalihada mwahu neirail kisin menpihr kan.
Emen nein Kora pwutak ko me wiahda Melkahka 84. E kin papah ni tehnpas sarawio erein wihk ehu nan sounpwong weneu koaros oh e tehkada pahs pwukat nan tehnpaso. E men duwehte menpihr swallow me kin kousoante nan tehnpas en Siohwa. E koasoia: “Maing KAUN, Wasa Lapalap, ia uwen ei poakohng Tehnpasomwi Sarawio! Ia uwen ei anahne mi wasao! I ngoangkilahr iang mi nan Tehnpas en KAUN-O. Paliwereiet oh ngeni unsek kin kokoulki ei peren ong Koht ieias. Menpihr kan [“swallow,” NW] wiadahr pasarail loale, re pil diaradahr dewerail wasao; re ahpw kin neineitik limwahn sapwellimomwi pei sarawi kan, Maing KAUN, Wasa Lapalap, ei nanmwarki, oh ei Koht.” (Melkahka 84:1-3) Ia duwe, kitail oh neitail kan, kin kasalehda me kitail pil men oh kesempwalki kaukaule patehng mwomwohdisohn sapwellimen Koht aramas akan?—Melkahka 26:8, 12.
w08 7/15 30 par. 3-4
Kakairada Madamadau Toupahrek ong Dahme Kitail Kak Wia, oh Pereperenki
Mahla de soumwahu ele kak irehdi dahme kitail kak wia ni atail kin papah Siohwa. Ma kowe pahpa de nohno men, ele ke pahn medewe me ke sohte kin uhdahn paiekihda omw kin wia pein omw onop de iang towehda mihting en Kristian kan pwehki omw kin kihong pali laud en omw ahnsou oh kehl ong noumw seri kan. Eri ia duwe, pwehki omw kin nohn medemedewe omw soh itar kan, met sou kakete ireiukedihsang dahme ke kak kakete wia?
Sounpar kid kei samwalahr ako, ohlen Lipai men kasalehda me e men wia mehkot ehu me e sohte kak kapwaiada. E kin ahneki pwais kaselel en papah ni tehnpas sarawi wihk riau nan sounpar koaros. Ahpw e kasalehda me e inengieng ahneki pwais kaselel en kousoanla limwahn pei sarawio. (Mel. 84:1-3) Dahme sewese ohl lelepek menet en itarkihla dahme e ahneki? E tehkada me mehnda ma pil rahn ehute e mihmihki nan wasa kelpene nan tehnpaso, met wia pwais tohrohr ehu. (Mel. 84:4, 5, 10) Duwehte met, kitail en song kasawih oh kalahnganki soahng kan me kitail kak wia, ahpw kaidehn en medemedewehte atail soh itar akan.
Siohwa Omw Koht Kin Ketin Kesempwalkin Uhk!
12 Ma ke kohwahki soumwahu ehu, kamehlele me Siohwa ketin mwahngih omw irairo. Peki en ketin seweseiuk pwe ken kak kakairada madamadau pwung duwen omw irairo. Kowe eri rapahki nan Paipel ire kan me Siohwa ketikihda me pahn kansenamwahwihiukala. Medemedewe ire kan me kasalehda ia uwen Siohwa eh kin ketin kesempwalki sapwellime ladu kan. Ni omw wia met, ke pahn kilang me Siohwa kin ketin kadek ong koaros me kin papah ih ni lelepek.—Mel. 84:11.
Ire Kesempwal kan
it-1 816
Seri Sepwoupwou
Pwehki e kin mengei en manokehla duwen irail pwukat me kin pahtou oh sohte kak doare pein irail, Siohwa ketin doadoahngki mahsen wet “seri sepwoupwou” pwehn kawehwehda ni ahnsou me Israel kin lelepek de sapeik. Ni ahnsou me wehio kin ahneki nanpwungmwahu kehlail rehn Siohwa, seri sepwoupwouo kin epwel mwahu. Ahpw ni ahnsou me kopwung sapahrek tepida wiawi nan sahpwo, seri sepwoupwouo uhdahn sohla pahn epwel mwahu, oh met wia kilelepen me irair en wehio pahn susuwedla. (Me 82:3; 94:6; Ais 1:17, 23; Ser 7:5-7; 22:3; Ese 22:7; Sek 7:9-11; Mal 3:5) Siohwa kin ketin keriahla irail kan me kin kaloke seri sepwoupwou kan. (Deu 27:19; Ais 10:1, 2) Siohwa ketin kawehwehda pein ih nin duwen emen me kin ketin pwainirailda sapahlo (Lep 23:10, 11), me kin ketin sewese irail (Me 10:14), oh Semen (Me 68:5) me sepwoupwou kan. Iei Ih me kin ketin wia kopwung ong irail (Deu 10:17, 18), kin ketin kasalehiong irail kadek kalahngan (Os 14:3), kin ketin sewese irail (Me 146:9), oh mweidohng irail en momour.—Ser 49:11.
Ehu kilelepen Kristian mehlel kan iei en kin tehk irail akan me pahtoukihla mehlahn arail pwoud de pahpa nohno. Tohnpadahko Seims ntinglahng Kristian ko, nda: “Soangen kaudok me mwakelekel oh sohte samin mwohn silangin Samatail Koht iei met: en apwalih me sepwoupwou kan oh liohdi kan nan arail kahpwal, oh dehr saminkihla elen mour en sampah wet.”—Sei 1:27.
SEPTEMBER 16-22
SOAHNG KESEMPWAL KAN SANG MAHSEN EN KOHT | MELKAHKA 85-87
Kapakap Kin Sewese Kitail en Dadaurete
Ke Kin Kasalehda Sapwellimen Siohwa Lingan?
