Iren Sawas kan ong Doaropwehn Kasukuhl ong Mihting en Mour oh Kalohk
© 2025 Watch Tower Bible and Tract Society of Pennsylvania
MAY 5-11
SOAHNG KESEMPWAL KAN SANG MAHSEN EN KOHT | LEPIN PADAHK 12
Mie Ketingpen Doadoahk Laud
Irair Kaselel Ehu me Kesempwalsang Daimon kan
Ele e uhdahn apwal ong ekei sapwellimen Siohwa ladu kan ren koadoahkihada mwohni me itar ong arail anahn kan. Re sohte kin song en rapahki ahl mengei de mwersuwed en wia met, ahpw re kin pwerisek oh doadoahk laud. Ni arail wia met, re kin kasalehda me ong irail, sapwellimen Koht irair kaselel kan, iangahki en kin mehlel, kin kesempwalsang kepwe koaros.—Lep. Pad. 12:24; Ep. 4:28.
Ia Duwen Omw Pahn Perenki Omw Doadoahk Laud?
E uhdahn mwahu en medemedewe duwen peidek keieu mwuhro pwehki ke kin keieu perenki omw doadoahk ni omw kilang meteikan ar paiekihda. Pein Sises mahsanih: “Kihwei kaperen sang ale.” (Wiewia 20:35) Me kin paiekihda atail doadoahk iei atail kaun kan oh pil irail kan me kin pwain atail sahpis de dipwisou kan. Ahpw mie meteikan me pil kin paiekihda atail doadoahk. Irail pwukat iei tohn atail peneinei oh pil irail kan me anahne sawas.
Tohn atail peneinei. Ni tapwin peneinei men eh kin doadoahk laud pwehn apwalih tohn eh peneineio, e kin kihda kamwahu ong irail ni ahl riau. Keieu, e kin tehk mwahu me re ahneki dahme re anahne, duwehte mwenge, likou oh imwarail. Eri, e kin kapwaiada pwukoa me Koht ketikihong, me iei en “apwalih . . . uhdahn kisehn pein eh peneinei.” (1 Timoty 5:8) Keriau, me kin pwerisekiong apwalih eh peneineio kin wiahda mehn kahlemeng mwahu duwen kesempwalpen doadoahk laud. Shane, me kitail koasoia mwoweo, nda: “Ei pahpao wia mehn kahlemeng mwahu duwen emen me ahneki madamadau pwung ong doadoahk. Ih ohl mehlel men me kin doadoahk laud erein eh mour, pali laud e wia doadoahk en kapinte. Sang eh mehn kahlemeng mwahu, I sukuhlki kesempwalpen doadoahngki pehi kat oh wiahda soahng kan me pahn wia mehkot katapan ong meteikan.”
Irail kan me anahne sawas. Wahnpoaron Pohl kihda kaweid ong Kristian kan ren “doadoahk . . . oh kak sewesehki me semwehmwe kan.” (Episos 4:28) Mehlel, ni atail kin doadoahk laud pwehn apwalih pein kitail oh pil atail peneinei, ele kitail pil kak sewese irail kan me semwehmwe. (Lepin Padahk 3:27) Eri doadoahk laud kak kahrehiong kitail en ahneki peren laud en kihkihwei.
Ire Kesempwal kan
ijwyp artikel 95 par. 10-11
Ia Duwen Ei Kak Kehlail en Powehdi Kahpwal?
● Wehwehki omw kahpwalo. Esehla wekpeseng en kahpwal laud kan oh kahpwal tikitik kan. Paipel mahsanih: “Ni ahnsou me aramas pweipwei men kin lingeringer, e kin mwadangete kasalehda. Aramas loalokong kin pohnsehse kapailok me aramas kin wiahiong irail.” (Lepin Padahk 12:16) Ke sohte nohn anahne pwunodki kahpwal kan koaros.
“Seri kan ni imwen sukuhlo kin nohn kaulimki soahng tikitik kan. Irail eri kin rong dahme iengarail kan kin koasoia nan social media—oh met kin kalaudehla arail kaulim oh irehdi arail koahiek en wehwehki duwen arail kahpwal kan.”—Joanne.
MAY 12-18
SOAHNG KESEMPWAL KAN SANG MAHSEN EN KOHT | LEPIN PADAHK 13
Dehr Pitida Pahn “Lamp” en Aramas Suwed
it-2 196 par. 2-3
Lamp
Ni Eh Kadoadoahk ong Karasaras Teikan. Karasepe, aramas kin doadoahngki lamp pwehn sere ele kan. Lepin padahk ehu doadoahngki karasaras wet pwehn kasalehda wekpeseng en aramas pwung men oh aramas suwed men, ni eh mahsanih: “Me pwung kan rasehng marain ehu me kin lingaling mwahu, ahpw me suwed akan rasehng lamp me mpwule kin kohkohdi en kunla.” (Lep 13:9) Marain en aramas pwung men kin pousehlahte wie maramarainla, ahpw sohte lipilipil ia uwen lingan en lamp en aramas suwed men, de ia uwen eh mwomwen pweida, Koht pahn ketin tehk me e pahn mihla nan rotorot, wasa me e pahn uhdahn dipekelekel. Ih met me pahn wiawihong aramas emen me kin keriahla seme oh ine.—Lep 20:20.
Nein emen “lamp me mpwule kin kohkohdi en kunla” pil kin wehwehki me sohte en aramas menet koapworopwor ong ahnsou kohkohdo. Pil ehu lepin padahk mahsanih: “Sohte ahnsou mwahu ong aramas suwed emen ni ahnsou kohkohdo—sohte mehkot e pahn kak kasikasik.”—Lep 24:20.
