Rapahki Popohl Sang ni Atail Pelianda Pepehm en Peirin

1. Ia duwen peirin eh kauwehla ahn Sosep peneineio?

SEIKOP kin poakohng nah pwutak ko koaros, ahpw e kin keieu kesempwalki nah pwutako Sosep me sounpar 17. Ia duwen rien Sosep pwutak ko ar mwekidki met? Irail kin peirinki Sosep, oh met kahrehda re tepida kailongki. Sohte mehkot me Sosep wia pwehn kahrehiong rie ko en kailongki ih. Mendahki met, irail netikihla Sosep pwehn wiahla lidu oh pitihedi arail pahpao me dene mahn lawalo men kemehla nah pwutak me e kesempwalkio. Arail peirin kahrehiong irail en kauwehla popohl en arail peneineio oh kahrehiong arail pahpao en nsensuwedla laud.​—Sen. 37:3, 4, 27-34.

2. Nin duwen me Kalesia 5:19-21 mahsanih, dahme kahrehda peirin uhdahn keper?

² Nan Paipel, peirinb iang wia kisehn “wiewiahn uduk” me uhdahn keper me kak kauhdi emen sang eh pahn iang sohsohki Wehin Koht. (Wadek Kalesia 5:19-21.) Peirin iei me kin kalapw kahrehda soangen irair keper kan duwehte kailok, pei, oh lingeringer.

3. Dahme kitail pahn koasoiapene nan iren onop wet?

³ Mehn kahlemeng suwed en rien Sosep pwutak ko kasalehda ia duwen peirin eh kak kauwehla nanpwungmwahu oh pil popohl en peneinei ehu. Mendahki kitail uhdahn sohte pahn wia dahme rien Sosep ko wia, kitail koaros sohte unsek oh mohngiongitail me diren piht. (Ser. 17:9) Eri e sohte kapwuriamwei me ekei pak kitail ele kin peirinki meteikan. Kitail pahn kousapahlih ekei mehn kahlemeng kan nan Paipel me pahn sewese kitail en ese dahme kahrehda pepehm en peirin kakete kekeirda nan mohngiongitail. Kitail eri pahn koasoiapene dahme kitail kak wia pwehn pelianda pepehm en peirin oh wiahda popohl en mie.

DAHME KAK KAHREHDA PEIRIN?

4. Dahme kahrehda mehn Pilisdia kan peiriniong Aisek?

⁴ Ni emen eh kepwehpwe. Aisek wia ohl kepwehpwe men, oh mehn Pilisdia kan kin peirinki met. (Sen. 26:12-14) Re pil audehkihda pwehl pwarer kan me Aisek anahne pwehn kanimpilehki nah pelin mahn kan. (Sen. 26:15, 16, 27) Duwehte mehn Pilisdia ko, rahnwet ekei aramas kin peirinki ma meteikan kepwehpwe sang irail. Irail sohte kin ihte men ahneki dahme meteikan ahneki ahpw re sohte pil men ren ahneki dipwisou ko.

5. Dahme kahrehda kaunen pelien lamalam kan kin peiriniong Sises?

⁵ Ni me tohto ar kin pwungki emen. Kaunen pelien lamalam en mehn Suhs kan kin peiriniong Sises pwehki aramas tohto kin pwungki ih. (Mad. 7:28, 29) Sises ketin wia wiliepen Koht oh kin ketin padahngki me mehlel. Mendahki met, kaunen pelien lamalam ko kin karaunlikamwih ih pwehn kauwehla eh adamwahu. (Mark 15:10; Sohn 11:47, 48; 12:12, 13, 19) Dahme kitail kak sukuhlki sang met? Kitail anahne pelianda pepehm en peiriniong irail me ahneki irair mwahu kan me kin kahrehiong riatail kan nan mwomwohdiso en poakohng irail. Ahpw kitail anahne song alasang arail kin kasalehda limpoak.​—1 Kor. 11:1; 3 Sohn 11.