10 Ma kitail men kasalehda sapwellimen Koht lingan, kitail pil anahne “poadidiong kapakap ahnsou koaros.” (Rom 12:12) Kitail anahne kapakapki sapwellimen Siohwa sawas pwehn papah ih ni ahl ehu me e ketin kupwurki. Kitail kak peki sapwellime manaman, kakehlepen atail pwoson oh pil kehl en pelianda kasongosong kan. Kitail pil kak peki en ketin sewese kitail en wiahla sounpadahk en Paipel mwahu kan. (Mad. 6:13; Luk 11:13; 17:5; 2 Tim. 2:15) Kitail anahne likih sawas me Samatail Siohwa kin ketikihda duwehte seri men eh kin likih semeo. Ma kitail peki Siohwa en ketin sewese kitail en kamwahwihala atail kin papah ih, kitail kak likih me e kak ketin sewesei kitail. Kitail en dehr medewe me atail kapakap kan kakete kedirepwa Siohwa. Eri kitail en kapakap oh kapinga ih, kasalehiong kalahngan oh peki en kaweid kitail, ahpw mehlel ni atail mihla nan irair apwal akan. Kitail pil kak peki Siohwa en ketin sewese kitail en kalinganahla ih ni atail kin papah.—Mel. 86:12; Seims 1:5-7.
Ia Duwen Siohwa Eh Kin Ketin Sapengala Atail Kapakap kan
17 Wadek Melkahka 86:6, 7. Sounmelkahkao Depit uhdahn kamehlele me Siohwa kin ketin karonge oh sapengala eh kapakap kan. Ke pil kak kamehlele soahngohte. Mehn kahlemeng kan me kitail koasoiapene nan iren onop wet kamehlelehiong kitail me Siohwa kak ketikihong kitail erpit oh kehl me kitail anahne pwehn dadaur. E kak ketin doadoahngki riatail Kristian kan de pil irail kan me sohte kin kaudokiong ih met en sewese kitail.
18 Mendahki Siohwa sohte kin ketin ahnsou koaros sapengala atail kapakap kan ni ahl me kitail kasik, kitail ese me e pahn ketin sapengala. E pahn ketikihda dahme kitail anahne oh pil ni ahnsou me kitail anahne. Eri, kapakap oh kamehlele me Siohwa pahn ketin karongeiuk. Likih me Siohwa pahn ketin apwalihiuk ahnsou wet oh me e pahn ketin ‘kaitarala anahn akan koaros’ nan sampah kapwo me kohkohdo.—Mel. 145:16.
Ire Kesempwal kan
it-1 1058 par. 5
Mohngiong
Papah ni “Mohngiong Unsek.” Mohngiong en aramas kin anahne pwon pwehn kadoadoahk mwahu, ahpw ni karasaras, mohngiongitail kin kak tohrohrpeseng. Depit kapakap nda: “Komw ketin sewese ie I en lemmwiki mwaromwi ni mohngiong unsek,” me kasalehda me ahn aramas emen mohngiong kak tohrohrpeseng pwehki eh pepehm kan de soahng kan me e kin masak. (Me 86:11, NW) Soangen aramas menet kakete “sohte kin loalopwoat . . . ni unsek”—de arail kaudok ong Koht kin ekiste karakar. (Me 119:113, NW; Kau 3:16) Emen pil kak “liksansalmwahu” (de ni lokaiahn Ipru, ahneki mohngiong oh mohngiong), songosong en papah soumas riemen, de kin likamw nda ehu soahng ni eh kin medemedewe ehu soahng tohrohr. (1Kr 12:33; Me 12:2) Sises kin ketin uhdahn kalahdeki soangen aramas mwalaun oh liksansalmwahu duwehte met.—Md 15:7, 8.
SEPTEMBER 23-29
SOAHNG KESEMPWAL KAN SANG MAHSEN EN KOHT | MELKAHKA 88-89
Sapwellimen Siohwa Kaunda me Keieu Mwahu
Utung Sapwellimen Siohwa Pwuhng en Kaunda!
5 Medewehla pil ehu kahrepe me Siohwa ketin sapwellimanki pwuhng en kaunda. E kin ketin doadoahngki sapwellime manaman en kaunda ni ahl me uhdahn pahrek. E ketin mahsanihong kitail: “Ei limpoak me poatopoat, oh I kin wia dahme pwung oh mehlel. Ih mepwukat me I kin kupwurperenki. Ngehi, KAUN-O, me mahmahsen.” (Ser. 9:24) Siohwa sohte ketin anahne ahn aramas kosonned kan pwehn sewese ih pilada dahme pwung. Ahpw, e kin ketin koasoanehdi dahme pwung. Oh Siohwa ketikihong aramas akan kosonned kan me poahsoankihda pein sapwellime pwung pahrek me unsek. Sounmelkahkao nda: “Sapwellimomwi wehi poahsoankihda pwungen kosonned oh pwuhng pahrek.” Eri kosonned, kaweid oh ire mehlel kan, de pilipil kan koaros me pwilisang rehn Siohwa kin pwung. (Mel. 89:14; 19:8) Sehdan kose me Siohwa kin ketin kaunda ni ahl sapahrek. Ahpw, pein Sehdan sohte kak wahdo pwung pahrek nin sampah.
Utung Sapwellimen Siohwa Pwuhng en Kaunda!
10 Sapwellimen Siohwa kaunda sohte kin lemei. Irail kan me kin peikiong ih kin ahneki maiau oh peren. (2 Kor. 3:17) Depit patohwan ndahki Siohwa: “Lingan oh roson kin kapilpene; manaman oh peren kin kadirehla Tehnpese.” (1 Kron. 16:7, 27) Sounmelkahkao Edan ntingihedi: “Meid pai aramas akan me kin kokoul kaudokiong komwi, me kin momour nan marain en sapwellimomwi kadek. Pwehki komwi re kin pereperen sang nimenseng lel nipwong, oh kapikapinga sapwellimomwi kalahngan lapalap.”—Mel. 89:15, 16.
