Ahneki Popohl Mendahki Mahwen oh Uhpene
Gary, me wia emen sounpei mahso koasoia, “Mwohn ei tepida onopki Paipel, I sohte wehwehki dahme kahrehda sampah eh nohn direki tiahk lemei, wiewia sapahrek, oh kahpwal kan. Ahpw met I solahr pwunod. I ese me Siohwa Koht pahn ketin wiahiong sampah en wiahla wasa ehu me sohte keper.”
Kaidehn Gary kelehpw me ahneki soangen pepehm wet. Tehk ia duwen Paipel eh sewesehier meteikan.
PAIPEL MAHSANIH: “Komwi me kupwur mwahu oh diren mahk.”—Melkahka 86:5.
IA DUWEN MET EH KIN SAWAS: “Ire wet kamehlelehiong ie me Siohwa me diren mahk. I ese me e pahn kupwurki mahkohng soahng koaros me I wiahda mahso ni ahnsou me I kin iang mahweno.”—Wilmar, Colombia.
PAIPEL MASANIH: “I pahn wiahda sampah kapw ehu oh lahng kapw ehu. Mehkoaros me pweidahr nan ahnsou samwalahr ako pahn manokonokla douluhl.”—Aiseia 65:17.
IA DUWEN MET EH KIN SAWAS: “I ahneki kahpwal en pwunod laud pwehki dahme wiawihong ie ahnsou me I sounpeio. Ahpw iren Paipel wet katamankihong ie me ni ahnsou keren, Siohwa pahn ketin kameleileidi ahi madamadau kapwunod kan oh katokehdi ahi ouraman kamasepwehk kan. Soahng pwukat sohla pahn mi nan ahi madamadau de mohngiong. Met kisakis kaselel ehu!”—Zafirah, United States.
PAIPEL MASANIH: “Pwungen kosonned en kin pweida mwahu nan sapwellime mwehi, oh paiamwahu oh popohl en kin poatopoat erein maram eh kin kamakamarainih wasa.”—Melkahka 72:7.
IA DUWEN MET EH KIN SAWAS: “I kalapw medemedewe mahsen pwukat. Ahnsou keren mahwen oh soahng suwed koaros me e kin kahrehda pahn sohla, oh kitail solahr pahn anahne pwunodki ma irail kan me kitail poakepoake mi nan keper de soh.”—Oleksandra, Ukraine.
PAIPEL MASANIH: “Irail kan sang rehn at tungoal aramas akan me melahr pahn pwurehng mourda! . . . Koaros me memeir nan ar sousou pahn pwourda oh koulki koulen peren.”—Aiseia 26:19.
IA DUWEN MET EH KIN SAWAS: “Kereniong tohn ei peneinei pwon kamakamala ni ahnsou me aramas en keinek teikan song ren kemehla koaros me kohsang keinek en mehn Tutsi. Ahpw iretikitik wet kin kamehlelehiong ie me I pahn pwurehng kilang irail. I kasikasik ien rong ar ngilen peren ni ahnsou me re kaiasada!”—Marie, Rwanda.
PAIPEL MASANIH: “Ahnsou keren aramas suwed kan pahn sohrala . . . a me aktikitik kan pahn sapwenikihla sahpwo oh re pahn paiamwahu oh popohl.”—Melkahka 37:10, 11.
IA DUWEN MET EH KIN SAWAS: “Mendahki mahweno eh uhdier, mihmiehte wiewia sapahrek oh aramas suwed kan. Iretikitik pwukat kin uhdahn sewese ie laud. Siohwa kin ketin mwahngih soahng koaros oh ketin wehwehki ahi irair. E ketin inoukihda me kereniong lokolok koaros pahn sohla oh manokonokla.”—Daler, Tajikistan.
Irail me koasoakoasoi nan makasihn wet wia kisehn Sounkadehdehn Siohwa rar kei me Paipel sewesehier ren diarada popohl. Irail sukuhlkier ia duwen en powehdi soangen kailok koaros. (Episos 4:31, 32) Sounkadehdehn Siohwa kan sohte kin iang pidada palien politik oh tiahk lemei.—Sohn 18:36.
Sounkadehdehn Siohwa kan pil kin sawaspene nin duwen peneinei limpoak ehu. (Sohn 13:35) Karasepe, Oleksandra, me eh koasoi kan sansalda mwoweo, anahne iang rie serepeino tangala nan ehu sahpw tohrohr pwehki mahwen. E nda: “Ni aht kotehla irepen sahpwo, se mwadangete kilangada Sounkadehde kan en wasao me mi mwo pwe ren kasamwo kiht. Arail sawas sewese kiht sen ahnla mi nan ehu sahpw kapw nin duwen aramas kei me tangasang nan uhdahn sapwat.”
Se lukeiuk en iang towehda at mihting kan, wasa me se kin sukuhlki duwen rongen popohl sang nan Paipel oh ia duwen en kapwaiada met. Menlau kohla nan jw.org pwehn rapahki wasa me karanihiuk de peki onop Paipel rehn emen Sounkadehdehn Siohwa kan, ni omw doadoahngki pwuhk en Pereperenki Mour Kohkohlahte!