Sewese me Ahneki Soumwahu en Madamadau—Ia Mwomwe?

Met Wehwehki

Mwein kitail kakete pehm me sohte mehkot kitail kak wia ma kompoakepatail men kin wie lokolongki soumwahu en madamadau. Ahpw kitail kak kasalehda me kitail uhdahn nsenohki sang ni atail sewese kompoakepatailo en nannantihong powehdi eh kahpwal en madamadau. Ia duwen?

Ia Duwen Met Kak Sawas

“Mwadang rong.”—SEIMS 1:19.

Ehu ahl me uhdahn mwahu en sewese kompoakepahmwo iei en rong ih ni ahnsou me e men koasoi. Dehr medewe me ke anahne sapeng mehkoaros me e nda. Kasalehiong ih me ke rongorong oh nsenohki ih. Song wehwehki eh pepehm oh dehr kadeik ih. Tamataman me e kakete nda soahng kan me e sohte men nda oh koluhkihla mwuhr.—Sohp 6:2, 3.

“Kaloalamwahwih.”—1 DESELONIKA 5:14.

Kompoakepahmwo kakete pwunod de lokolongki pepehm me sohte katepe. Ke kak kansenamwahwih oh kangoange ih sang ni omw kamehlelehiong me ke nsenohki, mehnda ma ke sehse dahme ke pahn nda.

“Kompoakepah kan kin kasalehda ar limpoak ahnsou koaros.”—LEPIN PADAHK 17:17.

Sewesehki soahng kan me anahn. Idek dahme ke kak wia a ke dehr pein medewe me ke eseier ia duwen omw pahn sawas. Ma kompoakepahmwo apwalki kawehwehiong uhk dahme e anahne, song idek reh soahng kan me kumwa kak wiapene, me duwehte kohla alu. De ke kak idek reh ma ke kak sewese ih netinet, kamwakel de doadoahk teikan.—Kalesia 6:2.

“Kanengamahiong.”—1 DESELONIKA 5:14.

Mwein kaidehn ahnsou koaros kompoakepahmwo pahn men koasoi. Kamehlelehiong kompoakepahmwo me ke pahn perenki rong ni ahnsou me e men koasoi. Pwehki eh soumwahwo, kompoakepahmwo kakete nda de wia mehkot me pahn kamedekeiukala. Ele e kin kauwehla amwa pilahn kan de kin lidoarda. Kanengamahiong oh song wehwehki eh irairo ni omw kin sewesehki dahme e anahne.—Lepin Padahk 18:24.

Omw Utuht Kak Sewese Kompoakepahmwo

“I kin nantihong wia kompoakepah me e pahn kak koasoiong ahnsou koaros. Mendahki sohte mehkot me I kak wia pwehn kamwahwihala eh kahpwal kan, ahnsou koaros I kin nantihong rong dahme e pahn nda. Ekei pak ihte me e anahne iei emen en rong ih oh e pahn nsenamwahula.”—Farrah,a me kompoakepaho kin lokolongki soumwahu en sohte mwenge mwahu oh pwunod oh soumwahu en nsensuwed.

“Emen kompoakepahi kin uhdahn kadek oh kangoang. E lukeielahng ni imweo I en iangih mwenge. E uhdahn limpoak, kahrehda I sohte apwalki kasalehda ei pepehm kan. Met uhdahn kangoange ie!”—Ha-eun, me kin lokolongki soumwahu en nsensuwed.

“Kanengamah kin uhdahn kesempwal. Ni ei pwoudo eh kin wia mehkot me kin kansensuwedihiehda, I kin katamankihong pein ngehi me eh soumwahwo me kahrehda eh wia met. Met kin sewese ie en dehr lingeringerda oh kin song medewe dahme e pahn anahne.”—Jacob, me eh pwoudo kin lokolongki soumwahu en nsensuwed.

“I uhdahn kalahnganki ei pwoudo eh kin utung ie oh kansenamwahwih ie. Ni ei kin pehm me pwunod poweiehdi, e sohte kin idingkihong ie I en wia mehkot me I sohte men wia. Met wehwehki me ekei pak e sohte kak wia dahme e kin perenki wia. E wia aramas kesempwal ong ie pwehki e uhdahn kadek oh sohte kin nsenohkihte pein ih.”—Enrico, me kin lokolongki soumwahu en pwunod.