11 Ni atail kalaudehla atail kin doudouloale sapwellimen Siohwa kupwuramwahu, e pahn pil kalaudehla atail kamehlele me sapwellime kaunda iei me keieu mwahu. Kitail ahneki soangen pepehmohte me sounmelkahkao ahneki ni eh patohwanohng Koht: “Rahnteieu nan Tehnpasomwi Sarawio mwahusang rahn kid wasa teikan.” (Mel. 84:10) Siohwa ketin kapikada kitail, eri e mwahngih dahme uhdahn pahn kaperenda kitail. Ni kadek, e kin ketikihong kitail laudsang dahme kitail anahne. Soahng koaros me Siohwa ketin mahsanihong kitail en wia kin wia kamwahupatail. Mehnda ma kitail anahne wiahda tounmetei kan, kitail pahn ahnsou koaros peren ma kitail peikiong Siohwa.—Wadek Aiseia 48:17.
Ahneki Pwoson Kehlail me Wehio Pahn Kapwaiada Kupwuren Koht
14 Siohwa ketin wiahda inou ehu ong Nanmwarki Depit en Israel en mahs. Inou wet adaneki inou en Depit. (Wadek 2 Samuel 7:12, 16.) Siohwa ketin inoukihda me Mesaiao pahn ketin wia emen kadaudoken Depit. (Luk 1:30-33) Ni ahl wet, Siohwa ketin kasalehda ni oaritik duwen peneinei me Mesaiao pahn ketidohsang ie. Siohwa ketin mahsanih me “nanmwarki kapw men pahn pwarada sang ni kadaudok en Nanmwarki Depit” pwehn wia Nanmwarki en Wehin Mesaiao. (Ais. 11:1) Kaundahn Depit sohte pahn imwisekla pwehki Sises, me wia kadaudoken Depit, “pahn kin poatopoat ahnsou koaros . . . erein ketipin eh pahn kin dakedaker wasa.” (Mel. 89:34-37) Kitail kak uhdahn kamehlele me kaundahn Mesaiao sohte pahn suwedla oh me kapai kan me kohsang kaunda wet pahn mihmi kohkohlahte.
Ire Kesempwal kan
cl 281 par. 4-5
“Komwi Kelehpw me Loalopwoat”
4 Nan Palien Paipel ni Lokaiahn Ipru, “loalopwoat” kin kadoadoahk nin duwen kadek me pahn ni limpoak ehuiong oh patehng mehkot ehu lao mehn akadeio pweida. E kin laudsang en ihte kasalehda lelepek. Pwe aramas emen kakete lelepek pwehki e pehm me e anahne wia met. Weksang met, loalopwoat kin poahsoankihda limpoak. Eri lepin lokaia “lelepek” pil kin kadoadoahkohng soahng kan me sohte momour. Karasepe, sounmelkahkao ndahki maramo me “eh kin pwarada pahnlahng ahnsou koaros [ni lokaiahn Ipru “lelepek”]” pwehki eh kin pwarada pahnlahng pwohng koaros. (Mel. 89:37, NW) Ahpw kitail sohte kak nda me maramo kin loalopwoat. Dahme kahrehda? Pwehki loalopwoat kin poasoahnkihda limpoak—mehkot me soahng kan me sohte momour sohte kak kasalehda.
5 Nan Paipel, aramas emen me kin loalopwoat pil kin ahneki pepehm en limpoak. En kapwarehda loalopwoat kin kasalehda me mie nanpwungmwahu rehn aramas me kapwarehda irair wet oh me e kasalehiongo. Soangen loalopwoat wet sohte kin wekiwekseli. E sohte duwehte ilok en nansed kan me kin pwungupwungudekseli pwehki kisiniengo eh kin wekiwekidekseli. Ahpw weksang met, loalopwoat, de limpoak loalopwoat, kin sewese aramas emen en tengeteng oh kehlail pwehn kak powehdi kahpwal laud kan.
SEPTEMBER 30–OCTOBER 6
SOAHNG KESEMPWAL KAN SANG MAHSEN EN KOHT | MELKAHKA 90-91
Pwehn Kareireila Omw Mour, Likih Siohwa
Roporop Ong Mour Werei
Saintis tohto kin koasoia me mendahki mie wini tohto en katokehdi mahla, aramas akan sohte pahn kak momour wereisang uwen sounpar me re kak lel rahnpwukat. Mehlel, mour werei en aramas kin ekisekis mwamwahula sangete pahr 1800 samwa kohdo. Ahpw met kohsang arail mour mwakelekel, mie wini me irehdihsang aramas akan ren soumwahuda oh wini teikan me kin kamwahwihala soumwahu tohto. Ekei semen en palien genes kin kamehlele me mour werei en aramas kakete lelehr ni uwen sounpar me aramas kak mourki.
Mpen sounpar 3,500 samwalahro, sounnting en Paipel Moses pohnese me: “Sounpar 70, ihte werein at mour—a ma se kehlail, e pahn lel 80; ahpw pahr pwukat kin kahrehiong kiht pwunodte oh apwal; mour kin mwadang imwisekla, oh se solahr mie.” (Melkahka 90:10) Mendahki aramas nannantihong kareireila uwen reirei en atail mour, mour kin duduwehte nin duwen me Moses kawehwehda.
Pwehn kapahrekihong mour mwotomwot en aramas, ekei kepikipik kan me duwehte menihke lidik weitahta de soangen menihke ehu me duwehte kopil (quahog) kin momourki daulih sounpar 200, oh tuhke kan me duwehte lapalahn tuhke me adaneki sequoia kin kak momourki sounpar kid kei. Eri, ni atail kin kapahrekihong uwen reirei en atail mour ong soahng pwukat oh soahng momour teikan, kitail sou pahn medewe, ‘Ihte uwen reirei en mour sounpar 70 de 80?’
Ia Eden Koht?
Aramas tohto kin medemedewe duwen peidek wet. Mwein kowe pil. Mwein kitail kin idek: Ma lahng oh sampah oh audepera kan koaros mie sounkapikparail, a ia wasa Koht ketisang ie?
