Ia Duwen Mahwen oh Uhpene Eh Pahn Sohla Wiawi

KOHT PAHN KETKIHSANG KOPEREMENT EN ARAMAS AKAN

Koht pahn ketin kasohrehla koperment en aramas akan ni rahn me Paipel kahdaneki Armakedon.a (Kaudiahl 16:16) Ni ahnsowo, “nanmwarki kan en sampah pwon” pahn pokonpene ong “mahwen me pahn wiawi ni rahn lapalap en Koht, me Keieu Manaman.” (Kaudiahl 16:14) Armakedon iei sapwellimen Koht mahwen me pahn katokehdi mahwen koaros nin sampah.

Sapwellimen Koht Wehi de koperment pahn wiliandi koperment en aramas oh e pahn kaunda sang nanleng oh sohte pahn sohrala. (Daniel 2:44) Koht ketin pilada sapwellime Ohl, Sises Krais en wia Nanmwarki en Wehi wet. (Aiseia 9:​6, 7; Madiu 28:18) Koperment wet iei Wehib me Sises ketin padahkihong sapwellime tohnpadahk ko ren kapakapki. (Madiu 6:​9, 10) Aramas koaros pahn ehupene pahn kaunda ehute, oh Sises me pahn ketin wia Kaun en Wehi wet.

Weksang kaun en sampah kan, Sises sohte pahn ketin doadoahngki sapwellime manaman ong pein kamwahupe. Pwehki e ketin pwung pahrek oh sohte kin ketin lipilipilki aramas, sohte me pahn pwunodki me e sohte pahn ketin tehk irail pwehki wasa, sahpw de keinek me re kohsang ie. (Aiseia 11:​3, 4) Oh aramas akan sohte pahn anahne repen pwung. Dahme kahrehda? Pwehki Sises pahn ketin nsenohki emenemen irail. “E kin ketin kapitala me semwehmwe kan me kin likweriong, oh pil irail kan me paisuwedlahr oh me lekdekla kan. . . . E kin ketin kapitirailla sang nan arail kehnaudek oh angkehlail kan.”—Melkahka 72:​12-14.

Wehin Koht pahn ketin kasohrehla tehtehn mahwen koaros nin sampah. (Maika 4:3) E pil pahn kihsang aramas suwed kan me kahng uhdihsang pei de kamedekihala meteikan. (Melkahka 37:​9, 10) Ohl, lih, oh seri koaros sohte pahn perki mehkot, sohte lipilipil wasa re pahn kohla ie nin sampah.—Esekiel 34:28.

Pahn sapwellimen Koht kaunda, aramas koaros pahn ahneki irair en mour me keieu kaselel. Wehio pahn kihsang soangen kahpwal koaros me kin kahrehda aramas en pei, me duwehte semwehmwe, duhpek, oh sohte wasahn kousoan mwahu. Koaros pahn diren kanarail mwenge mwahu oh ahneki wasahn kousoan mwahu.—Melkahka 72:16; Aiseia 65:​21-23.

Wehin Koht pahn kihsang soahng koaros me mahwen kin kahrehda. Soahng koaros me aramas kin lokolongki ni paliwararail, arail madamadau, oh pepehm pwehki mahwen pahn pil sohla. Pil irail kan me melahr pahn kaiasada oh mour nin sampah. (Aiseia 25:8; 26:19; 35:​5, 6) Peneinei kan pahn pwurehng tuhpene oh soahng suwed kan me aramas tamataman duwen mahwen pahn iangala kisehn “mehkan en mahso [me] sohralahr.”—Kaudiahl 21:4.

KOHT PAHN KETIKIHSANG DIHP

Wehin Koht pahn kaminiminpene aramas koaros en kaudokiong Koht mehlelo Siohwac, me iei “Koht en limpoak oh popohl.” (2 Korint 13:11) Aramas akan pahn esehla ia duwen arail pahn kousoanpene ni popohl. (Aiseia 2:​3, 4; 11:9) Irail me kin peikiong Koht pahn sohla ahneki dihp, ahpw pahn unsekla.—Rom 8:​20, 21.

KOHT PAHN KETIN KASOHREHLA SEHDAN OH NAH NGEHN SAUT KAN

Wehin Koht pahn kasohrehla irail kan me kin kamwakid aramas en mahwen, me iei Sehdan oh nah ngehn saut kan. (Kaudiahl 20:​1-3, 10) Pwehki re solahr pahn mie pwehn kamwakid aramas en wia me suwed, popohl pahn kipehdi wasa koaros.—Melkahka 72:7.

Ke kak uhdahn kamehlele me sapwellimen Koht inou en katokehdi mahwen pahn pweida. E kupwurki oh kak ketin kasohrehla mahwen.

• Koht sapwellimanki erpit oh manaman me anahn pwehn kauhdi mahwen oh tiahk lemei. (Sohp 9:4) Sohte mehkot me e sohte kak ketin kapwaiada.—Sohp 42:2.

• Koht sohte kupwurki kilang aramas akan en lokolok. (Aiseia 63:9) E kin ketin kalahdeki mehmen me kin perenki tiahk lemei.—Melkahka 11:5.

• Koht kin ketin kapwaiada sapwellime mahsen ahnsou koaros; e sohte kak ketin likamw.—Aiseia 55:​10, 11; Taitus 1:2.