Papah Kohto me Kin Ketikihda Saledek
3 Ma Sehdan kak kamwakid aramas unsek riemen oh tohnleng tohto ren soikala sapwellimen Koht kaunda, e kak wiahiong kitail soahngohte. Ahn Sehdan widing kan sohte wekila. E men kitail en medewe me dahme Koht ketin kupwurki kin nohn kakos. Sehdan men kitail en medewe me ma kitail papah Koht, atail mour sohte pahn kaperen. (1 Sohn 5:3) Aramas tohto nan sampah kin ahneki soangen madamadau wet, oh ma kitail pahn kalapw werekiong irail, ele atail madamadau pahn tepida duwehla arail. Sister men me met sounpar 24 koasoia me eh werek suwed kin uhdahn kamwakid laud eh madamadau. E kin masak ahneki madamadau me weksang ahn me pwulopwul teikan. Imwilahn met, sister menet wiahda tiahk samin. Mwein ke pil iang pehm duwen kompoakepahmw kan ar kak kamwakid laud omw madamadau.
w04 7/15 31 par. 6
“Aramas me Ahneki Lamalam Mwahu Kin Mwekid ni Loalokong”
Aramas pwung men me kin kanai eh wiewia kin mwekidki loalokong pwung pahn ale kapai. Solomon kamehlelehiong kitail: “Kenen aramas pwung kan kisin mwenge kin itarohng irail, ahpw me suwed kan kin duhpek ahnsou koaros.” (Lepin Padahk 13:25).” Siohwa kin ketin mwahngih dahme kin mwahuong kitail nan soangsoangen irair en mour—me pid atail peneinei, atail nanpwungmwahu rehn meteikan, atail kalohk, de ni atail kin ale peneu. Oh ni atail kin kapwaiada ni loalokong kaweid me dierek nan sapwellime Mahsen, kitail uhdahn pahn ahneki soangen mour me keieu mwahu.
Ire Kesempwal kan
it-2 276 par. 2
Limpoak
Madamadau sapwung duwen limpoak oh peneu. Ong ni soangen kahrepe pwukat, e sansal me aramas men kak ahneki limpoak mehlel, oh pwung ihte sang ni eh pahn rapahki oh idawehn sapwellimen Koht manaman oh erpit me kohsang Sapwellime Mahsen. Karasepe, pahpa de nohno men ele poakohng nah serio. Ahpw e kakete mweidohng eh limpoako en suwedla de mweidala eh pepehm en kamwakid ih en mweidohng serio nsene. E kakete sohte kapwaiada eh pwukoa nin duwen pahpa de nohno men en kaweid de pil panawih serio. (Lep 22:15) Soangen limpoak wet kakete wia mehkot me peneinei kin pohnmwahsohki, ahpw met kin kasalehda roporop. Paipel mahsanih me soangen aramas menet kin kasalehda kailok ahpw kaidehn limpoak, pwehki e sohte kin wia dahme pahn doarehla nah serio.—Lep 13:24; 23:13, 14.
MAY 19-25
SOAHNG KESEMPWAL KAN SANG MAHSEN EN KOHT | LEPIN PADAHK 14
Medewe ni Keneinei Dahme Ke Pahn Wia ni Kahpwal Laud Ehu Eh Pwarada
Kesempwalki Sapwellimen Koht Kisakis en Mour
10 Ekei pak, kitail sohte kak irehdi irair keper kan en wiawi. Ni mehlel soahng kan me duwehte melimel, soumwahu lusulus, oh mahwen. Ahpw ni ahnsou me soahng pwukat kin wiawi, kitail kak wia uwen atail kak pwehn pere atail mour oh pitsang keper kan sang ni atail peikiong kaweid kan duwen kohkohsang wasao oh pil kaweid teikan sang palien koperment. (Rom 13:1, 5-7) Irair karuwaru kan kakete wiawi, kahrehda kitail anahne rong kaweid kan me kohsang palien koperment pwehn kaunopada mwahu mwohn mepwukat wiawi. Karasepe, ele e pahn mwahu ma ke tehkada ma mie omw pihl me itar, mwenge me sohte pahn kiteila oh pil first-aid kan.
11 Dahme kitail anahne wia ma soumwahu lusulus ehu doupeseng wasa me kitail kin kousoan ie? Kitail anahne peikiong kaweid kan me koperment kihda, me duwehte omwiomw, dohpeseng, doadoahngki mask oh tohrohrasang meteikan. Ma kitail kin wia soahng pwukat, kitail kin kasalehda me kitail kin uhdahn kalahnganki sapwellimen Koht kisakis en mour.
12 Erein ahnsou me kahpwal wiawi, ekei pak kitail kin rongasang kompoakepatail kan, mehn mpatail kan, de rohng kan duwen soahng kan me sohte mehlel. Kitail en dehr kamehlele “mehkoaros” me kitail rong, ahpw e mwahu kitail en rong soahng kan me keieu pwung sang koperment oh toahkte kan. (Wadek Lepin Padahk 14:15.) Pwihn me Kin Apwalih Mwomwohdiso nan Sampah Pwon oh ohpis en Sounkadehdehn Siohwa kan kin nantihong alehdi ire pwung kan mwohn ar kihda kaweid me pid mihting en mwomwohdiso kan oh doadoahk en kalohk. (Ipru 13:17) Ni atail idawehn kaweid wet, kitail kin pere pein kitail oh meteikan sang keper. Ele kitail pil kak sewese meteikan en medewe soahng mwahu kan duwen Sounkadehdehn Siohwa kan.—1 Pit. 2:12.