Saintis kan kin pwungki me mie tepin audepen lahng oh sampah. Tepin iren Paipel kin pwungiong met ni eh mahsanih: “Nin tapio, Koht ketin kapikada lahng oh sampah.”—Senesis 1:1, NW.
Lahng sohte kak kapikada pein ih; e sohte kak pein pwarada. Mehkot me sohte mie sohte kak wiahda mehkot me mie. Ma mehkot sohte mie mwohn lahng eh tepida, e sohte pahn mie lahng rahnwet. Mehnda ma e apwal ong kitail en uhdahn wehwehki, ahpw mehkot me kin mie ahnsou koaros oh me sohte wia kisehn lahng me pahn kahrehiong lahng en miehla. Siohwa Koht, ngehn emen me sapwellimanki kehl oh erpit me sohte irepe, iei me Tepin Kahrehda.—Sohn 4:24.
Paipel mahsanihki duwen Koht: “Mwohn nahna kan ar wiawihda, mwohn omwi ketin kapikada sampah, komwi Koht poatopoat emen, oh pahn wia Koht kohkohlahte.” (Melkahka 90:2) Ihme kahrehda, Koht ketin mieier ahnsou koaros. Eri, “nin tapio,” e ketin kapikada lahng oh sampah.—Kaudiahl 4:11.
Ia Duwen Limpoak Eh Sewese Kitail en Powehdi Masak
16 Sehdan ese me kitail kin kesempwalki atail mour. Oh e nda me kitail pahn pil kesehla atail nanpwungmwahu rehn Siohwa pwe kitail en kak momour. (Sohp 2:4, 5) Ahpw Sehdan sapwung! Pwehki ih me kin “kahrehda mehla,” Sehdan kin song en doadoahngki atail masak mehla pwehn kahrehiong kitail en kesehla Siohwa. (Ipru 2:14, 15) Ekei pak, irail kan me Sehdan kin doadoahngki kin nda me re pahn kemeikitailla ma kitail sohte kesehla atail pwoson. De ekei pak, Sehdan kin kilang me kitail lelohng irair ehu me kitail kereniong mehla oh kin doadoahngki ahnsowo pwehn kahrehiong kitail en wiahda pilipil sapwung. Toahkte kan de atail peneinei kan me kaidehn Sounkadehde, ele pahn kasonge kitail en ale doken nta me kin kauwehla sapwellimen Koht kosonned. De emen kakete song en kangoange kitail en ale soangen wiepen wini ehu me uhwong kaweid en Paipel.
17 Mendahki kitail sohte men mehla, kitail ese me Siohwa sohte pahn ketin uhdihsang poakohng kitail. (Wadek Rom 8:37-39.) Ni kompoakepahn Siohwa kan ar kin mehla, e kin ketin tamataman irail, duwehte me re momourte. (Luk 20:37, 38) E ketin kupwurki kaiasirailda. (Sohp 14:15) Siohwa ketin pwainla pweipwei laud ehu pwe kitail “en ahneki mour soutuk.” (Sohn 3:16) Kitail ese ia uwen Siohwa eh ketin poakohng oh nsenohkin kitail. Eri kitail en dehr kesehla Siohwa ni ahnsou me kitail soumwahu de kereniong mehla, ahpw kitail en likih me e pahn ketin kansenamwahwihkitailla, ketikihong kitail erpit, oh kehl. Ih met me Valérie oh eh pwoudo wia.—Mel. 41:3.
Ire Kesempwal kan
Mie Tohnleng Men me Wia Sounperepomw?
Paipel sohte kin padahngki me emenemen aramas kin mie tohnleng men me kin wia sounpereparail. Mehlel me mie pak Sises mahsanih: “Kumwail kaleke pwe kumwail dehr mwamwahliki emen me tikitik pwukat [nein Krais tohnpadahk kan]. Kumwail en ese pwe arail tohnleng kin aririh Semei me ketiket nanleng ahnsou koaros.” (Madiu 18:10) Ahpw, Sises sohte mahsanih me kin mie tohnleng me kin wia sounperepen emenemen aramas. E mahsanih me tohnleng kan kin nsenohki emenemen sapwellime tohnpadahk kan. Ihme kahrehda tohnkaudok mehlel kan sohte kin wia mwekid soaloalokong oh keper kan, oh medewe me sapwellimen Koht tohnleng kan pahn pere irail.
Met wehwehki me tohnleng kan sohte kin sewese aramas akan? Soh. (Melkahka 91:11) Ekei kin uhdahn kamehlele me Koht ketin doadoahngki tohnleng kan pwehn pere irail oh kihong irail kaweid. Kenneth, me pwarada nan tepin ire wet, iei emen me kin kamehlele duwen met. Ohlo kakete pwung, ahpw kitail sohte kak akupwungki me met pwung. Sounkadehdehn Siohwa kan kin kalapw kilang mehn kadehde me tohnleng kan kin sewese irail ni arail kin wia doadoahk en kalohk. Ahpw, pwehki tohnleng kan ar sohte sansal, kitail sohte kak nda ia uwen Koht eh kin ketin doadoahngki irail pwehn sewese emenemen aramas nan soangsoangen irair kan. Ahpw, e konehng kitail en kalahngankihong Wasa Lapalahpie soangen sawas koaros me e kin ketikihda.—Kolose 3:15; Seims 1:17, 18.
OCTOBER 7-13
SOAHNG KESEMPWAL KAN SANG MAHSEN EN KOHT | MELKAHKA 92-95
Papah Siohwa Iei Elen Mour me Keieu Mwahu!
Me Pwulopwul kan, Kumwail Kin Medemedewehte Mehn Akadei kan me Pid Papah Koht?
