Iahd me Pei Sohla Pahn Wiawi?—Dahme Paipel Mahsanih?

“Met ahnsou en kameleileidi irair wet. Met ahnsou me kitail en kanengamah ni uwen me kak,” United Nations Secretary-General António Guterres koasoia duwen Iran eh peiong Israel ni Rahn Kaunop, April 13, 2024.

Pei me wiawi nan Middle East iei ehu karasepen dahme wiawi nin sampah pwon.

“Ahnsou wet pei suwed me kin wiawi nan sampah tohtohla sangete Mahwen Keriau en Sampah oh aramas rielik, me iei pahkis ehun aramas koaros, kin kousoan nan soangen wasa pwukat.”—United Nations Security Council, January 26, 2023.

Wasa me pei kin wiawi iei Israel, Gaza, Syria, Azerbaijan, Ukraine, Sudan, Ethiopia, Niger, Myanmar, oh Haiti.a

Iahd me pei sohla pahn wiawi? Ia duwe, kaunen sampah kan kak wahdo popohl? Dahme Paipel mahsanih?

Mahwen nin sampah pwon

Mahwen kan me wiawi nan sampah pwon kin kasalehda me mahwen koaros pahn kereniongehr imwisekla. Mahwen pwukat kin kapwaiada kokohp en Paipel duwen ahnsou me kitail momour loale. Paipel kin kahdaneki atail ahnsou “imwin koasoandi en mwehi wet.”—Madiu 24:3.

• “Kumwail pahn rong ngilen mahwen oh rongen mahwen.  . . . Ehu tohnwehi pahn mahweniong ehu tohnwehi oh ehu wehi pahn mahweniong ehu wehi.”—Madiu 24:6, 7.

Wadek oaralap “What Is the Sign of ‘the Last Days,’ or ‘End Times’?” pwehn kilang ia duwen mahwen en rahn pwukat ar kin kapwaiada kokohp en Paipel.

Mahwen me pahn katokehdi mahwen koaros

Paipel kohpada me aramas akan ar kin peipene pahn imwisekla. Ia duwen met eh pahn wiawi? Kaidehn pwehki dahme aramas pahn nantihong wia, ahpw pwehki Armakedon, “mahwen me pahn wiawi ni rahn lapalap en Koht, me Keieu Manaman.” (Kaudiahl 16:14, 16) Mwurin mahwen wet, Koht pahn ketin kapwaiada sapwellime inou ong aramas akan pwe ren ahneki popohl kohkohlahte.—Melkahka 37:10, 11, 29.

Pwehn kalaudehla omw ese duwen sapwellimen Koht mahwen me pahn katokehdi mahwen koaros, wadek oaralap “What Is the Battle of Armageddon?”