6. Ia duwen Diohtrepihs eh kasalehda peirin?

⁶ Ni emen eh ahneki pwukoa kan nan mwomwohdiso. Ni mwehin tepin Kristian ko, Diohtrepihs kin peiriniong irail kan me kin tiengla mwowe nan mwomwohdiso en Kristian kan. E kin men “keieu lapalap” nanpwungen irail nan mwomwohdiso, eri e kin ndaseli soahng suwed tohto duwen wahnpoaron Sohn oh brother teikan pwe irail kan nan mwomwohdiso en sohla wauneki irail. (3 Sohn 9, 10) Mehnda ma kitail uhdahn sohte pahn wia dahme Diohtrepihs wia, kitail pil kakete tepida peiriniong iengatail Kristian men me alehdi pwukoa ehu me kitail men alehdi​—ahpw mehlel ma kitail medewe me kitail koahiek duwehte ih de pil koahiek sang.

7. Dahme peirin kak wiahiong kitail?

⁷ Peirin kin rasehng dihpw pwoisin ehu. Ahnsou me e tepida kekeirda nan mohngiongitail, e kak apwal en kihsang de kemehla. Pepehm suwed kan duwehte luwak, pohnmwahso, oh roporop kak kalaudehla peirin. Rasehng dihpw suwed me kin kahrehiong rohs kan en dehr keirda, peirin kak kauhdi atail en kakairada irair mwahu kan, duwehte limpoak, poakehla meteikan, oh kadek. Ni ahnsowohte me kitail kilang peirin eh tepida wosada, kitail anahne usada sang nan mohngiongitail. Ia duwen atail kak pelianda pepehm en peirin?

KAKAIRADA AKTIKITIK OH ITARKI DAHME MIE

8. Irair dah kan me kak sewese kitail en pelianda pepehm en peirin?

⁸ Kitail kak pelianda pepehm en peirin sang ni atail kakairada aktikitik oh kin itarki dahme mie. Ni atail ahneki soangen irair mwahu pwukat, peirin sohte pahn kekeirda rehtail. Aktikitik pahn sewese kitail en dehr nohn medewe duwen pein kitail. Aramas aktikitik men sohte kin medewe me e warohng ale laudsang meteikan koaros. (Kal. 6:3, 4) Emen me kin itarki dahme e ahneki sohte pahn kapahrekiong ih meteikan. (1 Tim. 6:7, 8) Aramas aktikitik men me kin itarki dahme mie pahn perenda ni eh kilang emen alehdi mehkot mwahu.

9. Nin duwen me Kalesia 5:16 oh Pilipai 2:3, 4 mahsanih, dahme sapwellimen Koht manaman kak sewese kitail en wia?

⁹ Kitail anahne sapwellimen Koht manaman pwehn sewese kitail en dehr peirin ahpw en kakairada aktikitik oh itarki dahme kitail ahneki. (Wadek Kalesia 5:16; Pil. 2:3, 4.) Sapwellimen Siohwa manaman kak sewese kitail en kasawih atail madamadau loal kan oh kahrepen atail wiewia kan. Pwehki sapwellimen Koht sawas, kitail kak wiliandi madamadau oh pepehm keper kan ong madamadau oh pepehm me kin kakehlakahda kitail. (Mel. 26:2; 51:10) Medewehla mehn kahlemeng en Moses oh Pohl, ohl kei me pweida ni ara pelianda pepehm en peirin.

10. Irair dahieu me kakete kasonge Moses? (Menlau kilang kilel ni kilin Kahn Iroir wet.)

¹⁰ Moses ahneki manaman laud pohn sapwellimen Koht aramas akan, ahpw e sohte song en kauhdi meteikan ren pil ahneki soangen manaman wet. Karasepe, ehu pak Siohwa ketikihsang ekis en sapwellime manaman rehn Moses oh ketikihong pwihnen ohlen Israel mah kei me kesikesihnen limwahn impwalo. Mwurinte mwo, Moses rong me ohl mah riemen me sohte iang kohla ni impwalo pil alehdier sapwellimen Koht manaman oh tepidahr wia kokohp kan. Dahme Moses wia ahnsou me Sosua peki ih en katokehdi ohl mah riemeno? Moses sohte peiriniong ohl riemeno ara alehdi manaman sang rehn Siohwa. Ahpw ni aktikitik, e iang perenkihda ara alehdi pwaisen iang wia kokohp. (Nemp. 11:24-29) Dahme kitail kak sukuhlkihsang Moses?