Eimah Duwehte Sadok
11 Ia duwen atail kak eimah duwehte Sadok ni riatail Kristian kan ar mihla nan keper oh anahne sawas? (1) Idawehn kaweid. Erein ahnsou apwal pwukat, e kesempwal kitail en kin peik pwe kitail en kak miniminpene. Peikiong kaweid me kohsang ohpis en Sounkadehdehn Siohwa me kin apwalih omw wasa. (Ipru 13:17) Elder kan anahne kaukaule tehk koasoandi kan ong ia duwen arail pahn kaunopada oh dahme re pahn wia ma kahpwal ehu pwarada. (1 Kor. 14:33, 40) (2) En eimah ahpw kanahieng. (Lep. Pad. 22:3) Mwekid ni loalokong. Dehr wia mehkot me keper. (3) Likih Siohwa. Tamataman me Siohwa ketin kupwurki me kowe oh riomw Kristian kan en dehr lelohng keper. E kak ketin seweseiuk ken sewese riomw Kristian kan ni ahl me sohte keper.
Ire Kesempwal kan
it-2 1094
Koahiek en Madamadau
Ahpw emen me kin uhdahn doadoahngki eh koahiek en madamadau kakete pil wiahla emen me aramas kin kailongki. Mwein ih madamadau wet me sansalda nan Lepin Padahk 14:17 (NW, ntp) me mahsanih: “Aramas me ahneki koahiek en madamadau, aramas akan kin kailongki.” Aramas akan me sohte kin madamadau kin kalapw sapwungki irail kan me kin doadoahngki arail koahiek en madamadau. Oh aramas kin kalapw kailongki irail kan me kin doadoahngki arail madamadau pwehn wia kupwuren Koht. Duwehte me Sises Krais mahsanih: “Pwehki kumwail kaidehn kisehn sampah, ahpw I pilkumwailda sang sampah, ih kahrepe wet me sampah kin kailongkin kumwail.” (Sohn 15:19) Ahpw lokaiahn Ipru me kawehwehdiong “koahiek en madamadau” nan Lepin Padahk 14:17 (NW, ntp) kak pidada madamadau en kauwehla meteikan. Kahrehda ireo kakete pil wehwehki me aramas kin kailongki emen me kin wiahda koasoandi mwersuwed, oh ekei kawehwehn Paipel kin koasoia: “Aramas kin kailongki emen me kin wiahda koasoandi suwed.”—JP, Ro.
MAY 26–JUNE 1
SOAHNG KESEMPWAL KAN SANG MAHSEN EN KOHT | LEPIN PADAHK 15
Sewese Meteikan Ren Peren
Kitail en Kekeidki Atail Lelepek!
16 Sohp kin kadek oh kalapw kasamwo aramas akan. (Sohp 31:31, 32) Mendahki kitail sohte kepwehpwe, kitail kak “kasamwo mehn keiru kan.” (Rom 12:13) Kitail kak ehukihong meteikan mehkot tikitik, oh tamataman me “tungoale tehntuhke rehn aramas me ke poakepoake mwahusang tungoale uduk iou wasa me kailok mie.” (Lep. Pad. 15:17) Atail iang kang kisin mwenge rehn riatail kan kak wia ahnsou kaperen oh kakehlaka emenemen.
Kangoange Emenemen “Laud Sang Mahs”
16 Ia duwen ma e apwal ong uhk en ndaiong meteikan omw pepehm duwen irail? Ni mehlel, e sohte apwal en kangoange meteikan. Song en sirei ong emen. Ma irail sohte sirei ong uhk, ele irail ahneki kahpwal ehu oh anahne emen en koasoiong. Ele ke kak kansenamwahwihirailla ihte ni omw kin rong irail.—Seims 1:19.
17 Brother pwulopwul men me adaneki Henri uhdahn nsensuwedla ni ekei rehn kiseh kan ar uhdihsang papah Siohwa. Emen rehrail iei eh pahpao, me wia elder men mahs. Emen sounapwalih me kin seiloak tehkada me Henri nsensuwed oh wahla ih wasahn nim koahpi. Sounapwaliho kin rong kanahieng ni Henri kasalehda eh pepehm kan. Henri wehwehkihda me ihte ahl me e kak sewese kapwurehdo eh peneineio nan padahk mehlel iei ma pein ih kin kolokolete eh lelepek. E pil nsenamwahula ni eh wadek Melkahka 46, Sepanaia 3:17, oh Mark 10:29, 30.
18 Dahme kitail kak sukuhlkihsang dahme wiawihong Marthe oh Henri? Kitail koaros kak kansenamwahwih oh kangoange Kristian men me anahne. Nanmwarki Solomon ntingihedi: “Meid kaperen diar mahsen pwung ni ahnsou me konehng! Mesen kouruhr kin kaperenda nan kapehdomw, oh rohng mwahu kin kaperenihiukada mehlel.” (Lep. Pad. 15:23, 30) Ia duwe, ke kak medewehda emen me ke ese me mworusala de nsensuwed? Ke seu wia mehkot duwehte wadek ong ih ehu ire sang Kahn Iroir de neitail website? Pil ehu, Pohl padahkihong kitail me koulki koul en kaping ong Siohwa kak kansenamwahwihala kitail. E ntingihedi: “Kumwail padahkpene oh pil peneupene nanpwungamwail ni soangen loalokong koaros. Kumwail koulki koulen kaudok oh koul sarawi kan; kumwail kouliong Koht.”—Kol. 3:16; Wiewia 16:25.
Ire Kesempwal kan
ijwbq artikel 39 par. 3
Kristian Men Kak Ale Epwelpen Palien Wini?
2. I anahne pil ale kaweid sang toahkte teikan? E kesempwal en “ale kaweid koaros uwen me ke kak,” ahpw mehlel ma omw soumwahwo laud.—Lepin Padahk 15:22.