5 Kahrepe me keieu kesempwal en wiahda mehn akadei me pid papah Koht iei en kalahngankihong Siohwa sapwellime limpoak oh dahme e ketin wiadahr ong kitail. Emen sounnting en Melkahka nda: “Maing KAUN, ia uwen mwahu en ei kin patohwan wia ei kapingkalahngan ong komwi . . . wiepen nin limomwi manaman akan kin kansenamwahwihiehla; pwehki sapwellimomwi wiewia kan, I patohwan koulki ei peren.” (Mel. 92:1, 4) Medewehla soahng koaros me Siohwa ketikihong uhk. E ketikihong omw mour, omw pwoson, Paipel, mwomwohdiso, oh koapworopwor kaselel en mour kohkohlahte nan Paradais. Ni omw wiahda mehn akadei kan me pid papah Koht, ke kin kasalehiong Siohwa me ke kin kalahnganki soahng pwukat koaros oh met kin kakerenihiukala reh.
Ihs me Kin Kamwakid Omw Madamadau?
8 Duwehte pahpa nohno mwahu men, Siohwa kin ketin kupwurki sapwellime seri kan en ahneki mour me keieu nsenamwahu. (Ais. 48:17, 18) Eri e ketin padahkihong kitail kaweid oh ire mehlel mengei kan duwen tiahk mwahu oh ia pahn mwomwen atail wiewia ong meteikan. E ketin luke kitail en sukuhlki en kilangwohng soahng kan ni ahl me e kin ketin wia oh en mour pahrekiong sapwellime koasoandi kan. Met sohte wia mehkot me nohn kakos. Ahpw, e kin sewese kitail en medewe soahng kan ni ahl me pwung. (Mel. 92:5; Lep. Pad. 2:1-5; Ais. 55:9) Ma kitail wia met, kitail kak pilada dahme kitail mwahuki oh pil wiahda pilipil kan me pwung, me pahn kahrehiong kitail en nsenamwahu. (Mel. 1:2, 3) Ni atail kin ahneki sapwellimen Siohwa madamadau, e pahn wia kamwahupatail ni ahl tohto!
Siohwa Omw Koht Kin Ketin Kesempwalkin Uhk!
18 Ni atail kin mahla, kitail kak kamehlele me mihete doadoahk me Siohwa ketin kupwurki kitail en wia. (Mel. 92:12-15) Sises ketin padahkihong kitail me sohte lipilipil ia uwen tikitik en atail koahiek de ma kitail medewe me atail nanti sohte itar, Siohwa kin ketin kesempwalki soahng koaros me kitail kak wia nan sapwellime doadoahk. (Luk 21:2-4) Eri medemedewehte dahme ke kak wia. Karasepe, ke kak koasoiaiong meteikan duwen Siohwa, kapakapki riomw Kristian kan, oh kangoange meteikan en kolokolete arail lelepek. Siohwa ketin wiahkin uhk ienge tohndoadoahk, kaidehn pwehki dahme ke kak wiahda, ahpw pwehki omw kin perenki peikiong ih.—1 Kor. 3:5-9.
Ire Kesempwal kan
cl 176 par. 18
“Ia Uwen Loalen Sapwellime Erpit!”
18 Tehk ia duwen Pohl eh kasalehda uwen laud en sapwellimen Koht erpit ni eh nda: “Ia uwen laud en sapwellimen Koht kapai kan! Ia uwen loalen sapwellime erpit oh kupwurokong! Ihs me kak kawehwehda sapwellime koasoandi kan? Ihs me kak wehwehki sapwellime wiewia kan?” (Rom 11:33) Ni Pohl eh tepte nda “Ia uwen” nan iretikitiko, e kasalehda pepehm kehlail nan irair wet, ahpw mehlel pepehm en pwuriamweikihla ni wahu. Lepin lokaiahn Krihso me e pilada me wehwehki “loal” kereniong duwehte lepin lokaiao me wehwehki “pwoahr loal soh kapi.” Kahrehda kitail kak medewehla mwahu uhdahn wehwehn lepin lokaia kan me e doadoahngki. Ni atail kin medewehla duwen sapwellimen Siohwa erpit, e duwehte me kitail kilikilangdihla nan pwoar loal ehu me uwen eh loal oh kalaimwun, kahrehda kitail sohte kak wehwehki de pil kilelehdi de sohngedi ni oaritik. (Melkahka 92:5) Met sou kin kahrehiong kitail en aktikitikla?
OCTOBER 14-20
SOAHNG KESEMPWAL KAN SANG MAHSEN EN KOHT | MELKAHKA 96-99
‘Lohkiseli Rongamwahu’!
Dahkot Rongamwahwo?
KRISTIAN akan anahne kalohki “rongamwahu en Wehin Koht” sang ni arail pahn kin padahkihong meteikan duwen rongamwahwo oh kawehwehiong irail me Wehio iei koperment ehu me pahn kaunda sampah ni pwung ni ahnsou kohkohdo. Ahnsowohte, Paipel pil kin doadoahngki lepin lokaia wet “rongamwahu” ni soangen ahl teikan. Karasepe, kitail pahn kilang me ekei wasa nan Paipel kin koasoia “rongamwahun sapwellime komour” (Melkahka 96:2); “Rongamwahu wet sang rehn Koht” (Rom 15:16); oh “Rongamwahu duwen Sises Krais.”—Mark 1:1.
Rongamwahwo kin pid padahk mehlel koaros me Sises ketin padahngki oh sapwellime tohnpadahk ko ntingihedi. Mwohn eh ketidahla nanleng, Sises mahsanihong sapwellime tohnpadahk ko: “Kumwail eri kohwei wasa koaros oh padahkihong tohn wehi kan koaros; pwe re en wiahla nei tohnpadahk: papidaisihirailla ni mwaren Sahm oh Sapwellime oh Ngehn Sarawi [“sapwellimen Koht manaman,” NW], oh kehkehlingkihong irail re en peikiong mehkoaros me I koasoanediong kumwail.” (Madiu 28:19, 20) Eri doadoahk en Kristian mehlel akan kaidehn ihte en kaesehki meteikan kan duwen Wehio ahpw ren pil nantihong pwe meteikan en pil iang wiahla tohnpadahk.