11. Ia duwen elder kan ar kak alasang Moses?

¹¹ Ma kowe elder men, mie pak me pekipek ehu kohieng uhk me ken kaiahne emen nan mwomwohdiso pwe en apwalih pwukoa ehu me ke uhdahn perenki wia? Karasepe, ele ke kin perenki pwais en wia Onop en Kahn Iroir ehuehu wihk. Ma ke aktikitik duwehte Moses, ke sohte pahn pehm me ke solahr kesempwal ma pekipek ehu kohieng uhk ken kaiahnehda emen brother pwe ehu rahn, e pahn kak wia pwukoa wet. Ahpw ke pahn perenki omw sewese riomwo.

12. Ia duwen Kristian tohto rahnwet ar kasalehda aktikitik oh itarki dahme re ahneki?

¹² Medewehla pil ehu irair me brother mah tohto kin lelohng. Erein sounpar tohto, irail kin papah nin duwen soun koasoanehdi pwihnen elder kan. Ahpw ni ahnsou me irail sounpar 80, irail kin nsenki pwilikihdi pwukoa wet. Ni sounapwalih me kin seiloak kan ar lel sounpar 70, irail kin ni aktikitik pwilikihdi pwais kaselel wet oh uhd alehda ehu pwukoa tohrohr. Oh me keren, tohn Pedel tohto nan sampah pwon pil tepida wia pwukoa kapw teikan nan kalohk. Riatail Kristian lelepek pwukat sohte kin peiriniong irail kan me met ele uhd apwahpwalih pwukoa kan me re ahneki mwoweo.

13. Dahme kahrehda Pohl kakete lelohng kasongosong en peiriniong wahnpoaron 12 ko?

¹³ Wahnpoaron Pohl pil wia mehn kahlemeng mwahu duwen emen me kin kakairada irair en itarki dahme mie oh pil kin aktikitik. Pohl sohte mweidohng peirin en kekeirda reh. E kin doadoahk laud nan kalohk, ahpw ni aktikitik e nda: “Ngehi me keieu tikitik nanpwungen wahnpoaron kan oh I sohte warohng adaneki wahnpoaron.” (1 Kor. 15:9, 10) Wahnpoaron 12 ko idawehn Sises erein sapwellime doadoahk en kalohk nin sampah, ahpw Pohl sohte wiahla Kristian men lao mwurin Sises ketin pwoula oh iasada. Mendahki Pohl idihdida mwuhr en wiahla “wahnpoaron men ong mehn liki kan,” e sohte alehdi pwais tohrohr en wiahla emen wahnpoaron 12 ko. (Rom 11:13; Wiewia 1:21-26) Pohl sohte peiriniong meh 12 ko oh pil arail nanpwungmwahu keren me re ahneki rehn Sises, ahpw e itarkihte dahme e ahneki.

14. Dahme kitail pahn wia ma kitail kin aktikitik oh itarki dahme mie?

¹⁴ Ma kitail kin aktikitik oh itarki dahme mie, kitail pahn duwehte Pohl oh kasalehda atail wauneki irail kan me Siohwa ketikihong manaman. (Wiewia 21:20-26) Siohwa ketin koasoanehdi en mie elder kan me pahn tiengla mwowe nan mwomwohdiso en Kristian. Mendahki irail sohte unsek, Siohwa ketin wiahkin irail “kisakis kei.” (Ep. 4:8, 11) Ni atail kin wauneki irail pwukat me idihdidahr oh idawehn arail kaweid ni aktikitik, kitail kin mi karanih Siohwa oh ahneki popohl rehn iengatail Kristian kan.