JUNE 2-8
SOAHNG KESEMPWAL KAN SANG MAHSEN EN KOHT | LEPIN PADAHK 16
Peidek Siluh me Pahn Imwikihla Pilipil Mwahu kan
Wiahda Pilipil Loalokong kan ni Ahmw Pwulopwul
11 Peren me keieu laud kin kohsang atail papah Siohwa. (Lep. Pad. 16:20) E mwomwen me nein Seremaia sekteri Paruk sohla ahneki peren ahnsou kis nan eh mour. Paruk tepida medemedewe laud dahme e mwahuki laudsang dahme Siohwa ketin kupwurki. Siohwa ketin mwahngih duwen met oh ketin mahsanihong Paruk en uhdihsang “raparapahki ehu kamwahu” ong pein ih. Ma e peikiong, e pahn pitsang kasohrlahn Serusalem. (Ser. 45:3, 5) Dahme pahn kaperenda Paruk? En wia dahme e men wia oh iang sohrala, de en wia dahme Siohwa kupwurki oh pitsang kasohrlahn Serusalem?—Seims 1:12.
12 Emen brother me diar peren ni eh papah meteikan iei Ramiro. E nda: “I kohsang peneinei semwehmwe ehu nan kousapw ehu nan nahna kan en Bolivia. Eri ni ahnsou me riei pwutak laudo nda me e pahn pwain ie kohla iang sukuhl laud, e wia mehkot laud ong ie. Ahpw I ahpwtehn papidaisla nin duwen emen Sounkadehdehn Siohwa kan, oh pioneer men luke ie en iang ih kalohk nan kahnimw tikitik ehu. I kohla wasao, sukuhlkihdi seisei oh tapiada ahi pesines en wasahn seisei ehu pwehn kak apwalih ie.” Aramas tohto nan kisin kahnimwo men onopki Paipel. Mwuri, mwomwohdiso kapw ehu wiawihda me doadoahngki lokaiahn wasao, lokaia ohte me Ramiro kin doadoahngki. Eri e pilada en iang mwomwohdiso wet oh e papah wasao erein sounpar eisek. E nda me sohte doadoahk ehu me kak kihong ih peren laud sang eh kin sewese aramas en sukuhlki Paipel ni pein arail lokaia.
Ke Wiliakapwalahr?
MWOMWEN atail tikida, kompoakepatail kan, atail tiahk oh wasa me kitail kousoan ie kin kamwakid laud mwomwen atail mour. Ihme kahrehda mie soangen mwenge kan me kitail iouki, soangen likou kan me kitail kin likawih oh mwomwen atail wiewia weksang ahn ekei.
2 Ahpw mie soahng kei me kesempwal sang mwomwen atail likou de dahme kitail kin kang. Karasepe, ni atail kekeirda, kitail kin sukuhlki me mie soahng kan me pwung oh mie soahng kan me sapwung. Ahpw madamadau en aramas kin wekpeseng duwen dahme pwung oh dahme sapwung. Kadeikpen loalatail pil kin kamwakid pilipil kan me kitail wiahda. Paipel mahsanih me aramas akan me “sohte iang ahneki Kosonnedo; . . . kin kapwaiada audepen Kosonnedo sang ni pein nsenarail.” (Rom 2:14) Ahpw ia duwe, met wehwehki me ma sohte kosonned sansal ehu sang rehn Koht, kitail kak idawehnte koasoandi de ahl akan me kitail tikida loale oh me aramas kin kalapw wia?
3 Mie kahrepe kesempwal riau me Kristian kan sohte kin wia met. Keieu, Paipel mahsanih: “Ahl me ke lemeleme me iei ahl en pwung, kakete kahluwaiukalahng mehla.” (Lep. Pad. 16:25) Pwehki atail soh unsek, kitail sohte kak pein kaweid kitail ni unsek. (Lep. Pad. 28:26; Ser. 10:23) Keriau, Paipel mahsanih me Sehdan iei “koht suwed en sampah wet.” E kin kakaun tiahk de koasoandi en sampah wet, de madamadau en sampah ong dahme pwung de sapwung oh pil dahme aramas kin mwahuki. (2 Kor. 4:4; 1 Sohn 5:19) Ma kitail men kaperenda Siohwa oh men en ketin kapaikitailda, kitail anahne peikiong dahme kileldi nan Rom 12:2.—Wadek.
Ire Kesempwal kan
it-1 629
Peneu
Imwilahn Peikiong oh Imwilahn Pohnsehsehla. Me suwed kan, me pweipwei kan, de irail kan me sohte kin katapanki kasalehda tiahk mwahu kin kasalehda ar kin kailongki sapwellimen Siohwa peneu sang ni arail kin soikala douluhl. (Me 50:16, 17; Lep 1:7) Imwila suwed kan me kohsang soangen tiahk pweipwei wet kin kalaudehla arail anahne peneu, oh met kin kalapw wia kalokolok laud. Nin duwen me lepin padahko mahsanih: “Me pweipwei kan kin ale peneu sang pein ar pweipwei.” (Lep 16:22, NW) Re kakete pein kahrehiong ren semwehmwehla, namenekla, soumwahula, de pil mwadangete mehla. Poadopoad en mehn Israel kan kasalehda ia uwen suwed en met. Re kin pohnsehsehla peneu oh kopwung me soukohp kan kin kihda. Siohwa ketin panawih irail ni eh sohla kin ketin pere oh kapaia irail, ahpw re sohte kin tehk. Ihme kahrehda re alehdi peneu me inenen kehlail me e ketin padahkihong irail mwowe—ar lohdi oh kalipilipala.—Ser 2:30; 5:3; 7:28; 17:23; 32:33; Os 7:12-16; 10:10; Sep 3:2.
