Ia Duwen Mahwen oh Uhpene Eh Kin Kahpwalihala Kitail Koaros
“Uhpene kan ahnsouwet tohtohsang me kin wiawi sangete ni Mahwen Keriau en Sampah oh aramas rielik—pahkis ehu en tohnsampah—kousoan nan wasa kan me mepwukat kin wiawi.”
United Nations Deputy Secretary-General Amina J. Mohammed, January 26, 2023.
Mahwen kan oh uhpene kin kakete wiawi wasa kan me mie popohl. Pil irail kan me dohsang wasa me mahwen wiawi pil kin kakete iang mihla nan kahpwal. Oh kahpwal en mahweno kin mihmihte ahnsou werei mwurin mahweno nekier. Medewehla ekei kahpwal kan:
Sohte itar mwenge. Nin duwen me World Food Programme koasoia, “mahwen iei me kin keieu kahrehda duhpek, oh persent 70 en aramas me duhpek nan sampah kin mihmi nan wasa kan me mahwen oh tiahk lemei kin wiawi ie.”
Kahpwal en paliwar oh madamadau. Ni ahnsou ieu me mahwen pahn kin wiawi wasakis, tohn wasao kin pwunod laud. Aramas akan me kin kousoan wasa me mahwen kin wiawi kin kak ohla ni paliwararail oh pil arail madamadau. Ahpw, e pil apwal ren kin alehdi sawas sang rehn toahkte kan.
Tangasang sapwarail kan. United Nations High Commissioner for Refugees koasoia me lao lel September 2023, aramas tohtohsang million 114 nan sampah pwon tangasang sapwarail kan. Kahrepe keieu laud ong kahpwal wet iei mahwen oh uhpene.
Kahpwal en mwohni. Aramas akan kalapw lelohng kahpwal en mwohni pwehki mahwen. Karasepe, kepwe kan kin pweilaudla. Aramas akan kin lelohng kahpwal pwehki koperment kin doadoahngki mwohni laud ong mahweno, me uhdahn pahn kohwong palien roson mwahu oh sukuhl. Oh e uhdahn kin pweilaud en pwurehng kamwahwihala wasa kan me mahweno kauwehla.
Ohlahn sampah. Aramas akan kin lelohng nan kahpwal pwehki sahpw kan me re kin kousoan loale ohla. Saminlahn pihl, nan wehwe, oh pwehl kak kahrehda soangsoangen soumwahu, oh pil aramas kin kak mehkihla pakudang kan me mihmihte pahn pwehl mwurin mahweno.
E uhdahn sansal me mahwen kin kauwehla wasa oh pweilaud.