“RAPAHKI SOAHNG KAN ME KIN KAHREHDA POPOHL”

15. Dahme kitail anahne wia?

¹⁵ Ma kitail kin peiriniong meteikan de ma meteikan kin peiriniong kitail, kitail sohte pahn ahneki popohl nanpwungatail. Kitail anahne kihsang peirin nan mohngiongitail oh soikala kahrehiong meteikan en ahneki pepehm en peirin. Kitail anahne kapwaiada kahk kesempwal pwukat pwe kitail en kak peikiong sapwellimen Siohwa kehkehlik en “rapahki soahng kan me kin kahrehda popohl oh soahng kan me kin kakehlaka emenemen.” (Rom 14:19) Dahme kitail kak wia pwehn sewese meteikan en pelianda pepehm en peirin, oh ia duwen atail kak kahrehda popohl?

16. Ia duwen atail kak sewese meteikan en pelianda pepehm en peirin?

¹⁶ Atail madamadau oh wiewia kan kak kamwakid laud meteikan. Sampah wet kin men kitail en “pohnmwahsohki” dahme kitail ahneki. (1 Sohn 2:16) Ahpw soangen madamadau wet kin kahrehda peirin. Kitail kak soikala kahrehiong meteikan en kakairada pepehm en peirin ma kitail pilada en dehr ahnsou koaros koasoakoasoia dahme kitail ahneki de pilahn en pwainda. Pil ehu ahl me kitail kak soikala kahrehda peirin iei sang ni atail en pohnese atail soh itar kan me pid pwukoa kan me kitail ahneki nan mwomwohdiso. Ma kitail kin kalapw koasoakoasoia pwais kaselel kan me kitail ahneki, kitail kin kamengeihala peirin en keirda. Ahpw ni atail kin kasalehda atail nsenohki mehlel meteikan oh pohnese soahng mwahu kan me re kin wia, kitail kin sewese irail en itarki dahme re ahneki oh kahrehda minimin oh popohl en mie nan mwomwohdiso.

17. Dahme rien Sosep pwutak ko kakehr wia, oh dahme kahrehda?

¹⁷ Kitail kak kana ni atail pelianda pepehm en peirin! Pwurehng medewehla mehn kahlemeng en rien Sosep pwutak ko. Sounpar tohto mwurin arail wiakauwe Sosep, re tuhwong ih nan Isip. Mwohn Sosep eh kasalehiong irail ihs ih, e kasonge irail pwehn diarada ma re wekila. E koasoanehdi irail en iang ih mwenge oh e kin kihong rie me keieu tikitiko, Pensamin, kene mwenge tohtohsang me e kihong rie teiko. (Sen. 43:33, 34) Ahpw rie pwutak ko sohte peiriniong Pensamin. Re kasalehda arail nsenohki mehlel riarail pwutako oh pil arail pahpao, Seikop. (Sen. 44:30-34) Pwehki rien Sosep pwutak ko uhdihsang arail kin peirin, re kakehr pwurehng wiahda popohl nan arail peneineio. (Sen. 45:4, 15) Pil duwehte met, ma kitail kihsang pepehm en peirin, kitail pahn sewese kolokol popohl nan atail peneinei oh nan mwomwohdiso.

18. Nin duwen me Seims 3:17, 18 mahsanih, dahme pahn wiawi ma kitail kin sewese wiahda irair en popohl?

¹⁸ Siohwa ketin kupwurki kitail en pelianda pepehm en peirin oh rapahki popohl. Kitail anahne doadoahk laud pwehn wia soahng riau pwukat. Nin duwen me kitail koasoia nan iren onop wet, mie pepehm en peirin rehtail. (Seims 4:5) Oh kitail mi nan sampah ehu me kin kahrehda peirin. Ahpw ma kitail kakairada aktikitik, itarki dahme mie, oh kalahnganki soahng kan, kitail sohte pahn kin peirin. Ahpw kitail pahn sewese wiahda popohl pwe kitail en kak kakairada irair mwahu kan.​—Wadek Seims 3:17, 18.