JUNE 9-15
SOAHNG KESEMPWAL KAN SANG MAHSEN EN KOHT | LEPIN PADAHK 17
Ahneki Popohl nan Omw Pwopwoud
g 9/14 11 par. 2
Ia Duwen Omw Pahn Dehr Kolokol Lingeringer
Kasawih pein kowe ni mehlel. Paipel kin kasalehda me ekei aramas “kin mwadang en lingeringer” oh “kin kalapw mwehl.” (Lepin Padahk 29:22) Ih mwomwomwen met? Pein idek rehmw: ‘I kin kalapw kolokol ei lingeringer? Ia uwen mwadang en ei kin lingeringerda? I kin kalapw kaulimki soahng tikitik kan?’ Paipel mahsanih me emen me ‘pahn loalloale sapwung ehu pahn kak kauwehla nanpwungen ih oh kompoakepah.’ (Lepin Padahk 17:9; Eklesiasdes 7:9) Met pil kak wiawi nan pwopwoud. Eri ma ke kin kalapw kolokol omw lingeringer, pein idek rehmw, ‘I kak kalaudehla ei kanengamahiong ei pwoud?’—Mouren kaweid en Paipel: 1 Piter 4:8.
w08 5/1 10 par. 6–11 par. 1
Kamwahwihala Kahpwal kan
1. Koasoanehdi ahnsou en koasoiapene ire ehu. “Mie ahnsou me konehng ong soahng koaros . . . “ahnsoun nennenla oh ahnsoun koasoi.” (Ecclesiastes 3:1, 7, NW) Nin duwen me akamai me sansal mwowe kasalehda, ekei kahpwal kan kak kahrehda pepehm laud kan. Ma met wiawi, nantihong en kaunda pein uhk oh nda kumwa en uhdi—pwehn “nennenla”—mwohn akamai eh tepida. Ke kak kamwahwihala nanpwungamwa mwohn eh ohla me ke peikiong kaweid en Paipel wet: “Tepidahn akamai kin rasehng aramas me kin kamwakidasang perehpen pihl; katokehdi mwohn eh pahn pwilpeseng.”—Lepin Padahk 17:14.
Ahpw pil mie “ahnsoun koasoi.” Kahpwal kan kin duwehte dihpw me kin doupeseng ma sohte me kin mwatih. Eri dehr pohnsehsehla iren kahpwalo, oh kasik me kahpwalo pahn uhdahte sohrala. Ma ke nda kumwa en uhdi koasoi, kasalehda omw wauneki omw pwoudo sang ni omw pahn koasoanehdi ahnsou me keren, me kumwa en pwurehng koasoiapene iren kahpwalo. Soangen inou wet kak sewese kumwa koaros en kapwaiada mouren kaweid en Paipel wet: “Dehr wie lingeringer lao ketipino kihrla.” (Episos 4:26) Ei, ke uhdahn pahn anahne kapwaiada dahme ke inoukihda.
Ire Kesempwal kan
it-1 790 par. 2
Pwoaren Mas
Pwoaren mesen emen kin kasalehda eh pepehm kan. Pwoaren mas kak kasalehda poakehla emen de sohte poakehla (Deud 19:13); oh ni pwoaren eh kin “manih” emen, e kakete wia ni kailok de ni mwalaun. (Me 35:19; Lep 6:13; 16:30) Paipel kin mahsanih me aramas me sohte men tehk de sewese emen, e kin meirpene oh perehla pwoaren mese ko. (Md 13:15; Lep 28:27) Ni Paipel eh mahsanih me pwoaren mesen me pweipwei men “kin kohkohseli lel ni imwin sampah,” met kin wehwehki me e kilikilangseli mwahl, oh eh madamadau kan kin ping oh sohte kak soandi. (Lep 17:24, NW) Pil en aramas emen eh rosonmwahu, kehl, de peren kin sansalda sang ni pwoaren mese ko. (1Sa 14:27-29; Deud 34:7; Sop 17:7; Me 6:7; 88:9) Nanmwarki Seosopat patohwanohng Siohwa: “Masat kat kin sohpeiwohng komwi.”—2Kr 20:12, NW.
JUNE 16-22
SOAHNG KESEMPWAL KAN SANG MAHSEN EN KOHT | LEPIN PADAHK 18
Kangoange Irail kan me Ahneki Soumwahu
Erpit Mehlel Kin Liklikwer
17 Medewe mahs mwohn omw koasoi. Ma kitail sohte kanahieng, atail lokaia kakete kamedekihala meteikan. Paipel mahsanih: “Lokaia mwahl kin kauwehla wasa rasehng kedlahs, ahpw lokaiahn loalokong kin kamwahwihala wasa.” (Lep. Pad. 12:18) Kitail kin sewese kolokol popohl ni atail soikala koasoiaseli en meteikan sapwung. (Lep. Pad. 20:19) Ma kitail men atail koasoi en kansenamwahwih meteikan oh sohte kamedekirailla, kitail anahne kaukaule wadek oh medemedewe Mahsen en Koht. (Luk 6:45) Ni atail doudouloale dahme Paipel mahsanih, atail koasoi kan kak wiahla “poahsoan en kupwurokong” me kin kansenamwahwihala meteikan.—Lep. Pad. 18:4.
mrt artikel 19 koakon
Ia Duwen Omw Kak Sewese Emen me Ahnekihda Soumwahu Ehu ni Soh Kasikpe
Rong mwahu. Ehu ahl me keieu mwahu en sewese iengomw, iei en rong ih ni ahnsou me e men koasoi. Dehr pehm me ke anahne sapeng soahng koaros me e nda. E kin kalap itar en rongete. Song en wehwehki ah pepehm oh dehr kadeik. Dehr medewe me ke ese ah pepehm, ahpw mehlel ni ahnsou me eh soumwahwo sohte nohn sansal.—Lepin Padahk 18.
Koasoia soahng mwahu kan. Mwein ke sohte pahn ese dah ke pahn nda, ahpw en ndahte ekei lokaia pwehn kasalehda me ke nsenohki en iengomwo irairo kak kansenamwahu sang ahmw sohte douluhl nda mehkot . Ma ke sehse douluhl dah ke pahn nda, song en nda mehkot mengei ahpw kansenamwahu, duwehte “Sehse dahme I pahn nda, ahpw I men ken ese me ih nsenohkin uhk.” Ahpw dehr nda mehkot me duwehte “E kak suwedsang men” de “Mwahu pwe ke sohte ahneki . . .”