Dahme Pahn Wiawi ni Rahnen Kadeiko?
Nin duwen eh sansal nan kilel me mi pali koahiek, aramas tohto kin medewe me ni Rahnen Kadeiko, aramas lik kei pahn wisikdohng mwohn mwoalen Koht oh ale kadeik pwehki arail wiewia kan en mahs, ekei pahn ale ketingparail en mour nanleng a ekei pahn ale kalokolok nan kisiniei. Ahpw Paipel kasalehda me kahrepen Rahnen Kadeiko iei en kapitasang aramas akan koasoandi sapwung. (Melkahka 96:13) Koht ketin idihada Sises pwehn wia Sounkopwung me pahn kapwurehdo pwung pahrek ong aramas.—Wadek Aiseia 11:1-5; Wiewia 17:31.
Popohl Erein Pahr Kid oh Kohkohlahte!
18 Meleilei me mi nanpwungarail ohla ahnsou me Sehdan kahrehda aramas en pelianda Siohwa. Ahpw sang nan pahr 1914, Wehin Koht kin ekisekis wia soahng kan pwehn kapwurehdo meleilei oh minimin wet. (Ep. 1:9, 10) Erein Kaundahn Pahr Kido, soahng kaselel kan me “sohte sansal” pwehki e saikinte wiawi, pahn uhdahn pweida. Mwuri, “ni imwio,” me wehwehki imwin Kaundahn Krais Pahr Kido, pahn leledo. Dahme pahn wiawi ahnsowo? Mendahki Sises sapwellimankihdier “manaman koaros” nanleng oh nin sampah, e sohte kupwurki pahrekiong Siohwa. Ni karakarahk e “patohwanohng eh Koht oh Semeo wehio.” E pahn ketin doadoahngki eh pwukoa oh manaman tohrohr “ong ni kalinganpen Koht Sahm.”—Mad. 28:18; Pil. 2:9-11.
19 Ni ahnsowo, koaros me mi sampah pahn kaundahn Wehio pahn unsekla. Irail pahn idawehn sapwellimen Sises mehn kahlemeng. Oh pwehki irail aktikitik, irail pahn perenki pohnese sapwellimen Siohwa pwuhng en kaunirailda. Irail pahn pitsang kaimwiseklahn kasongosong ma re kasalehda me re men Siohwa en ketin kaunirailda. (Kaud. 20:7-10) Mwurin met, koaros me kin uhwong, mehnda ma tohnleng de aramas, pahn kasohrala soutuk. Ia uwen kaperen en ahnsowo! Koaros nan sapwellimen Siohwa peneinei nanleng oh sampah pahn kapinga ih. Oh Siohwa pahn “ketin kakaun mehkoaruhsie.”—Wadek Melkahka 99:1-3.
Ire Kesempwal kan
it-2 994
Koul
Ire kan me kin koasoia “koul kapw” pwoat sohte kin mihte nan Melkahka kan, ahpw e pil kin mie nan pwuhk kan me Aiseia oh wahnpoaron Sohn ntingihedi. (Me 33:3; 40:3; 96:1; 98:1; 144:9; 149:1; Ais 42:10; Kau 5:9; 14:3) Ma kitail pahn tehk iretikitik kan mwohn de mwurin iren Paipel kan me doadoahngki me doadoahngki lepin lokaia ko “koul kapw,” kitail pahn kilang me mie me kin koulki soangen koul wet pwehki irair kapw ehu me wiawi pwe Siohwa en ketin doadoahngki sapwellime pwuhng en kaunda. Nan Melkahka 96:10, NW, sounmelkahkao lohkihda ni peren: “Siohwa ketin wialahr Nanmwarki.” “Koul kapw” wet kin mwomwen koasoakoasoia duwen soahng kapw kan me wiawi ni Siohwa eh ketin doadoahngki sapwellime pwuhng en kaunda, iangahki dahme soahng pwukat pahn wiahiong nanleng oh sampah.—Me 96:11-13; 98:9; Ais 42:10, 13.
OCTOBER 21-27
SOAHNG KESEMPWAL KAN SANG MAHSEN EN KOHT | MELKAHKA 100-102
Kalahngankihong Siohwa Sapwellime Limpoak Loalopwoat
Ia Duwen Omw Pahn Kaunopadahng Papidaisla?
18 Omw limpoak ong Siohwa iei irair kaselel ehu, irair me keieu mwahu me ke ahneki. (Wadek Lepin Padahk 3:3-6.) Limpoak laud ong Koht kak seweseiuk en pweida ni omw lelohng kahpwal kan. Paipel kin kalapw kasalehda sapwellimen Siohwa limpoak loalopwoat ong sapwellime ladu lelepek kan. Sapwellime limpoak loalopwoat kin wehwehki me e soh mwahn pahn ketin likidmeliehla sapwellime ladu kan de sohla poakohng irail. (Mel. 100:5) Ke wiawihda rasehng Koht. (Sen. 1:26) Eri ia duwen omw kak kasalehda soangen limpoak wet?
19 Tepikihda omw kalahngan. (1 Des. 5:18) Pein idek rehmw ehuehu rahn, ‘Ia duwen Siohwa eh ketin kasalehiong ie limpoak?’ Mwuri tehk mwahu me ken kalahngankihong Siohwa nan omw kapakap oh koasoia soahng kan me e ketin wiadahr ong uhk. Pohnese me Siohwa ketin wiahiong uhk soahng mwahu kan pwehki e ketin poakohng uhk, duwehte wahnpoaron Pohl eh wehwehkihda duwen Siohwa. (Wadek Kalesia 2:20.) Pein idek rehmw: ‘I pil men kasalehiong ih ei limpoak?’ Limpoak ong Siohwa pahn seweseiuk en pousehlahte pelianda kasongosong kan oh seweseiuk en pweida ni omw lelohng kahpwal kan. E pahn kamwakid uhk en pousehlahte kaudokiong Siohwa oh kasalehiong Semomwo me ke poakohng ih rahn koaros.
