Soahng Suwed kan Kin Wiawi Erein Mahwen
Mahwen iei ehu mehkot me keieu suwed me emen kak lelohng. Sounpei kan oh irail akan me kaidehn sounpei nan sampah pwon ese ia uwen suwed en mahwen.
SOUNPEI KAN
“Ke kalapw kilang aramas ar kin kamakamala de ohla douluhl. Kahrehda ke kin kalapw ahneki pepehm en masepwehk.”—Gary, Britain.
“Nan tihnseweiet oh meseie kesikdi, oh I kilang me tohto kamakamala iangahki seri kan oh me mah kan. Mahwen kin kahrehda ken sohla kehn mehkot.”—Wilmar, Colombia.
“Ni ahnsou me ke kilang emen aramas kesikdi mwohmw, ke sohte pahn kak manokehla dahme wiawio. Ke kin rongorongete ngilen weriwer oh weirek. Oh ke sohte douluhl pahn kak manokehla aramaso.”—Zafirah, United States.
IRAIL AKAN ME KAIDEHN SOUNPEI
“I pehm me I sohte pahn kak pwurehng nsenamwahula. Ke kin perki omw mour, ahpw laudsang met, ke kin perki mour en omw peneinei oh kompoakepahmw kan.”—Oleksandra, Ukraine.
“E kin kamasepwehk en kin kesikesihnen nan lain en mwenge sang kuloak 2:00 nin sohrahn lel kuloak 11:00 nipwong, ni omw sohte ese ma ke pahn kesikdi.”—Daler, Tajikistan.
“Ei pahpa nohno kamakamala erein mahwen. Met kahrehda ei wiahla seri sepwoupwou men oh sohte me kak apwalih de kansenamwahwih ie.”—Marie, Rwanda.
Mendahki aramas pwukat lokolongkier mahwen, emenemen irail pwukat nsenamwahulahr. Oh irail kamehlele me mahwen koaros oh uhpene pahn kereniongehr sohla wiawi. Kahn Iroir wet pahn doadoahngki Paipel en kawehwehda ia duwen met eh pahn wiawi.