Ke kak kasalehda omw nsenohki iengomw sang ni omw esehla duwen eh soumwahwo. E pahn kalahnganki dahme ke koasoia oh omw song en wehwehkihla eh irairo. (Lepin Padahk 18:4) Ahpw, kanaiehng en dehr kihda kaweid me e sohte peki.
Sewesehki dahme e anahne. Dehr medewe me ke ese ia duwen omw pahn sewese, ahpw idek dahme ke kak wia. Ahpw tamataman iengmwo sohte pahn ndawei me e anahne sawas, pwehki e sohte pahn men kedirepweiuk. Ma met wiawi, song en idek reh dahme ke kak wia duwehte, netinet, kamwakel, de soahng teikan me ke kak sewesehki.—Kal 6:2.
Dehr uhdihsang en sewese. Erein iengomwo eh sosoumwahu, ele ekei pak eh pahn kauwehla amwa koasoandi de sohte men koasoiong uhk. Ahpw kanengamah oh wehwehkihla ah irairo. Pousehlahte sewesehki dahme e anahne.—Lepin padahk 18:24.
Sewese me Ahneki Soumwahu en Madamadau—Ia Mwomwe?
“Kaloalamwahwih.”—1 DESELONIKA 5:14.
Kompoakepahmwo kakete pwunod de lokolongki pepehm me sohte katepe. Ke kak kansenamwahwih oh kangoange ih sang ni omw kamehlelehiong me ke nsenohki, mehnda ma ke sehse dahme ke pahn nda.
“Kompoakepah kan kin kasalehda ar limpoak ahnsou koaros.”—LEPIN PADAHK 17:17.
Sewesehki soahng kan me anahn. Idek dahme ke kak wia a ke dehr pein medewe me ke eseier ia duwen omw pahn sawas. Ma kompoakepahmwo apwalki kawehwehiong uhk dahme e anahne, song idek reh soahng kan me kumwa kak wiapene, me duwehte kohla alu. De ke kak idek reh ma ke kak sewese ih netinet, kamwakel de doadoahk teikan.—Kalesia 6:2.
“Kanengamahiong.”—1 DESELONIKA 5:14.
Mwein kaidehn ahnsou koaros kompoakepahmwo pahn men koasoi. Kamehlelehiong kompoakepahmwo me ke pahn perenki rong ni ahnsou me e men koasoi. Pwehki eh soumwahwo, kompoakepahmwo kakete nda de wia mehkot me pahn kamedekeiukala. Ele e kin kauwehla amwa pilahn kan de kin lidoarda. Kanengamahiong oh song wehwehki eh irairo ni omw kin sewesehki dahme e anahne.—Lepin Padahk 18:24.
Ire Kesempwal kan
it-2 271-272
Usuhs (Lot, I)
Wia usuhs iei tiahk en mahs ehu me kin kadoadoahk pwehn wiahda pilipil kan. Dahme re kin wia iei en kesehda kisin takai de diper en tuhke de takai nan likou me limilimpene, “pohn kepe,” de nan sah ehu oh eri itikada. Mehmen me naineki kisin takai de diper me pwupwusang loale iei me kin pilipilda. Usuhso ele kin iangahki kapakap duwehte me kin wiawi ni emen eh kin wiahda inou ehu me e kahukihla. Ekei pak kapakapo kin kileldi a ekei pak soh, oh me kin wia kapakapo kin peki oh kasikasik sapwellimen Siohwa sawas. Lepin lokaiao usuhs (ni lokaiahn Ipru, goh·ralʹ) kin kadoadoahk ong tiahk en usuhs oh pil kadoadoahk ni karasaras pwehn kasalehda madamadau en “pwais” de “sohso.”—Sos 15:1; Me 16:5, NW; 125:3; Ais 57:6; Ser 13:25.
Mwomwen eh kin kadoadoahk. Lepin padahk 16:33 (NW) mahsanih: “Mehn usuhs kin lekdekiong nan likou, [“pohn kepe,” ntp.] ahpw pilipil koaros sang ni usuhs kin pwilisang rehn Siohwa.” Nan Israel, ahl konehng en wia usuhs iei en kauhdi akamai de kapwungala nanpwung suwed: “Usuhs kin katokehdi akamai kan oh pilada ihs me pwung nanpwungen aramas kehlail riemen me uhpene.” (Lep 18:18, NW) Usuhs sohte kin kadoadoahk ong siai en mwadong, mwadong, de pilein mwohni. Sohte me kin petki mwohni de kepwe—sohte me kin luhs sang kepwe de alehdi. E sohte kin wiawi pwehn kawauwihala tehnpas sarawio de samworo ko, oh e sohte pil kin wiawi ong kihda sawas. Weksang met, sounpei en Rom ko rapahki pein kamwahuparail ni arail usuhski sapwellimen Sises likou ko nin duwen me kokohpdahr nan Melkahka 22:18.—Md 27:35.
JUNE 23-29
SOAHNG KESEMPWAL KAN SANG MAHSEN EN KOHT | LEPIN PADAHK 19
Wia Kompoakepah Mehlel Men ong Riomw Kristian kan
Ia Duwen Atail en Kangkakehlailihte Atail Poakohng Emenemen
16 Medemedewehte irair mwahu kan en riatail kan, a kaidehn arail sapwung kan. Medewehla karasaras wet. Medewehla ke iang riomw Kristian kan kohpene mwemweit. Ke perenki ahnsowo oh ni amwail pahn kohkohpeseng, ke men kilelekumwaildi. Ke pil wiahda kilel riau pwe me ke tepin kilelehdio kakete sohte mwahu. Met mie noumw kilel siluh. Ahpw nan ehu kilel ko, ke tehkada me emen brother sohte sirei. Dahme ke pahn wiahiong kilelo? Ke pahn delete sang nan kilel ko pwehki nan kilel riau tehi ko, koaros sirei, pil iangahki brothero.