“Kumwail Loalokongla oh Mwasamwasahn!”
10 Ekei soahng keper kan me kitail anahne soikala kin iangahki kala ong meteikan, sakau laud, mwenge laud, nda lokaia kamedek, oh pil kilang mwadong lemei kan, kilel de kasdo suwed, oh soahng kan me duwehte mepwukat. (Mel. 101:3) Atail imwintihtio Tepil kin raparapahki ahnsou mwahu en kauwehla atail nanpwungmwahu rehn Siohwa. (1 Pit. 5:8) Ma kitail sohte kanahieng, Sehdan kak padokedi nan atail madamadau oh mohngiong wahn peirin, likamw, noahrok, kailok, aklapalap, oh lingeringer. (Kal. 5:19-21) Nin tapio, madamadau pwukat ele sohte nohn kehlail. Ahpw ma kitail sohte mwadangete wia uwen atail kak koaros pwehn kihsang, re pahn pousehlahte kekeirda duwehte tuhke pwoisin ehu oh kahrehda kahpwal.—Seims 1:14, 15.
Ke Pahn Kapwaiada Sapwellimen Siohwa Kehkehlik kan?
7 Dahme kitail anahne wia pwe kitail en dehr patehng sounpadahk likamw akan? Kitail sohte pahn kin koasoiong de lukeiraildohng nan imwatail. Kitail pil sohte pahn kin wadek neirail pwuhk kan, kilang arail kasdo kan, wadek dahme re kin ntingihada nan Internet oh sapeng. Dahme kahrehda kitail kin koasoanehdi teng en dehr patehng irail? Keieu, pwehki atail limpoak ong “Koht me loalopwoat oh mehlel.” Kahrehda kitail sohte men rong padahk likamw akan me kin uhwong padahk mehlel en Mahsen en Koht. (Deud. 32:4; Sohn 17:17) Kitail pil kin poakohng pwihn me Siohwa kin ketin doadoahngki pwe en padahkihong kitail padahk me inenen mehlel oh kaselel. Sapwellimen Siohwa pwihn me kin padahkihong kitail duwen mware oh ia wehwe, kupwure ong sampah, dahme kin wiawihong kitail ni ahnsou me kitail mehla, oh koapworopwor en kaiasada. Ke tamataman ia uwen omw perenkihda ni omw tepin sukuhlki duwen mepwukat oh pil padahk mehlel teikan? Eri ke dehr mweidohng padahk en sounpadahk likamw akan en kahrehiong uhk ken uhwongala pwihn me kin padahkihong uhk padahk mehlel pwukat.—Sohn 6:66-69.
8 Sohte lipilipil dahme sounpadahk likamw akan kin nda, ke dehr idawehn irail! Sohte kahrepen atail rong aramas akan me rasehng pwarer me sohte pile. Irail akan me kin rong irail pahn nsensuwedla. Kitail kin koasoanehdi teng en loalopwoatohng Siohwa oh sapwellime pwihn. Pwihn wet sohte kin kansensuwedihkitailla oh ahnsou koaros re kin kihong kitail diren padahk mehlel sang Mahsen en Koht me rasehng pihl mwakelekel.—Ais. 55:1-3; Mad. 24:45-47.
Ire Kesempwal kan
it-2 596
Pelikan
Ni ahnsou me pelikan men kin medkihla mwenge, e kin kalapw pihrla wasa ehu me e kin kelehpwla, wasa me e kin mwomwen pahtou oh moangeo kin idengek pohn pwopwe ko. E sohte kin mwekid, kahrehda ma emen kilang ih sang wasa doh, e pahn mwomwen me ih takai pwetepwet ehu. Menpihro kin mi ni soangen mwohmw wet erein awa tohto, kahrehda e duwehte soangen mwomwen pahtou me sounmelkahkao koasoakoasoia ni eh karasahda uwen laud en eh nsensuwed ni eh ntingihedi: “I duwehte pelikan men nan sapwtehn.” (Me 102:6, NW) “Sapwtehn” wasaht sohte wehwehki sapwtehn ehu, ahpw e wiahte wasa ehu me dohsang aramas, mwein lehpwel ehu met. Nan ekei ahnsou, lehpwel kan me mi paliepeng en Wahun Sordan kin wiahte wasa kan me pelikan kan kin mi ie. Mie soangen pelikan siluh me dierek nan Israel. Me kin keieu dierek nan sahpwo iei pelikan pwetepwet en palimese (Pelecanus onocrotalus); oh soangen pelikan me adaneki Dalmatian (Pelecanus crispus) oh pelikan me tihnsewe poh mpwulapwul (Pelecanus rufescens) sohte kin kalapw dierek wasao.
Pelikan kan kin keieu mwahuki wasa kan me sohte me kin koadoahki, wasa me aramas sohte kin kedirepwe irail. Ih wasa pwukat me irail kin wiahda pasarail kan oh apwalihada wahrail kan oh pil kommoal mwurin arail kin laid. Pwehki arail kin mwahuki wasa me irail en kelehpwla ie oh dohsang aramas, Paipel kin doadoahngki mahn pwukat pwehn karasahda wasa ehu me uhdahn tehnla. Pwehn karasahda en Edom pahn tehnla, Aiseia kohpada me pelikan kan pahn sapwenikihla sahpwo. (Ais 34:11) Sepanaia kohpada me pelikan kan pahn kousoanla pohn kadoken uhr kan en Ninipe, oh met kasalehda me sahpwo pahn uhdahn ohla oh tehnla mehlel.—Sep 2:13, 14.