17 Kitail kak kapahrekihpene kilel ko me kitail nekidala ong ahnsou kan me kitail men wiahki mehn kataman. Kitail kin kalapw taman ahnsou mwahu kan me kitail iang riatail Kristian kan. Ahpw ia duwen ma ehu ahnsou ko, emen riatail nda de wia mehkot me sohte kadek? Dahme kitail pahn wia? Kitail sou pahn song en manokehla soangen ahnsowo duwehte atail delete kilel suwedo? (Lep. Pad. 19:11; Ep. 4:32) Kitail kak manokehla ahn riatail men sapwung tikitik pwehki kitail kin tamataman ahnsou mwahu tohto me kitail kin iangih. Ih soangen mehn kataman me kitail men nekidala oh kesempwalki.
Omw Limpoak en Pousehlahte Kekeirda
10 Kitail pil kin rapahki elen sewese riatail Kristian kan. (Ipru 13:16) Medewehla dahme wiawihong Anna me kitail koasoiapene nan iren onop en mwoweo. Mwurin melimel laud ehu, ih oh eh pwoudo mwemweitla rehn peneinei ehu me wia Sounkadehde kei, oh ira esehda me melimelo kauwehla kadoken imwarailo. Pwehki met, ahn peneineio likou ko koaros pwelipwel. Anna koasoia: “Se ale arail likou ko, lopworada, ainihda, limpene, oh kapwurehla rehrail. Met sohte apwal ong kiht, ahpw pwehki se wia met, se uhdahn wiahla kompoakparail mwahu kei lao lel met.” Ara limpoak ong riera Kristian kan kamwakid ira en kihda sawas mwahu.—1 Sohn 3:17, 18.
11 Ni atail kin kadek oh kasalehda limpoak ong meteikan, irail kak kilang me kitail kin songosong en kahlemengih Siohwa. Oh ele re pahn kalahnganki atail kadek laudsang me kitail ese. Khanh, me kitail koasoiapene mwoweo, kin taman irail kan me sewese ih. E koasoia: “I uhdahn kalahnganki riei sister kan koaros me kin wa ie kohla kalohk. Irail kin pwekiehda, luke ie en iang irail kohla mwenge, oh kapwureiehla ni imweio. Met I esehda me e wia doadoahk laud ehu ong irail. Oh re wia met ni limpoak.” Ei mehlel, kaidehn koaros pahn kalahnganki dahme kitail wiahiong irail. Khanh ndahki irail kan me sewese ih: “I uhdahn men kapwungohng irail soangen wiewia kadek tohto me irail wiahiong ie, ahpw I sehse ia wasa irail kin mi ie. Siohwa ketin mwahngih, oh I kapakapki me e pahn ketin welianiehdi oh kapwungohng irail.” E pwung dahme Khanh nda. Siohwa kin ketin tehk wiewiahn kadek koaros me kitail kin wiahiong meteikan, mehnda ma pil tikitik. E kin ketin wiahki met meirong kesempwal ehu oh pweipwand ehu me e pahn ketin kapwungala.—Wadek Lepin Padahk 19:17.
Pousehlahte Kasalehda Limpoak Loalopwoat Nanpwungamwail
6 Rahnwet kitail kak nda me emen me kin doadoahk ong kompani ehu erein sounpar tohto wia tohndoadoahk loalopwoat men. Ahpw erein sounpar ko me e wie doadoahk ong kompanio, e saikinte tuhwong kaun kan en kompanio. Ele e sohte kin pwungki koasoandi kan me kompanio wiahda. E sohte poakohng kompoanio, ahpw e perenki pwehki e kak ale pweine. E pahn pousehlahte doadoahk wasao lao lel e kommoaldi de lao e diarada ehu doadoahk me mwahusang ni ehu wasa tohrohr.
7 Wekpeseng en loalopwoat me parakrap 6 kasalehda oh limpoak loalopwoat iei dahme kin kamwakid aramaso. Nan Paipel, dahme kin kamwakid sapwellimen Koht aramas kan en kasalehda limpoak loalopwoat? Irail kan me kin kasalehda limpoak loalopwoat sohte kin wia met pwehki re anahne, ahpw pwehki irail men wia. Medewehla mehn kahlemeng en Depit. Eh mohngiong kamwakid ih en kasalehda limpoak loalopwoat ong kompoakepaho Sonadan mendahki en Sonadan pahpao men kemehla Depit. Sounpar kei mwurin Sonadan mehla, Depit pousehlahte kasalehda limpoak loalopwoat ong nein Sonadan pwutako Mepiposed.—1 Sam. 20:9, 14, 15; 2 Sam. 4:4; 8:15; 9:1, 6, 7.
Ire Kesempwal kan
it-1 515
Kaweid, Sounkaweid
Siohwa ketin sapwellimanki erpit me keieu unsek. Oh ih kelehpw sohte ketin anahne emen en kaweid ih. (Ais 40:13; Ro 11:34) Sapwellime Ohlo kak ketin wia “Sounkaweid Kupwurokong,” me kin ketikihda kaweid, pwehki e ketin alehdi sapwellimen Koht manaman oh pil kin peikiong kaweid me e patohwan sang rehn Semeo. (Ais 9:6; 11:2; Soh 5:19, 30) Eri pwe kaweid ehu en wia kamwahupatail, e kin anahne pidada Siohwa. Sohte lipilipil en kaweid kan me kin uhwong Wasa Lapalahpie kin sohte katepe. E uhdahn sohte kak wia kaweid ehu.—Lep 19:21; 21:30.