OCTOBER 28–NOVEMBER 3
SOAHNG KESEMPWAL KAN SANG MAHSEN EN KOHT | MELKAHKA 103-104
E Ketin Tamataman “me Kitail Uhdahn Pwehl”
Kahlemengih Siohwa—En Madamadau Toupahrek
5 Sapwellimen Siohwa aktikitik oh poakehla meteikan kin kamwakid en ketin madamadau toupahrek. Karasepe, Siohwa ketin kasalehda ia uwen eh aktikitik ni ahnsou me e pahn kereniong ketin kasohrehla aramas suwed kan nan Sodom. Ni eh ketin doadoahngki sapwellime tohnleng kan, Siohwa mahsanihong ohl lelepeko Lohd en tangala ni nahna kan. Lohd masak kohla wasao. Eri e peki me ih oh eh peneineio en kohla Soar, kisin kahnimw ehu me Siohwa ketin pilada en kasohrehla. Siohwa kakete ketin idingkihong Lohd en idawehnte dahme E mahsanihong. Ahpw e ketin mweidohng Lohd en kohla Soar, oh E sohte kasohrehla kahnimwo. (Sen. 19:18-22) Sounpar epwiki kei mwuhr, Siohwa ketin poakehla mehn Ninipe kan. E ketin kadarala soukohp Sona Ninipe pwehn padahkihong aramas suwed ko me irail oh arail kahnimwo pahn kasohrala. Ahpw ni ahnsou me mehn Ninipe ko koluhla, Siohwa ketin poakeirailla oh sohte kasohrehla kahnimwo.—Sona 3:1, 10; 4:10,11.
Koapworopworki Siohwa, Duwehte Samson
16 Mendahki Samson lelohng imwila suwed pwehki sapwung me e wiahda, e sohte uhdihsang eh songosong en wia kupwuren Siohwa. Ma kitail pil wiahda sapwung ehu oh anahne peneu de kitail luhssang pwais kaselel ehu, kitail en dehr uhdi papah Siohwa. Tamataman me Siohwa kin ketin kupwurki mahkohng kitail. (Mel. 103:8-10) Mendahki atail sapwung kan, Siohwa kak ketin doadoahngkihte kitail, duwehte eh ketin doadoahngki Samson.
17 Medewehla mehn kahlemeng en brother pwulopwul men me adaneki Michael. E kin soupisek nan eh papah Siohwa. E papah nin duwen sounsawas men oh pil pioneer. Ahpw, e wiahda sapwung ehu me kahrehda e sohla ahneki pwukoa nan mwomwohdiso. E koasoia: “Mwohn ahnsowo, I kin uhdahn soupisek nan ei papah Siohwa. Ahpw mwuhr, I wiahkinteieu pehm me I solahr kak wia mehkot nan sapwellimen Siohwa doadoahk. I sohte leme me Siohwa pahn ketin likidmeliehla, ahpw I kin medewe ma ei nanpwungmwahu reh pahn pwurehng duwehte mwoweo de ma I pahn kak pwurehng papah ih nan mwomwohdiso duwehte me I kin wia mwoweo.”
18 E mwahu me Michael sohte uhdihsang papah Siohwa. E doula koasoia: “I kin doadoahk laud en pwurehng kamwahwihala ei nanpwungmwahu rehn Siohwa sang ni ei kin kaukaule kapakapohng ih, wia ei onop oh doudouloale.” Kohkohlao, Michael pwurehng alehdi eh pwukoa kan nan mwomwohdiso. Met e kin papah nin duwen elder oh pioneer men. E koasoia: “Utuht oh kangoang me I alehdi, ahpw mehlel sang elder kan, sewese ie en ese me Siohwa ketin poakepoakeiehte. Pwehki ei nsen mwakelekel, I kak pwurehng papah nan mwomwohdiso. Dahme wiawihong ie padahkihong ie me Siohwa pahn ketin mahkohng emen sohte lipilipil me uhdahn koluhla mehlel.” Kitail kak kamehlele me Siohwa pahn ketin doadoahngki kitail oh kapaikitailda mehnda ma kitail wiahda sapwung kan, ma kitail kin wia uwen atail kak en kapwungala atail wiewia kan oh pousehlahte koapworopworki ih.—Mel. 86:5; Lep. Pad. 28:13.
Ke Kak Lel Omw Mehn Akadei kan
2 Ma mie omw mehn akadei ehu me ke saikinte lel, dehr mworusala. Pwehn lel mehn akadei tikitik ehu, met pil kin anahne ahnsou oh doadoahk laud. Pwehki ke kin men kapwaiadahte omw mehn akadeio, met kasalehda me ke kin kesempwalki omw nanpwungmwahu rehn Siohwa oh men patohwanohng ih dahme keieu mwahu. Siohwa kin ketin kesempwalki omw nannanti. Ni mehlel, e sohte kin ketin kasik laudsang dahme ke kak patohwanohng ih. (Mel. 103:14; Maika 6:8) Eri ni omw pilada mehn akadei ehu, tehk mwahu me ke pahn kak kapwaiada. Mwurin omw pilada mehn akadei ehu, dahme ke kak wia pwehn lel mehn akadeio? Kitail pahn koasoiapene ekei sawas kan.
Ire Kesempwal kan
cl 55 par. 18
Manaman en Kapikipik—“Sounwiepen Nanleng oh Sampah”
18 Dahme kitail sukuhlkihsang mwomwen Siohwa eh ketin doadoahngki sapwellime manaman en kapikipik? Kitail kin pwuriamweikihla soangsoangen tohtohn kepikipik kan. Sounmelkahka men koasoia: “Maing [Siohwa], ia uwen tohtohn wiepen nin limomwi kan! . . . Sampah inenen direkihla wiepen nin limomwi kan.” (Me 104:24) Met uhdahn mehlel! Saintis kan me kin ropada duwen soahng momour kan (Biologist) diaradahr soangsoangen mahn, menpihr oh mwahmw rar kei nin sampah; ahpw arail madamadau kin wekpeseng ong ia uwen tohtohn me saikinte dierekda. Aramas me kin samanih wiahda soahng kan ele kin ekei pak sohla kak medewehda dahme re pahn wiahda. Weksang met, sapwellimen Siohwa manaman en kapikada soahng kan oh pil soahng kapw kan me wekpeseng—kin uhdahn sansal me sohte imwi.