JUNE 30–JULY 6
SOAHNG KESEMPWAL KAN SANG MAHSEN EN KOHT | LEPIN PADAHK 20
Soahng kan me Pahn Seweseiuk Erein Omw Date
Ia Duwen Omw Kin Date Eh Kawauwih Siohwa
3 Mendahki date kak wia ahnsou kaperen, ohl emen oh lih emen anahne medemedewe uwen kesempwal en met pwehki met kak imwikihla ara pwopwoudida. Ni rahnen ara kapwopwoudo, pwopwoud ehu kin wiahda inou mwohn Siohwa en poakohng oh wauneki emenemen erein ara momour. Mwohn atail wiahda inou ehu, kitail anahne medemedewe kanahieng. (Wadek Lepin Padahk 20:25.) Met pil kin wiawi ni pwopwoud ehu kin wiahda inou. Date kin sewese meh riemen en esehla emenemen oh wiahda pilipil mwahu. Ekei pak ira kin pilada en pwopwoudida; oh ekei pak ira kin pilada en sohla date. Ma ira sohla date, met sohte wehwehki me ira wiahda mehkot sapwung. Ahpw ira kin diarada ma ira pahn pwopwoudida de soh.
4 Dahme kahrehda e kesempwal en ahneki madamadau pwung ong date? Pwehki irail me kiripw kan ese me re sohte pahn tepida pehsehiong emen ma re ese me re sohte pahn pwoudiki. Ahpw, kaidehn me kiripw kante me anahne ahneki madamadau pwung. Kitail koaros anahne kakairada met. Karasepe, ekei kin medewe me ma meh riemen kin date, ira anahne pwopwoudla. Ahpw ia ahn ekei Kristian kiripw kan pepehm ong met? Melissa, sister kiripw men nan Wehin Amerika, koasoia: “Ni brother men oh sister men ara kin date, ekei Sounkadehde kan kin kasik me ira pahn pwopwoudida. Pwehki met, ekei kin doulahte date mendahki ira ese me ira sohte pahn wia pwopwoud mwahu. Ekei me kiripw kan sohte douluhl kin date. Met kak kahrehda pwunod laud.”
Ia Duwen Omw Kak Diar Omw Pwoud Mwahu
8 Ia duwen omw kak esehda mwahu mwomwen emen ni ahl me sohte nohn sansal? Ni mihting kan de ni ahnsoun patehng meteikan mwemweit, ele ke tehkada soahng kei duwen ahn aramaso nanpwungmwahu rehn Siohwa, mwomwen ih, de eh tiahk kan. Ihs me e kin kompoakepahnki, oh dahme e kin mwahuki koasoia? (Luk 6:45) Eh mehn akadei kan duwehte ahmw? Ke kak idek rehn elder kan nan eh mwomwohdisou de rehn Kristian koahiek teikan me uhdahn ese ih. (Lep. Pad. 20:18) Ke kak idekda duwen soangen aramas dah ih de duwen eh irair kan. (Rud 2:11) Ni omw kin tehkada mwahu mwomwen emen, tehk kanahieng me ken dehr kahrehiong en soansuwedkihda. Wauneki eh pepehm, dehr kin ahnsou koaros mihmiseli wasa me e kin mi ie de nantihong en diarada soahng koaros duwen ih.
Ia Duwen Omw Kin Date Eh Kawauwih Siohwa
7 Ia duwen omw kak esehla mwahu emen? Ke kak wia met sang ni omw idek peidek kan oh rong mwahu emenemen. Kumwa koaros anahne kasalehda ia uhdahn amwa pepehm oh en kin sapeng ni mehlel. (Lep. Pad. 20:5; Seims 1:19) Mwein kumwa kak pilada en ehupene wia soahng kan me kak kahrehda en mengei ong kumwa en koasoipene, me duwehte en mwengepene, kohla alu, oh kalohk. Kumwa pil kak esehla emenemen ni amwa patehng kompoakpamwah kan oh amwa peneinei. Patehng met, koasoanehdi en wia soahng kan me pahn kasalehiong uhk mwomwen ahn aramaso mwekid nan soangsoangen irair kan oh rehn aramas teikan. Tehk dahme Aschwin sang Netherlands song en wia. E ndahki ahnsou me ih oh Alicia kin date: “Se kin rapahki soahng kan me se kak ehupene wia pwehn esehla emenemen. Soahng pwukat sohte kin apwal, duwehte kaunopada mwenge de wia doadoahk teikan. Ni aht wia soahng pwukat, se kak kilang ahn emenemen irair mwahu kan oh soh unsek kan.”
8 Kumwa pil kak esehla mwahu emenemen ni amwa onopkipene iren Paipel kan. Ma kumwa pwopwoudla, kumwa anahne wiahda amwa ahnsou en kaudok en peneinei pwe Koht en ketin ieiangete amwa mouren pwopwoud. (Ekl. 4:12) Eri, kumwa kak wiahda ahnsou en onoppene ahnsou wet erein amwa kin date. Ei mehlel, kumwa saikinte wiahla peneinei ehu, oh brothero saikinte wiahla ahn sistero tapwi. Ahpw, sang ni amwa kin kaukaule onoppene, kumwa kak esehla ahn emenemen nanpwungmwahu rehn Siohwa. Max oh Laysa, pwopwoud ehu sang Wehin Amerika, diarada pil ehu kamwahu. Max koasoia: “Ahnsou me se tepida date, se tepida onopki sawasepen Paipel kan me pid duwen date, pwopwoud, oh mouren peneinei. Sawasepen Paipel pwukat sewesei kiht en koasoiapene soahng kesempwal tohto me apwal ong kiht en pein tepida koasoia.”
Ire Kesempwal kan
it-2 196 par. 7
Lamp
Nin duwen me Lepin Padahk 20:27 (NW) kasalehda, “esingek en aramas emen iei lamp en Siohwa, me kin serehda wasa me keieu loal rehn aramaso.” Sang dahme aramas emen kin esingengkihla de ndahla, sohte lipilipil ma koasoi mwahu de suwed, e kin kasalehda soangen aramas dahmen ih de dahme mi loale.—Pil kilang Wi 9:1.